1. Сар о Девел ко пурано време денѓа сила пле верна слугенге?

 Е ДЕВЛЕСКОРО ЛАФИ бут пути опишинела е верна манушен сар силна. Ама чак о најсилна машкар ленде на осетинѓе пе секогаш силна. На пример, ки јекх прилика о цари о Давид вакерѓа кај о Јехова денѓа ле храброст хем сила (Пс. 138:3). Ама ко јавера прилике дарандило (Пс. 55:5). Иако е Самсоне сине ле посебно бари сила која со авела сине таро е Девлескоро духо, сепак ов сине свесно кај адаја сила авела таро Девел хем кај бизи лате ов ка овел „сар са о јавера мануша“ (Суд. 14:5, 6; 16:17). Таро акава јасно дикхела пе кај акала верна мануша сине зорале само адалеске со о Јехова денѓа лен сила.

2. Соске о апостол Павле вакерѓа кај кеда тано слабо тано силно? (2. Коринќања 12:9, 10).

² О апостол Павле исто аѓаар признајнѓа кај ваљани леске сила таро Јехова. (Читин 2. Коринќања 12:9, 10.) Слично сар бут џене амендар, е Павле да сине ле проблемија састипаја (Гал. 4:13, 14). Понекогаш сине леске пхаро те керел адава сој исправно (Рим. 7:18, 19). А понекогаш сине бут секиримо хем дарала сине со ка случинел пе леа (2. Кор. 1:8, 9). Сепак кеда о Павле сине слабо, ов сине силно. Сар? О Јехова денѓа ле и сила со ваљани леске те шај те истрајнел ко неволје.

3. Башо кола пучиба ка добина одговор ки акаја статија?

³ О Јехова аменге да ветинела кај ка керел амен зорале (1. Пет. 5:10). Ама нашти те очекујна кај ка добина адаја сила бизо те кера нешто. Те вакера јекх пример. Јекх врда шај те  движинел пе адалеске со о мотори дела ле сила. Ама те шај те почминел те движинел пе о возачи мора те мечинел ко гаси. Слично, о Јехова тано спремно те дел амен и сила со ваљани аменге ама амен мора те кера нешто те шај те овел амен корист латар. Преку кола буќа керела амен о Јехова зорале? Хем со ваљани амен те кера те шај те добина адаја сила? Те шај те добина о одговорија, те дикха сар о Јехова денѓа сила е пророкоске е Јонаске, е Исусескере дајаке е Маријаке хем е апостол Павлеске. Исто аѓаар, ка дикха сар о Јехова понадари да дела сила пле слугенге авдиве.

4. Сар шај те добина сила таро Јехова?

⁴ Јекх начин сар шај те добина сила таро Јехова тано аѓаар со ка молина амен леске. О Јехова ка одговоринел ко амаре молитве аѓаар со ка дел амен „сила која со накхавела и нормално“ (2. Кор. 4:7). Шај исто аѓаар те добина сила кеда читинаја лескоро Лафи хем размислинаја башо адава со читинаја (Пс. 86:11). И Библија вакерела кај о хабери со денѓа ле аменге о Јехова тано силно (Евр. 4:12). Кеда молинаја амен е Јеховаске хем читинаја лескоро Лафи, тегани ка добина и сила со ваљани аменге те шај те истрајна, те ачхова радосна или те завршина несави пхари задача. Акана те дикха сар о Јехова денѓа сила е пророкоске е Јонаске.

5. Соске е пророкоске е Јонаске ваљанѓа сила?

⁵ Е пророкоске е Јонаске фалинѓа храброст. Кеда о Јехова денѓа ле јекх пхари задача ов дарандило, уклило ко броди хем нашља ко јавер тхан. Сар последица, ов хем о мануша со сине ко броди харичкаске ка мерен сине ки јекх бура. Кеда фрдинѓе ле ко море, јекх баро мачхо глтинѓа ле, а адава сине јекх бут страшно тхан. Со мислинеа, сар осетинѓа пе о Јона? Прво бути со шај али леске ки годи сине кај ка мерел. Шај исто аѓаар мислинѓа песке кај о Јехова мукхља ле. Сигурно о Јона бут дарала сине.

6. Спрема Јона 2:1, 2, 7 сар добинѓа о Јона сила џикоте сине ко воги е мачхескоро?

⁶ Со керѓа о Јона те шај те добинел сила џикоте сине коркори ко воги е мачхескоро? Сар прво ов молинѓа пе. (Читин Јона 2:1, 2, 7.) Иако на сине послушно е Јеховаске, о Јона каинѓа пе хем сине уверимо кај о Јехова ка шунел лескири молитва. Ов исто аѓаар размислинѓа башо буќа со читинѓа лен англедер. Акава џанаја ле соске ки лескири молитва сој пишими ко 2-то поглавје користинена пе о иста лафија хем фразе кола со аракхљовена ко Псалмија. (На пример споредин Јона 2:2, 5 хем Псалм 69:1; 86:7.) Акатар шај јасно те дикха кај о Јона бут шукар џанела сине акала лафија. А адава со размислинела сине баши ленде ко адала пхаре диве, керѓа ле панда поуверимо кај о Јехова ка поможинел ле. О Јехова спасинѓа е Јона хем покасно ов сине спремно те керел и задача која со о Јехова денѓа ле (Јона 2:10—3:4).

7-8. Сар јекх пхрал таро Тајван добинѓа сила џикоте накхела сине таро пхарипа?

⁷ Е Јонаскоро пример шај те поможинел аменге кеда накхаја таро различна неволје. На пример, о Жиминг, b јекх пхрал таро Тајван боринела пе јекхе пхаре насвалипаја. Исто аѓаар, лескири фамилија противинела пе леске хем физички малтретиринела ле адалеске со верујнела ко Јехова. Ама ов добинела сила таро Јехова преку и молитва хем о проучибе. Ов вакерела: „Понекогаш кеда ка појавинен пе проблемија, добором бут вознемиринава ман со нашти те проучинав“. Ама на откажинела пе. Понадари ов  вакерела: „Прво, молинава ман е Јеховаске, тегани чхивава манге о слушалке хем шунава о теократска гиља. Понекогаш ме да гиљавава лен са џикоте на смиринава ман. Пало адава почминава те проучинав“.

⁸ О лично проучибе поможинѓа е пхралеске Жиминг ко јекх начин ко кова со на очекујнѓа. На пример, пали операција јекх медицинско сестра вакерѓа леске кај ка ваљани те приминел рат адалеске со сине ле бут хари лоле крвна клетке. И рат англедер те овел операција, о Жиминг читинѓа јекх искуство тари јекх пхен која со ули операција таро исто проблеми. Ла сине ла панда похари крвна клетке, сепак ој на прифатинѓа рат хем састили. Адава искуство денѓа сила акале пхралеске те ачховел верно.

9. Со шај те кере ако баши несави пхари ситуација нане тут сила? (Дикх хем о слике.)

⁹ Кеда иси ту несави неволја, дали туке добором пхаро со нашти аракхеа лафија те вакере е Јеховаске сар осетинеа тут? Или дали осетинеа тут добором уморно таро проблемија со нашти те проучине? Ма бистре, о Јехова најшукар хаљовела тли ситуација. Адалеске, чак кеда на вакереа бут буќа ки молитва, ов сигурно кај о Јехова ка дел тут баш адава со ваљани туке (Еф. 3:20). Ако туке пхаро те читине хем те проучине адалеске со сиан насвало, уморно или сиан бут вознемиримо, шај те шуне о аудиоснимке тари Библија или таро амаре публикацие. Шај исто аѓаар те шуне несаве таро амаре гиља, или те дикхе несаве видеоклипија тари амари интернет-страница jw.org. О Јехова мангела те керел тут зорало, хем ка керел адава ако ту молинеа тут леске хем ако родеа о одговорија таро тле молитве ки Библија хем ко са о јавера буќа со дела тут.

10. Сар дена амен сила амаре пхраља хем пхења?

¹⁰ О Јехова шај преку амаре пхраља хем пхења те дел амен сила. Ола шај те утешинен амен хем те поможинен амен кеда аракхљоваја ки несави неволја или кеда аменге пхаро те исполнина несави задача (Кол. 4:10, 11). Посебно кеда накхаја таро пхаре диве, тегани ваљанена аменге амала (Изр. 17:17).  Кеда осетинаја амен слаба амаре пхраља шај те поможинен аменге ко физичко, духовно хем емоционално поглед. Акана те дикха сар е Исусескири дај и Марија добинѓа сила таро јавера.

11. Соске е Маријаке ваљанѓа сила?

¹¹ Е Маријаке ваљанѓа сила те шај те керел е Јеховаскири волја. Те замислина аменге сар осетинѓа пе и Марија откеда добинѓа јекх бут важно задача таро ангели о Габриел. О Габриел вакерѓа лаке кај ка ачховел кхамни иако на сине женими. Иако никогаш на сине ла чхаве хем на сине ла искуство сар дај, ој акана ваљани сине те бајрарел чхаве кова со ваљани сине те овел о Месија. Исто аѓаар, ој мора сине те објаснинел е Јосифеске кај тани кхамни хем кај на суќа никасаја. Акава на сине ни хари локхо те објаснинел пе (Лука 1:26-33).

12. Спрема Лука 1:39-45, сар и Марија добинѓа и сила со ваљанѓа лаке?

¹² Сар и Марија добинѓа и сила со ваљанѓа лаке те шај те исполнинел акаја посебно хем пхари задача? Ој родинѓа помош таро јавера. На пример, ој таро Габриел родинѓа повише информацие башо адава сар те керел и задача (Лука 1:34). Кратко пало адава, ој патујнѓа „ко јудејска планине“ те посетинел е Елисавета. Акаја посета врединѓа. И Елисавета пофалинѓа е Марија хем сине водими таро Јехова те вакерел јекх охрабрувачко пророштво башо е Маријакоро чхаво кова со на сине панда бијамо. (Читин Лука 1:39-45.) И Марија вакерѓа кај „о Јехова керѓа бут моќна буќа пле вастеа“ (Лука 1:46-51). Преку о Габриел хем и Елисавета, о Јехова денѓа сила е Маријаке.

13. Сар сине наградими јекх пхен кеда родинѓа помош таро пхраља?

¹³ Исто сар и Марија ту да шај те добине сила таро тле пхраља хем пхења. Јекхе пхењаке тари Боливија, која со викинела пе Дасури, ваљанѓа баш асавки сила. Кеда лакере дадеске аракхле пхаро насвалипе колеске со на сине иљачи, ој сине спремно те ачхол леа ки болница хем те грижинел пе леске (1. Тим. 5:4). Ама адава на сине секогаш локхо. Ој признајнела: „Бут пути мислинѓум кај нашти више те продолжинав“. Дали родинѓа помош? Ко почеток на. Ој вакерела: „На мангљум те досадинав е пхрален. Мислинѓум кај о Јехова ка дел ман адава со ваљани манге. Ама тегани халиљум кај адалеа со цидава ман таро јавера пробинава сине те решинав коркори мле проблемија“ (Изр. 18:1). И Дасури одлучинѓа те пишинел некоборе амаленге хем те објаснинел пли ситуација. Ој вакерела: „Нашти лафенцар те вакерав кобор охрабринѓе ман о пхраља хем о пхења. Ола анѓе хајбаске ки болница хем утешинѓе ман библиско стихонцар. Кобор тано шукар адава со џанаја кај на сием коркори. Амен сием дело тари е Јеховаскири бари фамилија која сој спремно те дел тут пло вас, те ровел туја хем заедно туја те боринел пе“.

14. Соске ваљани те прифатина помош таро старешине?

¹⁴ Јекх начин сар о Јехова дела амен сила тано преку о старешине. Ола тане сар поклонија кола со користинела лен те ден амен сила хем те охрабринен амен (Иса. 32:1, 2). Адалеске кеда сиан секиримо, вакер тле муке е старешиненге. Кеда ка нудинен туке помош, ов благодарно хем прифатин ла. О Јехова преку ленде шај те керел тут силно.

15. Сави надеж иси са е христијанен?

¹⁵ И надеж со авела тари Библија шај те дел амен сила (Рим. 4:3, 18-20). Сар христијања иси амен надеж те живина засекогаш — несавен ко небо, а побаро дело ко јекх бут шужо  рај теле ки пхув. Амари надеж дела амен сила те истрајна ко искушенија, те проповедина о шукар хабери хем те служина амаре пхраленге хем пхењенге ко собрание (1. Сол. 1:3). И исто надеж денѓа сила е апостол Павлеске.

16. Соске е Павлеске ваљанѓа сила?

¹⁶ Е Павлеске ваљанѓа сила. Ко пло писмо џи ко Коринќања, ов спорединѓа пе пхувјале чареа кова со локхе пхаѓола. Ов сине чхивдо ко притисок, ки неизвесност, прогонимо хем перавдо. Уствари лескоро живото понекогаш сине чак ки опасност (2. Кор. 4:8-10). О Павле пишинѓа акала лафија кеда сине ко пло трито мисионерско патујбе. Ама, ко адава моменти ов шај на сине свесно кај аџикерена ле јавера да пхарипа. Ов ваљани сине те соочинел пе манушенцар со сине насилна, те овел астардо, те доживинел бродолом хем те овел пханло.

17. Спрема 2. Коринќања 4:16-18, со поможинѓа е Павлеске те истрајнел?

¹⁷ Е Павле сине ле сила те истрајнел адалеске со концентриринѓа пе ки пли надеж. (Читин 2. Коринќања 4:16-18.) Ов вакерѓа е Коринќаненге чак ако лескоро тело „распадинела пе“, ов нане те дозволинел те обесхрабринел пе. О Павле сине концентриримо ки пли иднина. И надеж со сине е Павле добором бут врединела сине англо лескере јакхја со сине спремно те истрајнел ко било саво пхарипе те шај те добинел пли награда. Ов размислинела сине баши пли надеж хем сар резултати „обновинела пе сине таро диве ко диве“.

18. Сар о Тихомир хем лескири фамилија добинѓе сила тари надеж?

¹⁸ О Тихомир јекх пхрал тари Бугарија, добинѓа сила тари пли надеж. Англедер некобор берша лескоро потикно пхрал о Здравко муло ки јекх сообраќајно несреќа. Адалеске о Тихомир сине пхаго тари дукх. Те шај те икљон ко крајо акале дукхаја, ов хем лескири фамилија замислинена сине сар ка овел кеда о Здравко ка воскреснинел. О Тихомир вакерела: „На пример, кераја сине лафи коте ка аџикера е Здравко, саво хајбе ка спремина  леске, кој ка овел канимо ки прво забава кеда ка воскреснинел хем со ка вакера леске башо последна диве“. О Тихомир вакерела кај адава со размислинена баши надеж денѓа сила леске хем лескере фамилијаке понадари да те истрајнен хем те аџикерен е Јеховаскоро диве кеда ка воскреснинел лескере пхрале.

19. Со шај те кере те шај те бајраре тли надеж? (Дикх хем и слика.)

¹⁹ Сар шај те бајраре тли надеж? На пример, ако иси тут надеж те живине вечно ки пхув, читин сар и Библија опишинела о рај хем размислин башо адава (Иса. 25:8; 32:16-18). Размислин саво ка овел о живото ко нево свето. Замислин туке кај сиан адатхе. Кас дикхеа? Саве звукија шунеа? Сар осетинеа тут? Те шај пошукар те замислине туке о рај, дикх о слике ко амаре публикацие или несаво музичко видеоклипи, сар на пример, Во рајот прекрасен, Баш на прагот или Замисли го денот што доаѓа. Ако иси амен ки годи и надеж башо нево свето, амаре проблемија ка овен „моментална хем локхе“ (2. Кор. 4:17). И надеж со денѓа тут о Јехова ка керел тут силно.

20. Чак кеда сием слаба, сар шај те добина сила?

²⁰ Чак кеда осетинаја амен слаба, „таро Девел ка добина сила“ (Пс. 108:13). О Јехова више обезбединѓа адава со ваљани туке те шај те добине сила. Адалеске, кеда ваљани туке помош те шај те исполнине несави задача, те истрајне ки несави неволја или те ачхове радосно, молин тут таро вило е Јеховаске хем роде лестар водство аѓаар со ка проучине. Исто аѓаар прифатин о охрабрување таро тле пхраља хем одвојн туке време редовно те размислине баши надеж. Тегани ка добине „сила тари е [Девлескири] славно моќ“ те шај стрпливо хем радосно те истрајне ко са (Кол. 1:11).