1, 2. а) Сави неправда доживинѓе о Навутеј хем лескере чхаве? б) Башо кола дуј особине ка кера лафи ки акаја статија?

ДУЈ лошна мануша кривинѓе јекхе мануше баши јекх бут сериозно бути. Ама, адава сине ховајбе. О мануш сине осудимо те мерел. Замислин туке, сар осетинена пе сине о мануша со мангена и правда кеда дикхле сар мударена акале мануше хем лескере чхавен кола со на сине крива! Акаја ситуација нане само парамис. Акава чаче случинѓа пе јекхе верно манушеске кова со служинела сине е Јеховаске, адава сине о Навутеј. Ов живинела сине ко време кеда цари ко Израел сине о Ахав (1. Цар. 21:11-13; 2. Цар. 9:26).

² Ки акаја статија, ка дикха со случинѓа пе е Навутејеске. Исто аѓаар, ка дикха сар јекх верно старешина таро прво веко керѓа бари грешка. Акала дуј примерија  ка сикавен аменге кобор ваљани те ова понизна хем спремна те простина ако мангаја те дикха ки правда сар со дикхела о Јехова.

3, 4. Саво мануш сине о Навутеј хем соске на мангља те бикнел пли нива е Ахавеске?

³ О Навутеј сине верно е Јеховаске ко време кеда бут Израелција џана сине пало лошно пример е Ахавескоро хем лескере ромњакоро, и Језавела која со сине лошно царица. Ола обожавинена сине е ховавне девле, о Ваал, хем на поштујнена сине е Јехова хем лескере законија. Ама, о Навутеј ценинела сине пло амалипе е Јеховаја повише таро пло живото.

⁴ Читин 1. Царевите 21:1-3. Кеда о Ахав мангља таро Навутеј те кинел нива или те дел ле пошужи нива, ов на мангља. Соске? Ов вакерѓа леске кај нашти те дел ле о наследство со добинѓа ле, соске о Јехова адава забранинѓа. О Навутеј на мангља те бикинел и нива е Ахавеске соске на мангља те пхагел е Јеховаскоро закони кова со пхенела сине кај о Израелција на смејнена засекогаш те бикинен о наследство со добинѓе ле (3. Мој. 25:23; 4. Мој. 36:7). О Навутеј сине послушно е Јеховаске.

5. Со керѓа и Језавела те шај те лел и нива таро Навутеј?

⁵ Кеда о Навутеј на мангља те бикинел пли нива, о Ахав хем лескири ромни керѓе бут лошна буќа. Те шај те лен и нива, и Језавела вакерѓа дује џененге те кривинен е Навутеје башо нешто со на керѓа. Адаја сине и причина соске мударѓе ле хем лескере чхавен. Со керѓа о Јехова баши акаја бари неправда?

6, 7. Сар сикавѓа о Јехова кај мангела и правда хем соске адава утешинѓа е Навутејескере фамилија хем лескере амален?

⁶ О Јехова одма бичхалѓа е Илија ко Ахав те вакерел леске кај мударѓа мануше хем кај тано чор. Сави одлука анѓа о Јехова? О Ахав, лескири ромни хем лескере чхаве те овен мударде, сар со сине мударде о Навутеј хем лескере чхаве (1. Цар. 21:17-25).

⁷ Е Навутејескере фамилијаке хем лескере амаленге сине бут пхаро башо лошна буќа со керѓа лен о Ахав. О Јехова дикхља и неправда хем одма реагиринѓа. Адава сигурно бут утешинѓа лен. Ама, ленгири понизност хем и доверба ко Јехова шај сине испитими таро адава со случинѓа пе понадари.

8. Со керѓа о Ахав кеда шунѓа и осуда таро Јехова хем саво сине о резултати?

⁸ Кеда шунѓа о Ахав со одлучинѓа о Јехова те керел леске, пхаравѓа пле шеја хем уравѓа пе шеја коленцар со сикавѓа кај жалинела, постинела сине, совела сине адале шеенцар хем пхирела сине разочаримо. О Ахав уло понизно. Саво сине о резултати? О Јехова вакерѓа е Илијаске: „Адалеске со уло понизно, нане  те казнинав ле са џикоте тано џивдо. Ка казнинав лескоро кхер ко диве лескере чхавескере“ (1. Цар. 21:27-29; 2. Цар. 10:10, 11, 17). О Јехова, кова со „испитинела о виле“ хем шај те дикхел саве чаче сием, сикавѓа милост е Ахавеске (Изр. 17:3).

9. Соске и понизност ка заштитинел сине е Навутејескере фамилија хем е амален?

⁹ Кеда е Навутејескири фамилија хем лескере амала шунѓе кај е Ахавескири фамилија нане те овел казними са џикоте тано џивдо о Ахав, адава шај чхивѓа ленгири вера ко испит. Ама, и понизност ка поможинел ленге сине те заштитинен пумари вера. Соске? Ако сине понизна, ола понадари да ка служинен сине е Јеховаске хем ка овел лен сине доверба кај о Јехова нашти те овел неправедно. (Читин 5. Мојсеева 32:3, 4.) Ки иднина, е Навутејескири фамилија ка доживинел те дикхел пле манглен со ка воскреснинен. Тегани о Навутеј хем лескере чхаве ка добинен совршено правда (Јов 14:14, 15; Јован 5:28, 29). Јекх понизно мануш џанела кај „о чачутно Девел ка судинел секоја бути со керела пе, исто  аѓаар са сој гаравдо хем ка вакерел дали тано шукар или лошно“ (Проп. 12:14). Кеда судинела некаске, о Јехова дикхела буќа кола со амен на џанаја лен. Адалеске и понизност заштитинела амен те ачхова верна е Јеховаске.

10, 11. а) Кола ситуацие шај те испитинен амари вера? б) Сар шај и понизност те заштитинел амен?

¹⁰ Сар ка реагирине ако о старешине анена несави одлука со на хаљовеа ла или на сложинеа тут лаја? На пример, со ка кере ако о старешине одлучинена кај ту или некој сој туке паше на исполнинена више о условија те овел тумен несави задача ки организација? Со ако тло брачно партнери, тло чхаво, тли чхај, или несаво паше амал тано исклучимо таро собрание хем ту на сложинеа тут адале одлукаја со анѓе ла о старешине? Со ка кере ако мислинеа кај о старешине грешинѓе адалеа со сикавѓе милост некаске со керѓа грево? Акала ситуацие шај те испитинен амари вера ко Јехова хем ко адава сар водинела о собрание авдиве. Сар ка поможинел тут и понизност ако аракхљовеа ко јекх таро акала ситуацие? Те дикха дуј начинија.

¹¹ Прво, ако сием понизна ка признајна кај на џанаја са о буќа. Чак ако мислинаја кај џанаја са баши адаја ситуација, само о Јехова џанела со иси некас ко вило (1. Сам. 16:7). Ако иси амен акава ки годи, понизно ка признајна кај сием ограничиме хем кај ваљани те кера промене ко амаро размислување. Дујто, ако дикхлем или доживинѓем несави неправда, и понизност ка поможинел амен те ачхова послушна хем стрпливо те аџикера о Јехова те испрајнел и ситуација. И Библија вакерела: „Ка овел шукар околенге со дарана таро чачутно Девел. Ама, е лошноске нане те овел шукар хем нане те продолжинел пле диве“ (Проп. 8:12, 13). Ако ачховаја понизна, адава ка користинел аменге хем е јаверен. (Читин 1. Петрово 5:5.)

12. Кова извештај ка дикха акана хем соске?

¹² О христијања таро пурано време ки сириско Антиохија, аракхлиле ки ситуација со испитинѓа ленгири понизност хем ленгири спремност те простинен. Те дикха акава извештај хем те испитина амаро стави башо простиба. Акава шај те поможинел амен те хаљова соске о Јехова шај те користинел несовршена манушен бизо те пељарел пле мерилија.

13, 14. Саве задаче сине е Петаре хем сар сикавѓа кај тано храбро?

¹³ О апостол Петар сине старешина хем бут христијања таро прво веко џанена ле сине. Ов сине паше амал е Исусеа хем сине леске денде важна задаче (Мат. 16:19). Ко 36 берш, сине леске вакердо те проповединел е Корнелијаске хем сариненге таро  лескоро кхер. Соске акава сине нешто посебно? Адалеске со о Корнелиј на сине Евреи хем на сине обрежимо. Кеда о Корнелиј хем сарине таро лескоро кхер добинѓе о свети дух, о Петар халило кај ола шај те овен крстиме сар христијања. Ов вакерѓа: „Акала мануша приминѓе о свети дух исто сар аменде, адалеске кој шај те пхенел кај нашти те крстинен пе ко пани?“ (Дела 10:47).

¹⁴ Ко 49 берш, о апостолија хем о старешине таро Ерусалим кхединѓе пе те одлучинен дали о христијања кола со нане Евреија ваљани те обрежинен пе. Ко адава состанок, о Петар храбро сетинкерѓа е пхрален кај ов дикхља сар о мануша тари јавер нација приминѓе о свети дух иако на сине обрежиме. Адава со вакерѓа о Петар поможинѓа е пхрален таро водечко тело те анен одлука (Дела 15:6-11, 13, 14, 28, 29). О пхраља со сине Евреија хем окола таро јавера нацие, сине благодарна со е Петаре сине ле храброст те вакерел баши адаја ситуација. Е пхраленге таро прво веко на сине пхаро те овел лен доверба ко акава верно хем зрело мануш (Евр. 13:7).

15. Сави грешка керѓа о Петар џикоте сине ки сириско Антиохија? (Дикх и слика ко почеток тари статија.)

¹⁵ Несаво време пало адава состанок ко Ерусалим, о Петар гело ки сириско Антиохија. Џикоте сине адари, ов дружинела пе сине е пхраленцар со на сине Евреија. Шај те замислина кобор мангена сине те сикљовен таро Петар. Ама, сине бут изненадиме хем дукхавде кеда о Петар таро јекх пути чхинавѓа те хал заедно ленцар. Ов влијајнѓа упро јавера пхраља со сине Евреија хем исто аѓаар упро Варнава те постапинен исто сар лесте. Соске акава зрело старешина керѓа асавки бари грешка која шај сине те анел поделбе ко собрание? Со шај те сикљова тари акаја ситуација хем сар шај адава те поможинел амен ако несаво старешина дукхавела амен пле лафенцар или постапкенцар?

16. Саво совет добинѓа о Петар хем со шај те пуча амен?

¹⁶ Читин Галатите 2:11-14. О Петар дарандило таро мануша (Изр. 29:25). Ов џанела сине сар дикхела о Јехова ко мануша со нане Евреија. Ама, дарала сине сар ка дикхен ки лесте о пхраља со сине Евреија таро Ерусалим кеда ка авен хем ка дикхен ле кај дружинела пе е пхраленцар таро јавера нацие. О Павле вакерѓа е Петареске кај тано лицемерно. Соске? Адалеске со ов шунѓа ле сар ко состанок со икерѓа пе ко Ерусалим ко 49 берш бранинела е манушен со нане Евреија (Дела 15:12). Сар реагиринѓе о пхраља со сине навредиме таро Петар? Дали дозволинѓе адава те перавел лен духовно? Дали о Петар нашавѓа пле задаче баши пли грешка?

17. Сави корист сине е Петаре таро адава со простинѓа леске о Јехова?

¹⁷ О Петар сине понизно хем прифатинѓа о совет таро Павле. Ки Библија на пишинела кај о Петар нашавѓа несави пли задача. Џанаја кај пало несаво време о свети дух поможинѓа ле те пишинел дуј писмија кола со уле дело тари Библија. Ко пло дујто писмо о Петар башо Павле вакерѓа: „Амаро мангло пхрал“ (2. Пет. 3:15). Иако е Петарескири грешка поврединѓа е пхрален таро јавера нацие, о Исус, кова сој поглавари е собраниескоро, понадари да користинела ле сине (Еф. 1:22). Е пхрален хем е пхењен сине лен прилика те простинен е Петареске, исто сар со керѓе о Исус хем о Јехова. Надинаја амен кај нијекх лендар на дозволинѓа духовно те перел баши грешка јекхе несовршено манушескири.

18. Ко кола ситуацие шај ка ваљани те сикава кај дикхаја ки правда сар со дикхела о Јехова?

¹⁸ Исто сар со на сине совршена старешине ко прво веко, нане ни авдиве. Ки Библија пишинела: „Сарине амен бут пути грешинаја“ (Јак. 3:2). Акава тано локхо те вакерел пе, ама со ка кера ако несаво пхрал грешинела аменге? Ка дикха ли ки правда сар со дикхела о Јехова? Сар ка реагирине ако јекх старешина вакерела нешто со дикхјола сар предрасуда? Ако јекх старешина бизо те размислинел вакерела нешто со ка дукхавел или ка наврединел тут, дали ка дозволине адава те перавел тут духовно? Наместо одма те мислине кај о пхрал на ваљани више те овел старешина, ка аџикере ли стрпливо ко Исус, о поглавари е собраниескоро? Наместо те концентририне тут ки грешка е пхралескири, дали ка размислине кобор бут берша верно служинела е Јеховаске? Ако несаво пхрал со грешинѓа туке понадари да служинела сар старешина, шај чак добинела повише задаче, ка радујне тут ли баши лесте? Ако сиан спремно те простине, сикавеа кај дикхеа ки правда сар со дикхела о Јехова. (Читин Матеј 6:14, 15.)

19. Со ваљани те ова одлучна те кера?

¹⁹ Адалеске со мангаја и правда, амен радујнаја амен со панда хари о Јехова ка цидел са и неправда со авела таро Сатана хем таро акава лошно свето (Иса. 65:17). Џи тегани, ако доживинаја неправда, понизно те признајна кај шај на џанаја са о буќа баши адаја ситуација хем спремно те простина околенге со грешинена аменге. Ако кераја акава, тегани ка дикха ки правда сар со дикхела о Јехова.