1. Со мора те керен о пхраља те шај те успејнен те овен зрела христијања?

 О АПОСТОЛ Павле поттикнинѓа е пхрален таро Коринт: „Пхраљален ма размислинен сар тикне чхаве, него овен... возрасна ко хаљојбе“ (1. Кор. 14:20). Са о пхраља авдиве ваљани те применинен акава совет. Те шај те успејнен ко акава, ола мора те сикљовен те овен послушна ко е Девлескере законија хем те применинен о библиска начелија ко са со керена (Лука 2:52). Соске тано добором важно о терне пхраља те овен зрела христијања?

2-3. Соске тано важно јекх терно пхрал те овел зрело христијани?

² Е пхрален иси лен бут важна одговорностија хем ки фамилија хем ко собрание. Терне пхраљален, сигурно размислинѓен башо одговорностија со шај ка овен тумен ки иднина. Шај чхивѓан туке цел те ове пионери или слуга-помошнико, а понадари хем сар старешина. Исто аѓаар, шај мангеа те женине тут хем те овен тут чхаве (Еф. 6:4; 1. Тим. 3:1). Те шај те исполнине акала целија хем те ове успешно, ваљани те ове зрело христијани. b

³ Со ка поможинел туке те ове зрело христијани? Ваљани те сикљове несаве важна вештине. Тегани, со шај те кере панда акана те шај те ове спремно башо одговорностија со шај ка овен тут ки иднина хем успешно те кере лен?

4. Коте шај те аракхе шукар примерија пали коленде со шај те џа? (Дикх хем и слика.)

⁴ Бирин шукар примерија пали коленде со ка џа. И Библија тани пхерди шукар примеренцар колендар со о терне пхраља  шај те сикљовен. Акала мурша таро пурано време мангле е Девле хем керена сине различна задаче џикоте грижинена пе сине лескере народоске. Исто аѓаар, шај те аракхе шукар примерија ки тли фамилија хем ко собрание (Евр. 13:7). А исто шај бут те сикљове таро совршено пример е Исус Христосескоро (1. Пет. 2:21). Џикоте проучинеа акала примерија, размислин башо ленгере шуже особине (Евр. 12:1, 2). Пало адава одлучин ко кола начинија шај те џа пало ленгоро пример.

5. Сар шај те овел тут способност те проценине, хем соске адава тано важно? (Псалм 119:9).

⁵ Развин хем ма нашав и способност те проценине о буќа (Изр. 3:21). Јекх мануш коле со иси ле способност те проценинел о буќа, шукар размислинела англедер те керел нешто. Адалеске, де тутар са те развине хем те на нашаве акаја способност. Соске? Бут терне ко свето анена одлуке спрема пло мислење, или дозволинена ленгере чувствија те влијајнен упро ленгере постапке (Изр. 7:7; 29:11). Исто аѓаар, о медиумија шај те влијајнен бут упри туте. Ама сар шај те развине способност те проценине о буќа? Почмин аѓаар со ка сикљове о библиска начелија хем пало адава размислин соске ола тане тле шукарипаске. Пало адава, користин акала начелија те шај те ане одлуке кола со ка радујнкерен е Јехова. (Читин Псалм 119:9.) Ако развинеа акаја важно вештина, адава бут ка поможинел туке те ове зрело христијани (Изр. 2:11, 12; Евр. 5:14). Размислин сар и способност те проценине о буќа ка поможинел туке ко акала дуј ситуацие: 1) Ко адава сар понашинеа тут е пхењенцар хем 2) Кеда анеа одлуке башо адава сар ка ураве тут хем сар ка дотерине тут.

6. Сар шај и способност проценибаске те поможинел јекхе терне пхралеске те поштујнел е пхењен?

⁶ И способност те проценине ка поможинел туке те поштујне е џувлен. Нормално тано хем прикладно јекх терно пхрал те интересинел пе јекхе пхењаке хем те мангел те овел лаја ки врска. Ама, јекх пхрал со иси ле способност те проценинел никогаш нане те вакерел, те пишинел или те керел нешто колеа со ка керел несави пхен те мислинел кај интересинела пе лаке, освен ако чаче мангела те  лел пе лаја (1. Тим. 5:1, 2). Ако запознајнела пе јекхе пхењаја, ов ка заштитинел лакоро углед аѓаар со никогаш нане те овел лаја коркори бизо те овел ленцар некој (1. Кор. 6:18).

7. Сар шај и способност проценибаске те поможинел јекхе терне пхралеске кеда анела одлуке сар ка уравел пе хем сар ка дотеринел пе?

⁷ Јекх јавер начин сар шај јекх терно пхрал те сикавел кај иси ле способност те проценинел, тано аѓаар со шукар ка биринел со ка уравел хем сар ка дотеринел пе. Бут џене таро окола со керена и мода хем рекламиринена ла тане мануша со на служинена е Јеховаске или живинена неморално. Адалеске, о шеја со керена лен тане бут тесна или керена о мурша те изглединен сар о џувља. Кеда одлучинела со те уравел, јекх терно пхрал со напредујнела ки христијанско зрелост, мукхела те водинен ле о библиска начелија хем о шукар примерија таро собрание. Ов шај те пучел пе: „Дали ме одлуке сикавена кај иси ман способност те проценинав хем кај поштујнава е јаверен? Дали таро адава сар уравава ман о јавера шај јасно те дикхен кај служинава е Девлеске?“ (1. Кор. 10:31-33; Тит 2:6). Јекхе терне пхрале коле со иси ле способност те проценинел, нане те поштујнен ле само о пхраља хем о пхења него исто аѓаар лескоро небесно Дад.

8. Со ка поможинел јекхе терне пхралеске те овел доверливо?

⁸ Ов доверливо. Јекх терно пхрал кова сој доверливо, шукар грижинела пе башо са пле одговорностија (Лука 16:10). Размислин башо совршено пример е Исусескоро. Ов секогаш сине внимателно хем одговорно кеда керела сине о задаче со добинѓа лен таро Јехова. Ов керела сине секоја задача со денѓа ле о Јехова, чак кеда адава на сине локхо. Ов мангела сине е манушен — посебно пле ученикон — хем спремно денѓа пло живото ленге (Јован 13:1). Ако мангеа те џа пало е Исусескоро пример, де тутар са те кере секоја задача со добинеа ла. А ако на сиан сигурно сар те кере ла, ов понизно хем роде помош таро зрела пхраља. Ма фрде и бути тле шерестар само те шај те овел завршими (Рим. 12:11). Наместо адава, кер секоја задача „сар е Јеховаске, а на е манушенге“ (Кол. 3:23). Џанѓола пе ту на сиан совршено, адалеске ов скромно хем признајн секоја грешка со ка кере ла (Изр. 11:2).

9. Соске јекх терно пхрал ваљани те овел ле корисна вештине?

⁹ Те шај те ове зрело христијани, ваљани те сикљове корисна вештине. Ола ка поможинен туке те прифатине одговорностија ко собрание, те аракхе бути хем те ачхове ки лате, те грижине тут коркори туке хем тле фамилијаке хем те ове шукар е јаверенцар. Те дикха некобор таро акала важна вештине.

10-11. Сар адава со јекх терно пхрал ка сикљол шукар те читинел хем те пишинел ка користинел леске хем е собраниеске? (Псалм 1:1-3). (Дикх хем и слика.)

¹⁰ Сикљов шукар те читине хем те пишине. И Библија вакерела кај окова со секова диве читинела е Девлескоро Лафи хем размислинела  башо адава тано успешно хем радосно. (Читин Псалм 1:1-3.) Адава со редовно ка читинел и Библија, пошукар ка џанел сар размислинела о Јехова, а адава ка поможинел леске јасно те размислинел хем те применинел адава со читинела (Изреки 1:3, 4). Ко собрание ваљанена асавке пхраља. Соске?

¹¹ Е пхраленге хем е пхењенге тане потребна пхраља кола со шај те поучинен хем те ден библиска советија (Тит 1:9). Ако џанеа шукар те читине хем те пишине, ка шај те спремине говорија хем коментарија кола со ка овен корисна е јаверенге хем коленцар со шај те бајраре ленгири вера. Исто аѓаар, шај те кере корисна белешке џикоте проучинеа хем шунеа о говорија со икерена пе ко состанокија хем ко конгресија. Асавке белешке шај те поможинен туке те бајраре тли вера хем те охрабрине е јаверен.

12. Со ка поможинел тут те сикљове те кере лафи е јаверенцар?

¹² Сикљов сар те кере лафи е јаверенцар. Јекх христијани мора те сикљол акаја вештина. Окова со џанела сар те керел лафи е јаверенцар, шунела лен хем хаљовела ленгере мисле хем чувствија (Изр. 20:5). Ов шај те сикљол сар некој размислинела хем осетинела пе преку о гласо, о изразија ко муј хем о говор е телоскоро. Акава нашти те сикљове ако на сиан манушенцар. Ако цело време користинеа електронска уредија те шај те комуницирине е јаверенцар, сар на пример преку пораке, тли способност кере те некасаја лично лафи шај те слабонел. Адалеске, кер туке прилике те кере лафи е јаверенцар лично (2. Јов. 12).

13. Со јавер мора те сикљол јекх терно христијани? (1. Тимотеј 5:8). (Дикх хем и слика.)

¹³ Сикљов коркори те грижине тут туке. Јекх зрело христијани мора коркори песке те грижинел пе хем пле фамилијаке. (Читин 1. Тимотеј 5:8.) Ко несаве пхувја, о терне пхраља шај те сикљовен занати таро пумаро дад или некастар јаверестар тари фамилија. А ко јавера пхувја о терне шај те сикљовен занати или несаве јавера вештине ки средно школа. Бизи разлика сар тано ки тли пхув, шукар тано те сикљове вештине кола со ка поможинен туке те аракхе бути (Апо. 18:2, 3; 20:34; Еф. 4:28). Трудин тут те ове пенџардо сар некој сој буќарно хем сар некој со завршинела адава со почминѓа. Ако кереа акава, побаре ка овен о шансе кај ка аракхе бути хем кај ка ачхове ки лате. О особине хем о вештине коленге со керѓем лафи ки акаја статија тане исто аѓаар важна јекхе терне пхралеске те шај те исполнинел пле одговорностија ки иднина. Те дикха несаве таро адала одговорностија.

14. Сар шај јекх терно пхрал те спреминел пе баши полновремено служба?

¹⁴ Полновремено служба. Бут зрела христијања почминѓе е полновремено службаја кеда сине терне. И пионерско служба поможинела јекхе тернеске шукар те соработинел различна манушенцар. Исто аѓаар, адава поможинела леске мудро те користинел пле паре со заработинела лен хем те на трошинел повише таро адава со иси ле (Фил. 4:11-13). Шукар темели баши полновремено служба тани и помошно пионерско служба. Бут џене служинена несаво време сар помошна пионерија, а адава поможинела ленге те спреминен пе те служинен сар општа пионерија. И пионерско служба шај те пхравел туке о удар башо јавера да врсте полновремено служба, сар сој те служине ки изградба или ко Бетел.

15-16. Сар шај јекх терно пхрал те исполнинел о условија те шај те служинел ко собрание?

¹⁵ Слуга-помошнико или старешина. Са о пхраља ваљани те трудинен пе те исполнинен о условија те служинен e пхраленге хем пхењенге сар старешине. И Библија вакерела кај окова со иси ле асавки цел „мангела бут шукар бути те керел“ (1. Тим. 3:1). Англедер те служинел сар старешина, јекх пхрал мора те исполнинел о условија те служинел сар слуга-помошнико. О слуга-помошникија поможинена е старешиненге ко бут практична начинија. А ола заедно е старешиненцар понизно служинена е пхраленге хем пхењенге хем ревносно проповединена о шукар хабери. О терне пхраља шај те исполнинен о условија башо слуга-помошникија чак англедер те овел лен 20 берш. А јекх слуга-помошнико со исполнинела о условија, шај те овел старешина таро 20 берш наупре.

¹⁶ Сар шај те исполнине о условија те служине сар слуга-помошнико а покасно сар старешина? Нане несави конкретно формула баши адава. Ама ма бистре, акала условија аракхљона ки Библија хем темелинена пе ко мангипе спрема о Јехова, спрема тли фамилија хем спрема о собрание (1. Тим. 3:1-13; Тит 1:6-9; 1. Пет. 5:2, 3). Трудин тут те хаљове секова јекх таро адала условија. Молин тут е Јеховаске те поможинел туке те исполнине лен. c

17. Сар шај јекх терно пхрал те спреминел пе те овел ром хем поглавари? (Дикх хем и слика.)

¹⁷ Ром хем поглавари. Сар со вакерѓа о Исус, несаве зрела христијања одлучинена те на женинен пе (Мат. 19:12). Сепак, ако одлучинеа те женине тут, ка овен тут јавера да одговорностија сар ром хем сар поглавари (1. Кор.  11:3). О Јехова очекујнела е роместар те мангел пле ромња хем те грижинел пе башо лакере физичка, емоционална хем духовна потребе (Еф. 5:28, 29). Ки акаја статија сиклилем кај ваљани те развине и способност те проценине, те овел тут поштовање спрема о џувља хем те ове доверливо, акала особине хем вештине ка поможинен туке те ове шукар ром. Аѓаар ка ове шукар спремимо те исполнине тле улоге сар ром хем сар поглавари.

18. Сар шај јекх терно пхрал те спреминел пе те овел дад?

¹⁸ Дад. Откеда ка женине тут, шај ка ове дад. Со шај те сикљове таро Јехова башо адава сар те ове шукар дад? (Еф. 6:4). О Јехова вакерѓа пле чхавеске кај мангел ле хем кај керела ле радосно, ов на гаравѓа лестар адава (Мат. 3:17). Ако овеа дад, редовно уверин тле чхавен кај мангеа лен. Спремно пофалин лен башо шукар буќа со керена. О дада кола со џана пало е Јеховаскоро пример поможинена пумаре чхавенге те овен зрела христијања. Шај панда акана те спремине тут баши акаја улога аѓаар со мангипаја ка грижине тут е јаверенге тари тли фамилија хем таро тло собрание хем аѓаар со ка сикаве кај мангеа лен хем ценинеа лен (Јован 15:9). Адава ка поможинел туке те исполнине тли улога со шај ка овел тут ки иднина сар ром хем дад. Џи тегани, ка ове скапоцено е Јеховаске хем бари помош тле фамилијаке хем е собраниеске.

19-20. Со ка поможинел е терне пхраленге те овен зрела христијања? (Дикх и слика тари насловно страна.)

¹⁹ Терне пхраљален, нане таро јекх пути те овен зрела христијања. Ваљани те биринен шукар примерија пали коленде со ка џан, те развинен способност те проценинен, те овен доверлива, те сикљовен корисна вештине хем те спреминен тумен башо одговорностија со ка овен тумен ки иднина.

²⁰ Кеда размислинена башо адава ко со са ваљани те керен бути шај мислинена кај адава туменге бут пхаро. Ама тумен шај те успејнен. Ма бистрен кај о Јехова бут мангела те поможинел тумен (Иса. 41:10, 13). Џанѓола пе, исто аѓаар о пхраља хем о пхења да таро собрание ка поможинен туменге. Кеда ка исполнинен тумари цел те овен зрела христијања, ка овел тумен шужо хем среќно живото. Терне пхраљален, бут мангаја тумен! Џи тегани, џикоте керена бути те овен зрела христијања о Јехова нека благословинел тумен (Изр. 22:4).