Дали џанљан?
Соске ки е Давидескири војска сине несаве со на сине Израелција?
КИ Е Давидескири војска, машкар о војникија кола со на сине Израелција сине о Селек о Амонцо, о Урија о Хетејцо хем о Итма о Моавцо a (1. Лет. 11:39, 41, 46). Исто аѓаар ки војска сине хем Херетејција, Фелетејција хем мануша таро Гат (2. Сам. 15:18). О мануша таро Гат сине, а изгледа кај хем о Херетејција хем о Фелетејција сине паше фамилија е Филистејцонцар (Ис. Нав. 13:2, 3; 1. Сам. 6:17, 18; Езек. 25:16).
Соске о Давид дозволинѓа ки лескири војска те овен јабанџие? Ов сине уверимо кај ола сине леске верна, а сој панда поважно, кај сине верна е Јеховаске. На пример, башо Херетејција хем о Фелетејција, ко јекх библиско речнико пишинела акава: „Ола ачхиле верна е Давидеске ко најпхаре моментија џикоте владинела сине“ (The New Interpreter’s Dictionary of the Bible). Сар сикавѓе пли верност? Кеда „са о Израелција“ мукхле е Давиде хем геле пало Сава, кова со сине лошно, о Херетејција хем о Фелетејција ачхиле е Давидеа хем поможинѓе леске те чхинавел и побуна со керѓа о Сава (2. Сам. 20:1, 2, 7). Ки јавер прилика, о Адонија, о чхаво е Давидескоро, пробинѓа ов те чхивел пе те овел цари наместо о Соломон. Ама, о Херетејција хем о Фелетејција ачхиле верна е Давидеске хем поможинѓе леске те чхивел е Соломоне те овел цари, соске ов сине биримо таро Јехова (1. Цар. 1:24-27, 38, 39).
Јавер војнико со на сине Израелцо, а ачхило верно е Давидеске, сине о Етај таро Гат. О Етај хем лескере 600 војникија поддржинѓе е Давиде кеда лескоро чхаво о Авесалом, бунинѓа пе хем чхивѓа е Израелцон те противинен пе е цареске. О Давид вакерѓа е Етајеске кај адалеске сој тано јабанџија, на очекујнела пе лестар те боринел пе башо Давид. Ама о Етај вакерѓа: „Сар сој џивдо о Јехова хем сар сој џивдо мло господари, о цари, коте хем те овел мло господари, о цари, бизи разлика дали керела пе лафи мерибаске или животоске, атхе ка овел хем тло слуга!“ (2. Сам. 15:6, 18-21).
О Етај сине верно е Давидеске, о цари со сине помазимо таро Јехова
Иако о Херетејција, о Фелетејција хем о мануша таро Гат сине јабанџие, ола халиле кај о Јехова тано чачутно Девел хем сине лен хор поштовање спрема лесте хем спрема о Давид, сар лескоро помазанико. О Давид сигурно сине бут благодарно со узи лесте сине асавке верна мануша!
a Е Девлескоро закони сој пишимо ки 5. Мојсеева 23:3-6, забранинела сине о Амонција хем о Моавција те овен примиме ки израелско заедница. Изгледа кај акале законеа на дозволинела пе сине е јабанџиенге те овел лен иста правија ки израелско заедница, ама на забранинела пе сине ленге те дружинен пе е Девлескере народоја хем те живинен машкар ленде. Дикх ко Увид ко света лила, том 1, стр. 95 (англ.).
