СИГУРНО бут ценинеа о различна поклонија со добинеа лен таро Јехова хем благодарно сиан со ов дозволинела туке те одлучине сар те користине лен. Интересно тано адава со и Библија вакерела кај и мол да тани поклон таро Девел. Ки лате чак пишинела: „О маро радујнкерела е работникон хем и мол керела о живото пошужо“ (Проп. 10:19; Пс. 104:15). Ама веројатно приметинѓан кај несаве манушен иси лен проблеми алкохолеа. Исто аѓаар, о мануша ко цело свето иси лен различно стави башо пијбе алкохол. Со шај те поможинел е христијаненге те анен мудра одлуке кеда керела пе лафи башо алкохол?

Бизи разлика коте живинаја или ки сави култура барилем, ваљани те мукха упро амаро стави хем одлуке те влијајнел е Девлескоро размислибе, а на е манушенгоро сој околу аменде. Само тегани ка овел амен пошукар живото.

Веројатно приметинѓан кај бут мануша ко свето пиена редовно хем бут алкохол. Несаве пиена соске адава поможинела ленге те опуштинен пе. Јавера пиена те шај те икљовен ко крајо е проблеменцар. А ко несаве тхана, ко пијбе бут алкохол дикхела пе сар знако баши зрелост или муршипе.

Ама о христијања добинена мудра советија таро ленгоро Створители кова со грижинела пе ленге. На пример, ов предупрединела амен кај ка овен амен лошна последице ако маќоваја. Шај читинѓан ко Изреки 23:29-35, коте со детално пишинела башо јекх мато мануш хем башо несаве проблемија со анѓа леске о пијбе. a О Даниел, јекх старешина тари Европа, сетинела пе саво живото сине ле англедер те дознајнел башо Јехова хем те применинел лескере советија. Ов вакерела: „Пијава сине бут алкохол хем адалеске анава сине лошна одлуке. Адалеске, доживинѓум бут лошна искуствија хем кеда сетинава ман ки ленде панда разочаринава ман“.

Сар шај те ана мудра одлуке кеда керела пе лафи башо алкохол хем аѓаар те избегина о проблемија со анела лен о претерано пијбе? О клучо тано те мукха е Девлескоро размислибе те водинел амаре мисле хем постапке.

Те дикха со вакерела и Библија башо алкохол хем соске несаве мануша пиена.

Е Девлескоро Лафи на осудинела о умерено пијбе алкохол. Уствари, ки Библија пишинела кај о пијбе мол шај те анел аменге задоволство. Адатхе пишинела: „Радујн тут џикоте хаја тло маро, хем пи тли мол радосно вилеа“ (Проп. 9:7). О Исус пиља мол ко несаве прилике, а о исто керѓе јавера да слуге е Јеховаскере (Мат. 26:27-29; Лука 7:34; 1. Тим. 5:23).

Иако е Девлескоро Лафи на осудинела о умерено пијбе, сепак осудинела о маќојбе. Ки лесте јасно пишинела: „Ма маќовен мољаја“ (Еф. 5:18). Па чак вакерела кај о пијанице „нане те наслединен е Девлескоро Царство“ (1. Кор. 6:10). О Јехова строго осудинела о претерано пијбе хем о маќојбе. Наместо само те кера адава со керена о мануша околу аменде, амен мангаја те ана одлуке спрема е Девлескоро размислување.

Несаве мислинена кај шај те пиен бут алкохол хем ма те маќон. Ама адава тано бут опасно. Ки Библија пишинела кај окола сој тане „робија е мољаке“ шај те керен сериозна грешке хем те руминен пло амалипе е Јеховаја (Тит 2:3; Изр. 20:1). О Исус чак предупрединѓа кај о „претерано пијбе“ шај те чхинавел некас те кхувел ко е Девлескоро нево свето (Лука 21:34-36). Тегани, со шај те поможинел јекхе христијанеске те избегинел о проблемија кола со локхе шај те авен ако претерано пиела алкохол?

Опасно тано те мукха амари култура те влијајнел упро амаро стави башо алкохол. Кеда керела пе лафи башо хајбе хем пијбе, о христијања анена мудра одлуке кола сој спрема е Девлескири волја. И Библија сетинкерела амен: „Било те хан или било те пиен или било со јавер те керен, керен са баши е Девлескири слава“ (1. Кор. 10:31). Те дикха некобор пучиба хем библиска начелија.

Дали пијава алкохол те шај о јавера те прифатинен ман? Ки 2. Мојсеева 23:2 пишинела: „Ма џа пало мноштво“. Акате о Јехова предупрединѓа е Израелцон те на џан пало пример е манушенгоро со на керена лескири волја. Акава совет тано корисно е христијаненге авдиве да. Ако дозволинаја о јавера те влијајнен упро амаро стави хем амаре одлуке поврзиме алкохолеа, хари похари шај те чхинава те живина спрема е Девлескере мерилија хем аѓаар шај те нашава амаро амалипе леа (Рим. 12:2).

Дали пијава те шај те сикавав кобор сиум силно? Ко несаве културе тано нормално хем прифатливо те пиел пе бут хем редовно (1. Пет. 4:3). Ама, приметин ко со поттикнинена амен о лафија таро 1. Коринќања 16:13: „Овен џангавде, овен цврста ки вера, овен храбра хем ачховен зорале“. Шај ли о алкохол чаче те поможинел некаске те овел силно? На. Спротивно таро адава, о алкохол шај локхе те слабонкерел некаскири способност јасно те размислинел хем те анел шукар одлуке. Значи о претерано пијбе алкохол на сикавела кај некој тано силно, него адава тано доказ кај некој тано слабо. Ко Исаија 28:7 опишинела околе сој шамутимо таро алкохол сар некој со погрешно проценинела о буќа.

И чачутни сила авела таро Јехова хем вклучинела те ачхова џангавде хем те ова цврста ки вера (Пс. 18:32). Акава шај те кера ле ако пазинаја хем избегинаја опасностија хем ако анаја одлуке кола со нане те руминен амаро амалипе е Јеховаја. Џикоте о Исус сине ки пхув, ов сикавѓа асавки сила хем о јавера поштујнена ле сине соске сине храбро хем одлучно те керел адава сој исправно.

Дали пијава алкохол те шај те нашав таро проблемија? Јекх псалмисти коле со поттикнинѓа ле о Јехова, пишинѓа о следно: „Кеда пхердиљум бут мисле со на дена ман мир, ту  [Јехова] утешинѓан ман хем смиринѓан ман“ (Пс. 94:19). Ако сиан секиримо башо нешто, тегани роде помош таро Јехова, а на ко алкохол. Нешто со шај те поможинел туке те на ове добором секиримо тано те молине тут почесто е Јеховаске. Исто аѓаар, бут џене халиле кај тано корисно те роден совет таро несаво зрело пхрал ко собрание. Уствари, ако некој пиела алкохол те шај те икљол ко крајо е проблеменцар тегани шај нане те овел добором одлучно те постапинел исправно (Оси. 4:11). О Даниел коле со спомнинѓем ле англедер, признајнѓа: „Сиум сине бут секиримо хем осетинава ман сине криво. Пијава сине те шај те икљовав ко крајо е проблеменцар, ама о проблемија са повише бајрона сине, нашавѓум буте амален хем о поштовање коркори манге“. Со поможинѓа е Даниелеске? Ов вакерѓа: „Халиљум кај ваљани те родав утеха таро Јехова, а на ко алкохол. Ко крајо, о Јехова поможинѓа манге те решинав мле проблемија“. О Јехова тано секогаш спремно те поможинел аменге, чак кеда мислинаја кај нане надеж баши амари ситуација (Фил. 4:6, 7; 1. Пет. 5:7).

Ако понекогаш пиеа алкохол, испитин тут те шај те дикхе кобор редовно или бут пиеа. Шај те пуче тут: „Дали некој тари фамилија или несаво паше амал вакерѓа манге кај тано хари секиримо башо адава кобор бут пијава? Ако оја, адава сикавела кај почминѓа те овел тут навика пијбаске хем кај иси тут проблеми башо кова со на сиан свесно. „Дали акана пијава повише таро англедер?“ Акава шај те случинел пе некаске кова со иако нане зависно таро алкохол, ама џала ко адава правцо. „Шај ли те издржинав бизо алкохол некобор диве или повише време?“ Ако на, тегани о пијбе уло туке хор навика или уљан зависно таро алкохол. Адава шај ка значинел кај ваљани туке професионално помош те шај те накхаве адава проблеми.

Адалеске со о пијбе шај те керел бут проблемија, несаве христијања одлучинѓе хич те на пиен. А јавера одлучинѓе те на пиен адалеске со на свиџинела пе ленге о вкус. Ако несаве таро окола со пенџареа лен анѓе асавки одлука, шај те сикаве кај поштујнеа ленгири одлука аѓаар со нане те критикујне лен.

 Шај халиљан кај тано пошукар те чхиве туке границе башо адава кобор алкохол ка пие. Или шај ка чхиве туке правило башо адава кобор редовно ка пие — шај јекх пути ко курко или умерено џикоте хаја маро. Јавера чхивѓе песке границе башо адава сави врста алкохол ка пиен. На пример, одлучинѓе умерено те пиен само мол или пиво, а те на пиен јака пијалокија чак ако тане мешиме јавере пијалоконцар. Откеда ка чхиве туке јасна границе башо пијбе, ка овел туке полокхо те икере тут ки ленде. Јекх зрело христијани на ваљани те секиринел пе со ка мислинен о јавера башо одлуке со анела лен хем со мангела те икерел пе ки ленде.

Кеда анаја одлуке башо алкохол ваљани те мислина е јаверенге да. Ко Римјања 14:21 пишинела: „Шукар тано те на хал пе мас хем те на пиел пе мол или те керел пе било со јавер со ка перавел тле пхрале“. Сар шај те применине акава совет? Сикав пхраликано мангипе. Ако мислинеа кај адава со пиеа алкохол ка сметинел некаске, тегани о мангипе ка поттикнинел тут те на пие ки адаја прилика. Аѓаар ка сикаве кај мангеа е јаверен хем кај поштујнеа лен хем кај на родеа тли корист, него ленгири (1. Кор. 10:24).

Исто аѓаар, шај о властија анѓе несаве законија башо алкохол. Џанѓола пе, јекх христијани ка поштујнел акала законија. Адала законија шај одрединена тари која возраст шај некој те почминел те пиел алкохол, или шај забранинена те возинел пе или те управинел пе несаве машинаја ако пиела пе алкохол (Рим. 13:1-5).

О Јехова сикавела кај поштујнела амен адалеа со денѓа амен слобода те одлучина сар ка користина о бут поклонија со денѓа амен. Ки акаја слобода тане вклучиме амаро право те одлучина со ка ха хем со ка пија. Те трудина амен амаре одлукенцар те сикава кај ценинаја акаја слобода аѓаар со ка користина ла те шај те славина амаре небесно Даде.