Дали е лафенцар „ту, Јехова, ка аракхе лен“, кола сој пишиме ко Псалм 12:7, мислинела пе ко окола „сој мучиме“ (5-то стихо) или ко „лафија е Јеховаскере“ (6-то стихо)?

Таро контекст дикхела пе кај акале стихоја мислинела пе ко мануша.

Ко Псалм 12:1-4, читинаја: „Машкар о мануша на ачхило више некој сој верно“. Пало адава, ко Псалм 12:5-7, ов пишинѓа:

О 5-то стихо сикавела со ка керел о Девел околенге сој ки мука. Ов ка спасинел лен.

Понадари ко 6-то стихо пишинела кај „о лафија е Јеховаскере тане чиста лафија, сар чистимо сребро“. Акава сикавела со мислинена о чачутне христијања башо е Девлескоро Лафи (Пс. 18:30; 119:140).

Акана те дикха о следно стихо, Псалм 12:7: „Ту, Јехова, ка аракхе лен, секоле јекхе лендар, засекогаш ка заштитине лен тари акаја генерација“. Ко со мислинела пе е лафенцар „ка аракхе лен“?

Адалеске со ко 6-то стихо тане спомниме „о лафија е Јеховаскере“, несаве шај мислинена кај кеда ко 7-то стихо пишинела „ка аракхе лен“ адава значинела кај о Девел ка аракхел пле лафија. Амен џанаја кај о Јехова заштитинѓа и Библија иако о противникија бут пути пробинѓе те забранинен ла хем те уништинен ла (Иса. 40:8; 1. Пет. 1:25).

Ама, точно тано адава да сој пишимо ко 5-то стихо. О Јехова поможинѓа хем понадари да ка поможинел хем ка спасинел „околен сој мучиме“ (Јов 36:15; Пс. 6:4; 31:1, 2; 54:7; 145:20).

Тегани, ко со мислинела пе е лафенцар „ка аракхе лен“ таро 7-то стихо?

Ако подетално разглединаја акава псалм, ка хаљова панда пошукар кај е лафенцар „ка аракхе лен“ таро акава стихо мислинела пе ко мануша.

Ко Псалм 12:1, 2, о Давид вакерела кај о мануша нане више верна хем поштена, хем кај адава анѓа баре муке леске хем е јаверенге. Ко следно стихо, читинаја кај о Јехова ка керел нешто против окола со керена лошно лафи. Акава псалм уверинела амен кај шај те овел амен доверба кај о Јехова ка керел нешто ки корист пле народоске соске лескере лафија тане чиста.

Значи, о 7-то стихо вакерела кај о Јехова ка аракхел хем ка заштитинел околен кола со башо лошна мануша цидена муке.

Ко пуране копие таро хебрејска списија, ко 7-то стихо користинела пе лафи колеа со мислинела пе ко мануша. А ки грчко Септуагинта ко акава стихо, дуј пути користинела пе о лафи „амен“ колеа со мислинела пе ко верна мануша кола со цидена муке хем тане малтретириме. Освен адава, ко исто стихо пишинела кај о Јехова ка заштитинел „секоле јекхе лендар“, јавере лафенцар секоле јекхе таро верна. Ола ка овен заштитиме „тари акаја генерација“, уствари таро мануша кола со керена лошнипе (Пс. 12:7, 8). Ко јекх превод таро хебрејска списија ки арамејско чхиб, о прво дело таро 7-то стихо вакерела: „Ту, О ГОСПОДАРЕ, ка заштитине е праведна манушен, ка аракхе лен тари акаја лошно генерација засекогаш“. Акава тано панда јекх доказ кај ко Псалм 12:7 на мислинела пе ко е Девлескере лафија.

Значи, акава стихо дела надеж адаленге сој верна кај о Девел ка керел нешто те заштитинел лен.