1. Саве чувствија шај мучинена сине несаве верна слуген е Јеховаскере?

 БУТ охрабринела амен адава со џанаја кај о Јехова тано задоволно таро пло народо сар група! Ки Библија пишинела: „О Јехова радујнела пе пле слугенге“ (Пс. 149:4). Ама, понекогаш несаве тане добором бут обесхрабриме со шај пучена пе: „Дали о Јехова тано задоволно мандар лично?“ Буте верна слуген е Јеховаскере таро пурано време понекогаш мучинена лен сине асавке чувствија (1. Сам. 1:6-10; Јов 29:2, 4; Пс. 51:11).

2. Кас о Јехова одобринела?

² И Библија јасно сикавела кај о несовршена мануша шај те овен одобриме таро Девел. Сар? Мора те сикава вера ко Исус Христос хем те крстина амен (Јован 3:16). Аѓаар англо јавера сикаваја кај каинѓем амен башо амаре гревија хем кај ветинѓем е Девлеске кај ка кера лескири волја (Апо. 2:38; 3:19). О Јехова тано бут радосно кеда кераја акала буќа те шај те ова паше амала леа. Са џикоте даја амендар са те шај те живина спрема амаро завет, ка овел амен е Јеховаскоро одобрување хем ов ка дикхел ки аменде сар пле паше амала (Пс. 25:14).

3. Кола трин пучиба ка дикха ки акаја статија?

³ Ама, соске понекогаш несаве шај мислинена кај о Јехова на одобринела лен? Сар о Јехова сикавела кај одобринела амен? Хем сар јекх христијани шај те овел сигурно кај иси ле е Девлескоро одобрување?

СОСКЕ НЕСАВЕ МИСЛИНЕНА КАЈ О ЈЕХОВА НАНЕ ЗАДОВОЛНО ЛЕНДАР

4-5. Ко со шај те ова увериме чак ако мислинаја кај на врединаја?

⁴ Бут џене амендар панда таро тикнипе мислинена кај на врединена (Пс. 88:15). Јекх пхрал со викинела пе Едриен вакерела:  „Секогаш мислинава сине кај на врединава. Сетинава ман кај панда сар тикно молинава ман сине мли фамилија те живинел ко рај, иако сиум сине сигурно кај ме на сиум доволно шукар те шај те овав адатхе“. О Тони кова со барило ки фамилија кола со нане Сведокија вакерела: „Мле родителија никогаш на вакерена манге сине кај мангена ман или кај дичинена пе манцар. Адалеске мислинава сине кај са со керава нане доволно шукар“.

⁵ Ако понекогаш мислинаја кај на врединаја, шукар тано те сетина амен кај коркори о Јехова привлечинѓа амен ки песте (Јован 6:44). Ов дикхела о шукар буќа ки аменде кола со шај амен коркори на дикхаја лен хем ов џанела со чаче иси амен ко вило (1. Сам. 16:7; 2. Лет. 6:30). Адалеске, шај те верујна ле кеда ов вакерела аменге кај сием скапоцена (1. Јов. 3:19, 20).

6. Сар осетинела пе сине о апостол Павле башо пле гревија со керѓа лен англедер?

⁶ Англедер те дознајнен о чачипе, несаве амендар керѓе буќа баши коленде со шај панда осетинена пе крива (1. Пет. 4:3). Јавера кола со верно служинена е Јеховаске шај панда боринена пе погрешна желбенцар. Сар тано туја, дали тло вило осудинела тут башо нешто? Ако оја, шај те утешинел тут адава со ка џане кај јавера да верна слуге е Јеховаскере боринена пе сине слична чувствонцар. На пример, о апостол Павле сине бут разочаримо кеда размислинела сине башо пле слабостија (Рим. 7:24). Џанѓола пе, о Павле каинѓа пе башо пле гревија хем крстинѓа пе. Сепак, баши песте вакерѓа кај тано „најтикно таро апостолија“ хем кај тано најбаро грешнико (1. Кор. 15:9; 1. Тим. 1:15).

7. Со на ваљани те бистра кеда керела пе лафи башо гревија со керѓем лен англедер?

⁷ Амаро небесно Дад ветинѓа кај ка простинел аменге ако каинаја амен (Пс. 86:5). Значи, ако аменге чаче жал башо гревија со керѓем лен, шај те овел амен доверба кај о Јехова ка ачхол ко пло лафи хем ка простинел аменге (Кол. 2:13).

8-9. Сар шај те цида амендар и мисла кај никогаш нашти те кера доволно те шај те угодина е Јеховаске?

⁸ Сарине амен мангаја те служина е Јеховаске ки побари мера. Сепак, несаве мислинена кај никогаш нашти те керен доволно те шај о Јехова те овел лендар задоволно. Јекх пхен со викинела пе Аманда вакерела: „Обично мислинава кај те дав мло најшукар е Јеховаске значинела секогаш те керав нешто повише. Бут пути коркори мандар очекујнава те дав бут повише таро адава со чаче шај те дав. Пало адава, кеда нашти те керав адава со очекујнава мислинава кај о Јехова тано разочаримо мандар исто сар со сиум ме“.

⁹ Сар шај те цида амендар и мисла кај никогаш нашти те кера доволно те шај те угодина е Јеховаске? Ма бистре кај о Јехова нане круто, ов тано разумно хем на очекујнела повише таро адава со шај те кера. Ов ценинела са адава со кераја баши лесте са џикоте даја леске амаро најшукар. Исто аѓаар, размислин башо несаве личностија тари Библија кола со служинѓе е Јеховаске цело вилеа. На пример, размислин башо Павле. Ов ревно служинела сине бершенцар, аѓаар со патујнела сине бут километре хем керела сине бут собранија. Ама дали о Јехова на сине више лестар задоволно кеда лескере околностија менинѓе пе хем нашти сине повише те проповединел сар англедер? На. Ов понадари да керела сине адава со шај хем о Јехова благословинѓа ле (Апо. 28:30, 31). Слично тано аменцар да, кобор шај те да е Јеховаске зависинела таро амаре околностија, а адава шај те менинел пе. Ама леске тано најважно таро  саво мотиви кераја адава. Акана те дикха некобор начинија сар о Јехова сикавела кај тано задоволно амендар.

САР О ЈЕХОВА СИКАВЕЛА КАЈ ТАНО ЗАДОВОЛНО АМЕНДАР?

10. Сар шај те „шуна“ е Јехова сар вакерела аменге кај мангела амен хем ценинела амен? (Јован 16:27).

¹⁰ Преку и Библија. О Јехова родела начинија те шај те сикавел пле слугенге кај мангела лен хем кај тано задоволно лендар. Ки Библија тане пишиме дуј ситуацие кеда о Јехова вакерѓа е Исусеске кај мангела ле хем кај керела ле радосно (Мат. 3:17; 17:5). Дали мангеа те шуне е Јехова сар вакерела туке кај тано задоволно тутар? Амен нашти дословно те шуна е Јеховаскоро гласо, ама ов керела аменцар лафи преку и Библија. Амен шај те „шуна“ сар о Јехова вакерела аменге кај тано задоволно амендар кеда читинаја о лафија е Исусескере сој пишиме ко евангелија. (Читин Јован 16:27.) О Исус совршено сикавела сине о особине пле Дадескере. Адалеске кеда читинаја сар о Исус вакерела пле учениконге кај мангела лен хем ценинела лен, шај те замислина аменге сар о Јехова вакерела адала лафија аменге (Јован 15:9, 15).

11. Ако иси амен неволје дали адава значинела кај о Јехова нане задоволно амендар? (Јаков 1:12).

¹¹ Преку лескере постапке. О Јехова бут мангела те поможинел амен. На пример, ов грижинела пе башо амаре материјална потребе. Ама, понекогаш о Јехова шај те дозволинел те случинен пе аменге лошна буќа сар со сине е праведно Јовеа (Јов 1:8-11). О неволје на сикавена кај о Девел нане више задоволно амендар. Наместо адава, ола дена амен прилика те сикава кобор бут мангаја е Девле хем кобор бари доверба иси амен ки лесте. (Читин Јаков 1:12.) Џикоте накхаја таро адала неволје ка дикха сар о Јехова грижинела пе аменге хем сар поддржинела амен џикоте поможинела амен те истрајна.

12. Со шај те сикљова таро Дмитриј?

¹² Размислин башо Дмитриј, јекх пхрал тари Азија. Ов ачхило бизи бути хем повише масекија нашти сине те аракхел јавер бути. Адалеске, одлучинѓа те бајрарел пли служба хем адалеа те сикавел кај иси ле доверба ко Јехова. Накхле бут масекија а ов панда нашти сине те аракхел бути. Пало адава бут насвалило со чак нашти сине те уштел таро кревети. Ов почминѓа те мислинел песке кај нане више шукар ром хем дад, хем пучела пе  сине дали о Јехова панда тано задоволно лестар. Пало адава, јекх рат, лескири чхај ко листо принтинѓа о лафија таро Исаија 30:15: „Ачховен смириме хем сикавен доверба, адава ка овел тумари сила!“ Ој гели ко лескоро кревети денѓа ле о листо хем вакерѓа: „Тато, кеда нане те осетине тут шукар шај те сетине тут ко акава стихо“. О Дмитриј халило кај лескере фамилија иси ла панда со те хал, со те уравел хем кај те живинел адалеске со о Јехова поможинела лен. Ов вакерела: „Адава со ваљани сине те керав, сине те ачховав смиримо хем понадари да те овел ман доверба ко мло Девел“. Ако ту да иси тут слично проблеми, шај те овел тут доверба кај о Јехова грижинела пе туке хем кај ка поможинел тут те истрајне.

13. Преку касте о Јехова шај те сикавел аменге кај тано задоволно амендар, хем сар?

¹³ Преку о пхраља хем о пхења. О Јехова користинела амаре пхрален хем пхењен те шај те сикавел аменге кај тано задоволно амендар. На пример, ов шај те поттикнинел е јаверен те охрабринен амен баш кеда адава ваљани аменге. Акава доживинѓа јекх пхен тари Азија кеда сине ко пхаро периоди. Ој ачхили бизи бути хем бут насвалили. Пало адава лакоро ром керѓа сериозно грево хем повише нашти сине те служинел сар старешина. Ој вакерела: „Нашти сине те хаљовав соске акава случинела пе манге. Мислинава сине кај шај керѓум нешто погрешно хем кај о Јехова нане више задоволно мандар“. Амари пхен молинѓа е Јехова таро вило те уверинел ла кај иси ла лескоро одобрување. Сар о Јехова сикавѓа лаке адава? Ој објаснинела: „О старешине керѓе манцар лафи хем поможинѓе манге те дикхав кај о Јехова панда мангела ман“. Пало несаво време ој палем молинѓа е Јехова те поможинел лаке. Ој вакерела: „О исто  диве добинѓум јекх писмо тари јекх група пхраља хем пхења таро собрание. Џикоте читинава сине ленгере охрабрувачка лафија, осетинѓум кај о Јехова шунѓа мли молитва“. Оја, о Јехова бут пути сикавела кај тано задоволно амендар преку е јаверенгере љубезна лафија (Пс. 10:17).

14. Ко кова јавер начин о Јехова сикавела кај тано задоволно амендар?

¹⁴ Исто аѓаар, о Јехова сикавела аменге кај тано задоволно амендар аѓаар со користинела е пхрален хем е пхењен те шај те дел амен совет кеда адава ваљани. На пример, ко прво веко, водимо таро Девел о апостол Павле пишинѓа 14 писмија пле пхраленге. Ко адала писмија ов денѓа лен директно совет, ама ко јекх љубезно начин. Соске о Јехова водинѓа е Павле те дел асавко совет? О Јехова тано шукар Дад кова со „укоринела пле чхавен“ колен со мангела лен (Изр. 3:11, 12). Значи ако некој дела амен совет кова со темелинела пе ки Библија, адава на значинела кај о Јехова нане више задоволно амендар, уствари адава сикавела кај о Јехова панда мангела амен (Евр. 12:6). Со јавер сикавела аменге кај о Јехова тано задоволно амендар?

ЈАВЕРА ДОКАЗИЈА КАЈ О ЈЕХОВА ТАНО ЗАДОВОЛНО АМЕНДАР

15. Каске о Јехова дела пло свети дух, хем ко со уверинела амен адава?

¹⁵ О Јехова дела пло свети дух околенге кастар сој задоволно (Мат. 12:18). Шај те пуча амен: „Дали сикавава несаве особине со авена таро свети дух ко мло живото?“ Дали приметинѓан кај акана сиан пострпливо него англедер те пенџаре е Јехова? Уствари, кобор повише сикљовеа те сикаве о особине таро свети дух, добором поуверимо ка ове кај о Јехова тано задоволно тутар. (Дикх и рамка „ О особине со авена таро свети дух тане...“)

16. Кас о Јехова користинела те шај те вакерел о шукар хабери, хем сар осетинеа тут башо адава? (1. Солунјања 2:4).

¹⁶ Панда јекх начин сар о Јехова сикавела кај тано задоволно некастар тано аѓаар со дела ле и задача те вакерел о шукар хабери. (Читин 1. Солунјања 2:4.) Приметин сар јекхе пхењаке со викинела пе Џоселин користинѓа адава со керела е јаверенцар лафи башо шукар хабери. Јекх диве, кеда уштили таро сојбе и Џоселин осетинела пе сине разочарими. Ој вакерела: „На сине ман сила хем мислинава сине кај на сиум корисно.  Ама, сиум сине пионери хем адава диве ваљани сине те икљовав ки служба. Адалеске молинѓум ман хем гељум ки служба“. Адава сабај и Џоселин запознајнѓа јекхе љубезно ромња и Мери, која со прифатинѓа те проучинел и Библија. Некобор масекија покасно, и Мери вакерѓа кај кеда и Џоселин кхувѓа лаке ко удар ој ко адава моменти молинела пе сине е Девлеске те поможинел ла. Со сиклили и Џоселин таро акава искуство? Ој вакерела: „Адава сине сар ка пхене о Јехова вакерела манге: ‘Ме сиум задоволно тутар‘“. Џанѓола пе, нане секој те мангел те шунел о хабери со проповединаја ле. Ама, шај те ова увериме кај о Јехова радујнела пе кеда дикхела кај даја амендар са те шај те вакера о шукар хабери е јаверенге.

17. Со сикљовеа таро адава со вакерѓа и Вики баши откупнина? (Псалм 5:12).

¹⁷ О Јехова поможинела околенге кастар сој задоволно те овел лен корист тари откупнина (1. Тим. 2:5, 6). Ама, со ако амаро вило панда нане уверимо кај о Јехова тано задоволно амендар, иако иси амен вера ки откупнина хем крстинѓем амен? Ма бистре, нашти секогаш те овел амен доверба ко амаре чувствија, ама шај те овел амен доверба ко Јехова. Окола со иси лен вера ки откупнина тане праведна англо лескере јакхја хем ов ветинела кај ка благословинел лен. (Читин Псалм 5:12; Рим. 3:26.) Јекхе пхењаке со викинела пе Вики, поможинѓа адава со размислинела сине баши откупнина. Јекх диве, откеда хор размислинѓа баши откупнина, ој халили јекх важно бути: „Таро јекх пути халиљум кај о Јехова тано бут време манцар стрпливо, а ме сар те пхене вакерава леске: ‘Тло мангипе нане добором баро те шај те манге ман. И жртва тле чхавескири нашти те учхарел мле гревија‘“. Откеда размислинѓа кобор баро поклон тани и откупнина, ој почминѓа те осетинел кобор о Јехова мангела ла. Џикоте размислинаја баши откупнина амен да шај те осетина кај о Јехова мангела амен хем ка уверина амен кај тано задоволно амендар.

18. Ко со шај те ова увериме ако понадари да мангаја амаре небесно Даде?

¹⁸ Иако шај бут ка трудина амен те применина акала предлогија тари акаја статија, сепак понекогаш шај те осетина амен обесхрабриме хем те пуча амен дали о Јехова тано задоволно амендар. Ако случинела пе туке акава, ма бистре кај ов одобринела „околен со понадари да мангена ле“ (Јак. 1:12). Адалеске, понадари да ов паше е Јеховаја хем приметин ко кола начинија о Јехова сикавела туке кај тано задоволно тутар. Секогаш нека овел тут ки годи кај о Јехова „нане дур никастар амендар“ (Апо. 17:27).