1. Кеда размислинаја баши е Авраамескири вера, кова пучибе шај пучаја амен?

 ИАКО бут џене шунѓе башо Авраам, бут лендар на џанена бут баши лесте. Ама ту бут џанеа башо акава верно слуга. На пример, џанеа кај баши лесте вакерела пе кај тано „дад са околенгоро со иси лен вера“ (Рим. 4:11). Сепак, шај пучеа тут: „Дали шај те џав пало е Авраамескоро пример хем те овел ман исто сар лескири вера?“ Сигурно кај шај.

2. Соске тано важно те проучина е Авраамескоро пример? (Јаков 2:22, 23).

² Јекх начин сар шај те развина сар е Авраамескири вера тано аѓаар со ка проучина лескоро пример. О Авраам секогаш керела сине адава со родела лестар сине о Девел — ов селинѓа пе ки јекх бут дур пхув, бершенцар живинѓа ко шаторија хем сине спремно те жртвујнел пле мангле чхаве е Исако. О Авраам керѓа са акала буќа адалеске со сине ле силно вера. Пле вераја хем пле постапкенцар ов радујнкерѓа е Јехова хем уло леа паше амал. (Читин Јаков 2:22, 23.) О Јехова мангела сарине амен — исто аѓаар хем ту да — те доживина о иста благословија. Адалеске ов водинѓа е библиска писателен е Павле хем е Јакове те пишинен башо е Авраамескоро пример. Ки акаја статија ка дикха сој тано пишимо башо Авраам ко Римјања 4-то поглавје хем ко Јаков 2-то поглавје. О солдуј џене пишинѓе нешто важно башо Авраам.

3. Таро кова библиско стихо цитиринѓе хем о Павле хем о Јаков?

³ О Павле хем о Јаков цитиринѓе тари 1. Мојсеева 15:6, коте со пишинела: „О Авраам верујнѓа е Јехова, а ов башо адава дикхела сине ки лесте сар праведно“. Кеда јекх мануш тано  праведно англо е Јеховаскере јакхја, адава значинела кај о Јехова прифатинела ле сар пло слуга, чак дикхела ки лесте сар бизи грешка. Кобор шукар тано адава со јекх несовршено грешно мануш, шај те овел праведно англо е Девлескере јакхја! Сигурно ту да мангеа о Јехова те дикхел ки туте сар праведно хем адава шај те овел. Акана ка дикха соске о Јехова дикхела сине ко Авраам сар праведно хем со ваљани амен те кера те шај ки аменде да те дикхел аѓаар.

4. Со спречинела е манушен те овен праведна?

⁴ Ко пло писмо џи ко Римјања, о Павле пишинѓа кај са о мануша грешинена (Рим. 3:23). Тегани, сар шај о Девел те овел задоволно некастар хем те дикхел ле сар праведно, или бизи грешка? Те шај те поможинел са е искрена христијаненге те добинен о одговор ко акава, о Павле користинѓа е Авраамескоро пример.

5. Соске о Јехова вакерѓа е Авраамеске кај тано праведно? (Римјања 4:2-4).

⁵ О Јехова вакерѓа кај о Авраам тано праведно панда џикоте сине ки ханаанско пхув. Соске о Јехова шај сине те дикхел ко Авраам сар праведно? Дали адалеске со о Авраам совршено икерѓа пе ко е Мојсеескоро закони? Сигурно кај на (Рим. 3:13). О Закони сине дендо е Израелцонге повише таро 400 берш откеда о Девел вакерѓа кај о Авраам тано праведно. Тегани соске о Девел шај сине те вакерел кај о Авраам тано праведно? О Јехова сикавѓа леске шукарипе со на заслужинела пе хем дикхља ки лесте сар праведно адалеске со сине ле вера. (Читин Римјања 4:2-4.)

6. Соске о Јехова вакерела башо јекх несовршено мануш кај тано праведно?

⁶ О Павле вакерѓа кај кеда некој иси ле вера ко Девел ов дикхела ки лесте сар „праведно баши лескири вера“ (Рим. 4:5). О Павле исто аѓаар вакерѓа: „О Давид да керела лафи баши јекхе манушескири радост коле со о Девел дикхела сар праведно ама на башо лескере постапке: ’Радосна тане окола каскере со постапке коленцар со пхагена о закони тане простиме хем каскере гревија тане учхарде. Радосно тано о мануш кас со о Јехова на кривинела башо грево‘“ (Рим. 4:6-8; Пс. 32:1, 2). О Девел простинела или учхарела о гревија околенгере со иси лен вера ки лесте. Ов целосно простинела лен хем никогаш више на спомнинела лен. Ко асавке мануша дикхела сар некој со нане лен грешке хем тане праведна адалеске со иси лен вера.

7. Ки која смисла е Девлескере слуге таро пурано време сине праведна?

⁷ Иако о Авраам, о Давид хем јавера верна слуге сине праведна англо Девел, сепак ола понадари сине несовршена хем грешна. Ама адалеске со сине лен вера, о Девел дикхела сине ки ленде сар бизи грешка, посебно кеда спорединела лен сине околенцар со на сине лен вера ки лесте (Еф. 2:12). Сар о Павле со пишинѓа ко пло писмо, мора те овел амен вера те шај те ова паше е Девлеа. Адава сине случај е Авраамеа хем е Давидеа, а шај те овел случај аменцар да.

8-9. Саво погрешно мислење иси несавен башо адава со пишинѓе о Павле хем о Јаков, хем соске?

⁸ Веконцар о верска христијанска водачија нашти сине те согласинен пе сар тане поврзиме и вера хем о постапке. Несаве свештеникија сикавена кај доволно тано те овел тут вера ко Господари о Исус Христос те шај те ове спасимо. Шај шунѓан сар вакерена: „Верујн ко Исус хем ка ове спасимо“. Несаве шај чак цитиринена е Павлескере лафија: „О Девел дикхела [е мануше] сар праведно ама на  баши лескере постапке“ (Рим. 4:6). А јавера вакерена кај те шај те спасине тут, ваљани те џа ко тхана кола со мислинена пе кај тане света хем те кере јавера шукар буќа. Ола шај цитиринена о лафија таро Јаков 2:24: „О мануш ка овел праведно англо Девел башо пле постапке, а на само баши пли вера“.

⁹ Адалеске со иси различна верувања, несаве библиска изучувачија мислинена кај о Павле хем о Јаков на согласинѓе пе башо адава сој тано поважно, и вера или о постапке. Спрема несаве свештеникија, о Павле верујнела сине кај те шај о Девел те дикхел ки туте сар праведно ваљани туке само вера. Ама, о Јаков мислинела сине кај о постапке тане бут поважна. Башо акава, јекх религиозно професори вакерѓа: „О Јаков на халило соске о Павле мислинѓа кај некој шај [те овел праведно англо Девел] само баши пли вера, а на башо пле постапке“. Ама кеда о Павле хем о Јаков пишинѓе пле писмија, о Јехова е солдујен водинѓа пле духоја (2. Тим. 3:16). Значи, мора те овел јекх логично начин те шај те објаснинел пе акаја разлика. Те шај те хаљова акава ваљани те дикха о контекст.

10. Башо кола „постапке“ главно керѓа лафи о Павле? (Римјања 3:21, 28). (Дикх хем и слика.)

¹⁰ Башо кола „постапке“ керѓа лафи о Павле ко Римјања 3-то хем 4-то поглавје? Ов главно мислинела сине башо „постапке со родела лен о Закони“ — е Мојсеескоро закони, кова со о Јехова денѓа ле е Израелцонге ки планина Синај. (Читин Римјања 3:21, 28.) Изгледа несаве еврејска христијаненге ко е Павлескоро време сине пхаро те прифатинен кај на ваљани више те икерен пе ко е Мојсеескоро закони. Значи, о Павле користинѓа е Авраамескоро пример те докажинел кај те шај некој те овел праведно англо Девел на ваљани те керел „о постапке со родела лен о Закони“, него ваљани те овел ле вера. Акава бут охрабринела амен соске сикавела  кај о Девел шај те дикхел амен сар праведна. Ако развинаја вера ко Девел хем ко Христос, адава ка поможинел аменге те овел амен е Девлескоро одобрување.

11. Башо кола „постапке“ керѓа лафи о Јаков?

¹¹ Тари јавер страна о „постапке“ коленге со керѓа лафи о Јаков ко 2-то поглавје нане о „постапке со родела лен о Закони“ коленге со керѓа лафи о Павле. О Јаков керѓа лафи башо постапке или активностија кола со о христијања керена ко пумаро секојдневно живото. Асавке постапке сикавена дали јекхе христијане иси ле чачутни вера ко Девел или на. Те дикха дуј примерија со користинѓа лен о Јаков.

12. Сар о Јаков објаснинѓа кај и вера хем о постапке тане поврзиме? (Дикх хем и слика.)

¹² Ко пло прво пример, о Јаков керѓа лафи башо адава кобор тано важно о христијања те на овен пристрасна спрема о јавера. Те шај те истакнинел акаја мисла, ов керѓа лафи башо јекх мануш кова со понашинѓа пе шукар јекхе барвалеа, а на сине љубезно јекхе чоролеа. О Јаков објаснинѓа кај акава мануш шај те вакерел кај иси ле вера, ама лескере постапке на сикавена адава (Јак. 2:1-5, 9). Ко пло дујто пример, о Јаков керѓа лафи башо јекх мануш кова со дикхља кај лескоро пхрал или пхен нане лен со те уравен или со те хан а на керела ништо те шај те поможинел лен. Чак ако адава мануш вакерела кај иси ле вера, лескере постапке на сикавена адава. Адалеске, лескири вера на врединела. Сар со пишинѓа о Јаков: „И вера бизо постапке тани мули“ (Јак. 2:14-17).

13. Коле примереа сикавѓа о Јаков кај амари вера ваљани те дикхел пе таро амаре постапке? (Јаков 2:25, 26).

¹³ О Јаков вакерѓа кај и Раав тани шукар пример која со пле постапкенцар сикавѓа кај иси ла вера. (Читин Јаков 2:25, 26.) Ој шунѓа башо Јехова хем халили кај ов  поможинела е Израелцон (Ис. Нав. 2:9-11). Лакере постапке сикавѓе кај иси ла вера аѓаар со заштитинѓа дује израелско шпионен кеда ленгоро живото сине ки опасност. Адалеске, баши акаја несовршено џувли која со на сине Израелка вакерела пе кај сине праведно исто сар о Авраам. Таро лакоро пример сикљоваја кобор тано важно амаре постапкенцар те сикава кај иси амен вера.

14. Соске шај те вакера кај адава со пишинѓе о Павле хем о Јаков нане спротивно јекх јекхеа?

¹⁴ Значи, о Павле хем о Јаков керѓе лафи баши вера хем постапке таро дуј различна стране. О Павле вакерѓа е еврејско христијаненге кај никогаш нане те угодинен е Јеховаске само адалеа со ка икерен пе ко е Мојсеескоро закони. А о Јаков мангља те истакнинел кобор тано важно са о христијања те сикавен вера аѓаар со ка керен шукарипе е јаверенге.

15. Ко кола начинија шај те сикава вера преку амаре постапке? (Дикх хем и слика.)

¹⁵ О Јехова на вакерела кај, те шај те дикхел ки аменде сар праведна амен мора те кера о иста буќа со керѓа о Авраам. Уствари, иси бут начинија сар шај те сикава амари вера преку амаре постапке. Шај љубезно те доџакера е невен ко собрание хем те поможина е пхрален хем е пхењен коленге со ваљани помош. Освен адава, шај те кера шукарипе амаре фамилијаке, соске акала тане о буќа со о Девел ка одобринел лен хем ка благословинел лен (Рим. 15:7; 1. Тим. 5:4, 8; 1. Јов. 3:18). Јекх таро најважна начинија сар шај те сикава кај иси амен вера тано аѓаар со ревно ка проповедина о шукар хабери (1. Тим. 4:16). Сарине шај амаре постапкенцар те сикава кај иси амен вера ко е Јеховаскере ветувања хем кај лескоро начин сар постапинела тано најшукар. Ако кераја адава, шај те ова сигурна  кај о Девел ка дикхел ки аменде сар праведна хем ка ова лескере амала.

16. Сар и надеж со сине е Аврааме сине поврзими лескере вераја?

¹⁶ Ко Римјања 4-то поглавје тани истакними јекх јавер важно поука која со шај те сикљова ла таро Авраам — кобор тани важно и надеж. О Јехова ветинѓа кај преку о Авраам „бут народија“ ка овен благословиме. Замислин која шужи надеж сине е Аврааме! (1. Мој. 12:3; 15:5; 17:4; Рим. 4:17). Ама накхле бут берша, е Аврааме сине ле 100 берш, е Сара 90 берш, а о чхаво со сине ленге ветимо панда на добинѓе ле. Ола шај сине те мислинен кај нашти те овел лен чхаве адалеске сој тане бут пхуре. Акава сине баро испит е Авраамеске. Сепак, баши леске читинаја: „Адалеске со сине ле надеж, сине ле вера кај ка овел дад буте народонге“ (Рим. 4:18, 19). Ко крајо, лескири надеж исполнинѓа пе. Бијандило леске о Исак — о чхаво коле со бут време аџикерѓа (Рим. 4:20-22).

17. Котар џанаја кај о Девел шај те дикхел амен сар праведна хем кај шај те ова лескере амала?

¹⁷ Шај те овел амен е Девлескоро одобрување хем те ова лескере праведна амала, исто сар со сине о Авраам. Адава истакнинѓа о Павле кеда пишинѓа: „О лафија ’дикхља праведно ки лесте‘ на сине пишиме само [башо Авраам], него хем аменге коленде со ка дикхел сар праведна адалеске со верујнаја ки околесте со воскреснинѓа е Исусе таро муле, амаре Господаре“ (Рим. 4:23, 24). Исто сар о Авраам, ваљани те овел амен вера ко Јехова, те постапина шукар хем те овел амен надеж. О Павле ко 5-то поглавје продолжинѓа те керел лафи баши надеж, а адава ка дикха повише ки следно статија.