1. Сар адава со ка дикха о Псалм 15:1-5 ка користинел аменге?

 КИ АНГЛУНИ статија дикхлем кај окола со дена лафи е Јеховаске кај ка служинен леске хем трудинена пе те овен паше амала леа, шај те овен гостија ко лескоро симболично шатори. Ама со ваљани те кера те шај те овел амен асавко паше амалипе леа? О 15-то Псалм керела лафи баши акаја тема. (Читин Псалм 15:1-5.) Ко акава Псалм пишинела со мора те кера те шај те ова паше амала е Девлеа.

2. Ко со шај мислинѓа о Давид кеда спомнинѓа е Јеховаскоро шатори?

² О 15-то Псалм почминела акале пучибанцар: „Јехова, кој ка овел госто ко тло шатори? Кој ка живинел ки тли свето гора?“ (Пс. 15:1). Кеда о Давид спомнинѓа е Девлескоро „шатори“, ов шај мислинѓа ко свето шатори кова со несаво време аракхљола сине ко Гаваон. А кеда спомнинѓа е Девлескири „свето гора“, шај мислинѓа ко Сион ко Ерусалим. Адари, некобор километре јужно таро Гаваон, о Давид керѓа јекх шатори хем ки лесте чхивѓа о ковчег е сојузескоро, коте со ачхило са џикоте на градинѓа пе о храми (2. Сам. 6:17).

3. Соске мангаја те хаљова о 15-то Псалм? (Дикх хем и слика.)

³ Џанѓола пе, побаро дело таро Израелција на служинѓе ко свето шатори хем само некобор џене кхувѓе ки лесте, коте со сине о ковчег е сојузескоро. Ама са е Јеховаскере верна слуге шај те овен гостија ко лескоро симболично шатори, аѓаар со ка овен хем ка ачховен лескере амала. Асавко нешто сарине амен мангаја. Ко 15-то Псалм тане спомниме несаве особине со ваљани те развина лен хем те сикава лен те шај те ачхова е Јеховаскере амала.

 СЕКОГАШ ШУН Е ДЕВЛЕ ХЕМ ПОСТАПИН ПРАВЕДНО

4. Котар џанаја кај о Јехова на родела амендар само те крстина амен? (Исаија 48:1).

⁴ Ко Псалм 15:2 пишинела кај окова сој амал е Јеховаскоро, „шунела секогаш е Девле“ хем „постапинела праведно“. О лафија „шунела секогаш е Девле“, шај те превединен пе хем сар „живинела бизи маана“. Ама дали шај чаче те ова бизи маана? Оја. Иако нијекх мануш нане совршено, сепак о Јехова ка дикхел ки аменде сар те пхене сием „бизи маана“ ако даја амендар са те ова леске послушна. Кеда денѓем лафи е Јеховаске кај ка служина леске цело живото хем кеда крстинѓем амен, адава сине само почеток таро амаро амалипе е Девлеа. На пример, ко библиско време, само адалеске со некој сине Израелцо, на значинела сине автоматски кај шај те овел госто е Јеховаскоро. Несаве спомнинена сине е Јеховаскоро анав, ама на „чачипаја хем правдаја“. (Читин Исаија 48:1.) Те шај те сикавен кај чаче мангена те овен е Јеховаскере гостија, о Израелција ваљани сине те џанен со родела о Јехова лендар хем те постапинен спрема адава. Слично, те шај амен авдиве те ова паше амала е Јеховаја, нане доволно само те крстина амен хем те пхирава о анав е Јеховаскере сведокија. Ваљани нешто повише. Мора понадари да те постапина праведно. Сар шај те кера адава?

5. Со значинела те ова послушна е Јеховаске ко са?

⁵ Те шај о Јехова те вакерел некаске кај шунела ле секогаш хем постапинела праведно, ов ваљани те керел нешто повише него само те џал ко состанокија хем те учествујнел ки ленде (1. Сам. 15:22). Мора те да амендар са те шај те ова послушна ки секоја бути со кераја ла, чак кеда сием коркори (Изр. 3:6; Проп. 12:13, 14). Важно тано те трудина амен те ова послушна е Јеховаске чак ко буќа кола со шај на дикхјона добором важна. Аѓаар, ка сикава кај чаче мангаја ле хем адава ка керел  те мангел амен повише (Јован 14:23; 1. Јов. 5:3).

6. Спрема Евреија 6:10-12, сој тано бут поважно тари било која шукар бути со керѓем ла англедер?

⁶ О Јехова бут ценинела о буќа со керѓем леске англедер. Сепак, на значинела кај ка ачхова гостија ко е Јеховаскоро шатори само адалеске со керѓем шукар буќа англедер. Акава јасно дикхела пе таро лафија сој пишиме ко Евреија 6:10-12. (Читин.) О Јехова на бистрела о шукар буќа со керѓем лен англедер, ама ов мангела те продолжина те служина леске цело вилеа „са џи ко крајо“. О Јехова ка овел засекогаш амаро амал „ако на уморинаја амен“ (Гал. 6:9).

ВАКЕР О ЧАЧИПЕ КО ТЛО ВИЛО

7. Со значинела те вакера о чачипе ко амаро вило?

⁷ Окова со мангела те овел госто ко е Јеховаскоро шатори, мора те вакерел „о чачипе ко пло вило“ (Пс. 15:2). Акава на значинела само те на ховава. О Јехова мангела те ова чесна ко са со вакераја хем кераја (Евр. 13:18). Акава тано важно „соске, е Јеховаске тане одвратна о нечесна мануша, а паше амал тано околенцар сој тане чесна“ (Изр. 3:32).

8. Таро со ваљани те пазина амен?

⁸ Окола со вакерена о чачипе ко пумаро вило, на керена пе кај шунена е Девле кеда тане англо јавера, а пало адава кеда тане коркори керена лошна буќа (Иса. 29:13). Ола на постапинена нечесно. Окова сој румимо, или нечесно, шај те почминел те сумнинел пе кај несаве таро е Јеховаскере законија нане баш мудра (Јак. 1:5-8). Ов шај те овел непослушно е Јеховаске ко буќа коленге со мислинела кај нане добором важна. Пало адава, ако изглединела кај нане несаве лошна последице тари лескири непослушност, ов шај те почминел те керел панда полошна буќа. Иако ов шај те мислинел песке кај служинела е Јеховаске, о Јехова ка дикхел ки лесте сар лицемерно (Проп. 8:11). Ама, амен мангаја те ова чесна ко са.

9. Со случинѓа пе кеда о Исус хем о Натанаел прво пути дикхле пе, хем со сикљоваја таро адава? (Дикх хем и слика.)

⁹ Шај бут те сикљова башо адава кобор тано важно те ова искрена ко вило, тари ситуација  кеда о Исус прво пути дикхља пе е Натанаелеа. Кеда о Филип анѓа пле амале е Натанаеле те запознајнел пе е Исусеа, случинѓа пе нешто бут интересно. Иако о Исус англедер никогаш на дикхља е Натанаеле, ов вакерѓа: „Аке право Израелцо касте со нане ховајбе“ (Јован 1:47). О Исус џанља кај лескере јавера да ученикија сине искрена, ама о Натанаел сине посебно искрено. Иако сине несовршено сар аменде, о Натанаел на сине лицемерно него сине чесно ко са. О Исус сине воодушевимо лестар хем пофалинѓа ле башо адава. Кобор бари чест тани о Исус аменге да те мислинел аѓаар!

10. Соске ваљани те пазина со кераја лафи? (Јаков 1:26).

¹⁰ Ко 15-то Псалм тане пишиме буќа со родена пе амендар те кера, а тане поврзиме адалеа сар понашинаја амен е јаверенцар. Ко Псалм 15:3 пишинела кај окова сој госто ко е Јеховаскоро шатори „на вакерела ифтире пле чхибјаја, на керела нисаво лошнипе пле паше амалеске хем на лаџакерела пле амале“. Ако вакераја ховајба башо јавера хем адалеа каљараја ленгоро анав, адава шај бут те дукхавел лен хем аѓаар ка нашти више те ова гостија ко е Јеховаскоро шатори. (Читин Јаков 1:26.)

11. Со керела пе околенцар со каљарена е јаверенгоро анав хем на каинена пе башо адава?

¹¹ О псалмисти конкретно керела лафи баши некасте со каљарела е јаверенгоро анав адалеа со вакерела ховајба баши ленде. Окола со каљарена е јаверенгоро анав аѓаар со вакерена ховајба баши ленде хем на каинена пе башо адава, ка овен исклучиме таро христијанско собрание (Ерем. 17:10).

12-13. Ко кола ситуацие бизо те манга шај те лаџакера амаре амален? (Дикх хем и слика.)

¹² Ко Псалм 15:3 исто аѓаар пишинела кај окова сој е Јеховаскоро госто на керела нисаво лошнипе пле паше амалеске хем на лаџакерела пле амален. Сар шај те лаџакера амаре амален?

 ¹³ Амен шај бизо те манга те лаџакера некас аѓаар со ка ширина негативна информацие баши лесте. Размислин башо акала ситуацие: 1) јекх пхен чхинавела е пионерско службаја, 2) јекх брачно пари на служинела више ко Бетел хем 3) јекх пхрал на служинела више сар старешина или сар слуга-помошнико. Нане те овел шукар те вакера е јаверенге кај акала пхраља хем пхења шај керѓе нешто погрешно хем адалеске нашти те овел лен адаја задача. Шај иси повише причине соске ало џи ко адала промене башо кола амен ни на сием свесна. Окова сој госто ко е Јеховаскоро шатори „на керела нисаво лошнипе пле паше амалеске хем на лаџакерела пле амале“.

СИКАВ ЧЕСТ ОКОЛЕНГЕ СО ДАРАНА ТАРО ЈЕХОВА

14. Со значинела те цида амен таро адала со заслужинена омраза?

¹⁴ Ко Псалм 15:4 пишинела кај е Јеховаскоро амал „цидела пе секастар кова со заслужинела те мрзинен ле“. Котар шај те џана кој заслужинела омраза? Амен нашти те вакера дали некој заслужинела омраза спрема амаро мислење хем спрема амаре желбе. Соске? Амен сием несовршена хем адалеске несаве мануша шај те свиџинен пе аменге башо ленгере особине а јавера те на свиџинен пе аменге соске нервиринена амен. Адалеске, амен ваљани те цида амен само таро окола коленге со о Јехова вакерела кај заслужинена омраза (1. Кор. 5:11). Ко адала тане вклучиме окола со керена лошна буќа а на каинена пе, окола со на поштујнена амаре верувања хем со пробинена те уништинен амаро амалипе е Јеховаја (Изр. 13:20).

15. Кова тано јекх начин сар шај те сикава чест околенге со дарана таро Јехова?

¹⁵ Тари јавер страна, ко Псалм 15:4 пишинела кај ваљани те сикава чест околенге со дарана таро Јехова. Адалеске амен родаја начинија те сикава мангипе хем поштовање е Јеховаскере амаленге (Рим. 12:10). Сар? Спрема Псалм 15:4, окова сој тано госто ко е Јеховаскоро шатори керела адава аѓаар со „на менинела пло ветување, чак кеда адава тано леске ки штета“. Ако на икераја амен ко амаре ветувања ка повредина е јаверен (Мат. 5:37). На пример, о Јехова очекујнела таро пле гостија те икерен пе ко пло брачно завет. Ов исто аѓаар радујнела пе кеда о родителија трудинена пе те икерен пе ко ветувања со денѓе лен пумаре чхавенге. О мангипе спрема о Девел хем спрема о пашутно ка поттикнинел амен те да амендар са те икера амен ко амаре ветувања.

16. Ко саво јавер начин сикаваја чест е Јеховаскере амаленге?

¹⁶ Јавер начин сар сикаваја чест е Девлескере амаленге тано аѓаар со сием гостопримлива хем дарежлива (Рим. 12:13). Кеда накхаја време е пхраленцар хем е пхењенцар ко јавера да прилике на само ко состанокија хем ки служба, тегани оваја попаше ленцар хем е Јеховаја. Освен адава кеда сием гостопримлива џаја пало е Јеховаскоро пример.

МА МАНГ О ПАРЕ

17. Соске ко 15-то Псалм тане спомниме о паре?

¹⁷ Ко Псалм 15:5 пишинела кај окова сој е Јеховаскоро госто „на дела пле паре каматаја хем на лела мито против окова со нане криво“. Соске ко акава Псалм тане спомниме о паре? Адалеске со ако мангаја о паре, ола шај те овен аменге поважна таро мануша, па чак таро Девел (1. Тим. 6:10). Ко библиско време, несаве користинена сине пумаре чороле пхрален аѓаар со лена лендар сине камата башо паре со дена лен сине ки вересија. Исто аѓаар, несаве судие лена сине мито хем пало адава неправедно судинена  сине околенге со нане крива. Асавке постапке тане одвратна е Јеховаске (Езек. 22:12).

18. Кола пучиба шај те поможинен аменге те дикха саво стави иси амен башо паре? (Евреија 13:5).

¹⁸ Шукар тано те испитина амен те шај те дикха саво стави иси амен башо паре. Пуч тут: „Дали често размислинава башо паре хем башо адава со шај те кинав ленцар? Ако лава некастар паре, дали аџикерава бут време те накхел џикоте иранава лен мислиндор кај на ваљанена околеске со денѓа лен манге? Дали адава со иси ман паре керела те осетинав ман поважно таро јавера? Дали манге пхаро те овав дарежливо? Дали мислинава кај несаво пхрал или пхен тане материјалистија само адалеске со иси лен паре? Дали мангава те овав амал само околенцар сој барвале, а на мангава те дружинав ман околенцар сој чороле?“ Важно тано те пуча амен акала пучиба соске иси амен и бут шужи чест те ова е Јеховаскере гостија. Ама шај те ачхова е Јеховаскере гостија само ако сием сигурна кај нане амен мангипе башо паре. Ако тано аѓаар тегани о Јехова никогаш нане те мукхел амен. (Читин Евреија 13:5.)

О ЈЕХОВА МАНГЕЛА ПЛЕ АМАЛЕН

19. Соске о Јехова мангела те кера о буќа сој спомниме ко 15-то Псалм?

¹⁹ Ко 15-то Псалм ко крајо иси акава ветување: „Кој керела акава, никогаш нане те перел“ (Пс. 15:5). Акате о псалмисти откринела аменге соске о Јехова мангела те кера са адала буќа сој тане пишиме ко акава псалм. О Јехова мангела амен те ова среќна. Адалеске, ако кераја адава со о Јехова родела амендар ка овел амен пошукар живото хем ов ка аракхел амен (Иса. 48:17).

20. Со шај те очекујнен е Јеховаскере гостија?

²⁰ Е Јеховаскере гостија шај те очекујнен кај ка овел лен бут шужи иднина. О верна помазаникија ка живинен ко небо коте со о Исус спреминѓа ленге тхан (Јован 14:2). Околен со иси лен надеж те живинен ки пхув, едвај аџикерена те исполнинен пе о ветувања таро Откровение 21:3. Сариненге аменге тани бари чест со о Јехова канинѓа амен те ова лескере амала хем засекогаш те ова гостија ко лескоро шатори!