1. Која тани јекх причина соске о Јехова керѓа о брако?

 О ЈЕХОВА тано „радосно Девел“ хем ов мангела амен да те ова радосна (1. Тим. 1:11). Ов денѓа амен бут поклонија те шај те радујна амен ко живото (Јак. 1:17). Јекх таро адала поклонија тано о брако. Кеда кхувена ко брако, јекх ром хем јекх ромни дена песке лафи кај ка манген пе, ка поштујнен пе хем ка ценинен пе јекх јекхеа. Адава со ка ден пестар са те шај те ачховен паше, шај те анел ленге чачутни радост (Изр. 5:18).

2. Со случинела пе ко бут бракија авдиве?

² Жално тано адава со бут брачна парија авдиве бистрена со ветинѓе песке ко диве кеда леле пе. Адалеске, ола нане среќна. Спрема јекх извештај кова со сигенде иклило тари Светско здравствено организација, бут рома малтретиринена пумаре ромњен ко физичко, емоционално поглед хем лафенцар. Јекх асавко ром шај сикавела кај поштујнела пле ромња англо јавера мануша, ама понашинела пе лаја лошно кеда тане кхере. Исто аѓаар, ко бут бракија иси проблемија адалеске со о ром дикхела порнографија.

3. Соске несаве рома малтретиринена пумаре ромњен?

³ Соске шај несаве рома понашинена пе лошно пумаре ромњенцар? Шај ленгоро дад сине насилно хем ола мислинена песке кај о насилно понашибе тано нешто нормално. Јавера, шај понашинена пе аѓаар адалеске со ки ленгири култура мислинела пе кај јекх „право мурш“ мора те користинел сила те шај те сикавел е ромњаке кој тано главно. А јавера палем, на сине сикавде те контролиринен пумаре чувствија, машкар коленде сој хем и холи. Несаве мурша, почминѓе те на дикхен исправно ко џувља хем ко сексуална односија адалеске со иси лен навика те дикхен порнографија. Исто аѓаар, бут влијајнѓа и пандемија КОВИД-19. О извештаија сикавена кај ко адава периоди бут рома почминѓе те малтретиринен пумаре  ромњен. Џанѓола пе, нијекх таро акала причине на оправдинела о лошно хем о насилно понашибе е роменгоро.

4. Ко со ваљани те пазинен о христијанска рома, хем соске?

⁴ О христијанска рома ваљани те пазинен те на почминен те дикхен ко џувља погрешно. a Соске? Јекх причина тани адаја со бут пути о мисле ингарена џи ко постапке. Е помазиме христијаненге ко Рим о апостол Павле денѓа акава предупредување: „Ма мукхен понадари да те обликујнел тумен акава свето“ (Рим. 12:1, 2). Кеда о Павле пишинѓа е Римјаненге, адава собрание на сине нево, него постојнела сине више несаво време. Сепак, о лафија е Павлескере сикавена кај упро несаве ко собрание панда влијајнена сине о обичаија хем о ставија е светоскере. Баш адалеске ов поттикнинѓа лен те менинен пумаро начин сар размислинена хем сар понашинена пе. Џанѓола пе, акава совет важинела хем е христијанска роменге авдиве. Жално тано со несаве лендар дозволинѓе о ставија акале светоскере те влијајнен упри ленде, па чак хем малтретиринена пумаре ромњен. b Сар о Јехова очекујнела јекх ром те понашинел пе пле ромњаја? О одговор аракхаја ле ко главно стихо тари акаја статија.

5. Спрема 1. Петарескоро 3:7, сар ваљани јекх ром те понашинел пе пле ромњаја?

⁵ Читин 1. Петарескоро 3:7. О Јехова заповединѓа е роменге те поштујнен пумаре ромњен. Јекх ром кова со поштујнела пле ромња, ка понашинел пе лаја мангипаја хем љубезно. Ки акаја статија ка дикха сар јекх ром шај те сикавел кај мангела хем поштујнела пле ромња. Ама прво, те дикха саве постапкенцар јекх ром шај те сикавел кај на поштујнела пле ромња.

МА ПОВРЕДИН ТЛЕ РОМЊА

6. Сар дикхела о Јехова ко рома сој физички насилна пумаре ромњенцар? (Колошања 3:19).

⁶ Физичко насилство. О Јехова мрзинела околен сој насилна (Пс. 11:5). Ов посебно на одобринела кеда јекх ром тано насилно пле ромњаја. (Мал. 2:16; читин Колошања 3:19.) Спрема о главно стихо тари акаја статија, 1. Петарескоро 3:7, ако јекх ром на понашинела пе шукар пле ромњаја, адава ка влијајнел упро лескоро амалипе е Девлеа. О Јехова шај чак те на шунел лескере молитве.

7. Спрема Ефешања 4:31, 32, ко саво начин о рома на ваљани те керен лафи пумаре ромњенцар? (Дикх хем о „Објасниме лафија“.)

⁷ Груба лафија со дукхавена. Несаве рома дукхавена пумаре ромњен аѓаар со користинена пхаре лафија хем лафија со вреџинена. Ама о Јехова мрзинела и холи, о гнев, о викибе хем о лафија со вреџинена. c (Читин Ефешања 4:31, 32.) Ов шунела са. Е Јеховаске тано важно сар јекх ром керела лафи пле ромњаја, чак кеда тане коркори. Кеда јекх ром керела лафи пле ромњаја ко грубо начин, адалеа на само со руминела пло однос лаја, него хем пло амалипе е Јеховаја (Јак. 1:26).

8. Сар дикхела о Јехова ки порнографија, хем соске?

⁸ Дикхибе порнографија. Сар дикхела о Јехова ки порнографија? Ов мрзинела ла. Значи, јекх ром кова со дикхела неморална слике, руминела пло амалипе е Јеховаја хем адалеа понижинела пле ромња. d О Јехова очекујнела о ром те ачхол верно пле  ромњаке на само ко постапке него хем ко мисле. О Исус вакерѓа кај јекх ром кова со дикхела ки јавер џувли хем „мангела те совел лаја, ов више керѓа лаја прељуба ко пло вило“ e (Мат. 5:28, 29).

9. Соске о Јехова мрзинела кеда јекх ром теринела пле ромња ко понижувачка сексуална односија?

⁹ Понижувачка сексуална односија. Несаве рома теринена пумаре ромњен те овен лен сексуална односија кола сој понижувачка хем кола со керена е ромња те на овел ла чисто совест или те осетинел пе кај нане мангли. О Јехова мрзинела кеда некој постапинела себично хем на лела ко предвид е јаверескере чувствија. Ов очекујнела таро јекх ром те мангел пле ромња хем те поштујнел лакере чувствија (Еф. 5:28, 29). Ама, со ако јекх ром понижинела или малтретиринела пле ромња, или палем дикхела порнографија? Сар шај те менинел пло начин сар размислинела хем постапинела?

САР ШАЈ ЈЕКХ РОМ ТЕ ЧХИНАВЕЛ ПОГРЕШНО ТЕ ПОСТАПИНЕЛ

10. Сар шај о пример е Исусескоро те користинел е роменге?

¹⁰ Со ка поможинел јекхе ромеске те чхинавел те овел насилно хем те понижинел пле ромња? Адава со ка трудинел пе те џал пало пример е Исусескоро. Иако о Исус на сине никогаш женимо, о начин сар понашинела пе сине пле учениконцар тано шукар пример башо адава сар јекх ром ваљани те понашинел пе пле ромњаја (Еф. 5:25). Те дикха со шај те сикљовен о рома таро начин сар о Исус понашинѓа пе хем керѓа лафи пле апостоленцар.

11. Сар понашинела пе сине о Исус пле апостоленцар?

¹¹ О Исус понашинела пе сине љубезно пле апостоленцар хем сикавела ленге сине поштовање. Ов никогаш на понашинѓа пе ко грубо начин, а ни палем на понашинѓа пе сар те пхене тано ленгоро шефи. Иако сине ленгоро Господари хем Учители, о Исус на мислинѓа кај ваљани те користинел сила те шај те сикавел кај иси ле авторитети упри ленде. Наместо адава, ов понизно служинела сине ленге (Јован 13:12-17). Ов вакерѓа пле учениконге: „Сикљовен мандар, соске ме сиум кротко хем понизно ко вило, хем ка овел тумен неви сила“ (Мат. 11:28-30). Приметин кај о Исус сине кротко. Јекх кротко мануш нане слабо личност. Наместо адава, ов тано доволно силно те шај коркори те контролиринел пе. Кеда некој провоциринела ле, о кротко мануш ачхола смиримо хем контролиринела пле чувствија.

12. Сар о Исус керела сине лафи е јаверенцар?

¹² Пле лафенцар, о Исус утешинѓа хем охрабринѓа е јаверен. Ов на керела сине лафи ко грубо начин пле следбениконцар (Лука 8:47, 48). Чак кеда о противникија вреџинѓе ле хем пробинѓе те провоциринен ле, ов на иранѓа лошнипаја (1. Пет. 2:21-23). Ко несаве прилике о Исус чак биринѓа те чутинел наместо те одговоринел ко грубо начин (Мат. 27:12-14). Кобор шукар пример башо рома!

13. Спрема Матеј 19:4-6, шај јекх ром те спојнел пе пле ромњаја? (Дикх хем и слика.)

¹³ О Исус сикавѓа е ромен те овен верна пумаре ромњенге. Ов цитиринѓа о лафија пле Дадескере кова со вакерѓа кај о ром ваљани те „спојнел пе пле ромњаја“. (Читин Матеј 19:4-6.) О грчко глагол кова со користинела пе ко акала стихија башо те „спојнел пе“, дословно значинела те „лепинел пе“. Адалеске, и брачно врска машкар јекх ром хем јекх ромни ваљани те овел добором цврсто сар ка пхене ола тане лепиме заедно. Ако јекх лендар керела нешто колеа со поврединела  е јавере, тегани о солдуј ка патинен. Јекх ром кова сој бут паше пле ромњаја, нане те дикхел нисаво облик порнографија. Ов одма ка цидел пле јакхја „таро буќа со на врединена“ (Пс. 119:37). Уствари, ов керѓа завет пле јакхенцар кај нане те дикхел ки јавер џувли ко погрешно начин (Јов 31:1).

14. Кола буќа ваљани те керел јекх насилно ром те шај те овел палем паше е Јеховаја хем пле ромњаја?

¹⁴ Јекх ром кова сој насилно ко физичко поглед или кова со лафенцар малтретиринела пле ромња, ваљани те керел некобор буќа те шај те овел палем паше е Јеховаја хем пле ромњаја. Со ваљани те керел? Прво, ваљани те хаљол кај иси ле сериозно проблеми. Ништо нане гаравдо таро е Јеховаскере јакхја (Пс. 44:21; Проп. 12:14; Евр. 4:13). Дујто, ваљани те чхинавел те овел насилно пле ромњаја хем те менинел о начин сар понашинела пе (Изр. 28:13). Трито, ваљани те извининел пе пле ромњаке хем е Јеховаске хем те родел те простинен леске (Апо. 3:19). Ов исто аѓаар, ваљани те молинел е Јехова те поможинел леске те овел ле желба те менинел пе хем те шај те контролиринел пле мисле, лафија хем постапке (Пс. 51:10-12; 2. Кор. 10:5; Фил. 2:13). Штарто, ваљани те постапинел спрема пле молитве аѓаар со ка сикљол те мрзинел секова облик насилство хем лафија со вреџинена (Пс. 97:10). Панџто, ов ваљани одма те родел помош таро старешине ко собрание, кола со бут грижинена пе (Јак. 5:14-16). Шовто, ваљани те керел плани кова со ка поможинел леске те избегинел асавко понашибе ки иднина. О иста буќа ваљани те керен хем о рома кола со дикхена порнографија. О Јехова ка благословинел адален со трудинена пе те шај те менинен пло начин сар понашинена пе (Пс. 37:5). Ама, нане доволно јекх ром само те чхинавел те постапинел погрешно, него ваљани хем те сикљол те сикавел мангипе хем поштовање спрема пли ромни. Сар шај те керел адава?

САР ТЕ СИКАВЕ КАЈ МАНГЕА ХЕМ ПОШТУЈНЕА ТЛЕ РОМЊА

15. Сар шај јекх ром те сикавел кај мангела пле ромња?

¹⁵ Сикав лаке кај мангеа ла. Несаве пхрален со иси лен среќно брако, иси лен навика  секова диве те керен нешто колеа со ка сикавен кобор бут мангена пумаре ромњен (1. Јов. 3:18). Јекх ром шај тикне буќенцар те сикавел кај мангела пле ромња, сар на пример аѓаар со ка астарел ла таро вас или ка гушинел ла. Ов шај те бичхалел лаке порака хем те вакерел лаке: „Фалинеа манге“, или те пучел ла: „Сар накхела тло диве?“ Понекогаш, ов шај те сикавел пло мангипе спрема лате аѓаар со ка пишинел лаке картичка шукар бириме лафенцар. Кеда јекх ром керела акала буќа, ов поштујнела пле ромња хем керела те овел поцврсто лескоро брако.

16. Соске јекх ром ваљани те фалинел пле ромња?

¹⁶ Сикав лаке кај ценинеа ла. Јекх ром кова со поштујнела пле ромња охрабринела ла хем сикавела лаке кај ој врединела англо лескере јакхја. Јекх начин сар керела адава тано аѓаар со на бистрела те сикавел кај ценинела са адава со керела ој те шај те поддржинел ле (Кол. 3:15). Кеда јекх ром искрено фалинела пле ромња, адава радујнкерела лакоро вило. Ој ка осетинел пе сигурно, мангли хем поштујми (Изр. 31:28).

17. Сар шај јекх ром те сикавел кај поштујнела пле ромња?

¹⁷ Понашин тут љубезно хем сикав поштовање. Јекх ром кова со мангела пле ромња, бут ценинела ла. Ов ки лате дикхела сар јекх скапоцено поклон таро Јехова (Изр. 18:22; 31:10). Адалеске, понашинела пе лаја љубезно хем сикавела поштовање, чак кеда иси лен сексуална односија. Ов нане те теринел ла ко сексуална постапке колендар со нане те осетинел пе шукар, ка овел понижими или нане те овел ла чисто совест. f А важно тано лескири да совест те ачхол чисто англо Јехова (Апо. 24:16).

18. Ко со ваљани те овел одлучно о ром? (Дикх хем и рамка „ Штар начинија сар шај о ром те сикавел поштовање“.)

¹⁸ Сар ром, шај те ове сигурно кај о Јехова дикхела хем ценинела адава со трудинеа тут те шај те сикаве кај ценинеа тле ромња тле лафенцар хем постапкенцар. Ов одлучно те поштујне ла аѓаар со нане те кере ништо колеа со ка повредине ла хем аѓаар со ка ове љубезно, ка ле ко предвид лакере чувствија хем ка понашине тут лаја нежно. Ако кереа адава, ка сикаве кај мангеа ла хем кај врединела англо тле јакхја. Адалеа со ка поштујне тле ромња, ка аракхе тло најважно амалипе — о амалипе е Јеховаја (Пс. 25:14).