Бијамо сиум ко 1955 берш, сар најтикно таро трин мурша. Бариљум паше узо јужно брего тари Финска, ко јекх подрачје кова со авдиве тано пенџардо сар диз Ванта.

Ми дај крстинѓа пе сар е Јеховаскоро сведоко некобор берша англедер те бијанѓовав. Ама мо дад сине противнико хем на мукхела сине ме даја те проучинел аменцар или те лел амен ко состанокија. Адалеске ој сикавела амен сине о основна библиска чачипа кеда мо дад на сине кхере.

Панда таро тикнипе сиум сине одлучно те овав послушно е Јеховаске. На пример, јекх пути кеда сине ман ефта берш, мли наставничка добором бут хољанѓа адалеске со на мангљум те хав верилејтија (финска палачинке ратеа). Ој силаја пробинела сине те пхравел мло муј те шај те чхивел манге котор палачинка. Ама успејнѓум те пељарав и вељушка таро лакоро вас.

Кеда сине ман 12 берш, мо дад муло. Откеда муло, шај сине те џав ко состанокија. О пхраља таро собрание искрено сине заинтересириме манге хем адава поттикнинѓа ман духовно те напредујнав. Почминѓум секова диве те читинав и Библија хем хор те проучинав амаре публикацие. Асавке шукар навике поможинѓе манге те крстинав ман ко 8 август ко 1969 берш, кеда сине ман 14 берш.

Кратко откеда завршинѓум е школаја, почминѓум те служинав сар општо пионери. Само башо  некобор курке, селинѓум ман адари коте со иси побари потреба — ко Пиелавеси, ки централно Финска.

Ко Пиелавеси запознајнѓум е Сирка — јекх чхај која со покасно ули ми ромни. Привлечинѓа ман лакири скромност хем адава со бут мангела сине е Јехова. На сине лаке важно о углед или барвалипе. Е солдујенге сине аменге важно те служина е Јеховаске најшукар со шај, бизи разлика сави задача ка добина. Ко 23 март ко 1974 берш, венчинѓем амен. Наместо те џа ко меден месец, амен гелем те служина ки Картула, тхан коте со сине побари потреба таро објавителија.

Панда таро почеток сар лелем амен, о Јехова сикавѓа аменге кај ка грижинел пе башо амаре потребе ако чхиваја о Царство ко прво тхан (Мат. 6:33). На пример, ки Картула на сине амен врда. Ко почеток патујнаја сине точаконцар. Ама, евендаске о температуре перена сине потеле тари нула. Те шај те проповедина ко баро подрачје со сине е собрание, ваљани сине аменге врда. Ама на сине амен паре те кина јекх.

Изненадено, мо попхуро пхрал ало те посетинел амен. Ов вакерѓа кај мангела те дел ман пло врда. О осигурување сине више платимо, а амен ваљани сине те чхива само бензини. Хем аѓаар добинѓем о врда со ваљани сине аменге.

О Јехова сикавѓа кај ов леља и одговорност те грижинел пе башо амаре материјална потребе. А амари задача сине те чхива о Царство ко прво тхан.

Џикоте сием сине ки Школа башо пионерија ко 1978 берш, о Рајмо Квоканен, a јекх таро амаре инструкторија, поттикнинѓа амен те да и молба баши Школа Гилеад. Адалеске почминѓем те сикљова и англиско чхиб те шај те исполнина о условија те џа ки адаја школа. Ама панда англедер те овел амен прилика те пхера и молба, сием сине викиме ко Бетел ки Финска ко 1980 берш. Ко адава време, окола со служинена сине ко Бетел нашти сине те џан ки Школа Гилеад. Ама, амен манглем те служина адари коте со о Јехова мислинела кај тано најшукар, а на адатхе коте амен со мислинѓем кај тано најшукар. Адалеске прифатинѓем и покана. Ама, амен понадари да сикљоваја сине англиски те шај ако сине амен прилика те да и молба башо Гилеад.

 Некобор берша покасно, о Водечко тело вакерѓа кај окола да со служинена ко Бетел шај те ден молба башо Гилеад. Одма денѓем о молбе, ама на адалеске со на сием сине среќна ко Бетел. Само манглем те ова спремна те служина адари коте со иси побари потреба ако исполнинаја о условија башо адава. Сием сине викиме те џа ко Гилеад хем дипломиринѓем ко 79-то класи ко септември 1985 берш. Сием сине бичхалде ки Колумбија.

Ки Колумбија, амари прво задача сине те служина ко Бетел. Трудинава ман сине те керав мли задача најшукар со шај. Ама пало јекх берш ко Бетел, осетинава сине кај ваљани аменге несави промена. Адава сине о прво хем последно пути ко мло живото со родинѓум појавер задача. Пало адава, сием сине бичхалде те служина сар мисионерија ки диз Неива, ко подрачје Хуила.

Отсекогаш уживинава сине ки служба. Џикоте служинава сине коркори сар пионери ки Финска, понекогаш џава сине ки служба таро рано сабајле џи касно раќате. Хем сар нево брачно пари, ме хем и Сирка накхаја сине цело диве ки служба. Кеда проповединаја сине ко тхана кола со сине дур таро амаро кхер, понекогаш соваја сине ко амаро врда. Аѓаар, штединаја сине време кова со обично џала аменге сине ко друмо хем шај сине о тајсутно диве рано сабајле те почмина е службаја.

Сар мисионерија палем сием сине воодушевиме сар со сием сине англедер ки служба. Амаро собрание бајровела сине, а о пхраља хем о пхења ки Колумбија сине пхерде мангипе, поштовање хем ценење.

Паше узи Неива, о тхан коте со служинаја сине, сине дизја коте со на сине ни јекх Сведоко. Секиринава ман сине бут башо адава сар о шукар хабери ка проповединел пе ко адала да тхана. Ама адалеске со сине герилско војна, адала тхана на сине безбедна околенге со на сине адатхар. Адалеске, молинѓум ман некој таро адала дизја те овел е Јеховаскоро сведоко. Ама те шај те овел е Јеховаскоро сведоко, мислинѓум манге кај ов би ваљани те овел тари Неива. Исто аѓаар, молинава ман сине окова со ка крстинел пе, пало адава те овел духовно зрело хем те иранел пе ко тхан коте со бијандило те шај те проповединел. Ама ваљани сине те џанав кај е Јехова иси ле пошукар решение таро мло.

Кратко пало адава, почминѓум те проучинав и Библија јекхе терне чхавеа со викинела пе сине Фернандо Гонзалез. Ов живинела сине ко Алгесирас, јекх таро дизја коте со на сине Сведокија. Секова курко, о Фернандо патујнела сине повише таро 50 километре тари Неива, ко тхан коте со керела сине бути. Бут шукар спреминела пе сине башо библиско курси хем одма почминѓа те авел ко са о состанокија. Панда таро прво курко кеда почминѓем те проучина, о Фернандо кхедела сине е јаверен тари пли диз хем сикавела лен сине адава со ов сиклило тари Библија.

О Фернандо крстинѓа пе ко јануари 1990 берш, шов масек откеда почминѓа те проучинел и Библија. Пало адава, уло општо пионери. Адалеске со више сине јекх Сведоко ко Алгесирас, сине доволно безбедно те шај и подружница те бичхалел специјална пионерија ко адава тхан. Ко февруари 1992 берш, керѓа пе јекх собрание ки адаја диз.

 Дали о Фернандо проповединела сине само ки пли диз? На. Откеда женинѓа пе, ов хем лескири ромни селинѓе пе ко Сан Висенте дел Кагуан, јавер диз коте со на сине Сведокија. Ола поможинѓе те керел пе собрание адатхе. Ко 2002 берш, о Фернандо сине именујмо те служинел сар покраинско надгледнико. Ов хем лескири ромни и Олга тане панда ки акаја служба џи авдиве.

Таро акава искуство сиклиљум кобор тано важно те молина амен башо конкретна буќа сој поврзиме амаре теократско задаченцар. О Јехова шај те керел адава со амен нашти те кера. Ко крајо, акаја тани лескири жетва, а на амари (Мат. 9:38).

Ко 1990 берш, добинѓем задача те служина ки покраинско служба. Амари прво покраина сине ки главно диз, ки Богота. Дараја сине кај ка нашти шукар те кера акаја задача. Ме хем ми ромни сием обична мануша хем нане амен несаве посебна талентија. На сием сине сикле те живина ки јекх бари диз коте со сине бут мануша. Сепак, о Јехова исполнинѓа пло ветување сој пишимо ко Филипјања 2:13: „О Девел дела тумен хем и желба хем и сила те постапинен аѓаар сар ов со мангела“.

Покасно, добинѓем задача те служина ки јекх јавер покраина, ко подрачје таро Медељин, и диз која со спомнинѓум ла ко почеток. О мануша тари адаја диз сиклиле те дикхен о насилство ко улице хем адалеске адава више на сметинела лен сине. На пример, јекх пути џикоте водинава сине јекх библиско курси, авријал ки улица несаве мануша почминѓе те пукајнен пе јекх јекхеа. Ме мангљум те пашљовав теле, ама о интересенти сине смиримо хем понадари да читинела сине о пасус. Кеда завршинѓа е читибаја, ов извининѓа пе хем иклило авријал. Кратко пало адава, иранѓа пе дује тикне чхавенцар хем смирено вакерѓа: „Извини, ама мора сине те лав ме чхавен“.

Сине јавера да опасна ситуацие коленде со аракхлилем. Јекх пути џикоте проповединаја сине таро кхер ко кхер, ми ромни прастандили ки манде хем тари дар ко муј сине бледо. Вакерѓа манге кај јекх мануш пукајнѓа ки лате. Адава бут даравѓа ман. Ама, покасно халилем кај адава мануш на пукајнѓа ки Сирка, него ов пукајнѓа ко јекх јавер мануш кова со накхља латар.

Сар накхела сине о време, сиклилем те на вознемирина амен добором башо насилство ко улице. Бут сием сине охрабриме таро пример е Сведоконгоро со сине ко адава тхан адалеске со ола сине бут цврста хем стабилна иако сине ко слична ситуацие, па чак хем ко полошна. Халилем кај ако о Јехова поможинела лен, ка поможинел аменде да. Секогаш шунаја сине о советија таро старешине со сине ко адава тхан, пазинаја сине, а са о јавер мукхаја сине ко васта е Јеховаске.

Шај те вакера кај несаве ситуацие на сине да добором опасна сар со мислинѓем. Јекх пути џикоте сиум сине ки јекх посета, шунѓум сар ка пхене дуј џувља акошена пе хем вреџинена пе јекх јекхаја. На мангљум те дикхав сар некој акошела пе, ама и интересентка убединѓа ман те икљовав аври. Ко крајо, халиљум кај уствари адала сине дуј папагалија кола со имитиринена е комшиен сар акошена пе.

Ко 1997 берш, добинѓум задача те овав инструктори ки Школа башо организациско оспособување. b Секогаш ценинава сине адава со шај сине те овав присутно ко теократска школе. Ама, никогаш на мислинѓум кај ка овел ман асавки бари чест, те овав инструктори ки јекх асавки школа.

Покасно, служинѓум сар областно надгледнико. Кеда на сине више асавки служба, палем почминѓум те служинав сар покраинско надгледнико. Значи повише таро 30 берш, шај сине радосно те служинав сар инструктори хем покраинско надгледнико. Акала задаче анѓе манге баре благословија. Ама, на сине са локхо. Те објаснинав туменге соске.

Ман иси ман цврсто карактер. Адава поможинѓа манге те истрајнав кеда сиум сине ко пхаре околностија. Ама понекогаш сиум сине претерано ревно, аѓаар со пробинава сине те поправинав о буќа ко собранија. Понекогаш, поттикнинава сине е јаверен те овен љубезна хем разумна е јаверенцар. Ама, жално тано адава со ме коркори на сикавава сине адала особине (Рим. 7:21-23).

Башо мле слабостија, понекогаш осетинава ман сине бут обесхрабримо (Рим. 7:24). Јекх пути, вакерѓум е Јеховаске ки молитва кај ка овел најшукар ако мукхава и мисионерско служба хем иранава ман ки Финска. Адаја рат сиум сине ко состанок. Адава со шунѓум адатхе, охрабринѓа ман хем уверинѓа ман кај ваљани те ачховав ки мли задача хем понадари да те керав бути ко мле слабостија. Панда нашти те бистрав кобор јасно о Јехова одговоринѓа ки адаја молитва. Исто аѓаар, бут сиум благодарно со љубезно поможинѓа манге те керав бути ко мле слабостија.

Ме хем и Сирка сием бут благодарна е Јеховаске со сине амен и чест побаро дело таро амаро живото те накхава ле ки полновремено служба. Исто аѓаар, бут сиум благодарно е Јеховаске со денѓа ман асавки љубезно хем верно ромни.

Панда хари ка пхерав 70 берш хем више нане те служинав сар инструктори ко теократска школе хем сар покраинско надгледнико. Ама адава на разочаринела ман. Соске? Адалеске со сиум уверимо кај најбари чест анела е Јеховаске ако скромно служинаја леске хем ако фалинаја ле таро вило сој тано благодарно хем пхердо мангипаја (Мих. 6:8; Мар. 12:32-34). Те шај те да чест е Јеховаске, на ваљани те овел амен несави важно задача.

Кеда сетинава ман ко задаче со сине ман, хаљовава кај на добинѓум лен адалеске со сиум сине пошукар таро јавера, а ни палем адалеске со сине ман несави посебно способност. Дур таро адава! О Јехова денѓа ман адала задаче адалеске со сикавѓа манге пло шукарипе со на заслужинава ле. Ов дозволинѓа манге те керав адала задаче иако сине ман слабостија. Џанава кај успејнѓум те керав адала задаче адалеске со поможинѓа ман о Јехова. Аѓаар, преку мле слабостија сикавѓа пе е Девлескири сила (2. Кор. 12:9).