1. Соске шај те пхена кај е Авраамескири надеж на сине џабе?

 О ЈЕХОВА ветинѓа пле амалеске е Авраамеске кај преку лескоро потомство ка овен благословиме са о народија ки пхув (1. Мој. 15:5; 22:18). Адалеске со е Аврааме сине ле бари вера ко Девел, ов сине уверимо кај е Девлескоро ветување чаче ка исполнинел пе. Сепак, кеда е Аврааме сине ле 100 берш, а лескере ромња 90, акале верна слуген панда на сине лен чхаво (1. Мој. 21:1-7). Ама, ки Библија пишинела: „Адалеске со [е Аврааме] сине ле надеж, сине ле вера кај ка овел дад буте народонге, сар со сине вакердо“ (Рим. 4:18). Џанаја кај и надеж со сине е Аврааме исполнинѓа пе. Бијандило леске о Исак — о чхаво коле со добором време аџикерѓа. Соске о Авраам сине уверимо кај о Јехова ка исполнинел пло ветување?

2. Соске о Авраам сине сигурно кај е Јеховаскоро ветување ка исполнинел пе?

² Адалеске со о Авраам сине паше амал е Јеховаја, ов сине „целосно уверимо кај адава со [о Девел] ветинела“ ка исполнинел (Рим. 4:21). Адалеске со сине ле вера, о Авраам сине одобримо таро Девел хем о Јехова дикхља ки лесте сар праведно мануш (Јак. 2:23). Сар со пишинела ко Римјања 4:18, е Авраамескири вера хем и надеж сине поврзиме. Акана те дикха со вакерѓа о апостол Павле баши надеж, ко Римјања 5-то поглавје.

3. Со објаснинела о Павле баши надеж?

 ³ О Павле објаснинѓа соске шај те ова сигурна кај амари „надеж нане те разочаринел“ амен (Рим. 5:5). Исто аѓаар ов поможинела аменге те хаљова сар шај амари христијанско надеж те овел позорали. Џикоте дикхеа о процес кова со о апостол Павле опишинѓа ле ко Римјања 5:1-5, размислин баши туке лично. Џикоте кереа адава веројатно ка хаљове кај сар со накхља о време тли христијанско надеж ули панда посилно. Исто аѓаар, акаја статија ка поможинел туке те дикхе сар шај тли надеж те овел панда позорали таро сој акана. Прво, те кера лафи баши бут шужи надеж колаке со о Павле вакерѓа кај нане те разочаринел.

4. Башо со керела пе лафи ко Римјања 5:1, 2?

⁴ Читин Римјања 5:1, 2. О Павле пишинѓа акала лафија е собраниеске ко Рим. О пхраља хем о пхења адари запознајнѓе е Јехова хем е Исусе, сикавѓе вера хем уле христијања. Адалеске со сине лен вера, о Девел дикхља ки ленде сар праведна хем помазинѓа лен пле духоја. Аѓаар, ола добинѓе бут шужи надеж колаке со шај сине те овен сигурна кај ка исполнинел пе.

5. Сави надеж иси е помазаникон?

⁵ О Павле покасно пишинѓа е помазиме христијаненге таро Ефес баши надеж која со о Девел денѓа лен. Ки адаја надеж сине вклучимо те добинен „о наследство башо света“ (Еф. 1:18). Исто аѓаар, о Павле вакерѓа е Колошаненге коте ка исполнинел пе ленгири надеж. Ов викинѓа ла „надеж која сој гаравди туменге ко небо“ (Кол. 1:4, 5). Значи, е помазиме христијанен иси лен надеж те воскреснинен башо вечно живото ко небо, коте со ка владинен заедно е Христосеа (1. Сол. 4:13-17; Отк. 20:6).

6. Со вакерѓа јекх помазимо пхрал баши надеж?

⁶ О помазиме христијања ценинена и надеж со иси лен. Јекх лендар, о пхрал Фредерик Франц, кова со верно служинѓа е Девлеске бут берша, ко 1991 берш вакерѓа  сар осетинела пе баши пли надеж: „Амари надеж тани сигурно хем целосно ка исполнинел пе упро секова јекх таро 144.000 таро тикно стадо хем адава ки побари мера таро адава со замислинѓем аменге... [Амен] панда ценинаја амари надеж... Кобор повише аџикераја ла, добором повише ценинаја ла. Врединела те аџикера ла, чак ако ваљани те аџикера милиоња берша. Ме ценинава амари надеж повише таро било кеда англедер“.

7-8. Сави надеж иси повише слуген е Јеховаскере? (Римјања 8:20, 21).

⁷ Повише џене со служинена е Јеховаске авдиве, иси лен појавер надеж. Адаја тани и исто надеж со сине е Аврааме — вечно живото ки пхув коте со ка владинел е Девлескоро Царство (Евр. 11:8-10, 13). О Павле пишинѓа сави шужи иднина иси околен со аџикерена акаја надеж. (Читин Римјања 8:20, 21.) Со највише свиџинѓе пе туке кеда прво пути дознајнѓан со вакерела и Библија баши иднина? Дали тано адава со јекх диве ка ове совршено хем никогаш више нане те грешине? Или пхердиле тле јакхја асва кеда дознајнѓан кај тле мангле со муле палем ка уштен ко рај ки пхув? Акала буќа со дознајнѓан лен денѓе тут причина едвај те аџикере те исполнинен пе и надеж сој аменге денди.

⁸ Бизи разлика дали иси амен надеж те живина вечно ко небо или ки пхув, акаја бут шужи надеж керела амен радосна. Хем акаја надеж со керела амен радосна шај те овел панда позорали. О Павле објаснинѓа сар шај те случинел пе акава. Те дикха со пишинѓа баши амари надеж. Адава ка поможинел амен те ова поувериме кај амари надеж понадари да ка бајрол хем кај никогаш нане те разочаринел амен.

9-10. Сар со шај те дикха таро пример е Павлескоро, со шај те очекујнен о христијања? (Римјања 5:3). (Дикх хем и слика.)

⁹ Читин Римјања 5:3. Приметин кај о неволје шај те поможинен аменге амари надеж те овел панда посилно. Акава шај те овел аменге хари чудно. Ама и реалност тани кај са е Христосескере ученикија шај те очекујнен  неволје. Размислин башо е Павлескоро пример. Е пхраленге таро Солун ов вакерѓа: „Кеда сием сине туменцар, англедер вакерѓем туменге кај ка трпина неволје хем сар со џанена баш адава случинѓа пе“ (1. Сол. 3:4). А е пхраленге таро Коринт пишинѓа: „На мангаја пхраљален те на џанен башо неволје со случинѓе пе аменге... На сием сине сигурна дали ка ачхова џивде“ (2. Кор. 1:8; 11:23-27).

¹⁰ Авдиве да о христијања шај те очекујнен разна неволје (2. Тим. 3:12). Сар тано туја? Дали доживинѓан несави неволја адалеске со сикавѓан вера ко Исус хем почминѓан те џа пали лесте? Шај тле амала хем тли фамилија асана туке. Шај чак понашинена пе туја лошно. Или шај ки бути иси тут проблемија адалеске со мангеа ко са те постапине чесно? (Евр. 13:18). Дали сине тут прогонство таро властија адалеске со сведочинеа е јаверенге баши тли надеж? Бизи разлика саве неволје ка овен амен, о Павле вакерѓа кај ваљани те ова радосна. Соске?

11. Соске ваљани те ова одлучна бизи разлика саве пхарипа ка овен амен?

¹¹ Шај те ова радосна кеда иси амен неволје, соске адава шај те поможинел аменге те развина јекх важно особина. Сар со пишинела ко Римјања 5:3: „И неволја анела истрајност“. Са о христијања ка доживинен несави неволја. Адалеске сарине ваљани те ова одлучна те истрајна бизи разлика сави неволја ка овел амен. Само тегани ка шај те дикха сар амари надеж исполнинела пе. На мангаја те ова сар окола коленге со о Исус мислинѓа кеда керѓа лафи башо семе со пело ко тхан пхердо баренцар. Ола ко почеток радосно прифатинена о хабери, ама кеда ало прогонство или неволја ола одма пеле (Мат. 13:5, 6, 20, 21). Точно тано кај нане локхо, а ни шукар те овел амен неволје или противибе. Ама ако истрајнаја, адава ка овел башо амаро шукарипе. Ко саво начин?

12. Сар поможинела аменге и истрајност кеда иси амен неволје?

¹² О Јаков истакнинѓа сар ка користинел аменге адава со истрајнаја ко неволје. Ов пишинѓа: „Мукхен и истрајност нека завршинел пли бути те шај те овен совршена хем целосна, бизи нисави маана“ (Јак. 1:2-4). Значи, о Јаков вакерѓа кај и истрајност иси ла пли цел. Ој шај те поможинел амен те ова пострплива, те овел амен побари вера хем побари доверба ко Јехова. Ама, и истрајност поможинела аменге панда ко јекх важно начин.

13-14. Џи ко со ингарела и истрајност хем сар амари надеж тани поврзими адалеа? (Римјања 5:4).

¹³ Читин Римјања 5:4. О Павле вакерѓа кај и истрајност керела те ова „одобриме таро Девел“. Значи, ако сием истрајна тегани о Девел ка прифатинел амен. Акава на значинела кај о Јехова радујнела пе кеда иси тут неволје или проблемија. Наместо адава ов тано радосно адалеске со ту верно истрајнеа. Бут охрабринела амен адава со џанаја кај кеда сием истрајна адава радујнела е Јехова хем одобринела амен (Пс. 5:12).

¹⁴ Ма те бистра кај о Авраам верно истрајнѓа кеда сине испитими лескири вера хем адалеске о Девел сине задоволно лестар. О Јехова вакерѓа кај о Авраам тано лескоро амал хем ки лесте дикхела сине сар праведно мануш (1. Мој. 15:6; Рим. 4:13, 22). И исто бути шај те овел аменцар да. Дали о Девел ка прифатинел амен, на зависинела таро адава кобор сием зафатиме ки служба, а ни таро адава саве одговорностија иси амен. Него ка овел амендар задоволно ако верно истрајнаја чак ко пхарипа. А секова јекх амендар шај те истрајнел бизи разлика таро амаре берша, околностија или  способностија. Дали моментално иси тут несаво проблеми хем верно истрајнеа? Ако оја, тегани ма бистре кај кереа туке шукар анав англо Девел. Адава со џанаја кај о Девел прифатинела амен шај бут те влијајнел упри аменде. Адава шај те зојракерел амари надеж.

15. Со вакерѓа о Павле ко Римјања 5:4, 5, хем соске несаве шај те овен буниме башо акала лафија?

¹⁵ Сар со објаснинѓа о Павле, о Јехова тано задоволно амендар кеда ачховаја леске верна хем истрајнаја ко неволје. Приметин со вакерела понадари: „Адава со сием одобриме таро Девел анела надеж, а и надеж нане те разочаринел“ (Рим. 5:4, 5). Акала лафија шај несавен те бунинен. Соске? Адалеске со англедер ко Римјања 5:2 о Павле пишинѓа кај о христијања ко Рим више сине лен надеж — „надеж кај ка овен дело тари е Девлескири слава“. Адалеске несаве шај те пучен: „Ако акале христијанен више сине лен надеж, тегани соске о Павле спомнинела палем и надеж ко следна стихија“?

16. Сар почминела некасте те бајрол и надеж? (Дикх хем и слика.)

¹⁶ Ако иси амен ки годи кај и надеж шај те бајрол тегани ка хаљова со мангља те вакерел о Павле. Те вакера јекх пример: Дали сетинеа тут кеда прво пути шунѓан баши бут шужи надеж таро е Девлескоро Лафи? Ко адава време и идеја те живине вечно ко рај ки пхув сине туке бут шужи, ама на сиан сине сигурно дали адава чаче ка овел. Ама со повише сикљовеа сине башо Јехова хем башо библиска ветувања, овеа сине посигурно кај акаја надеж чаче ка исполнинел пе.

17. Сар тли надеж бајрола чак откеда крстинѓан тут?

¹⁷ Чак откеда крстинѓан тут тли надеж понадари да барили џикоте продолжинѓан са повише те сикљове башо Јехова хем те ове позрело ко духовно поглед (Евр. 5:13—6:1). Веројатно доживинѓан адава сој спомнимо ко Римјања 5:2-4. Доживинѓан разна неволје  ама истрајнѓан хем осетинѓан кај о Јехова тано задоволно тутар. Адалеске со џанеа кај о Девел мангела тут хем тано задоволно тутар, акана иси тут панда побари причина те очекујне о буќа со ветинѓа лен. Тли надеж ули панда позорали него со сине ко почеток. Ој туке акана пореално хем панда повише ценинеа ла. Са повише влијајнела упри туте хем адава ко секова дело таро тло живото — сар понашинеа тут те фамилијаја, саве одлуке анеа хем чак упро адава сар користинеа тло време.

18. Сави гаранција дела амен о Јехова?

¹⁸ О Павле спомнинела јекх важно мисла баши надеж со иси тут откеда о Девел одобринела тут. О Јехова уверинела тут кај тли надеж ка исполнинел пе. Соске шај те ове сигурно ко адава? О Павле спомнинела панда јекх гаранција со денѓа о Девел е христијаненге: „И надеж нане те разочаринел, соске е Девлескоро мангипе пхерѓа амаре виле преку лескири сила, која сој аменге денди“ (Рим. 5:5). Шај те ове сигурно кај и надеж сој туке лично денди ка исполнинел пе.

19. Ко со шај те ове сигурно кеда керела пе лафи баши тли надеж?

¹⁹ Размислин башо ветување кова со о Јехова денѓа е Авраамеске хем башо адава сар ов одобринѓа ле хем дикхља ки лесте сар амал. Е Авраамескири надеж на сине џабе. Ки Библија пишинела: „Откеда о Авраам сикавѓа стрпливост, ов добинѓа адава ветување“ (Евр. 6:15; 11:9, 18; Рим. 4:20-22). Шај те ова сигурна кај ов на сине разочаримо. Ту да шај те ове уверимо кај ако ачховеа верно ка исполнинел пе адава ко со надинеа тут. Тли надеж тани реално, ваљани те радујне тут а на те разочарине тут! (Рим. 12:12). О Павле пишинѓа: „О Девел, кова со дела надеж, нека дел тумен радост хем мир соске верујнена лесте, хем о свети дух нека бајрарел тумари надеж“ (Рим. 15:13).