1-2. Откеда некој ка крстинел пе, сар лескоро живото овела пошукар?

 СЕКОВА јекх амендар сине бут радосно кеда крстинѓа пе хем уло дело тари е Јеховаскири фамилија. Окола со иси лен чест те овен е Јеховаскере амала, сложинена пе е лафенцар со вакерѓа лен о псалмисти о Давид. Ов вакерѓа: „Среќно тано окова коле со ту, [Јехова] ка бирине хем каске со дозволинеа те авел туте паше те шај те живинел ко тле дворија“ (Пс. 65:4).

² Каске о Јехова дозволинела те живинел ко лескере дворија, јавере лафенцар, те овел лескоро амал? Сар со дикхлем ки англуни статија, ов биринела те овел паше околенцар со сикавена кај мангена те овен леа паше (Јак. 4:8). Кеда деа лафи е Јеховаске кај ка служине леске цело живото хем крстинеа тут, ту овеа леа паше ко јекх посебно начин. Шај те ове сигурно кај пало тло крстибе ов ка благословинел тут џикоте на овела доста (Мал. 3:10; Ерем. 17:7, 8).

3. Сави сериозно одговорност иси христијанен со денѓе лафи е Јеховаске кај ка служинен леске цело живото хем крстинѓе пе? (Проповедник 5:4, 5).

³ Џанѓола пе, о крстибе тано само почеток. Откеда ка кере адава прво чекори, ту ка манге те де тутар са те шај те живине спрема тло завет чак кеда ка овен тут искушенија или кеда ка овел испитими тли вера. (Читин Проповедник 5:4, 5.) Сар ученико е Исусескоро, ту ка трудине тут кобор со шај пошукар те џа пало лескоро пример хем те икере тут ко лескере заповедија (Мат. 28:19, 20; 1. Пет. 2:21). Акаја статија ка поможинел тут те кере адава.

 ПОНАДАРИ ДА ЏА ПАЛО ИСУС ЧАК КЕДА ИСИ ТУТ НЕВОЛЈЕ ХЕМ ИСКУШЕНИЈА

4. Ки која смисла е Исусескере ученикија пхиравена „стубо мучибаске“? (Лука 9:23).

⁴ Откеда ка крстине тут тло живото нане те овел бизо проблемија. Баш адава о Исус јасно вакерѓа кај лескере ученикија ка пхиравен „стубо мучибаске“. Уствари, ола ка керен адава „секова диве“. (Читин Лука 9:23.) Дали о Исус мангља те вакерел кај лескере ученикија секогаш ка мучинен пе? На. Адава со мангља те вакерел тано кај освен благословија лескере ученикон ка овел лен пхарипа. Несаве таро адала пхарипа шај те анен аменге бари дукх (2. Тим. 3:12).

5. Саве благословија ветинела о Исус околенге со керена жртве?

⁵ Шај тли фамилија противинѓа пе туке или шај жртвујнѓан нешто ко материјално поглед те шај те чхиве е Девлескоро Царство ко прво тхан ко тло живото (Мат. 6:33). Ако тано аѓаар, тегани шај те ове сигурно кај о Јехова дикхља са адава со керѓан баши лесте (Евр. 6:10). Веројатно хем коркори уверинѓан тут кобор тане точна е Исусескере лафија: „Ни јекх на мукхља кхер, или пхраља, или пхења, или даја, или даде, или чхавен, или ниве баши манде хем башо шукар хабери, а те на дел пе леске акана ко акава време 100 пути повише: кхера хем пхраља хем пхења хем даја хем чхаве хем ниве, ама заедно акалеа хем прогонство, а ко време со авела хем вечно живото“ (Мар. 10:29, 30). О благословија со добинѓан лен тане бут побаре тари било која жртва со керѓан ла (Пс. 37:4).

6. Соске пало тло крстибе ка ваљани понадари да те борине тут против „и желба е телоскири“?

⁶ Сепак, пало тло крстибе ту понадари да ка ваљани те борине тут против „и желба е телоскири“ (1. Јов. 2:16). Адава тано аѓаар соске ту понадари да сиан несовршено. Понекогаш, шај ка осетине тут слично сар о апостол Павле, кова со пишинѓа: „Андре ко мо вило, ме чаче уживинава ко е Девлескоро закони, ама ко мо тело дикхава јавер да закони кова со боринела пе против о закони ко мле мисле, хем акава закони е гревоскоро икерела ман сар робо“ (Рим. 7:22, 23). Шај ка ове обесхрабримо адалеске со мора те борине тут погрешна желбенцар. Ама ако размислинеа со ветинѓан е Јеховаске кеда денѓан леске лафи кај ка служине леске, адава шај те керел тут панда поодлучно те борине тут против о искушенија. О завет со денѓан ле ка поможинел туке кеда ка аракхљове ко искушенија. Сар?

7. Сар адава со ка де лафи е Јеховаске кај ка служине леске ка поможинел туке те ачхове верно?

⁷ Кеда деа лафи е Јеховаске кај ка служине леске цело живото, ту откажинеа тут тутар. Акава значинела кај ту биринеа те отфрлине тле лична желбе хем целија кола со на свиџинена пе е Јеховаске (Мат. 16:24). Адалеске, кеда овел тут несаво искушение или пхари ситуација нане те овел потребно те пуче тут сар ка постапине. Ту више отфрлинѓан са о јавера опцие освен јекх — те ачхове верно е Јеховаске. Ка ове цврсто одлучно те радујне е Јехова. Ки адаја бути ка ове сар о Јов. Иако аракхлило ко посебна пхаре ситуацие ов одлучно вакерѓа: „Нане те откажинав ман тари мли беспрекорност!“ (Јов 27:5).

8. Сар адава со ка размислине башо завет со денѓан ле е Јеховаске ки молитва ка поможинел туке те отфрлине о искушенија?

⁸ Адава со ка размислине башо завет со денѓан е Јеховаске ки молитва, ка дел тут сила те отфрлине секова искушение. На пример, дали ка почмине те флертујне  некасаја сој ко брако? Џанѓола пе кај на. Ту више ветинѓан е Јеховаске кај никогаш нане те кере асавко нешто. Ако на дозволинеа ки туте те развинен пе погрешна чувствија, покасно нане те ваљани те борине тут те циде лен тутар. Адалеа ка циде тут таро друмо е румиме манушенгоро (Изр. 4:14, 15).

9. Сар адава со ка размислине башо завет со денѓан е Јеховаске ки молитва шај исто аѓаар те поможинел туке понадари да те чхиве о духовна активностија ко прво тхан?

⁹ Со ако нудинела пе туке бути која со ка чхинавел тут редовно те џа ко состанокија? Ту више џанеа сар те постапине. Панда англедер те добине адаја понуда, ту више одлучинѓан те на прифатине асавки бути. Аѓаар, нане те ваљани те трудине тут те избегине о последице тари лошно одлука со анѓан ла. Шај бут те поможинел туке адава со ка размислине башо е Исусескоро пример, ов сине одлучно те радујнкерел пле Даде. Исто сар о Исус, сигате хем одлучно отфрлин са со на свиџинела пе е Девлеске колеске со денѓан лафи кај ка служине леске (Мат. 4:10; Јован 8:29).

10. Сар о Јехова ка поможинел туке откеда крстинѓан тут, понадари да те џа пало Исус?

¹⁰ Џанѓола пе кај о неволје хем о искушенија дена тут прилика те сикаве кај сиан одлучно понадари да те џа пало Исус. Џикоте кереа адава, шај те ове сигурно кај о Јехова ка поможинел туке. Ки Библија пишинела: „О Девел тано верно, хем нане те мукхел те овен искушиме повише таро адава со шај те издржинен, него ка поможинел туменге кеда иси тумен искушение те шај те издржинен ле“ (1. Кор. 10:13).

СО ШАЈ ТЕ КЕРЕ ТЕ ШАЈ ПОНАДАРИ ДА ТЕ ЏА ПАЛО ИСУС

11. Кова тано јекх таро најшукар начинија сар шај понадари да те џа пало Исус? (Дикх хем и слика.)

¹¹ О Исус сине ревно хем ачхило паше е Јеховаја аѓаар со молинела пе сине леске  (Лука 6:12). Уствари, јекх таро најшукар начинија те џа пало Исус откеда ка крстине тут, тано понадари да те кере о буќа кола со ка поможинен туке те ове попаше е Јеховаја. И Библија вакерела: „Бизи разлика кобор напредујнѓем џи акана, ваљани понадари да те напредујна, те џа ко акава исто друмо“ (Фил. 3:16). Некогаш, ка шуна искуствија таро пхраља хем пхења кола со одлучинѓе те керен повише ки служба башо Јехова. Шај сине ки Школа башо полновремена објавителија или селинѓе пе ко тхана коте со иси побари потреба. Ако тле околностија дозволинена туке, адаја тани бут шужи цел со шај ту да те чхиве ла туке. Е Јеховаскере слуге бут мангена те керен повише баши лесте (Апо. 16:9). Ама, со ако ко моменти нашти те кере адава? Ма мислин кај похари врединеа околендар со шај те керен адава. Сар христијања, аменге тано најважно џи ко крајо те истрајна (Мат. 10:22). Ма бистре кај о Јехова бут радујнела пе кеда служинеа леске спрема тле способностија хем околностија. Адава тано јекх важно начин сар шај понадари да те џа пало Исус откеда ка крстине тут (Пс. 26:1).

12-13. Со шај те кере ако тли ревност почминѓа те слабонел? (1. Коринќања 9:16, 17; дикх хем и рамка „ Ачхов ки трка“).

¹² Со ваљани те кере ако приметинеа кај тле молитве уле механичка, или кај на уживинеа више ки служба сар со уживинеа сине англедер? Со ако на уживинеа више ко читибе и Библија сар англедер? Ако случинела пе туке акава откеда крстинѓан тут, ма мислин кај нане тут е Јеховаскоро духо. Адалеске со сием несовршена амаре чувствија понекогаш шај те менинен пе. Ако тли ревност почминела те слабонел, размислин башо пример е апостол Павлескоро. Иако трудинела пе сине те џал пало е  Исусескоро пример, ов џанља кај понекогаш нане те овел ле бари желба те керел адава со ваљани. (Читин 1. Коринќања 9:16, 17.) Ов вакерѓа: „Ако керава адава бизи волја, сепак денди манге задача“. Јавере лафенцар, о Павле сине одлучно те керел пли служба бизи разлика сар осетинела пе сине ко моменти.

¹³ Слично, ма мукх тле несовршена чувствија те влијајнен упро тле одлуке. Ов одлучно те кере адава сој тано исправно, чак ако на керела пе туке адава. Ако кереа понадари да адава сој исправно, сар со ка накхел о време тле чувствија шај ка менинен пе. Џи тегани, адава со ка овел тут навика редовно те проучине и Библија, те молине тут, те џа ко состанокија хем ки служба, ка поможинел туке понадари да те џа пало Исус откеда ка крстине тут. Кеда тле пхраља хем пхења ка дикхен кај истрајно служинеа е Јеховаске, ола ка овен охрабриме (1. Сол. 5:11).

„ИСПИТИНЕН... ПРОВЕРИНЕН“

14. Башо кола буќа ваљани редовно те испитине тут, хем соске? (2. Коринќања 13:5).

¹⁴ Откеда ка крстине тут важно тано редовно те испитине тут. (Читин 2. Коринќања 13:5.) Понекогаш, шукар тано те размислине башо тло живото хем башо тле навике те шај те дикхе дали молинеа тут секова диве, дали читинеа хем проучинеа и Библија, дали редовно џаја ко состанокија хем ки служба. Пробин те аракхе нешто со ка поможинел туке панда повише те уживине хем те овел тут корист таро акала активностија. На пример, пуч тут пучиба сар сој: „Шај ли те објаснинав е јаверенге о основна библиска сикљојба? Со шај те керав те шај повише те уживинав ки служба? Дали мле молитве тане конкретна хем дали сикавена кај иси ман целосно доверба ко Јехова? Дали редовно џава ко состанокија? Со ка поможинел манге пошукар те шунав ко состанокија хем пошукар те коментиринав?“

15-16. Со сикљоваја таро е Робертескоро искуство?

¹⁵ Исто аѓаар, шукар тано редовно те испитине тут башо тле слабостија. О искуство јекхе пхралескоро со викинела пе Роберт сикавела кобор тано важно акава, ов вакерела: „Кеда сине ман околу 20 берш, керава сине бути похари саатија. Јекх диве пали бути, јекх колешка викинѓа ман ки песте кхере. Ој вакерѓа манге кај ка ова коркори хем кај ка накха аменге бут шукар. Ко почеток, вакерѓум несаве изговорија кола со на сине баш уверлива. Ама ко крајо вакерѓум на хем објаснинѓум соске“. О Роберти на пело ко адава искушение хем адава тано пофално. Ама  покасно кеда размислинѓа баши адаја ситуација халило кај шај сине пошукар те икљол ко крајо адале ситуацијаја. Ов признајнела: „На одбинѓум и понуда добором сигате хем одлучно сар о Јосиф со одбинѓа е Петефриескере ромња (1. Мој. 39:7-9). Уствари, изненадинѓум ман кобор сине манге пхаро те одбинав. Акаја ситуација поможинѓа манге те хаљовав кај ваљани те керав позорало мло амалипе е Јеховаја“.

¹⁶ Туке да шај те користинел ако испитинеа тут слично сар со керѓа о Роберти. Чак кеда ка успејне те на пере ко несаво искушение, пуч тут: „Кобор време ваљанѓа манге те шај те вакерав на?“ Ако хаљовеа кај сине туке хари пхаро те вакере на, ма обесхрабрин тут. Ов среќно со сиан свесно баши акаја слабост. Молин тут е Јеховаске башо адава хем кер нешто те шај те ове поодлучно те живине спрема е Јеховаскере морална мерилија (Пс. 139:23, 24).

17. Сар адава со о Роберти ачхило верно влијајнела упро е Јеховаскоро анав?

¹⁷ Таро е Робертескоро искуство шај те сикљова нешто јавер да. Ов вакерела: „Откеда одбинѓум е колешкакири понуда, ој вакерѓа манге: ’Положинѓан о тести!‘ Ме пучљум ла со мангела те пхенел. Ој објаснинѓа манге кај јекх лакоро амал кова со англедер сине е Јеховаскоро сведоко, вакерѓа лаке кај са о терне сведокија живинена двојно живото хем кај ако иси лен прилика ка керен нешто со нане исправно. Ој вакерѓа пле амалеске кај ка проверинел дали тано адава аѓаар манцар да. Бут радујнѓум ман кеда халиљум кај на лаџакерѓум е Јеховаскоро анав“.

18. Со сиан одлучно те кере откеда ка крстине тут? (Дикх хем и рамка „ Статие коленде со ка уживине“.)

¹⁸ Кеда деа лафи е Јеховаске кај ка служине леске цело живото хем крстинеа тут, ту сикавеа кај мангеа те славине лескоро анав бизи разлика со ка случинел пе. Шај те ове сигурно кај о Јехова тано свесно саве неволје хем искушенија иси тут. Ов ка поддржинел тут џикоте трудинеа тут те ачхове леске верно. Нека овел тут доверба кај преку пло свети дух, ов ка дел тут и сила со ваљани туке те шај те успејне ко адава (Лука 11:11-13). О Јехова ка поможинел тут, те шај понадари да те џа пало Исус откеда ка крстине тут.