Дали мислинеа кај о мануша шај те решинен о проблемија со керена те на ова рахати, безбедна хем те на овел амен шукар иднина? Те шај те џана о чачутно решение прво мора те џана со анела џи ко проблемија. Аѓаар нане само привремено те решина о проблемија, него корендан.

Те вакера јекх пример, јекх пациенти со викинела пе Том, сине насвало хем пало несаво време муло. Соске муло? „Кеда појавинѓе пе леске о прва симптомија, никаске на пело ки годи кај ваљани те дикхен состар тано насвало“, пишинѓа јекх таро докторија ки болница ки која сине о Том англедер те мерел. Веројатно о јавера докторија дена ле сине само иљачија те шај те осетинел пе пошукар.

Дали о мануша да аѓаар решинена о проблемија ко свето? На пример, те шај те чхинавен о криминал о властија анена законија, чхивена камере баши безбедност хем ко различна тхана чхивена полицајција. Ама иако акала буќа иси лен шукар резултатија, ола нашти целосно те решинен о причине башо проблемија. Уствари, бистрела пе јекх важно бути кај о постапке е манушенгере тане резултати таро ленгере мисле, чувствија хем желбе.

О Даниел кова со живинела ки јекх таро јужноамериканска пхувја која со овела са почороли, вакерела: „Англедер живинаја сине нормално живото, на дараја сине кај некој ка кхувел оружјеа хем ка чорел амендар нешто. Ама акана нане мир ки нијекх диз или гав. О чоролипе сикавѓа саве тане чаче о мануша. Ола тане алчна хем нане лен нисаво поштовање спрема о живото е јаверенгоро хем спрема ленгере буќа“ .

Јекх мануш кова со ка чхива леске анав Елиас, нашља таро јекх тхан ко Близок Исток коте со сине војна хем пало адава почминѓа те проучинел и Библија. Ов вакерела: „Буте тернен, ко тхан коте со бијандиљум, поттикнинена сине ленгере фамилие хем о политичка верска водачија те учествујнен ки војна хем те овен хероја. Ама о противникија да сине поттикниме те керен и исто бути. Са акава поможинѓа ман те хаљовав кобор тано жално о мануш те овел ле доверба ко манушикане владе“.

И Библија која со иси ла мудра советија вакерела:

• „Е манушескоро вило цидела ле ко лошнипе панда таро тернипе“ (1. Мојсеева 8:21).

• „О вило тано поховавно таро било со јавер хем спремно тано ко са. Кој шај те џанел со иси ки лесте?“ (Еремија 17:9).

• „Таро вило икљона лошна мисле: мударибе, неморал, чорибе, те вакерен пе ховавне буќа“ (Матеј 15:19).

О мануша нашти те чхинавен о лошна особине коленцар со поврединена е јаверен. Уствари, о проблемија со сине вакерде ки англуни статија јасно сикавена кај о мануша овена са полошна (2. Тимотеј 3:1-5). Адава тано аѓаар иако авдиве аменге достапна баро број информацие хем користинаја повише начинија баши комуникација таро било кеда англедер. Тегани соске нашти те решина о проблемија со иси ко свето? Дали очекујнаја амендар превише него со ваљани? Дали некогаш шај о свето те овел мирно хем безбедно тхан живибаске?

Чак ако о мануша чудоја шај те циден о лошна особине пестар, сепак нашти те керен о свето безбедно тхан сариненге. Соске? Адалеске сој тане ограничиме.

И Библија вакерела: „О мануш... нашти те управинел  пле чекорија (Еремија 10:23). Јавере лафенцар, о мануш нане створимо те управинел јавере манушенцар. Уствари, на сием створиме те владина упро јавера мануша исто сар со на сием створиме те живина тело пани или авријал тари пхув.

Размислин башо акава: Дали о мануша мангена некој јавер те вакерел ленге со те керен или спрема саве морална мерилија те живинен? Кој тане адала мануша со мангена о јавера те вакерен ленге пумаро стави башо абортус, баши смртно казна или башо воспитибе е чхавен? Акала тане само некобор буќа со керена поделбе машкар ко мануша. Адалеске, кобор хем те овел пхаро те прифатинел пе, адава со вакерела и Библија тано точно. Едноставно на сием ни способна, а нане амен ни право те владина упро јавера мануша. Тегани кој шај те поможинел амен?

Најмудро тано те рода помош таро амаро Створители соске ов тано адава со створинѓа амен. О Девел на ваздинѓа пле васта амендар сар со мислинена несаве. Уствари таро мудра советија со денѓа лен ки Библија јасно дикхела пе кобор грижинела пе е манушенге. Ако хаљоваја адава посебно лил пошукар ка хаљова коркори амен. Тегани ка хаљова соске и манушикани историја тани добором тажно. Сар со пишинѓа јекх германско филозофи „ка хаљова соске о мануша хем о владе на сикљона ништо тари историја, чак хем те хаљон нешто на применинена адава“.

И Библија вакерела кај „и мудрост дикхела пе таро адава со керела“, или јавере лафенцар таро резултати (Лука 7:35). Асавки мудрост дикхела пе таро лафија сој пишиме ко Псалм 146:3: „Ма те овел тумен доверба ко моќна мануша или ко било саво јавер мануш, кова со нашти те спасинел тумен!“ Акава шукар совет шај те поможинел амен те на надина амен ко нешто кова со никогаш нане те овел. О Кенет кова со живинела ки јекх диз ки Северно Америка колате со иси бут насилство, вакерела: „О политичарија вакерена кај ка керен пошукар о буќа, ама јасно дикхјола кај нашти те керен адава. Ола бут пути на исполнинена пле ветувања хем адава сикавела кај адава со вакерела и Библија тано точно“.

О Даниел кова со спомнинѓем ле англедер, вакерела: „Секова диве са повише уверинава ман кај о мануша нашти шукар те владинен... Адава со иси некас паре ки сметка или пензија на значинела кај ка овел ле сигурно иднина. Џанава бутен со сине лен асавки надеж хем бут разочаринѓе пе“.

Сар со ка дикха ко следна статие, освен со и Библија поможинела амен те дикха реално ко буќа, исто аѓаар дела амен хем чачутни надеж.