О СВЕТО КО ХАОС
2 | Мудро трошин о паре
СОСКЕ ТАНО ВАЖНО
Бут мануша мучинена пе секова диве те пханден крајо крајоја. Жално тано адава со адалеске со о свето тано ко хаос, адава овела са попхаро. Соске?
-
Кеда ко несаво тхан иси различна проблемија о цене башо хајбе хем башо живибе овена са побаре.
-
Кеда иси криза адава шај те керел о мануша те нашавен пумари бути или те керен бути бут хари паренге.
-
Ко природна катастрофе шај те овен оштетиме или уништиме деловна објектија, кхера или јавер имот хем адалеске бут џене овена чороле.
Со ваљани те џане
-
Ако мудро користинеа о паре тегани шај те ове поспремно башо несави пхари ситуација. Ма бистре, о буќа шај те менинен пе бут сигате.
-
О паре со леа, со штединеа лен или јавера буќа шај више те на врединен.
-
Несаве буќа на кинена пе паренцар, сар на пример и среќа хем и слога ки фамилија.
Со шај те кере панда акана
Ки Библија пишинела: „Ако иси амен хајбаске, урајбаске хем тхан живибаске, те ова задоволна акале буќенцар“ (1. Тимотеј 6:8).
Те ова задоволна значинела те кера разлика машкар адава со би мангаја те овел амен хем адава со чаче ваљани аменге. Акава тано посебно важно ако нане амен бут паре.
Те шај те ове задоволно адалеа со иси тут шај ка ваљани те кере несаве промене ко начин сар живинеа. Ако секогаш мангеа те кине туке буќа со нашти дозволинеа туке тегани ка овен тут финансиска проблемија.