1. Сар замислинеа туке е Јехова?

 ДАЛИ некогаш пробинѓан те замислине сар изглединела о Јехова? Сар замислинеа ле кеда молинеа тут леске? Иако амен нашти те дикха ле, сепак и Библија опишинела ле ко различна начинија. Башо Јехова вакерела кај тано „кхам хем штити“ хем „јаг со глтинела“ (Пс. 84:11; Евр. 12:29). О Езекиел ки јекх визија опишинѓа е Јеховаскири присутност сар сафири, парно злато со светинела хем виножито со бут светинела (Езек. 1:26-28). Акава шај те бајрарел амаро поштовање спрема о Јехова, па чак те бајрарел амари дар спрема лесте.

2. Соске шај несавенге те овел пхаро те овен паше е Јеховаја?

² Адалеске со нашти те дикха е Јехова шај те овел аменге пхаро те верујна кај ов мангела амен. Несаве мислинена кај о Јехова никогаш нашти те мангел лен адалеске со доживинѓе лошна буќа ко живото. Ленгоро дад шај никогаш на сикавѓа ленге мангипе. О Јехова хаљола адала чувствија хем сар ола влијајнена упри аменде. Те шај те поможинел аменге, ов преку пло Лафи сикавела аменге сави личност тано.

3. Соске ваљани те дознајна нешто повише башо Јехова хем башо лескоро мангипе?

³ Е Јехова најшукар шај те опишина ле јекхе лафеа — е лафеа мангипе. Баш адава вакерела и Библија, о Јехова тано мангипе (1. Јов. 4:8). Са со керела, керела таро мангипе. Е Девлескоро мангипе тано добором баро хем силно со сикавела ле чак околенге со на мангена ле (Мат. 5:44, 45). Ки акаја статија ка дикха нешто повише башо Јехова хем башо лескоро мангипе. Со повише сикљоваја башо амаро Девел, добором повише ка манга ле.

О ЈЕХОВА БУТ МАНГЕЛА АМЕН

4. Сар осетинеа тут адалеске со е Јехова иси ле сочувство? (Дикх хем и слика.)

⁴ „О Јехова тано пхердо сочувство“ (Јак. 5:11) Ки Библија ов спорединела пе јекхе дајаја сој пхерди сочувство (Иса. 66:12, 13). Замислин туке сар јекх дај љубезно грижинела пе  пле чхавеске. Ој нежно икерела ле ки пли ангали хем љубезно керела леа лафи. Кеда ровела или иси ле дукха, ој керела са со шај те дел ле адава со ваљани леске. Слично, кеда иси амен несави мука шај те ова сигурна кај о Јехова ка сикавел аменге мангипе. Јекх псалмисти пишинѓа: „Кеда пхердиљум бут мисле со на дена ман мир, ту утешинѓан ман хем смиринѓан ман“ (Пс. 94:19).

5. Со значинела туке е Јеховаскоро верно мангипе?

⁵ О Јехова тано верно (5. Мој. 32:4). На откажинела пе амендар кеда кераја нешто сој погрешно. О Израелција бут пути разочаринена ле сине. Сепак кеда каинена пе сине, ов уверинела лен сине ко пло верно мангипе. На пример, ки јекх прилика ов вакерѓа пле народоске: „Ту сиан манге скапоцено, сикавди туке чест хем ме мангава тут“ (Иса. 43:4, 5). Е Јеховаскоро мангипе на менинѓа пе. Никогаш на ваљани те сумнина амен ко адава, чак ако кераја несави сериозно грешка о Јехова нане те иранел аменге пло думо. Ако каинаја амен хем иранаја амен ко Јехова ка шај те дикха кај ов панда мангела амен. Ов ветинела кај ка простинел аменге ки бари мера (Иса. 55:7). И Библија вакерела кај тегани ка џана со значинела о Јехова те иранел амари сила (Апо. 3:19).

6. Со сикљоваја таро Захарија 2:8 башо Јехова?

⁶ Читин Захарија 2:8. О Јехова спорединела амен е зеницаја тари пли јакх. И јакх тани бут осетливо хем бут вредно дело таро амаро тело. Спрема адава, о Јехова јавере лафенцар сар те пхене вакерела аменге: „Тумен со сиен мло народо, секова јекх со поврединела тумен, поврединела адава сој манге скапоцено“. Адалеске со мангела амен, о Јехова џанела сар осетинаја амен хем иси ле бари желба те заштитинел амен. Кеда амен осетинаја дукх, ов да осетинела дукх. Адалеске шај те ова сигурна кај ка одговоринел аменге кеда молинаја ле: „Аракх амен сар и зеница тле јакхјакири“ (Пс. 17:8).

7. Соске ваљани те уверина амен ко е Јеховаскоро мангипе?

⁷ О Јехова мангела те уверине тут кај ов тут лично мангела. Ама ов џанела кај башо адава со доживинѓем англедер шај те пуча амен дали ов чаче мангела амен. Или шај ко моменти накхаја тари несави ситуација која со чхивела ко испит амари доверба ко е Јеховаскоро мангипе. Со ка поможинел туке те бајраре  тли доверба? Адава со ка дознајне сар о Јехова сикавела пло мангипе спрема о Исус, о помазаникија хем спрема сариненде аменде.

САР О ЈЕХОВА СИКАВЕЛА ПЛО МАНГИПЕ

8. Соске о Исус сине уверимо кај лескоро Дад мангела ле?

⁸ О Јехова хем лескоро Чхаво накхавѓе време заедно повише него било кој јавер. Џикоте сине заедно бут милијарде берша, ола уле бут паше хем ленгоро мангипе јекх јекхеске бут барило. О Јехова јасно сикавѓа пло мангипе е Исусеске. Адава шај те читина ле ко Матеј 17:5. О Јехова шај сине само те вакерел: „Акава тано окова со керела ман радосно“. Наместо адава, ов мангља те џана кобор бут мангела е Исусе, адалеске ов вакерѓа леске „мло мангло Чхаво“. О Јехова дичинела пе сине е Исусеа, посебно адалеске со сине спремно те дел пло живото (Еф. 1:7). А о Исус ни хари на сумнинѓа пе кај лескоро Дад мангела ле. Е Јеховаскоро мангипе сине добором реално е Исусеске со шај сине те осетинел ле хор ки песте. Ко повише прилике ов сикавѓа кај тано уверимо кај лескоро Дад мангела ле (Јован 3:35; 10:17; 17:24).

9. Кова лафи опишинела е Јеховаскоро мангипе спрема о помазаникија? Објаснин. (Римјања 5:5).

⁹ О Јехова исто аѓаар сикавела пло мангипе спрема о помазаникија. (Читин Римјања 5:5.) Приметин кова лафи користинела пе те шај те сикавел пе кобор мангела о Јехова е помазаникон. Акате пишинела кај ов „пхерѓа“ ленгере виле пле мангипаја. Јекх библиско речнико спорединела е Јеховаскоро мангипе јекхе рекаја колате со цело време тхавдела пани хем пхерѓола. Акаја споредба јасно сикавела кобор бут мангела о Јехова е помазаникон. О помазаникија џанена кај о Девел мангела лен (Јуда 1). О апостол Јован опишинѓа пле чувствија акале лафенцар: „Дикхен саво мангипе денѓа амен о Дад, те ова викиме е Девлескере чхаве“ (1. Јов. 3:1). Дали о Јехова мангела само е помазаникон? На, о Јехова сикавѓа кај мангела саринен амен.

10. Кова тано о најбаро доказ башо е Јеховаскоро мангипе?

¹⁰ Кова тано о најбаро доказ башо е Јеховаскоро мангипе? И откупнина — о најбаро мангипе со шај сине некој џи акана те сикавел (Јован 3:16; Рим. 5:8). О Јехова денѓа пле мангле Чхаве сар жртва хем дозволинѓа те мерел са е манушенге, те шај амаре гревија те овен простиме хем аѓаар те ова лескере амала (1. Јов. 4:10). Со повише размислинаја баши цена со платинѓе ла о Јехова хем о Исус, добором повише хаљоваја кобор бут мангена секоле јекхе амендар (Гал. 2:20). И откупнина на сине платими само адалеске со е Јеховаскири правда родела сине адава. Него, ој тани поклон таро Јехова со денѓа ла мангипаја. Ов докажинѓа кај мангела амен аѓаар со жртвујнѓа адава сој леске најскапоцено — е Исусе. О Јехова дозволинѓа лескоро Чхаво те цидел муке хем те мерел аменге.

11. Со сикљоваја таро Еремија 31:3?

¹¹ Сар со дикхлем, о Јехова на само со осетинела мангипе спрема аменде, него ов исто аѓаар сикавела пло мангипе. (Читин Еремија 31:3.) О Јехова привлечинѓа амен ки песте адалеске со мангела амен. (Споредин 5. Мојсеева 7:7, 8.) Никој хем ништо нашти те одвојнел амен таро адава мангипе (Рим. 8:38, 39). Сар осетинеа тут адалеске со џанеа кај о Јехова мангела тут? Читин о 23-то Псалм хем дикх сар е Јеховаскоро мангипе хем грижа влијајнѓа упро Давид хем сар адава шај те влијајнел упри аменде.

САР ВЛИЈАЈНЕЛА УПРИ ТУТЕ Е ЈЕХОВАСКОРО МАНГИПЕ?

12. Сар ка опишине кратко о 23-то Псалм?

¹² Читин Псалм 23:1-6. Ко Псалм 23 преку јекх гили о Давид опишинела пли доверба  ко е Јеховаскоро мангипа хем ки лескири грижа. Ов опишинѓа лескоро паше амалипе е Јеховаја, колесте со дикхела сине сар пло Пастири. О Давид осетинела пе сине сигурно адалеске со о Јехова водинела ле сине, хем ов целосно потрпинела пе сине ки лесте. О Давид џанља кај о Јехова секова диве ка сикавел леске пло мангипе. Соске сине добором уверимо ко адава?

13. Соске о Давид сине сигурно кај о Јехова ка грижинел пе леске?

¹³ „Ништо нане те фалинел манге“. О Давид осетинела сине е Јеховаскири грижа соске ов секогаш дела ле сине адава со ваљани леске. О Давид исто аѓаар џанела сине кај о Јехова дикхела ле сине сар лескоро амал хем кај одобринела ле. Адалеске сине сигурно кај бизи разлика со ка случинел пе леске ки иднина, о Јехова понадари да ка грижинел пе башо лескере потребе. Адава со е Давиде сине ле доверба кај о Јехова мангела ле хем грижинела пе леске, поможинѓа леске те на секиринел пе хем те овел радосно хем задоволно (Пс. 16:11).

14. Сар шај о Јехова мангипаја те грижинел пе аменге?

¹⁴ О Јехова љубезно грижинела пе аменге, посебно кеда случинела пе аменге нешто лошно ко живото. И Клер a‚ која со служинѓа повише таро 20 берш ко Бетел, на џанља сар те поможинел пле фамилијаке кеда таро јекх пути сине лен повише проблемија. Лакере даде сине ле мозочен удар, јекх таро лакере пхења сине исклучими, исто аѓаар нашавѓе пумаро тикно бизнис хем пумаро кхер. Сар о Јехова сикавѓа кај љубезно грижинела пе ленге? И Клер вакерела: „О Јехова грижинѓа пе мле фамилијаке аѓаар со секова диве добинѓе адава со ваљани ленге. Бут пути денѓа  лен чак повише таро адава со ваљани ленге. Често размислинава башо адава сар о Јехова грижинѓа пе аменге хем никогаш нане те бистрав о мангипе со сикавѓа ле аменге. Адава поможинѓа манге понадари да радосно те служинав е Јеховаске кеда сине ман јавера да проблемија ко мло живото“.

15. Соске о Давид шај сине те иранел пли сила? (Дикх хем и слика.)

¹⁵ „Ов дела ман неви сила“. Понекогаш, о Давид осетинела пе сине вознемиримо таро са о проблемија хем неволје со сине ле (Пс. 18:4-6). Сепак, мангипе хем и грижа таро Јехова денѓа ле неви сила. О Јехова ингарѓа пле уморно амале „ко тхан коте со иси бут чар“ хем „ко тхана коте со иси бут пани“. Адава поможинѓа е Давидеске те добинел неви сила хем понадари да те служинел е Јеховаске (Пс. 18:28-32).

16. Сар е Јеховаскоро мангипе дела тут сила?

¹⁶ Слично, е Јеховаскоро верно мангипе шај аменге да те поможинел те икљова ко крајо е неволјенцар со иси амен (Плач 3:22; Кол. 1:11). Размислин баши пхен Рејчел. Ој сине пхаги тари дукх кеда лакоро ром мукхља ла хем е Јехова џикоте сине и пандемија КОВИД-19. Сар поможинѓа лаке о Јехова? Ој вакерела: „О Јехова керѓа те осетинав ман мангли. Ов денѓа ман амала кола со накхавѓе време манцар, анѓе манге хајбе, бичхалѓе манге пораке хем охрабрувачка стихија, асана сине манцар хем секогаш потсетинена ман сине кај о Јехова грижинела пе манге. Бут сиум благодарно е Јеховаске со денѓа ман асавки бари духовно фамилија“.

17. Соске о Давид на дарала сине таро лошнипе?

¹⁷ „На дарава таро лошнипе, соске ту сиан манцар“. Е Давидескоро живото бут пути сине ки опасност хем ле сине ле бут моќна душмања. Сепак, адалеске со џанља кај о Јехова мангела ле, ов осетинѓа пе сигурно хем заштитимо. О Давид шај сине ки секоја ситуација те осетинел кај о Јехова сине леа хем кај охрабринела ле. Адалеске ки гили вакерѓа: „Таро са со дарава [о Јехова] ослободинѓа ман“ (Пс. 34:4). Иако понекогаш дарала сине, о Давид шај сине те побединел адаја дар соске џанела сине кај е Јеховаскоро мангипе сине бут посилно тари лескири дар.

18. Сар адава со џанаја кај о Јехова мангела амен дела амен сила кеда аракхљоваја ко страшна ситуацие?

¹⁸ Сар адава со џанаја кај о Јехова мангела амен дела амен сила кеда аракхљоваја ко  страшна ситуацие? Јекх пионерка со викинела пе Сузи опишинела сар ој хем лакоро ром осетинѓе пе кеда ленгоро чхаво мударѓа пе. Ој вакерела: „Кеда доживинаја несави трагедија, адава шај бут те влијајнел упри аменде хем осетинаја амен сар те пхене амаре васта тане пханле, нашти ништо те кера. Ама е Јеховаскоро сочувство керѓа те осетина амен безбедна хем заштитиме“. И Рејчел кола со спомнинѓем англедер вакерела: „Јекх рат кеда сиум сине бут тажно хем бут секирими, ко гласо хем ровиндор молинѓум ман е Јеховаске. Одма пало адава осетинѓум сар о Јехова утешинѓа ман хем смиринѓа ман, исто сар јекх дај со керела адава пе бебеске, хем тегани засуќум. Никогаш нане те бистрав адава моменти“. Јекх старешина со викинела пе Тасос сине пханло штар берш адалеске со одбинѓа те џал ки војска. Сар дикхља е Јеховаскоро мангипе хем грижа? Ов вакерела: „О Јехова грижинѓа пе те добинав са со ваљани манге, па чак повише таро адава. Адава панда повише уверинѓа ман кај шај те овел ман целосно доверба ки лесте. Исто аѓаар, преку лескири сила о Јехова керѓа те ачховав радосно иако о затвор сине бут депресивно тхан. Халиљум кај кобор попаше соработинава леа, добором повише ка овел ман корист таро лескоро шукарипе, адалеске почминѓум те служинав сар општо пионери ко затвор“.

АЧХОВ ПАШЕ ТЛЕ СОЧУВСТВИТЕЛНО ДЕВЛЕА

19. а) Сар адава со џанаја кај о Девел мангела амен влијајнела упро адава со ка вакера ко амаре молитве? б) Кова стихо со керела лафи башо е Девлескоро мангипе највише значинела туке? (Дикх и рамка „ Стихија кола со поможинена аменге те осетинеа е Јеховаскоро мангипе“).

¹⁹ О искуствија со дикхлем лен џи акана докажинена кај о Јехова, „о Девел е мангипаскоро“, тано аменцар (2. Кор. 13:11). Ов грижинела пе секоле јекхеске лично! Увериме сием кај сием опколиме таро лескоро верно мангипе (Пс. 32:10). Кобор повише размислинаја башо адава сар ов сикавѓа аменге пло мангипе, добором пореално овела аменге хем оваја са попаше леа. Шај ко секова моменти те молина амен леске хем те вакера леске кобор аменге потребно лескоро мангипе. Шај те вакера леске са со мучинела амен соске сием увериме кај хаљола амен хем кај бут мангела те поможинел аменге (Пс. 145:18, 19).

20. Сар е Јеховаскоро мангипе керела те ова попаше леа?

²⁰ Исто сар со привлечинела амен и јаг ко јекх шудро диве, аѓаар привлечинела амен е Јеховаскоро мангипе. Адалеске, те прифатина е Јеховаскоро мангипе кова со дела амен утеха хем мир хем амен да те вакера леске: „Мангава тут, Јехова!“ (Пс. 18:1).