1-2. Сави чест сикавела о Јехова пле верна слугенге?

 САВИ улога иси е Јехова ко тло живото? Шај ка вакере: „О Јехова тано мло Дад, мло Девел хем мло Амал“. Шај мислинеа ко јавера да лафија коленцар со шај те опишине е Јехова. Ама, дали баши леске шај те вакере кај ов тано тло домаќини кова со канинела тут ко пло кхер?

² О цари о Давид спорединѓа е Јехова јекхе домаќинеа, а лескере верна слуген спорединѓа лен лескере гостонцар. Ов пучља: „Јехова, кој ка овел госто ко тло шатори? Кој ка живинел ки тли свето гора?“ (Пс. 15:1). Таро акава стихо дознајнаја кај шај те ова гостија ко е Јеховаскоро шатори, јавере лафенцар те ова лескере амала. Нане ли акаја бари чест која со сикавела аменге о Јехова?

О ЈЕХОВА МАНГЕЛА ТЕ ОВА ЛЕСКЕРЕ ГОСТИЈА

3. Кој сине о прво госто е Јеховаскоро, хем сар осетинена пе сине о Јехова хем лескоро госто башо адава?

³ Англедер те почминел те створинел, о Јехова сине коркори. Ама, пало адава створинѓа пле првобијаме Чхаве. О Јехова сине сар домаќини, кова со канинѓа пле прво госто ко пло шатори хем бут сине радосно башо адава. И Библија вакерела аменге кај е Јеховаскоро Чхаво сине леске „бари  радост“. А лескоро прво госто, о Исус „сине радосно англи лесте цело време“ (Изр. 8:30).

4. Кас панда о Јехова канинѓа те овел госто ко лескоро шатори?

⁴ Пало адава, о Јехова створинѓа е ангелен хем ленде да канинѓа лен те овен лескере гостија. И Библија вакерела кај тане „е Девлескере чхаве“ хем сикавела кај ола тане радосна адалеске сој тане е Јеховаја (Јов 38:7; Дан. 7:10). Бут берша, е Девлескере амала сине само окола со живинена сине леа ко небо. Пало адава, ов створинѓа е манушен ки пхув. Аѓаар ола да шај сине те овен гостија ко лескоро шатори. Несаве таро адала гостија сине о Енох, о Ное, о Авраам хем о Јов. И Библија баши ленде вакерела кај тане е Девлескере амала или окола со џана сине „е чачутне Девлеа“ (1. Мој. 5:24; 6:9; Јов 29:4; Иса. 41:8).

5. Со шај те сикљова таро пророштво сој пишимо ко Езекиел 37:26, 27?

⁵ Веконцар пало адава, о Јехова продолжинѓа те канинел пле амален те овен лескере гостија. (Читин Езекиел 37:26, 27.) На пример, таро е Езекиелескоро пророштво дознајнаја кај о Девел чаче мангела лескере верна слуге те овен леа паше амала. Ов ветинѓа кај ка керел ленцар „сојуз башо мир“. Акава пророштво керела лафи башо време кеда окола со иси лен надеж те живинен ко небо хем окола со иси лен надеж те живинен ки пхув, ка овен ко јекхипе ко лескоро симболично шатори сар „јекх стадо“ (Јован 10:16). Амен авдиве живинаја ко адава време!

О ДЕВЕЛ ГРИЖИНЕЛА ПЕ АМЕНГЕ КАЈ ХЕМ ТЕ ОВА

6. Сар некој овела госто ко е Јеховаскоро шатори, хем коте аракхљола лескоро шатори?

⁶ Ко библиско време, јекх шатори сине тхан коте со некој шај сине те одморинел пе хем те гаравел пе кеда сине невреме. Некој со сине госто некасте ко шатори шај сине те очекујнел кај о домаќини шукар ка грижинел пе леске. Кеда даја лафи е Јеховаске кај ка служина леске, амен оваја гостија ко лескоро симболично шатори (Пс. 61:4). Амен иси амен бут духовно храна хем сием бут радосна со шај те ова ко друштво манушенцар со исто аѓаар уле е Јеховаскере гостија. Лескоро симболично шатори нане само ко јекх тхан. Шај сиан сине ки јавер пхув ко несаво специјално конгрес хем адатхе запознајнѓан јаверен да кола сој среќна сој тане ко е Девлескоро шатори. Е Јеховаскоро шатори тано сегде коте со аракхљона лескере верна слуге (Отк. 21:3).

7. Соске шај те вакера кај о верна слуге со муле панда тане гостија ко е Јеховаскоро шатори? (Дикх хем и слика.)

 ⁷ А сој тано околе верна слугенцар со муле? Дали ола панда тане гостија ко е Јеховаскоро шатори? Оја! Соске шај те вакера адава? Адалеске со о Јехова сетинела пе ки ленде добором шукар со англи лесте ола тане панда џивде. О Исус вакерѓа: „Кај о муле ка воскреснинен, сикавѓа о Мојсеј да ко пло лил кеда пишинѓа баши грмушка, коте со башо Јехова вакерѓа кај тано ’о Девел е Авраамескоро, о Девел е Исакоскоро хем о Девел е Јаковескоро‘. Ов нане о Девел е муленгоро него е џивденгоро соске леске сарине ола тане џивде“ (Лука 20:37, 38).

САВЕ БЛАГОСЛОВИЈА ИСИ АМЕН АМА ХЕМ СО МОРА ТЕ КЕРА

8. Саве благословија иси е Јеховаскере гостон адалеске сој тане ко лескоро шатори?

⁸ Исто сар со ко јекх дословно шатори шај те одморине тут хем те гараве тут кеда о време нане шукар, аѓаар хем е Јеховаскоро шатори заштитинела лескере гостон таро са со шај те керел ленге штета ко духовно поглед хем дела лен чачутни надеж баши иднина. Ако ачховаја паше е Јеховаја, о Сатана ка нашти те керел аменге нисави трајно штета (Пс. 31:23; 1. Јов. 3:8). Ко нево свето о Јехова понадари да ка заштитинел пле верна амален, на само таро духовна опасностија него хем таро мерибе (Отк. 21:4).

9. Со очекујнела о Јехова таро пле гостија?

⁹ Чаче тани бари чест те овел пе госто ко е Јеховаскоро шатори. Шај те овел амен паше амалипе е Јеховаја, кова со шај те трајнел вечно. Со ваљани те кера ако мангаја понадари да те ова лескере гостија? Ако некој канинела тут песте кхере, сигурно ка манге те џане со очекујнела тутар ов. На пример, ов шај очекујнела тутар англедер те кхуве андре те икале те кундре, хем ту сигурно ка кере адава. Слично, амен сигурно мангаја те џана со очекујнела о Јехова околендар со мангена те ачховен гостија ко лескоро шатори. Амаро мангипе спрема о Јехова поттикнинела амен те да амендар са те шај целосно те кера лескири волја (Кол. 1:10). Точно тано кај о Јехова тано амаро Амал, ама исто аѓаар ов тано амаро Девел хем Дад кова со заслужинела те поштујна ле (Пс. 25:14). Никогаш на ваљани те бистра акава хем секогаш ваљани хор те поштујна ле. Адава со хор ка поштујна ле ка поможинел аменге те на кера нешто со ка дукхавел ле. Амен мангаја секогаш те џа скромно амаре Девлеа (Мих. 6:8).

О ЈЕХОВА СИНЕ НЕПРИСТРАСНО Е ИЗРАЕЛЦОНЦАР

10-11. Сар дикхјола пе кај о Јехова тано непристрасно таро начин сар постапинела сине е Израелцонцар ки Синајско Пустина?

¹⁰ О Јехова тано непристрасно пле гостонцар (Рим. 2:11). Акава џанаја таро начин сар постапинѓа е Израелцонцар ки Синајско Пустина.

¹¹ Откеда ослободинѓа пле народо таро ропство ко Египет, о Јехова чхивѓа свештеникон те шај те служинен ко свето шатори. А е левитенге денѓа одговорност те керен јавера задаче поврзиме е службаја ко свето шатори. Дали о Јехова грижинела пе сине пошукар околенге со служинена сине ко свето шатори или околенге со живинена сине паше узи лесте? На! О Јехова тано непристрасно.

12. Таро со јавер дикхела пе кај о Јехова сине непристрасно е Израелцонцар? (2. Мојсеева 40:38; дикх хем и слика.)

¹² Секова Израелцо шај сине те овел паше амал е Јеховаја бизи разлика дали служинела сине ко свето шатори или на, хем бизи разлика дали живинела сине паше или дур лестар. На пример, о Јехова керѓа цело  народо те дикхел о стубо таро облако хем о стубо тари јаг кола со сине упро шатори. (Читин 2. Мојсеева 40:38.) Кеда о облако ка почминел сине те движинел пе ко нево правцо, чак окола со живинена сине најдур таро свето шатори шај сине те дикхен адава. Аѓаар, ола шај сине те пакујнен пумаре буќа, те кхеден пумаре фамилијарна шаторија хем те џан заедно е јаверенцар (4. Мој. 9:15-23). Сарине шај сине те шунен о јасно хем гласно звуко е дује сребрена трубенгоро кова со сине знако кај ваљани те циден (4. Мој. 10:2). Значи, адава со некој живинела сине паше узо свето шатори на значинела сине кај ов тано попаше е Јеховаја таро окола со живинена сине подур. Наместо адава, секова Израелцо шај сине те овел е Јеховаскоро госто хем шај сине те овел сигурно кај ов ка водинел ле хем ка аракхел ле. Слично тано авдиве да, бизи разлика кај живинаја, о Јехова мангела амен, грижинела пе аменге хем аракхела амен.

САР О ЈЕХОВА АВДИВЕ СИКАВЕЛА КАЈ ТАНО НЕПРИСТРАСНО

13. Кова тано јекх начин сар о Јехова сикавела непристрасност авдиве?

¹³ Несаве таро е Девлескере слуге авдиве живинена паше узо главно седиште или паше узо несаво Бетел. Јавера служинена ко адала објектија. Адалеске, адала пхраља хем пхења шај те учествујнен ко бут таро активностија кола со керена пе ко адала тхана хем те дружинен пе околенцар со предводинена. Несаве служинена сар покраинска надгледникија или ки несави јавер специјално полновремено служба. Ама, повише таро е Јеховаскере слуге на служинена ко асавко начин. Ако ту да сиан јекх лендар, ов сигурно кај амаро домаќини о Јехова мангела са пле гостон (1. Пет. 5:7). Ов бут шукар пенџарела тут хем дела тут адава со ваљани туке. О Јехова дела духовно храна са пле слугенге, водинела лен хем аракхела лен.

14. Ко саво јавер начин о Јехова сикавела кај тано непристрасно сар амаро домаќини?

 ¹⁴ Јавер начин сар о Јехова сикавела кај тано непристрасно сар амаро домаќини тано аѓаар со мукхља и Библија те овел достапно е манушенге ко цело свето. О Свето писмо ко почеток сине пишимо ко трин чхибја — хебрејско, арамејско хем грчко. Дали окола со џанена те читинен ко оригинална чхибја ки која со сине пишими и Библија, тане попаше е Јеховаја таро окола со на џанена? Џанѓола пе кај на (Мат. 11:25).

15. Со сикавела кај о Јехова тано непристрасно? (Дикх хем и слика.)

¹⁵ Дали о Јехова ка прифатинел амен сар пле амала на зависинела таро адава дали иси амен бари школа, а ни палем таро адава дали џанаја о оригинална чхибја ки која со сине пишими и Библија. О Јехова керѓа сариненге те овел достапно лескири мудрост, а на само околенге со иси лен бари школа. Лескоро Лафи, и Библија, тано преведимо ко милја чхибја. Адалеске, са е манушен ко цело свето шај те овел лен корист таро библиска сикљојба хем те дознајнен сар шај те овен паше амала е Јеховаја (2. Тим. 3:16, 17).

ПОНАДАРИ ДА КЕР АДАВА СО МАНГЕЛА О ЈЕХОВА

16. Спрема Апостолија 10:34, 35, со ваљани те кера те шај о Јехова понадари да те прифатинел амен сар пле гостија?

¹⁶ Аменге тани бари чест со о Јехова приминѓа амен те ова гостија ко лескоро симболично шатори. Ов тано о најшукар, најљубезно хем најгостопримливо домаќини со постојнела. Исто аѓаар, ов тано непристрасно. Ов прифатинела амен саринен бизи разлика кај живинаја, котар аваја, сави школа иси амен, сави раса иси амен, кобор берш иси амен, или саво пол сием. Ама само окола сој леске послушна прифатинела лен те овен лескере гостија. (Читин Апостолија 10:34, 35.)

17. Кај ка аракха повише информацие башо адава со ваљани те кера те шај те ова гостија ко е Јеховаскоро шатори?

¹⁷ Ко Псалм 15:1, о Давид пучља акала пучиба: „Јехова, кој ка овел госто ко тло шатори? Кој ка живинел ки тли свето гора?“ Пало адава пле силаја о Јехова водинѓа е Давиде те шај те одговоринел ко акала пучиба. Ки јавер статија ка дикха несаве таро буќа со ваљани те кера те шај те ачхова амала е Јеховаја.