Те шај те угодина е Јеховаске мора те овел амен вера. Ама, и Библија вакерела кај „нане саринен вера“ (2. Сол. 3:2). Кеда о апостол Павле вакерѓа акава, ов керела сине лафи башо „румиме хем лошна мануша“ кола со прогонинена ле сине хем колендар со ваљани сине те овел ослободимо. Ама, адава со вакерѓа баши вера важинела хем јавере да манушенге. Несаве на мангена те прифатинен о јасна доказија кај постојнела Девел кова со створинѓа са со иси (Рим. 1:20). Јавера вакерена кај верујнена ки несави побари сила. Ама, акаја нане чачутни вера колаја со шај те угодина е Јеховаске.

Ваљани те ова увериме кај о Јехова постојнела хем кај наградинела околен со иси лен силно вера (Евр. 11:6). И вера тани јекх таро особине со авена тари е Девлескири сила. Те шај те добина адаја сила, ваљани ки молитва те рода ла таро Јехова (Лука 11:9, 10, 13). Јавер важно начин сар те добина е Девлескири сила тано аѓаар со ка читина и Библија која со сине водими тари лескири сила те шај те овел пишими. Пало адава, шај те размислина башо адава со читинаја хем те трудина амен те применина адава со сикљоваја. Ко асавко начин амен дозволинаја е Јеховаскири сила те влијајнел упро амаро живото, а адава поможинела амен те овел амен вера колаја со шај те угодина е Девлеске.