1. Сој тано о духовно рај, хем ко со ваљани те ова одлучна?

 АВДИВЕ ки пхув иси јекх рај колесте со иси мануша сој зафатиме керибаја шукар буќа. Ки лесте иси милиоња мануша колен со иси лен чачутно мир. Окола со аракхљона ко акава рај тане одлучна никогаш те на мукхен ле. Ола исто аѓаар, мангена кобор со шај повише мануша те авен ко адава рај. Ко саво рај мислинела пе? Ко духовно рај! a

2. Сој тано посебно башо духовно рај?

² Чаче тано посебно со о Јехова керѓа јекх симболично тхан коте со лескоро народо тано ко мир хем ко јекхипе, иако живинела ко е Сатанаскоро лошно хем опасно свето колесте со о мануша мрзинена пе јекх јекхеа (1. Јов. 5:19; Отк. 12:12). Амаро Девел кова сој пхердо мангипаја дикхела сар акава свето керела штета е манушенге. Адалеске ов поможинела пле слугенге те осетинен пе безбедна те шај те служинен леске радосно. Ко лескоро Лафи о духовно рај тано опишимо сар безбедно „тхан гарајбаске“ хем сар „градина колате со иси доволно пани“ (Иса. 4:6; 58:11). Адалеске со о Јехова благословинела лен, адала со живинена ко акава рај тане безбедна хем радосна ко акала последна диве (Иса. 54:14; 2. Тим. 3:1).

3. Кеда прво пути исполнинѓе пе о лафија таро Исаија 65-то поглавје?

³ О Јехова водинѓа е пророко е Исаија те пишинел саво ка овел о живото адаленгоро со ка живинен ко духовно рај. Акала лафија шај те аракха лен ко 65-то поглавје таро лил  Исаија хем ола прво исполнинѓе пе ко 537 берш а.а.е. Ко адава време, о Евреија кола со каинѓе пе сине ослободиме таро ропство ко Вавилон хем иранѓе пе ки пумари пхув. О Јехова благословинѓа пле народо хем поможинѓа ле те керел о Ерусалим палем те овел шужо хем те обновинел о храми — о главно тхан коте со обожавинена ле сине (Иса. 51:11; Зах. 8:3).

4. Сар авдиве исполнинена пе о лафија таро Исаија 65-то поглавје?

⁴ Ко 1919 берш а.е., е Исаијаскоро пророштво дујто пути почминѓа те исполнинел пе кеда о слуге е Јеховаскере таро амаро време сине ослободиме таро Баро Вавилон. Пало адава, о духовно рај почминѓа хари по хари те ширинел пе ки цели пхув. О ревносна христијања поможинѓе те керен пе бут собранија хем сикавена сине христијанска особине. Мурша хем џувља, кола со англедер живинена сине неморално хем сине насилна, уравѓе „и неви личност која сој керди спрема е Девлескири волја“ (Еф. 4:24). Џанѓола пе, бут таро благословија со вакерѓа лен о Исаија, дословно ка исполнинен пе ко нево свето со ка овел ки иднина. Ама, панда авдиве иси амен бут благословија адалеске со живинаја ко духовно рај. Те дикха сар акава духовно рај влијајнела упри аменде хем соске на ваљани никогаш те мукха ле.

САР ОСЕТИНЕНА ПЕ ОКОЛА СОЈ ТАНЕ КО ДУХОВНО РАЈ

5. Спрема о пророштво таро Исаија 65:13, кола амаре потребе тане задоволиме адалеске со живинаја ко духовно рај?

⁵ Чале хем освежиме. О пророштво е Исаијаскоро сикавела кобор бари разлика иси машкар адала со живинена ко духовно рај хем адала со на живинена ки лесте. (Читин Исаија 65:13.) О Јехова дарежливо дела пле слугенге са адава со ваљани ленге те шај те задоволинел ленгере духовна потребе. О Девел дела амен пли сила, и Библија хем бут духовно храна те шај те „ха“, те „пија“ хем те „радујна амен“. (Споредин Откровение 22:17.) Различно амендар, окола со нане ко духовно рај тане „бокхале“, „жедна“ хем „лаџана“. Ленгере духовна потребе нане задоволиме (Амос 8:11).

6. Спрема Јоил 2:21-24, солеа тане споредиме о поклонија со дела амен о Јехова хем сави корист шај те овел амен лендар?

⁶ Ко пло пророштво о Јоил користинѓа несаве основна буќа, сар сој гив, мол хем маслиново масло те шај те сикавел кај о Јехова дарежливо дела пле слугенге адава со ваљани ленге, машкар коте сој хем и духовно храна (Јоил 2:21-24). Ов керела адава преку и Библија хем преку амаре публикацие кола со темелинена пе ки лате, преку амари интернет-страница, хем исто аѓаар преку амаре состанокија хем конгресија. Амен шај секова диве те користина акала поклонија хем тегани ка шај те ова духовно чале хем освежиме.

7. Со поможинела аменге те овел амен „радост ко вило“? (Исаија 65:14).

⁷ Среќна хем задоволна. Е Девлескере слуге шај те овен „бут радосна“ адалеске сој тане бут благодарна е Јеховаске. (Читин Исаија 65:14.) О чачипа со бајрарена амари вера, о утешна ветувања таро е Девлескоро Лафи хем амари сигурно надеж баши иднина, која со темелинела пе ки е Христосескири откупно жртва, поможинена аменге те овел амен „радост ко вило“. Кеда кераја лафи башо акала буќа амаре пхраленцар хем пхењенцар, адава керела амен те ова чаче среќна (Пс. 34:8; 133:1-3).

8. Кола дуј важна буќа иси ко духовно рај?

⁸ О мангипе хем о јекхипе со иси машкар е Јеховаскоро народо тане дуј важна буќа ко  духовно рај (Кол. 3:14). Акава поможинела амен те замислина аменге саво ка овел о живото ко нево свето кеда машкар е Јеховаскере слуге ка овел панда побаро мангипе хем панда побаро јекхипе таро авдиве. Јекх пхен вакерела со приметинѓа ко е Јеховаскоро народо кеда прво пути запознајнѓа ле. Ој вакерела: „На осетинава ман сине нигде среќно, ни машкар ми фамилија. Ама машкар е Јеховаскоро народо прво пути дикхљум сар о мануша сикавена чачутно мангипе јекх јекхеске“. Секова јекх со мангела те овел чаче среќно хем задоволно ваљани те овел ко амаро духовно рај. Бизи разлика со мислинела акава свето башо е Јеховаскере слуге, лен иси лен шукар анав англо Јехова хем англо са о јавера со обожавинена ле (Иса. 65:15).

9. Саво ветување иси амен ко Исаија 65:16, 17 башо буќа со анена аменге дукх хем муке авдиве?

⁹ Смириме. Ко Исаија 65:14 вакерела кај окола со одлучинена те ачховен авријал таро духовно рај „ка викинен тари дукх ко вило хем бут ка ровен соске [ленгоро] духо тано пхаго“. Ама, со ка овел са околе буќенцар со анена дукх хем муке е Девлескере народоске? Ко крајо, адала буќа ка овен бистерде хем „ка овен гаравде таро е [Девлескере] јакхја“. (Читин Исаија 65:16, 17.) О Јехова ка цидел амаре проблемија хем сар со ка накхел о време нане ни те сетина амен ки дукх со анѓе аменге адала проблемија.

10. Соске сиан благодарно башо адава со шај те ове заедно тле пхраленцар хем пхењенцар? (Дикх хем и слика.)

¹⁰ Панда авдиве осетинаја амен посмириме кеда сием присутна ко амаре состанокија хем ола поможинена амен те на концентририна амен ко буќа кола со керена аменге стрес. Амен исто аѓаар кераја те овел шукар атмосфера машкар аменде аѓаар со сикаваја о особине со авена тари е Девлескири сила, сар сој мангипе, радост, мир, љубезност хем кроткост (Гал. 5:22, 23). Амен сием бут благодарна со сием дело тари е Девлескири организација. Окола со ка ачховен ко духовно рај ка дикхен сар целосно исполнинела пе е Девлескоро ветување башо „нево небо хем неви пхув“.

11. Спрема Исаија 65:18, 19, сар ваљани те влијајнел упри аменде о духовно рај со керѓа ле о Јехова?

¹¹ Благодарна хем радосна. О Исаија исто аѓаар вакерела соске ваљани бут те радујна амен ко духовно рај. О Створители кова со керѓа акава симболично рај тано о Јехова. (Читин Исаија 65:18, 19.) Адалеске, на чудинела амен со о Јехова користинела амен  те шај те поможинел е манушенге те икљон таро светска организацие кола со на сикавена о чачипе башо Девел хем те поможинел лен те кхувен ко амаро бут шужо духовно рај. Адалеске со сием ко чачипе иси амен бут благословија кола со анена аменге бари радост, а адава поттикнинела амен те вакера е јаверенге да баши ленде (Ерем. 31:12).

12. Кеда читинеа о ветувања сој пишиме ко Исаија 65:20-24, сар осетинеа тут хем соске?

¹² Адалеске со сием ко духовно рај иси амен надеж. Акаја тани панда јекх причина со керела те ова благодарна хем радосна. Размислин само ко са адава со ка дикха хем ка кера ко е Девлескоро нево свето! И Библија ветинела: „Нане те овел бебе со ка живинел само некобор диве... ни пхуро кова со нане те живинел са пле берша“. Амен ка градина кхера хем ка живина ки ленде. Ка садина дракха хем ка ха ленгоро плоди. Нане амен те трудина амен џабе соске ка ова „потомство благословимо таро Јехова“. О Јехова ветинела кај ко амаро живото ка ова безбедна хем задоволна хем кај ка овел амен чачутни смисла соске живинаја. Панда англедер те рода ле о Јехова ка џанел сави потреба иси секоле амендар хем ка дел „са е манушенге хем е животненге адава со мангена“ (Иса. 65:20-24: Пс. 145:16).

13. Сар о лафија таро Исаија 65:25, опишинена о промене со о мануша керѓе лен кеда почминѓе те служинен е Јеховаске?

¹³ Ка манген о мир хем ка овен безбедна. Е Девлескири сила поможинѓа бутен кола со сине бут насилна, агресивна хем кола со на постапинена сине чесно те керен баре промене ко пло живото. (Читин Исаија 65:25.) Ола трудинѓе пе бут те шај те променинен пле лошна особине (Рим. 12:2; Еф. 4:22-24). Нормално, иако сием е Девлескере слуге амен панда сием несовршена хем адалеске понадари да ка грешина. Ама о Јехова керѓа те овен ко јекхипе различна мануша колен со иси лен мангипе хем мир кова со на чхинавѓола (Тит 2:11). Акава тано чудо хем само о семоќно Девел шај те керел ле!

14. Сар о лафија таро Исаија 65:25 исполнинѓе пе упро јекх пхрал?

¹⁴ Дали о мануша чаче шај те менинен пе? Размислин башо акава искуство. Јекх терно џикоте пхерѓа 20 берш, повише пути сине ко затвор. Сине бут насилно хем живинела сине неморално. Ов сине ко затвор адалеске со чорела сине врдија, кхувела сине ко објектија те чорел хем керела сине јавера сериозна криминална буќа. Секогаш сине спремно марибаске. Кеда прво пути дознајнѓа о чачипе тари Библија хем почминѓа те џал ко е Јеховаскере сведоконгере состанокија ов сине уверимо кај аракхља нешто колеске со врединела те живинел — о духовно рај. Откеда крстинѓа пе бут пути размислинѓа сар упри лесте исполнинѓе пе о лафија таро Исаија 65:25. Таро јекх насилно мануш — сар рув, ов уло јекх мануш кова со мангела о мир — сар бакхро.

15. Соске мангаја те канина е јаверен да ко духовно рај хем сар шај те кера адава?

¹⁵ О стихо таро Исаија 65:13 почминела е лафенцар: „Аѓаар вакерела о Најбаро господари, о Јехова“. О 25-то стихо завршинела е лафенцар: „вакерела о Јехова“. Адава со ветинела о Јехова секогаш исполнинела пе (Иса. 55:10, 11). О духовно рај више постојнела. О Јехова керѓа јекх пхралипе кова сој чаче бут посебно. Адалеске со сием дело таро акава пхралипе, шај те овел амен џи негде мир хем те осетина амен безбедно ко акава насилно свето (Пс. 72:7). Адалеске мангаја те поможина со шај повише манушенге те овен дело таро амаро христијанско пхралипе. Акава шај те кера ле ако  концентриринаја амен ко адава те сикава е манушен башо Девел (Мат. 28:19, 20).

САР ШАЈ ТЕ ПОМОЖИНА Е ЈАВЕРЕНГЕ ТЕ МАНГЕН ТЕ АВЕН КО ДУХОВНО РАЈ?

16. Со шај те поможинел е манушенге те манген те авен ко духовно рај?

¹⁶ Секова јекх амендар шај те керел нешто те шај о јавера те манген те авен ко духовно рај. Амен шај те кера адава аѓаар со ка џа пало пример е Јеховаскоро. Ов на чхивела силаја е манушен те овен дело тари лескири организација. Наместо адава, ов љубезно анела е манушен ки песте (Јован 6:44; Ерем. 31:3). Кеда о искрена мануша ка дознајнен башо е Јеховаскоро мангипе хем башо лескере бут шуже особине, нашти а ма те манген те авен ки лесте. Сар шај амен да амаре шукар особиненцар хем адалеа со ка понашина амен шукар те поможина е манушенге те манген те авен ко духовно рај?

17. Со ваљани те кера те шај о јавера те манген те авен ко духовно рај?

¹⁷ Јекх начин сар шај те кера о јавера те манген те авен ко духовно рај тано аѓаар со ко амаре состанокија ка постапина љубезно хем ка сикава мангипе. Кеда несаво нево ка авел ко амаре состанокија мангаја те вакерел о исто со вакерѓе о неверникија кола со шај сине ко состанокија ко пурано Коринт. Ола вакерѓе: „Чаче о Девел тано машкар туменде!“ (1. Кор. 14:24, 25; Зах. 8:23). Адалеске мора понадари да те шуна о совет те ова ко мир јекх јекхеа (1. Сол. 5:13).

18. Сар шај те поможина е манушенге те манген те авен ки амари организација?

¹⁸ Амен ваљани те трудина амен секогаш те дикха ко амаре пхраља хем пхења сар со дикхела о Јехова, а на ки ленгири несовршеност, која со јекх диве ка нашавѓовел. Амен шај те решина секова несогласување машкар аменде ко љубезно начин  ако секогаш сикаваја „милост јекх јекхеске хем спремно простинаја јекх јекхеске“ (Еф. 4:32). Аѓаар о мануша со мангена те постапинел пе ленцар ко слично начин ка манген те овен дело таро духовно рај. b

АЧХОВ КО ДУХОВНО РАЈ

19. а) Спрема и рамка „ Ола мукхле ле хем иранѓе пе“, со вакерѓе несаве откеда иранѓе пе ко духовно рај? б) Ко со ваљани те ова одлучна? (Дикх хем и слика.)

¹⁹ Бут сием благодарна башо амаро духовно рај. Ов авдиве тано пошужо таро било кеда англедер хем ки лесте иси са повише мануша кола со фалинена е Јехова. Никогаш ма те чхинава те ова благодарна башо духовно рај со о Јехова керѓа ле аменге. Секој со мангела те овел освежимо, задоволно, смиримо хем безбедно мора те авел ко духовно рај хем никогаш те на мукхел ле. Ама ваљани бут те пазина соске о Сатана керела са со шај те ховавел амен те шај те мукха о духовно рај (1. Пет. 5:8; Отк. 12:9). На смејнаја те мукха те успејнел ко адава. Те да амендар са те шај те икера о духовно рај те овел шужо, чисто хем понадари да те овел мир ки лесте.