О одговор башо акава пучибе влијајнела упро адава сар дикхаја ко живото.

Дали тано логично о Девел, кова со керѓа добором шукар буќа ко свето, те овел ле намера о мануша те циден муке?

Адалеске со ко свето иси бут муке, окола со нане религиозна вакерена кај о мануша нане важна е Девлеске, а адалеа анена ко пучибе хем адава дали ов постојнела. Спрема ленде о муке тане доказ кај 1) е Девле нане ле моќ те чхинавел лен, 2) о Девел на мангела те чхивел ленге крајо, или 3) о Девел на постојнела.

Ама дали тане адала о единствена причине соске цидаја?

О Девел на керѓа амен те цида муке.

Ов мангела те уживина ко живото.

„[Е манушенге] нане ништо пошукар таро адава те овен бахтале хем те керен шукарипе ко пло живото, хем секова мануш ваљани те хал хем те пиел хем те уживинел ко шукар буќа таро цело пло трудо. Адава тано поклон таро Девел“. (ПРОПОВЕДНИК 3:12, 13).

О Девел керѓа о прва мануша, о Адам хем и Ева, те живинен ко совршена условија.

Лескири намера на сине те циден муке ни ола ни ленгере потомција.

„Пало адава о Девел денѓа лен берекети хем вакерѓа ленге: ’Те овел тумен пхердо чхаве хем те овен бут џене, пхерен и пхув хем керен ла бути‘“ (1. МОЈСЕЕВА 1:28).

О Адам хем и Ева биринѓе те на шунен е Девле.

Акаја одлука анѓа баре муке ленге хем са ленгере потомцонге.

„Преку јекх мануш о грево кхувѓа ко свето хем преку о грево о мерибе, хем аѓаар о мерибе ширинѓа пе ко са о мануша, соске сарине грешинѓе“ (РИМЈАНИТЕ 5:12). *

О Девел на керѓа амен те живина бизо лескоро водство.

Исто сар со на сием керде те живина тело пани, ни на сием керде те ова независна таро Девел.

„О мануш кова со пхирела нашти те управинел пле друмоја“ (ЕРЕМИЈА 10:23).

О Девел на мангела те цида муке.

Адалеске ов сикавела амен сар те избегина о проблемија.

„Ако пазинеа сине ко мле заповедија! Тло мир ка овел сине сар река“ (ИСАИЈА 48:18).