1-2. Саве пхарипа шај те овен е Јеховаскере верна слуген?

 КЕДА доживинаја несави трагедија адава шај таро јекх пути те менинел цело амаро живото. На пример, јекх верно пхрал со викинела пе Луис a откринѓа кај тано насвало тари јекх опасно врста рако. О доктори вакерѓа леске кај ка живинел само панда некобор масекија. И Моника хем лакоро ром сине зафатиме духовно активностенцар. Пало несаво време ој дознајнѓа кај лакоро ром, кова со служинела сине сар старешина, више бершенцар живинела двојно живото. И Оливија, јекх пхен која со нане женими, мора сине те мукхел по кхер адалеске со авела сине јекх страшно урагани. Кеда иранѓа пе, ој дикхља кај о урагани уништинѓа лакоро кхер. О живото акале трине објавителенгоро таро јекх пути менинѓа пе. Дали ту да доживинѓан нешто добором страшно?

² Иако верно служинаја е Јеховаске, амен да доживинаја пхарипа хем насваљоваја, исто сар са о јавера мануша. Освен адава, шај ка ваљани те доживина противибе или прогонство околендар со мрзинена е Девлескере народо. Иако о Јехова на заштитинела амен таро акала пхарипа, ама ов ветинела кај ка поможинел аменге (Иса. 41:10). Кеда ов поможинела амен, шај те ачхова радосна, те ана шукар одлуке хем те ачхова леске верна чак кеда накхаја таро најпхаре ситуацие. Ки акаја статија ка дикха штар начинија сар о Јехова поможинела аменге кеда накхаја таро најпхаре диве ко амаро живото. Исто аѓаар ка дикха со ваљани те кера те шај те овел амен корист тари помош со дела амен.

О ЈЕХОВА КА АРАКХЕЛ ТУТ

3. Кеда доживинаја несави трагедија, со шај те овел аменге пхаро те кера?

³ О проблеми со доживинаја. Кеда доживинаја несави трагедија шај те овел пхаро јасно те размислина хем те ана одлуке.  Соске? Шај адалеске со амари душа андрал дукхала амен. Шај иси амен добором секирацие со само ки ленде те мислина. Шај осетинаја амен сар те пхене пхираја ки магла хем на џанаја која страна те џа. Приметин сар осетинѓе пе о дуј пхења колен со спомнинѓем лен англедер кеда сине лен пхарипа. И Оливија вакерела: „Кеда о урагани уништинѓа мло кхер наџанава сине више со те керав. О секирацие леле мли сила“. И Моника, колакоро ром изневеринѓа ла вакерела: „Нашти те вакерав кобор сиум сине разочарими. Сар те пхене некој кхувѓа ман чхурикаја. Нашти сине више нормално те функциониринав. Никогаш на мислинѓум кај ка доживинав нешто асавко“. О Јехова ветинела кај ка поможинел амен. Сар?

4. Спрема Филипјања 4:6, 7, со ветинела аменге о Јехова?

⁴ Сар поможинела аменге о Јехова. Ов ветинела аменге кај ка дел амен пло мир. (Читин Филипјања 4:6, 7.) Кеда иси амен мир таро Девел, тегани амаре мисле хем амаро вило тане рахати хем осетинаја амен смириме адалеске со сием паше амала леа. Акава мир тано „упредер секоја мисла“. Акава чувство тано бут пошукар него адава со шај амен те мислина аменге. Дали случинѓа пе туке некогаш таро јекх пути те осетине тут смиримо откеда таро вило молинѓан тут е Јеховаске? Асавко чувство уствари тано о мир таро Девел.

5. Сар о мир таро Девел аракхела амаре мисле хем амаро вило?

⁵ Ко Филипјања 4:7 исто аѓаар пишинела кај о мир таро Девел „ка аракхел“ или ка заштитинел тумаре виле хем тумаре мисле. О лафи сој преведимо сар „ка аракхел“ ки грчко чхиб користинела пе сине сар воено израз хем леа опишинела пе сине јекх група војникија кола со заштитинена јекх диз хем икерена ла сине безбедно таро нападија. О мануша тари адаја диз шај сине мирно те совен соске џанена сине кај о војникија терѓона англо порте. Слично, кеда о мир таро Девел аракхела амаре виле хем амаре мисле, тегани сием смириме соске џанаја кај сием заштитиме (Пс. 4:8). Исто сар ко случај е Анакоро, чак ако амари ситуација на менинела пе одма, сепак амен шај џи негде те осетина амен смириме (1. Сам. 1:16-18). А кеда сием смириме, бут пути тано аменге полокхо те размислина јасно хем те ана мудра одлуке.

6. Со шај те кера те шај те овел амен корист таро е Девлескоро мир? (Дикх хем и слика.)

⁶ Со ваљани амен те кера. Кеда сиан смиримо викин е „чуваре“ ки несави смисла. Сар? Аѓаар со ка молине тут са џикоте на осетинеа о мир таро Девел (Лука 11:9; 1. Сол. 5:17). О Луис коле со спомнинѓем ле англедер објаснинела со поможинѓа леске хем  лескере ромњаке, е Анаке, кеда дознајнѓе кај ка живинел само панда некобор масекија. Ов вакерѓа: „Ко асавке моментија бут тано пхаро те ане одлуке башо тло састипе хем башо јавера буќа, ама ко акава пхаро време шај сине те овел амен мир само адалеске со молинѓем амен“. О Луис хем лескири ромни вакерѓе кај ола редовно хем таро вило молинѓе пе те роден таро Јехова андруно мир хем мудрост те шај те анен шукар одлуке. Хем ов чаче поможинѓа ленге. Ако накхеа таро пхаро периоди, ма чхинав те молине тут хем ка осетине сар е Јеховаскоро мир аракхела тло вило хем тле мисле (Рим. 12:12).

О ЈЕХОВА КА ПОМОЖИНЕЛ ТУКЕ ТЕ АЧХОВЕ СТАБИЛНО

7. Сар шај те осетина амен кеда накхаја тари несави пхари неволја?

⁷ О проблеми со доживинаја. Кеда накхаја тари несави пхари ситуација амаре чувствија, мисле или постапке шај нане те овен о иста. Исто сар јекх броди со шај те овел фрдимо таро бранија тари јекх страна ки јавер страна, аѓаар аменде да о силна чувствија шај те фрден амен тари јекх страна ки јавер. И Ана, кола со спомнинѓем ла англедер, вакерела кај откеда муло лакоро ром о Луис ој нашти сине те контролиринел пле чувствија. Ој вакерѓа: „Понекогаш перава ки депресија хем почминава коркори те жалинав ман. Исто аѓаар, понекогаш сиум сине хољами со ов више на сине узи манде“. Освен адава, и Ана осетинела пе сине осамено хем нервозно кеда ваљани сине те анел одлуке башо буќа коленге со о Луис бут шукар грижинела пе сине. Понекогаш осетинела пе сине сар ка пхене сине машкар јекх бари бура ко море. Сар поможинела аменге о Јехова кеда ка почминен те поплавинен амен асавке емоцие?

8. Спрема Исаија 33:6, ко со уверинела амен о Јехова?

⁸ Сар поможинела аменге о Јехова. Ов уверинела амен кај ка поможинел аменге те ачхова стабилна. (Читин Исаија 33:6.) Кеда јекх броди аракхљола ки несави бура, адава шај те овел опасно соске шај те превртинел пе. Те шај те на случинел пе адава, ко бут бродија чхивена пе стабилизаторија таро солдуј стране е бродескере тело пани. Асавке стабилизаторија шај те поможинен е бродеске те на мрдинел бут хем аѓаар о мануша сој ки лесте те осетинен пе безбедна хем те уживинен џикоте патујнена. Ама бут таро адала стабилизаторија најшукар функциониринена само тегани кеда о броди движинела пе англе. Слично, о Јехова ка поможинел аменге те ачхова стабилна ако понадари да верно служинаја леске чак кеда накхаја таро пхаре ситуацие.

9. Сар поможинена амен о алатке истражибаске те ова урамнотежена? (Дикх хем и слика.)

 ⁹ Со ваљани амен те кера. Кеда ка аракхљове ки бура таро негативна чувствија, де тутар са понадари да те молине тут, те џа ко состанокија хем те џа ки служба. Џанѓола пе, шај нане те овел тут доволно сила те кере добором сар со кереа сине англедер, ама ма бистре кај о Јехова на очекујнела амендар те кера повише таро адава со шај те кера. (Споредин Лука 21:1-4.) Исто аѓаар, одвојн туке време лично те проучине хем хор те размислине башо адава со проучинеа. Соске? О Јехова преку пли организација дела амен статие хем видеоклипија кола со шај те поможинен аменге те ачхова стабилна. Те шај те аракхе адава со ваљани туке шај те користине о алатке истражибаске со иси ки тли чхиб, сар на пример и апликација JW Li­brary^® хем о Прирачнико истражибаске е Јеховаскере сведоконгоро. И Моника кола со спомнинѓем ла англедер вакерѓа кај само со ка почминел те осетинел пе лошно, ој одма родела совет ко акала алатке истражибаске. На пример ој родела сине ки тема „холи“. Ко јавера прилике родела сине ки тема „неверство“ или „верност“. Пало адава читинела сине о материјали са џикоте на осетинела пе сине пошукар. Ој вакерѓа: „Кеда почминава сине те истражинав, осетинава ман сине вознемирими. Ама сар со читинава сине осетинава ман сине сар ка пхене о Јехова нежно гушинела ман. Исто аѓаар, халиљум кај о Јехова хаљовела ман сине бизи разлика сар ка осетинав ман хем ов поможинела манге сине“. Асавки поддршка таро Јехова шај исто аѓаар те поможинел туке те контролирине са тле чувствија са џикоте на осетинеа андруно мир (Пс. 119:143, 144).

О ЈЕХОВА КА ПОДДРЖИНЕЛ ТУТ

10. Сар шај те осетина амен пали несави трагедија?

¹⁰ О проблеми со доживинаја. Откеда ка доживина несави трагедија, шај ка овен диве кеда ка осетина амен физички или емоционално ко крајо е силенцар. Шај осетинаја амен сар јекх повредимо спортисти кова со јекх време прастала сине сигате а акана лангала џикоте пхирела. Шај акана едвај кераја адала буќа кола со англедер бут локхе кераја лен сине, или шај нане амен бари волја те кера нешто ко со англедер бут уживинаја сине. Исто сар о Илија шај аменге бут пхаро те ушта. Шај само мангаја те сова (1. Цар. 19:5-7). Со ветинела аменге о Јехова кај ка керел кеда осетинаја амен бут слаба?

11. Ко саво јавер начин поможинела аменге о Јехова? (Псалм 94:18).

¹¹ Сар поможинела аменге о Јехова. Ов  ветинела кај ка поддржинел амен. (Читин Псалм 94:18.) Исто сар со јекхе повредиме спортистеске ваљани помош те шај те движинел пе, шај аменге да ка ваљани помош те шај те ачхова активна ки служба башо Јехова. Ко асавке моментија о Јехова уверинела амен: „Ме, о Јехова, тло Девел, икерава тут таро тло десно вас хем вакерава туке: ’Ма дара! Ме ка поможинав туке‘“ (Иса. 41:13). О цари о Давид осетинѓа асавки помош. Кеда сине ле неволје хем проблемија душманенцар, ов вакерѓа е Јеховаске: „Тло десно вас поддржинела ман“ (Пс. 18:35). Ама, сар поддржинела амен о Јехова?

12. Преку касте о Јехова шај те поможинел аменге кеда сием слаба?

¹² О Јехова бут пути поддржинела амен аѓаар со поттикнинела е јаверен те поможинен аменге. На пример, кеда о Давид ки јекх прилика осетинѓа пе емоционално слабо, лескоро амал о Јонатан посетинѓа ле те шај те зајакнинел ле хем те охрабринел ле (1. Сам. 23:16, 17). Слично, о Јехова биринѓа е Елисее те шај практично те поможинел е Илијаске (1. Цар. 19:16, 21; 2. Цар. 2:2). Авдиве, о Јехова шај те дел амен и поддршка со ваљани аменге преку амари фамилија, амала или старешине. Сепак, кеда иси амен несави емоционално дукх, шај мангаја те цида амен е јаверендар хем те ачхова коркори. Адаја тани нормално реакција. Со шај те кера те шај те добина е Јеховаскири поддршка?

13. Со шај те кера те шај те овел амен корист тари е Јеховаскири поддршка? (Дикх хем и слика.)

¹³ Со ваљани амен те кера. Борин тут против и желба те изолирине тут. Кеда цидаја амен е јаверендар, шај те почмина те мислина само ки аменде хем ко проблемија со иси амен. Асавко размислување шај те влијајнел упро одлуке со анаја лен (Изр. 18:1). Џанѓола пе, саринен амен понекогаш иси амен потреба те ова коркори, посебно кеда доживинаја несави трагедија. Ама ако изолиринаја амен повише време, тегани шај те отфрлина и помош таро мануша колен со о Јехова користинела те шај те поможинел аменге. Адалеске, кобор хем те овел туке пхаро ко асавке моментија, прифатин и помош тари тли фамилија, таро амала хем таро старешине. Дикх ки ленде сар некасте со о Јехова користинела те шај те поможинел туке (Изр. 17:17; Иса. 32:1, 2).

О ЈЕХОВА КА УТЕШИНЕЛ ТУТ

14. Кола ситуацие шај те даравен амен?

¹⁴ О проблеми со доживинаја. Шај накхаја таро ситуацие колендар со дараја. Ки Библија  читинаја башо верна слуге е Девлескере кола со вакерѓе кај накхена таро пхаре ситуацие хем кај дарандиле таро пумаре душмања или јавера притисокија (Пс. 18:4; 55:1, 5). Слично, амен да шај иси амен противибе ки школа, ки бути, тари амари фамилија или таро властија. Шај чак дараја кај ка мера адалеске со сием бут насвале. Ко асавке ситуацие шај осетинаја амен слабо сар јекх тикно чхаво. Сар поможинела амен о Јехова ко асавке моментија?

15. Со ка керел аменге о Јехова спрема Псалм 94:19?

¹⁵ Сар поможинела аменге о Јехова Ов утешинела амен хем смиринела амен. (Читин Псалм 94:19.) Кеда читинаја акава Псалм шај мислинаја ки јекх тикни чхај која со дарала хем нашти те совел адалеске со авријал грминела. Шај те замислина аменге сар лакоро дад авела, лела ла ки ангали хем икерела ла са џикоте на засовела. Иако аври иси панда невреме хем грминела, ама ој акана осетинела пе сигурно ки пле дадескири ангали. Кеда амен доживинаја несаве пхаре ситуацие тегани ваљани аменге амаро небесно Дад те лел амен ко јекх симболично начин ки пли ангали са џикоте на смиринаја амен. Сар шај те добина асавки утеха таро Девел?

16. Со шај те кера те шај те овел амен корист тари е Јеховаскири утеха? (Дикх хем и слика.)

¹⁶ Со ваљани амен те кера? Редовно одвојн туке време те шај те ове е Јеховаја аѓаар со ка молине тут хем ка читине лескоро Лафи (Пс. 77:1, 12-14). Ако иси тут асавки навика, тегани најверојатно о прво нешто со ка кере кеда ка овел тут стрес тано те роде помош таро тло небесно Дад. Вакер е Јеховаске состар дараја хем башо со секиринеа тут. Дозволин леске преку и Библија те керел туја лафи хем те утешинел тут (Пс. 119:28). Несаве делија тари Библија посебно шај те утешинен тут кеда дараја. На пример, шај те добине охрабрување таро лила Јов, Псалмија хем Изреки хем исто аѓаар таро е Исусескере лафија сој пишиме ко 6-то поглавје таро Матеј. Џикоте молинеа тут е Јеховаске хем читинеа лескоро Лафи ка осетине сар ов утешинела тут.

17. Ко со шај те ова увериме?

¹⁷ Шај те ова увериме кај о Јехова секогаш ка овел аменцар, чак ко најпхаре диве таро амаро живото. Амен никогаш нане те ова коркори (Пс. 23:4; 94:14). О Јехова ветинела кај ка аракхел амен, ка поможинел амен те ачхова стабилна, ка поддржинел амен хем ка утешинел амен. Ко Исаија 26:3 башо Јехова пишинела: „Ту ка спасине околен со целосно потпринена пе ки туте. Ка де лен трајно мир соске иси лен доверба ки туте“. Адалеске, нека овел тут доверба ко Јехова хем кер са со шај те овел тут корист тари лескири помош. Ако кереа адава ка добине неве силе, чак ко пхаре времија.