1. Со очекујнела амендар о Јехова?

 ЈЕКХ таро најсреќна моментија јекхе ромеске хем јекхе ромњаке тано кеда ка бијанѓовел ленге јекх састо бебе. Ама, иако о родителија бут мангена пумаре бебе, ола на би мангена ов секогаш те ачховел бебе. Уствари, ола бут ка секиринен пе ако о бебе на бајрола. Слично, о Јехова бут радујнела пе кеда кераја амаре прва чекорија сар следбеникија е Исусескере, ама ов на мангела амен те ачхова тикне чхаве ко духовно поглед (1. Кор. 3:1). Наместо адава, ов очекујнела амендар те ова возрасна христијања (1. Кор. 14:20).

2. Со ка дикха ки акаја статија?

² Со значинела некој те овел возрасно христијани? Со ваљани те кера те шај те ова зрела христијања? Сар и зорали духовно храна поможинела аменге духовно те бајрова? Хем соске на ваљани те мислина кај ако сием зрела на ваљани понадари да те кера бути ко амаро амалипе е Јеховаја? Ки акаја статија ка дикха о одговорија ко акала пучиба.

СО ЗНАЧИНЕЛА НЕКОЈ ТЕ ОВЕЛ ЗРЕЛО ХРИСТИЈАНИ?

3. Со значинела некој те овел возрасно христијани?

³ Ки Библија, о грчко лафи сој преведимо сар „возрасно“, шај исто аѓаар те значинел „зрело“, „совршено“ хем „целосно“ a (1. Кор. 2:6). Исто сар јекх бебе со продолжинела те бајровел са џикоте на овела возрасно мануш, амен да ваљани те продолжина те бајрова ко духовно поглед те шај те ова возрасна, јавере лафенцар, зрела христијања. Џанѓола пе, чак хем те ова да зрела христијања, никогаш на ваљани те чхинава те бајрова ко духовно поглед (1. Тим. 4:15). Сарине амен, па чак о терне да, шај те ова зрела христијања. Ама, котар дикхела пе кај некој тано зрело христијани?

4. Таро со дикхела пе кај некој тано зрело христијани?

 ⁴ Јекх зрело христијани керела са адава со родела лестар о Девел. Ов на биринела те керел само адава со леске свиџинела пе. Џанѓола пе, адалеске сој тано несовршено ов ка керел грешке. Сепак, пле животоја сикавела кај размислинела хем постапинела спрема е Девлескири волја. Ов уравѓа и неви личност хем понадари да трудинела пе са повише те размислинел сар о Девел (Еф. 4:22-24). Ов сиклило те анел мудра одлуке спрема е Девлескере законија хем начелија хем адалеске на ваљани леске баши секоја бути правило те шај те џанел сар те понашинел пе. Кеда ка анел одлука, ов дела пестар са те шај те постапинел спрема лате (1. Кор. 9:26, 27).

5. Со шај те случинел пе јекхе христијанеске со нане зрело? (Ефешања 4:14, 15).

⁵ Тари јавер страна, јекх христијани со на барило ко духовно поглед шај локхе те верујнел околенге со ширинена ховајба хем со вакерена измислиме информацие. Или, шај те овел ховавдо таро окола со ширинена теорие бизо доказија или таро отпадникија. b (Читин Ефешања 4:14, 15.) Ов шај те овел љубоморно е јаверенге, те керел расправие, те овел претерано осетливо хем шај локхесте те перел ко искушение (1. Кор. 3:3).

6. Солеа шај те спорединел пе о духовно бајројбе? (Дикх хем и слика.)

⁶ Сар со сине спомнимо англедер, и Библија вакерела кај о начин сар некој бајровела ко духовно поглед тано слично адалеа сар некој бајровела ко физичко поглед. Иси бут буќа кола со јекх чхаво на џанела лен. Адалеске ваљани некој сој возрасно те заштитинел ле хем те водинел ле. На пример, јекх дај шај те вакерел пле тикне чхајаке те астарел ла таро вас џикоте накхена и улица. Сар ка бајрол, и дај шај ка мукхел ла коркори те накхел и улица, ама сепак ка вакерел лаке те дикхел пле стране. Кеда и чхај ка овел возрасно ка џанел коркори сар те избегинел о опасностија. Исто сар со е тикне чхавенге ваљани помош те шај те избегинен о опасностија, аѓаар е христијаненге со нане зрела, бут пути ваљани помош таро зрела христијања те шај те избегинен о опасностија хем те анен мудра одлуке. Тари јавер страна, кеда јекх зрело христијани ваљани те анел одлука, ов  хор размислинела башо библиска начелија те шај те дикхел сар о Јехова размислинела хем тегани постапинела спрема адава.

7. Дали е зрела христијаненге ваљани помош таро јавера?

⁷ Дали акава значинела кај јекхе зрело христијанеске никогаш на ваљани помош таро јавера? Џанѓола пе кај на. Чак о зрела христијања понекогаш ваљани те роден помош. Ама адава со нане зрело ко духовно поглед шај очекујнела о јавера те вакерен леске со те керел, или о јавера те анен одлуке наместо лесте. Тари јавер страна, кеда јекх зрело христијани родела помош е јаверендар со иси лен побаро искуство хем мудрост, ов хаљовела кај о Јехова очекујнела лестар коркори те „пхиравел пло товар“ (Гал. 6:5).

8. Ко со разликујнена пе о зрела христијања?

⁸ Исто сар со о возрасна мануша разликујнена пе ко физичко поглед, аѓаар хем е зрела христијанен иси лен различна особине. На пример, несаве тане бут мудра, а јавера тане бут храбра. Несаве шај тане бут дарежлива, а јавера шај тане бут сочувствителна. Освен адава, кеда дуј зрела христијања тане ки слично ситуација, ола шај ка анен различна одлуке кола со сепак темелинена пе ко библиска начелија. Акава бут пути случинела пе кеда ваљани те анен одлуке сој мукхле ки совест. Адалеске сој свесна башо акава, ола на осудинена пе машкар песте ако ленгере одлуке тане различна. Наместо адава, ола трудинена пе те ачховен ко јекхипе (Рим. 14:10; 1. Кор. 1:10).

СО ВАЉАНИ ТЕ КЕРА ТЕ ШАЈ ТЕ ОВА ЗРЕЛА ХРИСТИЈАЊА?

9. Дали автоматски бајроваја ко духовно поглед? Објаснин.

⁹ Сар со накхела о време, јекх чхаво ка бајрол хем ка овел возрасно мануш. Ама никој нашти автоматски те овел зрело христијани. На пример, о пхраља хем о пхења таро Коринт прифатинѓе о шукар хабери, крстинѓе пе, добинѓе е Девлескири сила хем бут сиклиле таро поуке со денѓа лен о апостол Павле (Апо. 18:8-11). Сепак, некобор берша откеда крстинѓе пе, бут џене лендар на сине зрела ко духовно поглед (1. Кор. 3:2). Со шај те кера те шај те на случинел пе аменге да асавко нешто?

10. Со мора те кера те шај те ова зрела ко духовно поглед? (Јуда 20).

¹⁰ Те шај те ова зрела, прво ваљани те манга те ова зрела. Окола со мангена „о неискуство“, јавере лафенцар со мангена те ачховен бебија ко духовно поглед, никогаш нашти те овен зрела (Изр. 1:22). Амен на мангаја те ова сар некој сој возрасно ко физичко поглед, ама на мангела те прифатинел и одговорност коркори те анел одлуке, него понадари да очекујнела лескере родителија те одлучинен леске ко тхан. Наместо адава, мангаја те прифатина и одговорност те бајрова ко духовно поглед, јавере лафенцар те кера бути ко амаро амалипе е Јеховаја. (Читин Јуда 20.) Ако панда трудинеа тут те ове зрело христијани, молин е Јехова те дел тут „хем и желба хем и сила“ те успејне ко адава (Фил. 2:13).

11. Сави помош дела амен о Јехова те шај те ова зрела христијања? (Ефешања 4:11-13).

¹¹ О Јехова на очекујнела амендар коркори те бајрова ко духовно поглед. Ов денѓа амен пастирија хем учителија ко собрание кола сој спремна те поможинен аменге те ова „возрасна“ ко духовно поглед „са џикоте на оваја целосно зрела сар о Христос“. (Читин Ефешања 4:11-13.) Исто аѓаар, о Јехова дела амен пли сила те шај те поможинел аменге те овел амен „е Христосескири годи“ (1. Кор. 2:14-16). Освен адава, о Девел мукхља те овен пишиме о штар евангелија те шај те сикавел амен сар о Исус размислинѓа, сар  керѓа лафи хем сар постапинѓа џикоте сине ки пхув. Адалеа со ка размислине хем ка постапине сар о Исус, ка исполнине тли цел те ове зрело христијани.

САР ПОМОЖИНЕЛА АМЕН И ЗОРАЛИ ДУХОВНО ХРАНА

12. Сој тано „о основно сикљојбе башо Христос“?

¹² Те шај те напредујна џи ки зрелост, на ваљани само те џана „о основно сикљојбе башо Христос“, јавере лафенцар о основна христијанска сикљојба. Несаве таро адала основна сикљојба тане: о каибе, и вера, о крстибе хем о воскресение (Евр. 6:1, 2). Ко акала сикљојба темелинела пе о христијанско верување. Адалеске, кеда о Петар проповединѓа е манушенге ки Педесетница, ов керѓа лафи башо акала буќа (Апо. 2:32-35, 38). Те шај те ова е Христосескере ученикија, мора те прифатина акала основна сикљојба. На пример, о Павле предупрединѓа кај секова јекх со на прифатинела о сикљојбе башо воскресение, нашти те вакерел кај тано чачутно христијани (1. Кор. 15:12-14). Сепак, те шај те ова зрела, мора те џана повише него само о основна сикљојба.

13. Со ваљани те кера те шај те овел амен корист тари зорали духовно храна која сој спомними ко Евреија 5:14? (Дикх хем и слика.)

¹³ Поразлично таро основна сикљојба, ки зорали духовно храна нане вклучиме само е Јеховаскере законија, него лескере начелија да кола со поможинена амен те хаљова сар ов размислинела. Те шај те овел амен корист тари акаја духовно храна, ваљани те проучина и Библија, хор те размислина башо адава со читинѓем хем пало адава те да амендар са те применина адава со сиклилем. Џикоте кераја адава, амен уствари сикљоваја те ана одлуке кола со радујнена е Јехова. c (Читин Евреија 5:14.)

14. Сар о Павле поможинѓа е Коринќаненге те напредујнен ки зрелост?

¹⁴ Кеда ка аракхљовен ки несави ситуација колаке со нане несаво конкретно закони ки Библија, е христијаненге со нане зрела бут пути тано пхаро те анен исправна одлуке. Ако ки Библија нане несаво конкретно закони, несаве мислинена песке кај шај те керен со мангена. А јавера, родена правило атхе коте со на ваљани те овел. На пример,  изгледа кај о христијања таро Коринт пучле е Павле дали шај те хан хајбе кова со англедер сине дендо несаве идолеске. Наместо те вакерел ленге со те керен, о Павле сикавѓа ленге кај секас иси право те биринел со ка керел спрема адава со дозволинела леске лескири совест. Ов спомнинѓа ленге несаве библиска начелија кола со шај сине те поможинен ленге те анен одлука колаја со ленгири совест ка ачхол чисто хем колаја со нане те сопкинен е јаверен (1. Кор. 8:4, 7-9). О Павле сикавѓа е Коринќанен те користинен о света списија те шај коркори те анен одлуке, наместо те зависинен таро јавера мануша или те роден само правилија. Аѓаар, мангља те поможинел ленге те овен духовно зрела.

15. Сар о Павле поможинѓа е христијаненге со сине Евреија те напредујнен ко духовно поглед?

¹⁵ Таро адава со пишинѓа о Павле е христијаненге со сине Евреија, сикљоваја панда јекх важно поука. Несаве на продолжинѓе те бајровен ко духовно поглед, ола уствари уле асавке каске со палем „ваљани тхуд, а на зорали [духовно] храна“ (Евр. 5:12). Ола на сиклиле хем на прифатинѓе о неве сикљојба кола со о Јехова откринела лен сине преку о собрание (Изр. 4:18). На пример, бут Евреија упорно вакерена сине кај понадари да ваљани те икерел пе е Мојсеескоро закони, иако 30 берш англедер, о Закони чхинавѓа те важинел адалеске со сине денди и откупно жртва е Исусескири (Рим. 10:4; Тит 1:10). Адала 30 берш сине доволно те шај о христијања те хаљовен кај на ваљани више те икерен пе ко Закони. Значи, е писмоја со пишинѓа ле џи ко Евреија, о Павле мангља те поможинел ленге те прифатинен о хор чачипа кола со сикавела лен сине. Акава писмо сине баш адава со ваљанѓа е христијаненге те шај те бајрарен пумари вера кај о нево начин те обожавинел пе е Јехова кова со сине андо преку о Исус, тано бут пошукар. Исто аѓаар, денѓа лен храброст понадари да те проповединен иако сине лен противибе таро Евреија (Евр. 10:19-23).

ПОНАДАРИ ДА КЕР БУТИ КИ ТЛИ ЗРЕЛОСТ

16. Освен со ка напредујна ки зрелост, со јавер мора те кера?

¹⁶ Нане доволно само те трудина амен те ова духовно зрела, него хем ваљани те ачхова зрела. Адалеске, на ваљани те мислина кај  ако сием зрела на ваљани више те кера бути ко амаро амалипе е Јеховаја (1. Кор. 10:12). Ваљани те испитина амен те шај те уверина амен кај понадари да напредујнаја (2. Кор. 13:5).

17. Сар е Павлескоро писмо џи ко Колошања сикавела кај ваљани те ачхова духовно зрела?

¹⁷ Ко пло писмо џи ко Колошања, о Павле панда јекх пути истакнинела кобор тано важно те ачхова зрела. Иако о Колошања сине више духовно зрела, о Павле предупрединѓа лен те пазинен те на перен ки замка те почминен те размислинен сар о мануша ко свето (Кол. 2:6-10). О Епафрас да, кова со шукар џанела сине е пхрален таро собрание, редовно молинела пе сине те шај ола џи ко крајо те ачховен зрела (Кол. 4:12). Со сикљоваја таро акава? Хем о Павле хем о Епафрас халиле кај те шај те ачхова духовно зрела ваљани аменге е Девлескири помош, ама исто аѓаар ваљани секој амендар те трудинел пе те ачховел духовно зрело. Ола мангле о Колошања те ачховен возрасна, јавере лафенцар духовно зрела христијања, бизи разлика саве предизвикија сине лен.

18. Со шај те случинел пе јекхе зрело христијанеске? (Дикх хем и слика.)

¹⁸ О Павле предупрединѓа е Евреен кај ако јекх зрело христијани на пазинела, шај те анел џи ко адава о Јехова више никогаш те на овел лестар задоволно. Јекхе христијанескоро вило шај те овел зорало сар бар хем адалеске нашти више те каинел пе хем о Девел те простинел леске. Ама шукар тано адава со о Евреија на але џи ко акава степен (Евр. 6:4-9). А со овела околенцар сој неактивна или исклучиме, а пало адава ка каинен пе? Ако понизно каинена пе, ола ка сикавен кај нане сар окола коленге со пишинѓа о Павле. Џанѓола пе, кеда ка иранен пе ко Јехова, ленге ка ваљани и помош со дела ла ов (Езек. 34:15, 16). О старешине шај те замолинен јекх зрело пхрале или пхења те поможинел ленге палем те овен паше е Јеховаја.

19. Сави цел ваљани те овел амен?

¹⁹ Ако трудинеа тут те ове зрело христијани, ту шај те исполнине адаја цел! Понадари да ха тари зорали духовно храна хем трудин тут со повише те размислине сар о Јехова. А ако сиан више зрело христијани, кер са со шај те ачхове духовно зрело христијани — акана хем ки цели вечност.