Несаве бариле ки култура коте со о мурша мислинена кај о џувља врединена похари лендар. На пример о Ханс, јекх покраинско надгледнико тари Боливија вакерела кај несаве бариле ки култура коте со о мурша мислинена кај тане пошукар таро џувља хем бут пути понашинена пе е ленцар бизо поштовање. О Шенгшиен, јекх старешина таро Тајван, вакерела: „Ко тхан коте со живинава, бут мурша мислинена кај о џувља на ваљани те мешинен пе ленге ко ништо. Ако јекх мурш вакерела со мислинела јекх џувли башо нешто, лескере амала шај те на поштујнен ле више“. Несаве мурша сикавена кај иси лен предрасуде спрема о џувља ко јавера начинија. На пример, шај вакерена шале коленцар со понижинена е џувлен.

Ама, шукар тано адава со јекх мурш шај те менинел пе, бизи разлика ки која култура барило. Ов шај те менинел пло стави кај о мурша тане пошукар таро џувља (Еф. 4:22-24). Шај те керел адава ако џала пало е Јеховаскоро пример. Ки акаја статија ка дикха сар о Јехова постапинела е џувленцар, сар о пхраља шај те џан пало е Јеховаскоро пример хем сар шај о старешине те предводинен ко сикајбе поштовање е пхењенге.

САР ПОСТАПИНЕЛА О ЈЕХОВА Е ЏУВЛЕНЦАР?

О Јехова тано совршено пример башо адава сар ваљани те постапинел пе е џувленцар. Ов тано сочувствително Дад кова со мангела са пле чхавен (Јован 3:16). А о џувља кола со сикавена вера ки лесте тане леске сар скапоцена чхаја. Размислин башо следна начинија сар о Јехова сикавела кај мангела хем поштујнела е џувлен.

Ов постапинела ленцар непристрасно. О Јехова керѓа е мурше хем е џувља спрема пло лико  (1. Мој. 1:27). Ов на створинѓа е мурше поинтелигентно или поталентиримо тари џувли, а ни на мангела е муршен повише таро џувља (2. Лет. 19:7). Ов керѓа о мурш хем и џувли те овел лен исто способност те хаљовен о библиска чачипа хем те сикавен особине сар лескере. О Јехова ценинела хем е муршен хем е џувлен со сикавена вера ки лесте. Хем ов сариненге дела надеж те живинен вечно ки пхув или те служинен сар царија хем свештеникија ко небо. Таро акава дикхјола пе кај е Јехова нане ле предрасуде спрема о џувља.

Ов шунела лен. Е Јеховаске тано важно сар осетинена пе о џувља хем со мучинела лен. На пример, ов шунѓа хем одговоринѓа ко молитве е Рахелакере хем е Анакере (1. Мој. 30:22; 1. Сам. 1:10, 11, 19, 20). Исто аѓаар, о Девел пле силаја водинѓа несаве библиска писателен те пишинен башо ситуацие коленде со о мурша шунѓе е џувлен. На пример, о Авраам сине послушно ко е Јеховаскере лафија те шунел пле ромња е Сара (1. Мој. 21:12-14). О цари о Давид шунѓа е Авигеја. Уствари, ов халило кај о Јехова бичхалѓа ла те керел леа лафи (1. Сам. 25:32-35). О Исус, кова со совршено сикавела сине о особине пле Дадескере, шунѓа пле даја е Марија (Јован 2:3-10). Таро акала примерија дикхаја кај јекх начин сар о Јехова сикавела поштовање спрема о џувља тано аѓаар со шунела лен.

Ле иси ле доверба ки ленде. На пример, е Јехова сине ле доверба ки Ева хем лаке да денѓа и задача те грижинел пе баши пхув (1. Мој. 1:28). Адалеа ов сикавѓа кај и Ева на врединела похари таро Адам, него кај ки лате дикхела сар помошничка. Исто аѓаар, о Јехова денѓа е Девораке хем е Олдаке, кола со сине пророчице, задача те ден совет лескере народоске, а исто аѓаар јекхе судијаске хем јекхе цареске (Суд. 4:4-9; 2. Цар. 22:14-20). Авдиве да о Јехова сикавела доверба ко пхења аѓаар со дела лен различна задаче ки служба баши лесте. Акала верна пхења служинена сар објавителија, пионерија хем мисионерија. Ола поможинена ко проектирибе, градибе хем одржибе дворане хем подружнице. Несаве лендар служинена ко Бетел, а јавера ко преведувачка канцеларие. Акала пхења тане сар јекх бари војска колен со о Јехова користинела те шај те исполнинел пли волја (Пс. 68:11). Јасно тано кај о Јехова на мислинела кај о џувља тане слаба или кај нане способна.

САР ШАЈ О ПХРАЉА ТЕ СИКЉОВЕН ТЕ ПОНАШИНЕН ПЕ Е ЏУВЛЕНЦАР САР О ЈЕХОВА?

Пхраљален, те шај те дикха дали понашинаја амен амаре пхењенцар сар о Јехова, ваљани искрено те испитина сар размислинаја хем постапинаја. Те шај те кера адава, ваљани аменге помош. Исто сар со јекх рендген апарати шај те сикавел дали амаро срце тано ки шукар состојба, аѓаар јекх шукар амал хем е Девлескоро Лафи шај те поможинен аменге те открина дали хор ки аменде иси несаво негативно чувство спрема о џувља. Со ваљани те кера те шај те добина асавки помош?

Пуч јекхе шукар амале (Изр. 18:17). Шукар ка овел те пуча несаве амале касте со иси амен доверба хем сој пенџардо сар некој сој љубезно хем разумно акала пучиба: „Со мислинеа, сар понашинава ман е пхењенцар? Дали ола осетинена кај поштујнава лен? Иси ли нешто со шај те менинав ки манде те шај панда пошукар те понашинав ман ленцар?“ Ако тло амал вакерела туке несаве буќа коленде со шај те ове пошукар, ма оправдин тут. Наместо адава, ов спремно те кере адава со ваљани.

Проучин е Девлескоро Лафи. О најшукар начин те дикха дали понашинаја амен шукар е пхењенцар тано аѓаар со преку е Девлескоро Лафи ка испитина амаро стави хем амаре постапке (Евр. 4:12). Џикоте проучинаја и Библија, шај те читина башо несаве мурша кола со понашинѓе пе шукар е џувленцар хем башо несаве мурша со понашинѓе пе лошно. Пало адава, шај те споредина ленгере постапке амаре постапкенцар. Освен адава, ако спорединаја повише библиска стихија, адава ка поможинел аменге те на икала стихија таро контекст те шај те поддржина несаве амаре погрешна ставија башо џувља. На пример, ко бут библиска преводија ко 1. Петарескоро 3:7 пишинела кај о мурша ваљани те поштујнен е џувлен „сар послабо чаро“. b Дали адава значинела кај и џувли на врединела исто сар о мурш или кај нане добором интелигентно  или способно? Џанѓола пе кај на! Споредин о лафија е Петарескере адалеа со пишинела ко Галатјања 3:26-29 коте со пишинела кај о Јехова машкар о мурша биринѓа хем е џувлен те владинен заедно е Исусеа ко небо. Ако проучинаја е Девлескоро Лафи хем ако замолинаја јекхе шукар амале или амалинка те вакерел аменге пло мислење башо адава сар понашинаја амен е џувленцар, адава шај те поможинел аменге те сикљова искрено те поштујна амаре пхењен.

САР О СТАРЕШИНЕ СИКАВЕНА КАЈ ПОШТУЈНЕНА Е ПХЕЊЕН

Јавер начин сар шај о пхраља те сикљовен те поштујнен е пхењен тано аѓаар со ка слединен о пример амаре грижлива старешиненгоро. Сар о старешине сикавена кај поштујнена е пхењен? Те дикха некобор конкретна начинија.

Ола пофалинена е пхењен. О апостол Павле денѓа шукар пример е старешиненге. Ов јавно пофалинѓа некоборе пхењен ко писмо башо собрание ко Рим (Рим. 16:12). Шај ли те замислине туке сар осетинѓе пе о пхења кеда о писмо е Павлескоро сине читимо ко собрание? Слично сар о Павле, о старешине дарежливо пофалинена е пхењен башо ленгере шуже особине хем башо са адава со керена е Јеховаске. Акава шај бут те поможинел е пхењенге те џанен кај о собрание бут ценинела лен хем поштујнела лен. Адава со о старешине охрабринена лен шај те овел баш адава со ко моменти ка ваљанел ленге те шај понадари да те служинен верно е Јеховаске (Изр. 15:23).

Кеда пофалинена е пхењен, о старешине тане искрена хем конкретна. Соске? Јекх пхен со викинела пе Џесика, вакерела: „Шукар тано кеда о пхраља вакерена јекхе пхењаке ’браво‘. Ама посебно ценинаја кеда о пхраља ка пофалинен амен башо нешто конкретно. На пример, адалеске со амаре чхаве бешена мирно ко состанокија или адалеске со одвојнаја време те џа ки јекх интересентка хем со лаја ла аменцар ко состанок“. Адалеа со пофалинена лен конкретно, о  старешине керена о пхења те осетинен пе потребна хем цениме ко собрание.

Ола шунена е пхењен. О понизна старешине хаљовена кај нане само лен шукар идее. Ола пучена е пхењен башо ленгере предлогија хем внимателно шунена лен џикоте керена лафи. Адава на само со ка користинел ленге него исто аѓаар ка охрабринен е пхењен. Сар? Јекх старешина со викинела пе Херардо хем служинела ко Бетел, вакерела: „Халиљум кај адава со пучава е пхењен башо ленгоро мислење, поможинела манге пошукар те керав ми бути. Бут пути ола керена сине несави бути повише време таро несаво пхрал“. Ко собрание, бут пхења служинена сар пионерија хем адалеске ола џанена бут повише башо мануша таро подрачје. Јекх старешина со викинела пе Брајан, вакерела: „Амаре пхењен иси лен бут шуже особине хем вештине кола сој потребна ки организација. Адалеске сикљов таро ленгоро искуство!“

О мудра старешине на игнориринена е пхењенгере предлогија. Соске? Јекх старешина со викинела пе Едвард, вакерела: „О мислење јекхе пхењакоро или лакоро искуство шај те поможинел јекхе пхралеске те овел ле целосно слика баши јекх бути хем пошукар те хаљовел о чувствија е јаверенгере“ (Изр. 1:5). Чак ако јекх старешина нашти те применинел о предлог јекхе пхењакоро, сепак ов шај те заблагодаринел пе лаке со вакерѓа пло мислење хем со споделинѓа пло искуство.

Ола обучинена е пхењен. О мудра старешине родена прилике те обучинен е пхењен. На пример, ола шај те сикавен е пхењен сар водинела пе о состанок службаке, те шај те овен спремна ако ко состанок нане крстимо пхрал. Шај те обучинен лен те керен бути несаве алатенцар или машиненцар те шај те поможинен ки изградба хем ко одржибе теократска објектија. Ко Бетел, о надгледникија обучинена е пхењен те керен различна задаче, сар на пример башо одржибе, баши набавка, башо сметководство, башо компјутерско програмирибе хем јавера буќа. Кеда обучинена е пхењен, о старешине сикавена кај дикхена ки ленде сар способна соработникија хем кај иси лен доверба ки ленде.

Бут пхења користинена и обука со добинѓе ла таро старешине те шај те поможинен е јаверенге. На пример, несаве пхења користинена и обука со добинѓе ла баши изградба дворане, те шај те поможинен е јаверенге те градинен пумаре кхера пали несави природно катастрофа. Јавера пхења користинена о вештине со сиклиле џикоте сведочинѓе ко прометна тхана те шај те поможинен повише пхењенге те учествујнен ки адаја служба. Саво стави иси е пхењен башо старешине со обучинѓе лен? Јекх пхен со викинела пе Џенифер, вакерела: „Џикоте поможинѓум те градинел пе дворана, јекх надгледнико одвојнѓа време те обучинел ман. Ов дикхља и бути со керѓум хем пофалинѓа ман. Бут шукар сине манге те керав леа бути адалеске со дикхава сине кај ценинела ман хем кај иси ле доверба ки манде“.

СОСКЕ ТАНО ШУКАР ТЕ ПОНАШИНА АМЕН Е ПХЕЊЕНЦАР САР ТЕ ПХЕНЕ ТАНЕ АМЕНГЕ ФАМИЛИЈА

Амен мангаја амаре верно пхењен исто сар о Јехова! Адалеске понашинаја амен ленцар сар те пхене сием фамилија (1. Тим. 5:1, 2). Дичинаја амен со шај те служина е Јеховаске заедно ленцар. Аменге адаја тани бари чест! Исто аѓаар, радујнаја амен кеда ола осетинена кај мангаја хем кај поддржинаја лен. Јекх пхен со викинела пе Ванеса, вакерела: „Бут сиум благодарно е Јеховаске адалеске со сиум дело тари лескири организација која сој пхерди пхраленцар со охрабринена ман“. Јекх пхен таро Тајван вакерела: „Бут сиум благодарно со о Јехова хем лескири организација ценинена е џувлен хем поштујнена амаре чувствија. Адава бајрарела мли вера хем мло ценење баши чест со иси ман те овав дело тари е Јеховаскири организација“.

О Јехова сигурно дичинела пе кеда дикхела кај о верна пхраља таро собрание ценинена е џувлен хем иси лен поштовање спрема ленде, исто сар лесте (Изр. 27:11). Јекх старешина тари Шкотска со викинела пе Бенџамин, вакерела: „Авдиве, иси бут мурша ко свето со на поштујнена е џувлен. Адалеске, кеда амаре пхења кхувена ки дворана, амен мангаја ола те осетинен и разлика“. Те да амендар са те ова сар о Јехова аѓаар со ка понашина амен амаре верна пхењенцар мангипаја хем ка поштујна лен, соске ола адава заслужинена (Рим. 12:10).