1-2. Со шај те поможинел амен те хаљова сар о Јехова осетинела пе башо ховајба со сине вакерде лескере анавеске?

 ЗАМИСЛИН кај некој со мангеа ле вакерела лошна буќа тутар. Ту џанеа кај адава нане чаче ама сепак несаве верујнѓе ле. Сој панда пострашно ола почминена те ширинен адава ховајбе хем панда бут јавера верујнѓе. Сар ка осетине тут? Ако туке важна о мануша хем тло углед, адава ховајбе сигурно ка поврединел тут (Изр. 22:1).

² Акаја измислими ситуација шај те поможинел амен те хаљова сар о Јехова осетинѓа пе кеда лескоро анав сине каљардо. Јекх таро лескере ангелија вакерѓа ховајба баши лесте е прво џувљаке е Еваке, хем ој верујнѓа ко адава ховајбе. Адава ховајбе керѓа о Адам хем и Ева те бунинен пе против о Јехова хем анѓа грево хем мерибе са е манушенге (1. Мој. 3:1-6; Рим. 5:12). Са о проблемија со дикхаја лен ко свето сар на пример, о мерибе, о војне, о муке, постојнена соске о Сатана вакерѓа ховајба ки еденско градина. Дали е Јехова дукхала ле башо са адала ховајба хем о последице со авена лендар? Сигурно. Сепак, о Јехова на икерела холи. Наместо адава, ов понадари да тано „радосно Девел“ (1. Тим. 1:11).

3. Сави чест иси амен?

³ Амен иси амен чест те поможина те докажинел пе кај адава со вакерѓа о Сатана башо Јехова тано ховајбе. Адава кераја аѓаар со шунаја и заповед: „Фалинен о анав е Јеховаскоро“ (Пс. 113:1). Амен кераја адава аѓаар со вакераја е јаверенге о чачипе башо лескоро свето анав. Дали ту да мангеа те учествујне ко адава? Те дикха трин причине со ка поможинен амен те фалина о анав е Девлескоро цело амаре вилеа.

 КЕДА ФАЛИНАЈА Е ЈЕХОВАСКОРО АНАВ КЕРАЈА ЛЕ РАДОСНО

4. Соске о Јехова радујнела пе кеда фалинаја ле? Вакер пример. (Дикх хем и слика.)

⁴ Кеда фалинаја амаре небесно Дадескоро анав кераја ле радосно (Пс. 119:108). Дали акава значинела кај о Семоќно Девел тано сар о несовршена мануша, кола со мангена о јавера те фалинен лен адалеске со нане сигурна ки песте? На. Размислин баши акаја споредба. Јекх тикни чхај прастала ко пло дад гушинела ле хем вакерела леске: „Ту сиан о најшукар дад ко цело свето!“ О дад асала хем бут тано радосно. Соске? На адалеске со ов на осетинела пе сигурно ки песте или адалеске со ваљани леске пофалба тари лескири чхај, него адалеске со ов мангела пле чхаја. Ов тано радосно со ој сикавела леске мангипе хем ценинела ле. Ов џанела кај асавке особине ка поможинен лаке те овел посреќно кеда ка бајрол. Таро слична причине, о Јехова о најбаро Дад, радујнела пе кеда фалинаја ле.

5. Кова ховајбе докажинаја кај нане точно кеда фалинаја е Девлескоро анав?

⁵ Кеда фалинаја амаре небесно Даде поможинаја те докажинел пе кај нане точно панда јекх ховајбе со вакерѓа ле о Сатана баши секова јекх амендар. Ов вакерѓа кај нијекх мануш нане верно те бранинел е Девлескоро анав. Спрема лесте нијекх мануш нане те ачховел верно кеда ка овел чхивдо ко испит. Ов вакерела кај сарине амен ка чхинава те служина е Девлеске ако мислинаја кај аѓаар ка овел аменге пошукар (Јов 1:9-11; 2:4). Ама о Јов ачхило верно е Јеховаске хем докажинѓа кај о Сатана ховавела. Дали ту да ка ачхове верно е Девлеске? Секој амендар шај те биринел те бранинел амаре Дадескоро анав хем те керел ле радосно аѓаар со ка служинел леске верно (Изр. 27:11). Адаја тани чаче бари чест аменге.

6. Сар шај те џа пало пример е Давидескоро хем е левитенгоро? (Неемија 9:5)

⁶ Окола со мангена е Девле поттикниме тане те фалинен лескоро анав цело вилеа. О цари о Давид пишинѓа: „Ка фалинав тут, о Јехова Девла, цело мле вилеа, ка славинав тло анав засекогаш“ (Пс. 86:12). О Давид џанља кај кеда фалинаја е Јеховаскоро анав, адалеа фалинаја е Девле. Кеда шунаја о анав Јехова, одма со авела аменге ки годи тано адава сави личност тано ов, лескере шукар особине хем са адава со ов створинѓа. О Давид мангља те фалинел о анав пле небесно Дадескоро, адалеске со ки лесте дикхела сине сар нешто сој свето. Ов мангља те керел адава цело пле вилеа. Слично, о левитија да фалинена сине е Јехова аѓаар со  предводинена сине ко гиљајбе. Ола понизно признајнѓе кај е Јеховаскоро свето анав заслужинела бут побари фалба тари адаја со ола дена ла пумаре лафенцар. (Читин Неемија 9:5.) Сигурно кај асавки понизно фалба таро вило бут радујнкерѓа е Јехова.

7. Сар шај те фалина е Јехова ки служба хем ко амаро секојдневно живото?

⁷ Авдиве, амен шај те фалина е Јехова амаре лафенцар кола со ка сикавен кобор сием леске благодарна хем кобор мангаја ле. Кеда проповединаја, амари главно цел тани те поможина е јаверенге те овен паше е Јеховаја хем ола да те осетинен о исто со амен осетинаја амаре мангле Дадеске (Јак. 4:8). Радосна сием со шај те сикава е манушенге сар и Библија опишинела е Јехова. Ки лате тане пишиме лескере бут шуже особине сар сој о мангипе, правда, мудрост хем моќ. Исто аѓаар, амен фалинаја е Јехова хем радујнаја ле кеда даја амендар са те џа пало лескоро пример (Еф. 5:1). Адалеа сикаваја кај разликујнаја амен таро акава лошно свето. О мануша шај те приметинен кај сием појавера хем те пучен пе соске разликујнаја амен (Мат. 5:14-16). Кеда иси амен прилика те кера ленцар лафи тегани шај те објаснина ленге соске разликујнаја амен. Адава шај те керел о искрена мануша те манген те служинен е Девлеске. Кеда фалинаја е Јехова ко акала начинија радујнаја лескоро вило (1. Тим. 2:3, 4).

РАДУЈНАЈА Е ИСУСЕ КЕДА ФАЛИНАЈА Е ЈЕХОВАСКОРО АНАВ

8. Соске о Исус тано најшукар пример башо адава сар те фалинел пе е Јеховаскоро анав?

⁸ Никој, ни ко небо ни ки пхув, на џанела е Јехова пошукар таро Исус (Мат. 11:27). О Исус мангела пле Даде хем ов тано најшукар пример башо адава сар те фалинел пе е Јеховаскоро анав (Јован 14:31). И рат англедер те мерел, ки молитва вакерѓа пле Дадеске која тани и најважно бути со исполнинѓа ла џикоте керѓа пли служба ки пхув. Ов вакерѓа: „Вакерѓум ленге тло анав“ (Јован 17:26). Сар керѓа адава?

9. Која споредба користинѓа о Исус те шај те опишинел ко најшукар начин саво чаче тано лескоро Дад?

⁹ О Исус керѓа бут повише него само те вакерел е манушенге кај е Девлескоро анав тано Јехова. О Евреија, колен со о Исус сикавела сине, џанена сине више е Девлескоро анав. Ама ов ко најшукар начин вакерела сине, јавере лафенцар, објаснинела сине сави личност тано ов (Јован 1:17, 18). На пример ко хебрејска списија читинаја кај о Јехова тано милостиво хем љубезно (2. Мој. 34:5-7). Акава чачипе уло панда појасно кеда о Исус вакерѓа и споредба башо бунтовно чхаво хем лескоро дад. Ки акаја споредба о чхаво каинѓа пе хем иранѓа пе кхере. Кеда о дад дикхља ле панда дуралдан, прастандило, гушинѓа ле хем таро вило простинѓа леске. Џикоте читинаја акаја споредба шај те хаљова кобор милостиво хем сочувствително тано о Јехова (Лука 15:11-32). О Исус поможинѓа е јаверенге те хаљовен сави личност чаче тано о Јехова.

10. а) Котар џанаја кај о Исус користинела сине пле Дадескоро анав хем кај мангља о јавера да те керен о исто? (Марко 5:19; дикх хем и слика.) б) Со мангела о Исус амен те кера авдиве?

¹⁰ Дали о Исус мангља о јавера да те користинен лескере Дадескоро анав? Сигурно кај оја. Несаве религиозна водачија шај мислинена сине кај е Девлескоро анав тано бут свето те шај те андинен ле. Ама, о Исус никогаш на дозволинѓа асавке традицие со нане библиска те чхинавен ле те фалинел пле Дадескоро анав. Размислин башо време кеда о Исус сине ко герасинско региони хем сасљарѓа јекхе мануше коле со сине ле демонија. О мануша дарандиле хем молинѓе е  Исусе те џал песке адатхар хем адалеске ов на ачхило ко адава тхан (Мар. 5:16, 17). Ама о Исус мангља адари да те вакерел пе е Јеховаскоро анав. Адалеске, е манушеске со сасљарѓа ле вакерѓа те вакерел е јавере манушенге башо адава со о Јехова керѓа баши лесте, а на башо адава со о Исус керѓа леске. (Читин Марко 5:19.) a О Исус мангела амен да авдиве те кера о исто, те вакера лескере Дадескоро анав ко цело свето! (Мат. 24:14; 28:19, 20). Кеда кераја адава, амен радујнаја амаре Царе е Исусе.

11. Башо со сикавѓа о Исус пле следбеникон те молинен пе хем соске адава тано важно? (Езекиел 36:23).

¹¹ О Исус џанља кај е Јеховаскири намера тани те славинел пло анав, јавере лафенцар те чистинел ле таро са о ховајба со сине вакерде баши лесте. Адалеске, амаро Господари сикавѓа пле следбеникон те молинен пе: „Амаро Дад со сиан ко небо, те фалинел пе тло свето анав“ (Мат. 6:9). О Исус халило кај акава тано о најважно пучибе кова со влијајнела упро са о мануша хем упро са о ангелија. (Читин Езекиел 36:23.) Никој, ни ко небо ни теле ки пхув, на фалинѓа е Јеховаскоро анав сар со керѓа адава о Исус. Сепак, кеда астарѓе е Исусе, башо со обвининѓе ле лескере душмања? Кај ни хари на поштујнела е Девле! Е Исусеске сигурно о најстрашно хем о најбаро грево сине те каљарел пе о свето анав лескере Дадескоро. Ов сине бут секиримо те на овел обвинимо хем осудимо баши асавки лошно постапка. Шај адаја сине и главно причина соске е Исусе сине ле баро пхарипе ки душа некобор саатија англедер те астарен ле (Лука 22:41-44).

12. Со керѓа о Исус те шај те фалинел пле Дадескоро анав ко најшукар начин со шај?

¹² Те шај те фалинел пле Дадескоро анав, о Исус трпинѓа те овел мучимо ко различна начинија, те овел вреџимо хем те вакерен ховајба против лесте. Ов на сине состар те лаџал соске џанља кај ко са сине послушно пле Дадеске (Евр. 12:2). Ов исто аѓаар, џанља кај адала нападија со сине ле ко адава пхаро време, директно авена сине таро Сатана (Лука 22:2-4; 23:33, 34). О Сатана сигурно надинела пе сине кај ка успејнел те чхивел е Исусе те на овел верно е  Јеховаске, ама ов ни хари на успејнѓа ко адава. О Исус денѓа најбаро доказ кај о Сатана тано лошно хем ховавела хем кај е Јехова иси ле слуге кола со ачховена леске верна чак ко најпхаре испитија!

13. Сар шај те радујне тле Царе?

¹³ Дали мангеа те радујне тле царе е Исусе? Продолжин те фалине е Јеховаскоро анав, аѓаар со ка поможине е јаверенге те дознајнен кобор шуже особине иси амаре Девле. Аѓаар ка џа пало пример е Исусескоро (1. Пет. 2:21). Исто сар о Исус, ка радујнкере е Јехова хем ка докажине кај лескоро душмани о Сатана бизи лаџ ховавела!

КЕДА ФАЛИНАЈА Е ЈЕХОВАСКОРО АНАВ ПОМОЖИНАЈА ТЕ СПАСИНЕЛ ПЕ НЕКАСКОРО ЖИВОТО

14-15. Кола шукар буќа шај те случинен пе кеда сикаваја е манушен башо Јехова?

¹⁴ Кеда фалинаја е Јеховаскоро анав поможинаја те спасинел пе некаскоро живото. Сар? Сар со џанаја, о Сатана „корјарѓа и годи околенгири со на верујнена“ (2. Кор. 4:4). Адалеске, ола верујнена ко е Сатанаскере ховајба сар сој: О Девел на постојнела, о Девел тано дур амендар хем нане леске гајле е манушенге, ов тано бут лошно хем мучинела е грешникон засекогаш. О Сатана вакерела са акала ховајба соске мангела те каљарел е Јеховаскоро шукар анав хем те керел о мануша те на манген те овен леа паше. Ама, кеда амен проповединаја тегани чхинаваја е Сатана те исполнинел пли цел. Амен сикаваја о чачипе е манушен башо амаро Дад, а адалеа фалинаја лескоро свето анав. Која шукар бути шај те икљол таро адава?

¹⁵ О чачипа таро е Девлескоро лафи иси лен бари моќ. Кеда сикаваја е манушен башо Јехова хем башо адава саво чаче тано ов, шај те дикха нешто бут шукар. Тегани, ленгере јакхја кола со сине пханле таро е Сатанаскере ховајба, почминена хари по хари те пхравѓон хем те дикхен амаре Дадескере бут шуже особине. Ола тане воодушевиме тари лескири моќ со нане ла границе (Иса. 40:26). Исто аѓаар, сикљовена те овел лен доверба ки лесте адалеске со ов тано совршено праведно (5. Мој. 32:4). Сикљовена тари лескири бари мудрост (Иса. 55:9;  Рим. 11:33). Хем бут утешинела лен адава кеда дознајнена кај „о Девел тано мангипе“ (1. Јов. 4:8). Сар овена попаше е Јеховаја, ленгири надеж кај ка живинен засекогаш сар лескере чхаве овела посигурно. Чаче тани бари чест со шај те поможина е манушенге те овен паше пле Дадеа! Кеда кераја адава о Јехова дикхела ки аменде сар пле соработникија (1. Кор. 3:5, 9).

16. Сар влијајнѓа упро несавенде адава со дознајнѓе е Девлескоро анав? Вакер примерија.

¹⁶ Ко почеток шај само те сикава е манушен кај е Девлескоро анав тано Јехова. Адава тано доволно те шај те менинел несаве искрено манушескоро живото корендан. На пример, јекх чхај со викинела пе Алија, b барили ки религиозно фамилија колакере сикљојба на темелинена пе сине ки Библија. Ама, ој на сине задоволно тари пли религија хем на осетинела пе сине паше е Девлеа. Адава менинѓа пе откеда почминѓа те проучинел е Јеховаскере сведоконцар. Ој почминѓа те дикхел ко Девел сар пло амал. Хем ој сине бут изненадими кеда дознајнѓа кај е Девлескоро анав сине цидимо таро бут Библие хем кај сине менимо обична титуленцар, сар на пример Господари. Адава со дознајнѓа е Јеховаскоро анав целосно менинѓа лакоро живото. И Алија радосно вакерѓа: „Мле најшукар амале иси ле анав!“ Со случинѓа пе пало адава? Ој вакерела: „Акана осетинава баро андруно мир. Адава со џанава е Девлескоро анав тано манге бари чест“. О Стив кова со сине музичари, авела тари фамилија која со строго икерела пе сине ко еврејска традицие. Ов на мангља те овел ки нијекх религија адалеске со дикхља баро лицемерство. Ама, откеда лескири дај мули, ов сложинѓа пе те овел присутно ко јекх библиско курси кова со водинѓа ле јекх пхрал. Ле бут погодинѓа ле кеда дознајнѓа е Девлескоро анав. Ов вакерела: „Никогаш на шунѓум башо е Девлескоро анав. Прво пути халиљум кај о Девел чаче постојнела, ки лесте почминѓум те дикхав сар чачутни личност. Тегани халиљум кај аракхљум манге амал“.

17. Соске сиан одлучно понадари да те фалине е Јеховаскоро анав? (Дикх хем и слика.)

¹⁷ Џикоте сиан ки служба, дали вакереа е манушенге е Јеховаскоро свето анав? Дали поможинеа ленге те хаљовен саво тано чаче амаро Девел? Аѓаар, ту фалинеа е Девлескоро анав. Понадари да фалин е Девлескоро свето анав, аѓаар со ка поможине е манушенге те дознајнен сави личност тано ов. Аѓаар ка шај те спасине некаскоро живото. Исто аѓаар, ка џа пало о водство тле Царескоро, е Исус Христосескоро, хем сој најважно ка радујне тле Даде, е Јехова, кова сој пхердо мангипаја. Ов одлучно те фалине лескоро анав „ки цели вечност!“ (Пс. 145:2).