1. Со мангена те керен са е Девлескере слуге, хем соске? (Дикх и слика тари насловно страна.)

О ИСУС ХРИСТОС заповединѓа пле следбениконге: „Џан хем керен ученикија таро мануша таро са о народија“ (Мат. 28:19). Са о верна слуге е Девлескере мангена те сикљовен сар шај целосно те керен и служба сој ленге денди (2. Тим. 4:5). Чаче, нијекх јавер бути ко живото нане поважно, повредно или поитно таро адава те проповедина хем те сикава е манушен башо Девел. Ама, шај те овел пхаро те џа ки служба добором кобор со мангаја.

2. Кола проблемија иси амен џикоте кераја амари служба?

² Ама, ко амаро живото иси јавера да важна буќа башо кола со ваљани аменге време хем сила. Шај мора те кера бут саатија бути те шај те грижина амен башо амаре хем амаре фамилијакере основна потребе. Шај иси амен јавера да фамилијарна одговорностија или, палем, шај боринаја амен насвалипаја, депресијаја или проблеменцар со анела лен о пхурипе. Сар шај целосно те кера амари служба иако иси амен асавке околностија?

3. Со шај те дикха таро е Исусескере лафија сој пишиме ко Матеј 13:23?

³ Ако амаре околностија чхинавена амен те џа ки служба добором кобор со би мангаја, на ваљани те обесхрабрина амен. О Исус џанља кај нашти секова јекх амендар те накхавел исто време хем те трошинел исто сила ки служба. (Читин Матеј 13:23.) О Јехова бут ценинела адава со кераја ки служба са џикоте даја амаро најшукар (Евр. 6:10-12). Тари јавер страна, шај амаре околностија на дозволинена аменге те кера нешто  повише. Ки акаја статија ка дикха сар шај и служба башо Девел те чхива ла ко прво тхан ко амаро живото, сар шај те живина едноставно хем сар шај пошукар те проповедина хем те сикава е јаверен. Прво, те дикха со значинела целосно те кера амари служба.

4. Со значинела целосно те кера амари служба?

⁴ Едноставно вакердо, те шај целосно те кера амари служба, ваљани те проповедина хем те сикава е јаверен кобор со шај повише. Ама, нане важно само кобор време накхаваја ки служба. Е Јеховаске исто аѓаар тано важно таро кола мотивија кераја адава. Адалеске со мангаја е Јехова хем амаре пашутнен цело вилеа кераја амари служба * (Мар. 12:30, 31; Кол. 3:23). Те служина е Девлеске цело вилеа значинела те кера и служба најшукар со шај спрема амаре околностија хем силе. Ако ценинаја и чест те проповедина, ка трудина амен те вакера о шукар хабери кобор со шај повише манушенге.

5-6. Вакер пример сар шај и служба те овел аменге ко прво тхан иако иси амен бут обврске.

⁵ Замислин јекх терно мануш со уживинела те башалел гитара. Ов мангела те башалел секогаш кеда иси ле прилика те керел адава. Пало несаво време, аракхела бути ко јекх кафичи те башалел гитара ко викендија. Ама, адалеске со на заработинела доволно паре те шај те учхарел пле трошакија, ов почминела те керел бути ки јекх дуќана ки каса таро понеделник џи ко петок. Иако побаро дело таро пло време накхела ки бути ки дуќана, и музика тани леске ко вило. Ов бут мангела те овел пошукар гитаристи хем адава те овел лескири професија. Иако ко моменти о околностија на дозволинена леске адава, ов уживинела ки секоја прилика кеда шај те башалел гитара, бизи разлика кобор кратко трајнела адава.

⁶ Слично, шај тле околностија на дозволинена те ове ки служба добором кобор со би мангеа ту. Сепак, адава тано нешто со највише мангеа те кере. Адалеске трудинеа тут пошукар те проповедине те шај о шукар хабери те ресел џи ко вило е манушенгоро. Ама, адалеске со иси тут бут обврске, шај пучеа тут  сар шај те чхиве о проповедибе ко прво тхан ко тло живото.

7. Саво стави сине е Исусе баши служба?

⁷ О Исус денѓа најшукар пример башо адава саво стави ваљани те овел амен баши служба. Најважно бути ко лескоро живото сине те вакерел башо е Девлескоро Царство (Јован 4:34, 35). Пхирѓа бут километре те шај те проповединел кобор со шај повише манушенге. Користинѓа секоја прилика те керел лафи е манушенцар ко ленгере кхера хем ко прометна тхана. Са со керѓа о Исус ко пло живото сине поврзимо лескере службаја.

8. Сар шај те овел амен сар е Исусескоро стави баши служба?

⁸ Амен да сар о Исус трудинаја амен те кера прилике те сведочина сегде хем секогаш кеда шај. Спремна сием те жртвујна амари удобност те шај те проповедина (Мар. 6:31-34; 1. Пет. 2:21). Несаве ко собрание иси лен прилика те служинен сар специјална, општа или помошна пионерија. Јавера сиклиле несави чхиб или селинѓе пе ко подрачје коте со иси побари потреба таро објавителија. Сепак, побаро дело таро проповедибе керена ле објавителија кола со нашти те служинен ко асавке начинија, ама керена са со шај ки служба башо Девел. Бизи разлика кобор кераја, о Јехова на аџикерела амендар те кера повише таро адава со шај. Ов мангела сарине те ова бахтале џикоте вакераја „о славно шукар хабери таро бахтало Девел“ (1. Тим. 1:11; 5. Мој. 30:11).

9. а) Сар о Павле чхивѓа о проповедибе ко прво тхан ко пло живото иако мора сине те керел бути? б) Спрема Дела 28:16, 30, 31, саво стави сине е Павле баши служба?

⁹ О апостол Павле денѓа аменге шукар пример адалеа со и служба сине леске најважно бути ко живото. Кеда сине ко Коринт, џикоте сине ко пло дујто мисионерско патујбе, на сине ле доволно паре хем адалеске мора сине те одвојнел време те шај те керел шаторија. Ама е Павлеске на сине акава најважно ко живото. Ов керела сине акаја бути те шај те издржинел пе ки служба хем на мангља о Коринќања те платинен башо лескере трошакија (2. Кор. 11:7). Иако о Павле мора сине те керел бути, и служба башо Девел понадари да сине леске најважно ко живото, хем проповединела сине секоја сабота. Откеда лескере околностија менинѓе пе ко пошукар, ов шај сине целосно те концентриринел пе „ко проповедибе о лафи, хем сведочинела сине е Евреенге кај о Исус тано чаче о Христос“ (Дела 18:3-5; 2. Кор. 11:9). Покасно, ов сине дуј берш пханло ко јекх кхер ко Рим. Сепак, сведочинела сине сариненге со авена сине ки лесте, хем исто аѓаар пишинела сине писмија. (Читин Дела 28:16, 30, 31.) О Павле сине решимо ништо те на овел леске поважно тари служба. Ов пишинѓа: „Адалеске со иси амен акаја служба... на откажинаја амен“ (2. Кор. 4:1). Иако амен да ваљани те одвојна време те шај те кера бути, сепак исто сар о Павле, шај те чхива и служба башо Девел ко прво тхан ко живото.

10-11. Сар шај целосно те кера амари служба ако иси амен проблемија састипаја?

¹⁰ Ако нашти те проповедина таро кхер ко кхер добором кобор со мангаја адалеске со сием пхуре или насвале, шај те проповедина ко јавера начинија. О христијања таро прво веко проповединена сине сегде. Ола користинена сине секоја прилика те керен лафи е манушенцар башо чачипе — таро кхер ко кхер, ко прометна тхана хем неформално (Дела 17:17; 20:20). Ако нашти те пхира, шај те беша ко тхана коте со иси бут мануша хем те проповедина адаленге со накхена. Исто  аѓаар шај те сведочина неформално, преку писмија или телефони. Акаја служба анела бахталипе буте објавителенге колен со ограничинела лен о састипе или несаве јавера проблемија.

¹¹ Иако иси тут проблемија састипаја, ту шај целосно те кере тли служба. Размислин палем башо апостол Павле. Ов вакерѓа: „Са шај те керав соске поможинела манге окова со дела ман сила“ (Фил. 4:13). Е Павлеске ваљани сине адаја сила кеда насвалило ко јекх таро пле мисионерска патујба. Тари Библија шај те дикха кај сине ле прилика те проповединел е пхраленге ки Галатија баш адалеске со насвалило (Гал. 4:13). Слично, адава со сиан насвало шај те дел тут прилика те вакере о шукар хабери е јаверенге, сар на пример, е докторенге, е медицинско сестренге хем е јаверенге кола со грижинена пе туке. Бут таро адала мануша тане ки бути кеда о пхраља џана ленде кхере те сведочинен ленге.

12. Со значинела те овел тут едноставно јакх?

¹² О Исус вакерѓа: „И светилка е телоскири тани и јакх. Значи, ако тли јакх тани концентририми само ки јекх бути [или „едноставно“], цело тло тело ка овел светло“ (Мат. 6:22, фус.). Со мангља те вакерел о Исус адалеа? Кај ваљани те живина едноставно, те ова концентририме ки јекх бути хем те на дозволина нешто те лел амаро внимание. О Исус денѓа амен пример адалеа со концентриринѓа пе ки служба, хем сикавѓа пле ученикон те ачховен концентририме ки служба башо Јехова хем ко е Девлескоро Царство. Амен џаја пало е Исусескоро пример адалеа со о проповедибе тано аменге најважно бути ко живото (Мат. 6:33).

13. Со шај те поможинел аменге те чхива и служба ко прво тхан ко живото?

 ¹³ Јекх начин сар шај те чхива и служба ко прво тхан ко амаро живото тано аѓаар со ка живина едноставно. Тегани ка овел амен повише време те поможина е јаверенге те запознајнен е Јехова хем те манген ле. * На пример, дали шај те кера несаве промене ко амаро работно време те шај повише те проповедина ко работна диве? Дали шај те накхава похари време ки рекреација?

14. Саве промене керѓа јекх брачно пари те шај те накхавел повише време ки служба?

¹⁴ Јекх старешина со викинела пе Илајас хем лескири ромни керѓе баш адава. Ов објаснинела: „Мангаја сине те кера повише ки служба, ама ко адава време нашти сине те ова пионерија. Сепак, мора сине некотар те почмина. Адалеске керѓем потикне промене те шај повише те проповедина. На пример, почминѓем похари те трошина. Исто аѓаар, халилем кај накхаваја бут време ки рекреација хем адалеске керѓем промене. Освен адава, замолинѓем ки бути те менинен амаро работно време те шај повише те проповедина. Адалеске со керѓем са акава, шај сине те проповедина акшамеске, те овен амен повише библиска курсија, па чак дуј пути ко масек шај сине те проповедина ко работна диве. Адава керѓа амен бут бахтале!“

15. Спрема 1. Тимотеј 4:13, 15, ко саво јавер начин шај целосно те кера амари служба башо Девел?

¹⁵ Јавер начин сар шај целосно те кера амари служба башо Девел тано аѓаар со ка трудина амен пошукар те проповедина. О мануша ко несаве професие мора редовно те добинен обука те шај пошукар те џанен и  бути хем пошукар те керен ла. Исто акава важинела околенге со проповединена башо е Девлескоро Царство. Амен ваљани понадари да те сикљова сар шај пошукар те кера амари служба (Изр. 1:5; читин 1. Тимотеј 4:13, 15).

16. Сар шај пошукар те проповедина о шукар хабери? (Дикх и рамка „ Целија кола со ка поможинен манге целосно те керав мли служба“.)

¹⁶ Спрема адава, со ка поможинел аменге понадари да те ова пошукар ки служба? Адава со ка икера амен ко упатствија со добинаја лен ко состанок Амаро живото хем служба. Ко акава состанок добинаја корисна советија кола со поможинена аменге пошукар те проповедина о шукар хабери. На пример, кеда о претседавачи дела советија околенге со иси лен задача ко состанок, шај те шуна корисна информацие кола со ка поможинен аменге те ова пошукар ки служба. Адала советија шај те применина лен кеда ка џа ки служба. Исто аѓаар, шај те рода помош таро надгледнико тари амари група проповедибаске или те џа леа ки служба. Освен адава, шај те џа ки служба несаве поискусно објавителеа, пионереа или е покраинско надгледникоја. Џикоте сикљоваја пошукар те користина амаре главна публикацие службаке, панда повише ка уживина ко проповедибе хем ко сикајбе е јаверен.

17. Сар ка осетина амен ако трудинаја амен целосно те кера амари служба?

¹⁷ Аменге тани бари чест адава со о Јехова дозволинела те ова лескере соработникија! (1. Кор. 3:9). Кеда трудинаја амен те проценина сој тано најважно хем ако и служба башо Девел аменге ко прво тхан ко живото, ка ова бахтале џикоте служинаја е Јеховаске (Фил. 1:10; Пс. 100:2). Сар слуга е Јеховаскоро, шај те ове сигурно кај ов ка дел туке сила те кере тли служба иако иси тут проблемија хем ограничувања (2. Кор. 4:1, 7; 6:4). Бизи разлика дали тле околностија дозволинена туке те накхаве хари или повише време ки служба, шај те овел тут причина те ове бахтало ако кереа адава цело вилеа (Гал. 6:4). Кеда трудинеа тут целосно те кере тли служба, сикавеа мангипе е Јеховаске хем тле пашутнеске. „Кериндор адава ка спасине хем тут хем адален со шунена тут“ (1. Тим. 4:16).