1. Кола тане несаве таро благословија со иси амен адалеске со сием дело тари е Јеховаскири организација?

 БУТ баро благослов тано со сием дело тари е Јеховаскири организација ко акала пхаре последна диве. О живото ко акава свето овела са попхаро хем попхаро, ама о Јехова денѓа амен пхраља хем пхења кола со шај те поможинен амен (Пс. 133:1). Исто аѓаар, ов поможинела амен те овел амен среќно фамилија (Еф. 5:33 — 6:1). Ама исто аѓаар, дела амен мудрост која со шај те поможинел аменге те икљова ко крајо амаре проблеменцар хем те осетина чачутно андруно мир.

2. Со ваљани те кера, хем соске?

² Сепак, амен мора бут те трудина амен те шај те ачхова верна е Јеховаске џикоте служинаја леске. Соске? Адалеске со о јавера бут пути шај те поврединен амен пумаре лафенцар или постапкенцар. Исто аѓаар, шај те обесхрабрина амен таро амаре лична грешке, посебно ако кераја повише пути јекх исто грешка. Амен понадари да ваљани те служина е Јеховаске чак кеда 1) поврединена амен амаре пхраља хем пхења, 2) разочаринела амен амаро брачно партнери хем 3) разочаринаја амен коркори амендар. Ки акаја статија ка дикха секоја јекх таро акала трин ситуацие. Исто аѓаар, ка дикха со шај те сикљова таро несаве верна слуге е Јеховаскере кола сој спомниме ки Библија.

КЕДА НЕСАВО ПХРАЛ ИЛИ ПХЕН ПОВРЕДИНЕЛА ТУТ

3. Саво предизвик иси е Јеховаскере слуген?

³ Предизвик. Понекогаш, несаве пхралескоро или пхењакоро карактер шај нервиринела амен. Јавера шај те поврединен амен, те на овен аменцар љубезна или те вакерен аменге нешто бизо те размислинен. Освен адава, о старешине шај те грешинен. Асавке ситуацие шај те чхивен некас те  сумнинел пе дали акаја тани е Девлескири организација. Наместо те служинен е Јеховаске понадари да ко јекхипе пле пхраленцар хем пле пхењенцар, несаве чхинавена те керен лафи адаленцар со поврединѓе лен па чак на џана ко состанокија (Соф. 3:9). Дали акава тано мудро? Те дикха со шај те сикљова таро јекх слуга е Девлескоро кова со сине ки слично ситуација.

4. Саве предизвикија сине е апостол Павле?

⁴ Библиско пример. О апостол Павле џанља кај о пхраља хем о пхења сине несовршена. На пример, кеда ало ко собрание ко Ерусалим несаве на верујнѓе кај ов тано ученико (Апо. 9:26). Покасно, несаве керена сине лафи пало лескоро думо те шај те каљарен лескоро анав (2. Кор. 10:10). Исто аѓаар, о Павле дикхља сар јекх старешина анѓа погрешно одлука која со шај керѓа о јавера те сопкинен пе (Гал. 2:11, 12). Исто, јекх таро лескере паше соработникија о Марко, бут разочаринѓа ле (Апо. 15:37, 38). Акала ситуацие шај сине те керен о Павле те чхинавел те дружинел пе хем те соработинел адаленцар со поврединѓе ле. Сепак, ов позитивно дикхела сине ко пле пхраља хем пхења хем понадари да верно служинела сине е Јеховаске. Со поможинѓа е Павлеске те на откажинел пе?

5. Со поможинѓа е Павлеске те ачхол паше пле пхраленцар хем пхењенцар? (Колошања 3:13, 14; дикх хем и слика).

⁵ О Павле бут мангела сине е пхрален хем е пхењен. Адава мангипе поможинѓа леске те на концентриринел пе ко ленгере слабостија, него ко ленгере шукар особине. Исто аѓаар, о мангипе поттикнинѓа е Павле те керел адава со коркори пишинѓа ко Колошања 3:13, 14. (Читин.) Размислин сар понашинѓа пе о апостол Павле е Маркоја кова со мукхља ле ко лескоро прво мисионерско патујбе. Иако о Павле ко почеток сине вознемиримо башо адава, сепак ов на мукхља те влијајнен упри лесте лескере чувствија. Покасно, кеда о Павле пишинѓа писмо е собраниеске ко Колоси, фалинѓа е Марко кај тано верно соработнико кова со поможинѓа ле хем утешинѓа ле (Кол. 4:10, 11). Кеда сине ко затвор ко Рим, о Павле родинѓа те бичхален леске баш е Марко те поможинел ле (2. Тим. 4:11). Дикхјола кај о Павле простинѓа пле пхраленге хем сине паше ленцар понадари да. Со шај те сикљова таро Павле?

6-7. Со ка поможинел аменге понадари да те манга амаре пхрален хем пхењен иако иси лен слабостија? (1. Јованескоро 4:7).

⁶ Поука. О Јехова мангела понадари да те сикава мангипа амаре пхраленге хем пхењенге. (Читин 1. Јованескоро 4:7.) Ако  некој на понашинѓа пе аменцар шукар ки несави ситуација, шај те овел амен доверба кај ов на мангља те поврединел амен хем кај трудинела пе те икерел пе ко библиска начелија, ама шај ки адаја ситуација постапинѓа бизо те размислинел (Изр. 12:18). О Девел мангела пле верна слуген иако иси лен слабостија. Ов на цидела пе амендар кеда грешинаја, него понадари да тано амаро амал хем на ачхола аменге хољамо (Пс. 103:9). Чаче тано бут важно те џа пало пример амаре небесно Дадескоро кова со простинела аменге (Еф. 4:32 — 5:1).

⁷ Исто аѓаар, на ваљани те бистра кај сар авела са попаше о крајо акале светоскоро, ваљани те ова попаше амаре пхраленцар хем пхењенцар. Шај те очекујна кај о прогонство ка овел са побаро. Шај чак те пханден амен баши амари вера. Ако адава случинела пе, амаре пхраља хем пхења ка ваљанен аменге бут повише него англедер (Изр. 17:17). Размислин со случинѓа пе јекхе старешинаске тари Шпанија, кова со викинела пе Хуан. a Ов хем јавере пхраља сине пханле баши ленгири неутралност. Ов вакерела: „Ко затвор живинаја сине сарине заедно хем адалеске понекогаш џаја аменге сине ко живце. Ваљани сине те трпина амен хем бут бути те простина аменге. Адава поможинела сине аменге те ова ко јекхипе хем те заштитина амен машкар аменде. Заедно аменцар сине затвореникија кола со на служинена сине е Јеховаске. Јекх пути, поврединѓум ми муси хем сиум сине ко гипси, адалеске нашти сине те керав несаве буќа коркори. Ама, јекх таро пхраља тховела сине ме шеја хем грижинела пе манге сине ко јавера практична начинија. Осетинѓум чачутно мангипе баш тегани кеда највише ваљанѓа манге“. Чаче иси амен шукар причине те решина амаре проблемија машкар аменде панда авдиве!

КЕДА ТЛО БРАЧНО ПАРТНЕРИ КА РАЗОЧАРИНЕЛ ТУТ

8. Саве предизвикија иси е брачна парен?

⁸ Предизвик. Ко секова брако иси пхарипа. Баш адава вакерела и Библија, кај адала сој ко брако ка „овен лен телесна неволје“ (1. Кор. 7:28). Соске? Адалеске со о ром хем и ромни тане несовршена колен со иси различна особине хем коленге со свиџинена пе различна буќа. Шај иси лен различно култура или потекло. Сар со накхела о време, шај ка почминен те сикавен особине кола со англедер те лен пе на приметинѓе лен. Секоја јекх таро акала буќа шај те анел проблемија. Наместо те признајнен кај о солдуј анѓе џи ко проблеми хем те трудинен пе те решинен ле, ола шај кривинена пе јекх јекхеа. Шај чак те мислинен кај ка решинен пумаре проблемија ако на живинена заедно или палем развединена пе. Ама дали адава чаче ка решинел ленгере проблемија? b Те дикха јекх пример тари јекх џувли која со ачхили верно е Јеховаске иако сине ла бут проблемија ко брако.

9. Саво предизвик сине е Авигеја?

⁹ Библиско пример. И Авигеја сине ко брако е Навалеа, колеске со и Библија вакерела кај сине дрско хем лошно мануш (1. Сам. 25:3). Е Авигејаке сигурно сине бут пхаро те живинел асавке ромеа. Дали е Авигеја сине ла прилика те чхивел крајо пле бракоске? Оја. Асавки прилика сине ла кеда о Давид кова со ваљани сине те овел цари ко Израел,  ало те мударел лакере роме адалеске со вреџинѓа ле хем лескере манушен (1. Сам. 25:9-13). И Авигеја шај сине те нашел хем те мукхел о Давид те мударел е Навале. Ама, ој на керѓа адава, него убединѓа е Давиде те на мударел е Навале (1. Сам. 25:23-27). Соске керѓа адава?

10. Со веројатно поттикнинѓа е Авигеја те ачхол ко брако иако сине ла бут проблемија?

¹⁰ И Авигеја мангела сине е Јехова хем дикхела сине ко брако сар со дикхела ов. Ој сигурно џанља со вакерѓа о Девел е Адамеске хем е Еваке кеда керѓа о прво брако (1. Мој. 2:24). И Авигеја џанља кај англо е Јеховаскере јакхја о брако тано свето. Ој мангља те радујнел е Девле хем адава поттикнинѓа ла те керел са со шај те спасинел пле кхерутнен машкар коленде со сине хем лакоро ром. Ој сигате керѓа нешто те шај те чхинавел е Давиде те мударел е Навале. Исто аѓаар, ој сине спремно те извининел пе башо нешто со на керѓа. Сигурно о Јехова бут мангља акале храбро ромња која со на сине себично. Со шај те сикљовен таро е Авигејакоро пример о ромња хем о рома?

11. а) Со очекујнела о Јехова адалендар сој ко брако? (Ефешања 5:33). б) Со сиклиљан таро адава сар и Кармен трудинѓа пе те аракхел пло брако? (Дикх хем и слика.)

¹¹ Поука. О Јехова мангела о ром хем и ромни те ачхон заедно ко брако чак ако пхаро јекхеа лендар те живинел пе. О Девел бут радујнела пе кеда дикхела сар о брачна парија трудинена пе те решинен пумаре проблемија хем те сикавен мангипе со нане себично хем те поштујнен пе. (Читин Ефешања 5:33.) Размислин башо пример е пхењакоро Кармен. Пало шов берш, откеда женинѓа пе, и Кармен почминѓа те проучинел е Јеховаскере сведоконцар хем покасно крстинѓа пе. Ој вакерела: „Мле ромеске на свиџинела пе сине и одлука со анѓум. Ов уло љубоморно е Јеховаске. Вреџинела ман сине хем заканинѓа пе манге кај ка мукхел ман“. Иако сине ла проблемија, и Кармен на откажинѓа пе таро пло брако. Ој трудинѓа пе 50 берш, те сикавел мангипе хем поштовање пле ромеске. Ој вакерела: „Сар накхена сине о берша, почминѓум те хаљовав пошукар сар осетинела пе мо ром хем те керав леа љубезно лафи. Адалеске со џанава сине кај о брако тано свето англо е Јеховаскере јакхја, дава сине мандар са те шај те аракхав ле. Адалеске со мангава е Јехова никогаш на пробинѓум те мукхав мле роме“. c Ако туке да икљона проблемија ко брако, шај те овел тут доверба кај о Јехова ка поддржинел тут хем ка поможинел тут.

 КЕДА СИАН РАЗОЧАРИМО КОРКОРИ ТУТАР

12. Саво предизвик шај те овел амен ако керѓем сериозно грево?

¹² Предизвик. Шај бут те разочарина амен коркори амендар ако керѓем несаво сериозно грево. И Библија вакерела кај амаре гревија шај те керен те осетина амен пхаге вилеа хем пхаге духоја (Псалм 34:18). Јекх пхрал со викинела пе Дејвид, бут трудинѓа пе те напредујнел ко духовно поглед хем пало несаво време уло слуга-помошнико. Ама, керѓа сериозно грево хем халило кај изневеринѓа е Јехова. Ов вакерела: „Мли совест бут мучинела ман сине хем сар те пхене пхиравава сине јекх тони цигле. Покасно осетинава сине баро пхарипе ки душа. Ројбаја молинава ман сине е Јеховаске. Мислинѓум манге кај о Девел никогаш нане више те шунел ман хем соске би шунела некас кова со разочаринѓа ле“. Ако кераја несаво сериозно грево, шај те осетина бари дукх хем адава те чхивел амен те мислина кај о Јехова ваздинѓа пле васта амендар (Пс. 38:4). Ако ту да осетинеа тут аѓаар, размислин башо јекх верно слуга е Девлескоро кова со на чхинавѓа те служинел леске иако керѓа сериозно грево.

13. Саво сериозно грево керѓа о апостол Петар, хем саве јавера грешке анѓе ле џи ко адава?

¹³ Библиско пример. И рат англедер те овел мудардо о Исус, о апостол Петар керѓа некобор грешке кола со анѓе џи ко адава те керел бут сериозно грево. Прво, е Петаре сине ле бут бари самодоверба ки песте, аѓаар со вакерѓа кај чак о јавера апостолија те мукхен е Исусе ов нане те керел адава него ка ачхол верно (Мар. 14:27-29). Дујто, ки градина Гетсиманија, о Петар некобор пути засуќа иако о Исус вакерѓа леске те ачхол џангавдо (Мар. 14:32, 37-41). Пало адава, кеда але о мануша те астарен е Исусе о Петар мукхља ле (Мар. 14:50). Ко крајо, о Петар трин пути вакерѓа кај на пенџарела е Исусе па чак хаља совли кај адава тано аѓаар (Мар. 14:66-71). Сар реагиринѓа о Петар кеда халило кобор баро грево керѓа? Ов сине пхаго тари дукх хем рунѓа душаја, адалеске со осетинѓа пе бут криво (Мар. 14:72). Замислин туке сар осетинѓа пе о Петар кеда пало некобор саатија лескере амале е Исусе мударѓе ле. Сигурно мислинѓа песке кај ни хари на врединела!

14. Со поможинѓа е Петареске понадари да верно те служинел е Јеховаске (Дикх и слика тари насловно страна.)

¹⁴ О Петар шај сине понадари да верно те служинел е Јеховаске таро некобор причине. Ов на изолиринѓа пе, ов гело ко пле духовна пхраља хем сигурно сине утешимо лендар (Лука 24:33). Освен адава, откеда  воскреснинѓа о Исус, појавинѓа пе е Петареске веројатно адалеске со мангља те охрабринел ле (Лука 24:34; 1. Кор. 15:5). Покасно, наместо те укоринел е Петаре башо лескере грешке, о Исус вакерѓа пле амалеске кај ка добинел побаре одговорностија (Јован 21:15-17). О Петар џанља кај керѓа баро грево, ама понадари да трудинѓа пе те керел адава сој исправно. Соске? Адалеске со сине уверимо кај лескоро Господари, о Исус на откажинѓа пе лестар. Исто аѓаар, о духовна пхраља е Петарескере понадари да поможинѓе ле. Со шај те сикљова таро е Петарескоро пример?

15. Ко со мангела о Јехова те уверина амен? (Пс. 86:5; Рим. 8:38, 39; дикх хем и слика).

¹⁵ Поука. О Јехова мангела те ова увериме кај ов мангела амен хем тано спремно те простинел аменге. (Читин Псалм 86:5; Римјања 8:38, 39.) Кеда грешинаја, амен осетинаја амен крива. Адава тано нормално хем шукар да. Ама, на ваљани те мислина кај о Јехова на мангела амен или нане те простинел аменге. Наместо адава, ваљани одма те рода помош. О Дејвид кова со спомнинѓем ле поупре вакерела: „Керѓум грево адалеске со боринава ман сине коркори против о искушение“. Ама, ов халило кај ваљани те керел лафи е старешиненцар. Ов вакерела: „Кеда керѓум лафи е старешиненцар, ола поможинѓе манге те осетинав е Јеховаскоро мангипе. А дикхљум кај о старешине да мангена ман. Ола поможинѓе ман те уверинав ман кај о Јехова на мукхља ман“. Амен да шај те ова увериме кај о Јехова мангела амен хем простинела аменге ако каинаја амен башо амаре гревија, родаја помош хем ако искрено трудинаја амен те на кера палем о иста грешке (1. Јов. 1:8, 9). Ако сием увериме кај о Јехова мангела амен хем мангела те простинел аменге нане те чхинава те служина леске чак кеда ка грешина.

16. Соске сиан одлучно понадари да те служине верно е Јеховаске?

¹⁶ О Јехова бут ценинела адава со трудинаја амен те служина леске ко акала пхаре последна диве. Адалеске со о Јехова поможинела амен шај понадари да те служина леске иако несаве буќа шај те разочаринен амен. Амен понадари да шај те манга амаре пхрален хем пхењен те простина ленге чак ако поврединена амен. Шај те сикава кобор баро мангипе иси амен спрема о Девел хем кај поштујнаја лескере начелија башо брако ако даја са амендар те решина о проблемија со шај ка овен амен ко брако. А ако кераја грево шај те рода помош таро Јехова, те уверина амен кај о Јехова мангела амен хем простинела аменге хем те продолжина те служина леске. Шај те ова сигурна кај о Јехова бут ка благословинел амен ако на откажинаја амен те кера шукарипе (Гал. 6:9).