1-2. Со мора те керел некој англедер те крстинел пе?

 КО ПОСЛЕДНА панџ берш, повише таро јекх милиони мануша крстинѓе пе хем уле е Јеховаскере сведокија. Бут џене лендар, исто сар о Тимотеј кова со служинела сине е Јеховаске ко прво веко, сине сикавде башо чачипе „панда таро тикнипе“ (2. Тим. 3:14, 15). Јавера запознајнѓе е Јехова сар побаре, а несаве ко попхуре берша. На пример, јекх ромни која со проучинѓа и Библија е Јеховаскере сведоконцар, крстинѓа пе кеда сине 97 берш!

² Ако проучинеа и Библија некасаја таро е Јеховаскере сведокија или ако тле родителија сикавена тут башо чачипе панда таро тикнипе, дали размислинеа те крстине тут? Адаја тани јекх бут шукар цел. Ама англедер те крстине тут, ваљани те де завет е Јеховаске. Ки акаја статија ка дикха со значинела те де завет е Девлеске, јавере лафенцар те де лафи е Јеховаске кај ка служине леске цело живото. Исто аѓаар, ој ка поможинел туке те хаљове соске на ваљани те дара те кере адава чекори хем те крстине тут кеда ка ове спремно башо адава.

СО ЗНАЧИНЕЛА ТЕ ДЕ ЗАВЕТ Е ДЕВЛЕСКЕ?

3. Вакер библиска примерија таро мануша кола со сине ко завет е Јеховаја.

³ Спрема и Библија, кеда некој дела сине завет е Јеховаске, ов сине одвојмо баши јекх посебно задача. О Израелција сине ко завет е Јеховаја сар нација. Ама, несаве поединција таро народо сине ко завет е Јеховаја ко јекх посебно начин. На пример, о Арон пхиравела сине „о свето знако башо завет“ — јекх златно плочка ко англуно дело  таро лескоро турбани. Адаја златно плочка сикавела сине кај ов сине биримо те служинел е Јеховаске ко јекх посебно начин — сар првосвештенико е израелско народоске (3. Мој. 8:9). О назарејција да сине ко завет е Јеховаја ко јекх посебно начин. О лафи „назарејцо“ авела таро хебрејско лафи „назир“, со значинела „биримо“ или „одвојмо“. О назарејција ваљани сине те шунен о посебна заповедија со сине пишиме ко е Мојсеескоро закони (4. Мој. 6:2-8).

4. а) Со случинела пе кеда деа лафи е Јеховаске кај ка служине леске цело живото? б) Со значинела некој те „откажинел пе пестар“? (Дикх хем и слика.)

⁴ Кеда деа лафи е Јеховаске кај ка служине леске, ту биринеа те ове ученико е Исус Христосескоро хем одлучинеа е Девлескири волја те овел туке најважно ко живото. Со ка родел пе тутар ако деа акава завет? О Исус вакерѓа: „Ако некој мангела те џал пали манде, нека откажинел пе пестар“ (Мат. 16:24). И грчко фраза сој преведими сар „нека откажинел пе пестар“, шај исто аѓаар те превединел пе сар „мора коркори песке те вакерел на“. Кеда деа лафи е Јеховаске, ка ваљани те вакере на башо са адава со на свиџинела пе леске (2. Кор. 5:14, 15). Ко адава тано вклучимо те вакере на хем башо „постапке е грешно телоскере“, сар сој о сексуално неморал (Гал. 5:19-21; 1. Кор. 6:18). Дали адава со ка шуне акала заповедија ка керен тло живото пхаро? Ако мангеа е Јехова хем ако сиан уверимо кај лескере законија тане башо тло шукарипе, нане те овел туке пхаро (Пс. 119:97; Иса. 48:17, 18). Јекх пхрал со викинела пе Николас, вакерела: „Ко е Јеховаскере мерилија шај те дикхе сар решетке таро затвор кола со чхинавена тут те кере адава со ту мангеа или сар решетке таро кафези лавенцар кола со заштитинена тут тари опасност“.

5. а) Сар шај те де лафи е Јеховаске кај ка служине леске цело живото? б) Сави тани и разлика машкар о завет хем о крстибе? (Дикх хем и слика.)

 ⁵ Сар шај те де завет е Јеховаске кај ка служине леске цело живото? Аѓаар со ки молитва ка ветине леске кај ка служине само леске хем кај најважно ко живото ка овел туке те кере лескири волја. Уствари, ту ветинеа е Јеховаске кај понадари да ка манге ле „са тле вилеа, хем са тле душаја, хем са тле гоѓаја, хем са тле силаја“ (Мар. 12:30). Тло завет деа ле кеда сиан коркори, адава тано нешто машкар туте хем о Јехова. Тари јавер страна, о крстибе тано јавно хем аѓаар о јавера шај те дикхен кај ту денѓан завет е Јеховаске. Тло завет тано сериозно ветување кова со деа ле е Јеховаске. Адалеске тли цел ваљани те овел те икере тут ко адава ветување, а о Јехова да очекујнела тутар адава (Проп. 5:4, 5).

СО ВАЉАНИ ТЕ ПОТТИКНИНЕЛ ТУТ ТЕ ДЕ ЗАВЕТ Е ЈЕХОВАСКЕ?

6. Со ваљани те поттикнинел тут те де лафи е Јеховаске кај ка служине леске цело живото?

⁶ И главно причина соске ваљани те де лафи е Јеховаске кај ка служине леске цело живото тани тло мангипе спрема лесте. Тло мангипе на ваљани те овел водимо само таро чувствија. Ту замангљан е Јехова адалеске со шукар запознајнѓан ле хем џанеа лескири намера (Кол. 1:9). Адава со проучинѓан и Библија уверинѓа тут 1) кај о Јехова чаче постојнела, 2) кај и Библија тани лестар, хем 3) кај ов користинела пли организација те шај те исполнинел пли намера.

7. Со ваљани те керел некој англедер те дел завет е Јеховаске?

⁷ Кеда некој одлучинела те дел завет е Јеховаске, ов ваљани те џанел о основна сикљојба тари Библија хем те живинел спрема  е Девлескере мерилија. Кобор со дозволинена леске о околностија ов керела е јаверенцар лафи башо адава со сиклило (Мат. 28:19, 20). Лескоро мангипе спрема о Јехова барило хем иси ле искрено желба те служинел само леске. Дали туја да тано аѓаар? Ако мангеа е Јехова са тле вилеа, нане те де ле завет хем те крстине тут само те шај те радујне околе со проучинела туја и Библија или тле родителен, а ни палем само адалеске со тле амала керена адава.

8. Сар и благодарност поможинела туке те одлучине те де лафи е Јеховаске кај ка служине леске цело живото? (Псалм 116:12-14).

⁸ Кеда размислинеа башо са адава со керѓа туке о Јехова, сиан благодарно хем мангеа те де ле лафи кај ка служине леске цело живото. (Читин Псалм 116:12-14.) Бут точно тано адава со вакерела и Библија, кај „секова шукар хем совршено поклон“ авела таро Јехова (Јак. 1:17). На постојнела побаро поклон тари откупно жртва лескере Чхавескири е Исусескири. Размислин кобор шужо поклон тани и откупнина. Преку лате шај те ова паше е Јеховаја. Ов исто аѓаар дела амен прилика те живина вечно (1. Јов. 4:9, 10, 19). Адава со ка де завет е Јеховаске тано најшукар начин сар шај те сикаве кај сиан леске благодарно башо најбаро мангипе со сине некогаш сикавдо хем башо са о јавера благословија со добинѓан лен лестар (5. Мој. 16:17; 2. Кор. 5:15). Баши асавки благодарност керела пе лафи ко лил Ов бахтало засекогаш, ки лекција 46 точка 4, коте со иси о видеоклипи Со шај те да е Девлеске?.

ДАЛИ СИАН СПРЕМНО ТЕ ДЕ ЗАВЕТ ХЕМ ТЕ КРСТИНЕ ТУТ?

9. Соске никој на ваљани те мислинел кај мора те дел завет е Јеховаске?

⁹ Шај мислинеа кај панда на сиан спремно те де завет хем те крстине тут. Шај ваљани те кере панда промене ко тло живото те шај те икере тут ко е Јеховаскере мерилија, или шај ваљани туке панда време те шај те зојракере тли вера (Кол. 2:6, 7). На напредујнена са о интересентија исто темпоја хем нане спремна са о терне те ден завет хем те крстинен пе ки исто возраст. Кеда размислинеа башо тло духовно напредок, трудин те хаљове саве промене ваљани те кере ту, бизо те споредине тут е јаверенцар (Гал. 6:4, 5).

10. Со шај те кере ако халиљан кај панда на сиан спремно те де завет хем те крстине тут? (Дикх хем и рамка „ Е терненге кола со бариле ко чачипе“.)

¹⁰ Чак ако халиљан кај панда на сиан спремно те де лафи е Јеховаске кај ка служине леске цело живото, ма откажин тут тари адаја цел. Молин е Јехова те поможинел туке те кере о промене со ваљани (Фил. 2:13; 3:16). Ов сигурно кај ов ка шунел тле молитве хем ка одговоринел ки ленде (1. Јов. 5:14).

СОСКЕ НЕСАВЕ НАНЕ ОДЛУЧНА

11. Сар ка поможинел аменге о Јехова те ачхова леске верна?

¹¹ Иако несаве тане спремна те ден завет е Јеховаске хем те крстинен пе, сепак мислинена пе дали те керен адава. Ола пучена пе: „Со ако пало мло крстибе керава сериозно грево хем исклучинена ман?“ Ако ту да дараја таро адава, ов уверимо кај о Јехова ка дел тут са со ваљани те шај те служине леске хем те живине аѓаар сар ов со мангела (Кол. 1:10). Ов исто аѓаар ка дел тут сила те шај те кере адава сој исправно. Адалеа со поможинѓа буте џененге, о Јехова више сикавѓа кај шај те керел адава (1. Кор. 10:13). Адалеске бут хари џене тане исклучиме таро собрание. О Јехова чаче поможинела пле слугенге те ачховен леске верна.

12. Со ка поможинел аменге те на кера сериозно грево?

 ¹² Секова несовршено мануш тано ко искушение те керел нешто погрешно (Јак. 1:14). Сепак, ту ваљани те одлучине сар ка постапине кеда сиан ко искушение. Џанѓола пе, ко крајо тут иси тут контрола упро адава сар ка живине. Несаве мануша вакерена кај нане амен контрола упро амаре чувствија хем постапке. Ама адава нане точно. Ту шај те сикљове те контролирине тле погрешна желбе. Чак кеда ка аракхљове ко несаво искушение, ту шај те одлучине те на пере ки лесте. Те шај те успејне ко адава, молин тут секова диве. Нека овел тут навика редовно те проучине е Девлескоро Лафи. Ов редовно ко состанокија. Кер е јаверенцар лафи баши тли вера. Ако редовно кереа акала буќа, ка овел тут сила те живине спрема тло завет, хем никогаш ма бистре кај о Јехова ка поможинел туке ко адава (Гал. 5:16).

13. Саво шукар пример мукхља аменге о Јосиф?

¹³ Ка овел туке полокхо те ачхове верно е Јеховаске ако англедер одлучинеа со ка кере кеда ка аракхљове ко искушение. Ки Библија тане спомниме бут мануша кола со керѓе адава иако сине несовршена. На пример, е Петефријаскири ромни нонстоп пробинела сине те ховавел е Јосифе. Ама ов англедер одлучинѓа сар ка реагиринел ки асавки ситуација. Тари Библија дознајнаја кај ов одбинѓа ла хем вакерѓа лаке: „Сар шај те керав добором баро лошнипе хем те грешинав е Девлеске?“ (1. Мој. 39:8-10). Јасно тано кај о Јосиф џанља сар ов ка постапинел панда англедер ој те пробинел те ховавел ле. Адава поможинѓа леске те постапинел исправно кеда аракхлило ко искушение.

14. Сар шај те сикљова те на пера ко искушенија?

¹⁴ Сар шај те џа пало пример е Јосифескоро хем те ачхове верно е Девлеске кеда сиан искушимо? Шај панда акана те одлучине сар ка постапине кеда ка аракхљове ко искушение. Сикљов одма те циде тут таро буќа кола со о Јехова мрзинела лен, па чак ни ма размислин баши ленде (Пс. 97:10; 119:165). Адава ка поможинел туке те на кере грево кеда ка аракхљове ко искушение соске више ка џане сар те постапине.

15. Сар шај некој те сикавел кај ревно родела е Јехова? (Евреија 11:6).

¹⁵ Шај џанеа кај аракхљан о чачипе хем кај мангеа те служине е Јеховаске са тле вилеа, ама шај панда мислинеа кај на сиан спремно  те де завет е Јеховаске хем те крстине тут. Шај те џа пало пример е царескоро е Давидескоро хем те молине е Јехова: „Дикх саво мануш сиум, о Девла, дикх со иси ман ко вило. Испитин ман хем дикх мле мисле кола со вознемиринена ман. Хем дикх, иси ли нешто ки манде со чхивела ман те џав ко лошно друмо хем ингар ман ко вечно друмо“ (Пс. 139:23, 24). Кеда молинеа тут аѓаар, ту сикавеа кај родеа помош таро Јехова хем кај кереа бути ки тли цел те де завет хем те крстине тут. А о Јехова благословинела „околен со родена ле ревно“. (Читин Евреија 11:6.)

ОВ СА ПОПАШЕ Е ЈЕХОВАЈА

16-17. Сар о Јехова привлечинела ки песте околен со бариле ко чачипе? (Јован 6:44).

¹⁶ О Исус вакерѓа пле учениконге кај о Јехова привлечинѓа лен ки песте. (Читин Јован 6:44.) Размислин кобор шужо чувство тано адава хем со значинела адава лично туке. О Јехова дикхела нешто шукар ко секова мануш со привлечинѓа ле ки песте. Ко адава мануш дикхела сар пли „најмангли сопственост“ (5. Мој. 7:6). Аѓаар дикхела ки туте да.

¹⁷ Шај сиан терни личност која со барили ко чачипе. Шај мислинеа кај служинеа е Јеховаске само адалеске со тле родителија тане е Јеховаскере сведокија, а на адалеске со о Јехова привлечинѓа тут ки песте. Сепак, и Библија вакерела: „Овен паше е Девлеа, хем ов ка овел паше туменцар“ (Јак. 4:8; 1. Лет. 28:9). Кеда ту кереа нешто те шај те ове паше е Јеховаја, ов да овела паше туја. О Јехова на дикхела ки туте само сар дело тари јекх група. Ов привлечинела секас лично, чак адален со бариле ко чачипе. Кеда кереа нешто те шај те ове паше е Јеховаја, ов керела адава со пишинела ко Јаков 4:8. (Споредин 2. Солунјања 2:13.)

18. Со ка дикха ки јавер статија? (Псалм 40:8).

¹⁸ Адалеа со ка де лафи е Јеховаске кај ка служине леске цело живото хем ка крстине тут, ка сикаве исто стави сар о Исус. Ов спремно прифатинѓа те керел са адава со родинѓа лескоро Дад (Читин Псалм 40:8; Евр. 10:7). Ки јавер статија ка дикха со ка поможинел туке понадари да верно те служине е Јеховаске откеда ка крстине тут.