1. Спрема Ефешаните 6:10-13, кова тано јекх начин сар сикавела о Јехова кај грижинела пе аменге? Објаснин.

ЈЕКХ начин сар сикавела о Јехова кај грижинела пе аменге тано аѓаар со поможинела аменге те борина амен против амаре душмања. Амаре најбаре душмања тане о Сатана хем о демонија. О Јехова вакерела аменге кај акала душмања тане бут опасна хем дела амен са со ваљани аменге те шај те борина амен против ленде. (Читин Ефешаните 6:10-13.) Амен шај успешно те борина амен против о Бенг ако прифатинаја и помош таро Јехова хем ако иси амен целосно доверба ки лесте. Исто сар о апостол Павле, амен да сием увериме ко акала лафија: „Ако о Девел тано аменцар, кој ка овел против аменде?“ (Рим. 8:31).

2. Со ка дикха ки акаја статија?

² Сар чачутне христијања, амен на мангаја превише те интересина амен башо Сатана хем башо демонија. Аменге тано најважно те сикљова башо Јехова хем те служина леске (Пс. 25:5). Ама, ваљани те џана кола буќа керела о Сатана. Соске? Те шај те на ховавел амен (2. Кор. 2:11). Ки акаја статија ка дикха јекх главно начин сар о Сатана хем о демонија пробинена те ховавен е манушен. Исто аѓаар, ка дикха сар шај успешно те борина амен против ленде.

3-4. а) Сој тано о спиритизам? б) Кобор тано раширимо о верување ко спиритизам?

³ Јекх главно начин сар о Сатана хем о демонија пробинена те ховавен е манушен тано преку о спиритизам.  Окола со керена спиритизам вакерена кај џанена или керена буќа кола со о мануша нормално нашти те џанен лен или те керен лен. На пример, несаве вакерена кај шај те дикхен со ка овел ки иднина аѓаар со користинена различна буќа, сар сој и астрологија. Јавера вакерена кај шај те комунициринен е муленцар. А несаве керена магие. *

⁴ Кобор тано раширимо о верување ко спиритизам? Јекх анкета која со сине керди ко 18 пхувја ки Латинско Америка хем ко Карибија сикавѓа кај скоро јекх третина таро мануша со учествујнѓе ки лате верујнена ко магие, хем скоро исто добором мануша верујнена кај шај те комунициринел пе е духонцар. Јекх јавер анкета сине керди ко 18 пхувја ки Африка. Адари, ко просек, повише таро екваш со учествујнѓе ки анкета вакерѓе кај верујнена ко магие. Џанѓола пе, бизи разлика коте живинаја, ваљани те аракха амен таро спиритизам соске о Сатана пробинела те ховавел цело свето (Отк. 12:9).

5. Сар дикхела о Јехова ко спиритизам?

⁵ О Јехова тано о Девел е чачипаскоро (Пс. 31:5). Спрема адава, сар дикхела ов ко спиритизам? Ов мрзинела ле! О Јехова вакерѓа е Израелцонге: „Ки туте ма те аракхљовел нијекх со ка накхавел тари јаг пле чхаве или пле чхаја, нијекх со дикхела со ка овел ки иднина, нијекх со керела магија, нијекх со пророкујнела спрема о знакија, ни магишари, нијекх со викинела духија,.. нијекх со пучела е мулен. Соске секој со керела асавко нешто тано одвратно е Јеховаске“ (5. Мој. 18:10-12). О христијања на ваљани те икерен о Закони со денѓа о Јехова е Израелцонге. Ама, џанаја кај лескоро стави башо спиритизам на менинѓа пе (Мал. 3:6).

6. а) Сар користинела о Сатана о спиритизам те шај те керел лошнипе е манушенге? б) Спрема Проповедник 9:5, со чаче овела е манушенцар кеда мерена?

⁶ О Јехова вакерела аменге те аракха амен таро спиритизам соске џанела кај о Сатана користинела ле те шај те керел лошнипе е манушенге. О Сатана користинела о спиритизам те шај те ширинел пле ховајба, коте сој вклучимо о ховајбе кај о муле живинена ко несаво јавер тхан. (Читин Проповедник 9:5.) Ов исто аѓаар користинела о спиритизам те шај те икерел е манушен ки дар хем те цидел лен таро Јехова. И цел е Сатанаскири тани те теринел е манушен со керена спиритизам те овел лен доверба ко лошна духија наместо ко Јехова.

7. Со вакерела аменге о Јехова?

⁷ Сар со дикхлем англедер, о Јехова вакерела аменге са адава со ваљани те џана те шај те на ховавен амен о Сатана хем о демонија. Те дикха некобор буќа кола со шај те поможинен аменге те борина амен против о лошна духија.

8. а) Кова тано о главно начин сар шај те борина амен против о лошна духија? б) Сар ко Псалм 146:4 тано откримо е Сатанаскоро ховајбе башо муле?

⁸ Читин е Девлескоро Лафи хем размислин баши лесте. Акава тано главно начин сар шај те отфрлина о ховајба со ширинена лен о лошна духија. Е Девлескоро Лафи откринела е Сатанаскере ховајба (Еф. 6:17). На пример, откринела о ховајбе кај о муле шај те комунициринен е џивденцар. (Читин  Псалм 146:4.) Исто аѓаар, е Девлескоро Лафи сетинкерела амен кај само о Девел шај точно те вакерел со ка овел ки иднина (Иса. 45:21; 46:10). Ако редовно читинаја е Девлескоро Лафи хем ако размислинаја башо адава со читинаја, ка шај те отфрлина хем те мрзина о ховајба ко кола со о лошна духија мангена те верујна.

9. Таро кола буќа ваљани те аракха амен?

⁹ Ма кер буќа коленде со иси спиритизам. Адалеске со сием е Девлескере слуге, амен на кераја буќа коленде со иси спиритизам. На пример, на пробинаја те ава ко контакт е муленцар преку некасте или ко било саво јавер начин. Сар со дикхлем ки англуни статија, на учествујнаја ко адетија со керена е муленге кола со темелинена пе ко верување кај пало мерибе живинена ко несаво јавер тхан. Исто аѓаар, на ваљани те користина астрологија или несаве јавера слична буќа те шај те џана со ка овел ки иднина (Иса. 8:19). Џанаја кај са акала буќа тане бут опасна хем кај шај те анен амен ко директно контакт е Сатанаја хем е демоненцар.

10-11. а) Со керѓе несаве ко прво веко кеда шунѓе башо чачипе? б) Спрема 1. Коринќаните 10:21, соске ваљани те џа пало пример е христијаненгоро таро прво веко, хем сар шај те кера адава?

¹⁰ Уништин са адава сој тано поврзимо спиритистичка буќенцар. Ко прво веко, несаве мануша ко Ефес керена сине спиритизам. Кеда шунѓе о чачипе башо Девел, бут џене лендар керѓе баре промене. Ко Дела 19:19 пишинела: „Бут џене со керена сине магие, кхединѓе пумаре лила хем тхарѓе лен англо сариненде“. Акала мануша керѓе са те шај те боринен пе против о лошна духија. Ленгере лила башо магие сине бут скупа. Ама, ола на денѓе лен никаске, а ни на бикинѓе лен, него уништинѓе лен. Ленге на сине важно кобор врединена сине адала лила. Соске? Поважно сине ленге те керен е Јеховаскири волја.

¹¹ Сар шај те џа пало пример адале христијаненгоро  таро прво веко? Ако иси амен нешто сој поврзимо спиритистичка буќенцар, ка овел мудро те уништина ле. Ко акава тане вклучиме амајлие хем јавера буќа кола со о мануша пхиравена лен или аракхена лен ко несаво тхан те шај те заштитинен пе таро лошна духија. (Читин 1. Коринќаните 10:21.)

12. Кола пучиба ваљани те пуча амен башо адава сави забава биринаја?

¹² Шукар размислин сави забава биринеа. Пуч тут: „Дали читинава лила, списанија или статие ко интернет коленде со иси спиритизам? Саве гиља шунава, саве филмија хем емисие дикхава ки телевизија, или саве видеоигре кхелава? Дали ки несави таро акала буќа иси спиритизам? Дали ки ленде сикавена пе вампирија, зомбија или несаве натприродна силе? Дали ки ленде о магие тане сикавде сар забава со нане опасно?“ Џанѓола пе, на ваљани те значинел кај ки секоја забава коте со сикавена пе фантазие или бајке иси спиритизам. Кеда размислинеа сави забава те бирине, ов одлучно те аракхе тут таро са со мрзинела о Јехова. Амен мангаја те да са амендар те овел амен чисто совест англо амаро Девел (Дела 24:16). *

13. Со на ваљани те кера?

¹³ Ма вакер парамиса сој поврзиме демоненцар. Ки акаја бути амен ваљани те џа пало е Исусескоро пример (1. Пет. 2:21). Англедер те авел ки Пхув, о Исус живинела сине ко небо, хем адалеске бут џанела сине башо Сатана хем башо демонија. Ама, ов на нашавела сине пло време те вакерел парамиса башо адава со керѓе акала лошна духија. О Исус мангља те сикавел е манушен  башо Јехова, а на башо Сатана. Амен шај те џа пало е Исусескоро пример аѓаар со нане те вакера парамиса башо демонија. Наместо адава, амаре лафенцар сикаваја кај о чачипе тано аменге хор ко вило (Пс. 45:1).

14-15. а) Соске на ваљани те дара таро лошна духија? б) Со сикавела кај о Јехова заштитинела пле слуген авдиве?

¹⁴ Ма дара таро лошна духија. Ко акава несовршено свето сариненге шај те случинен пе лошна буќа. Шај изненадено те погодинел амен несави несреќа, насвалипе па чак мерибе. Ама, на ваљани те мислина кај адала буќа керена лен о лошна духија. И Библија вакерела кај секоле јекхеске шај те случинен пе непредвидена буќа (Проп. 9:11). Освен адава, о Јехова сикавѓа кај тано бут помоќно таро лошна духија. На пример, о Девел на дозволинѓа е Сатанаске те мударел е Јове (Јов 2:6). Ко е Мојсеескоро време, о Јехова сикавѓа кај тано помоќно таро египетска свештеникија со керена сине магие (2. Мој. 8:18; 9:11). Покасно ко небо, о Јехова денѓа е Исусеске власт упро Сатана хем упро демонија. Адалеске о Исус шај сине те фрдел лен таро небо. А панда хари, ола ка овен фрдиме ки бездна, коте со никаске нашти те керен лошнипе (Отк. 12:9; 20:2, 3).

¹⁵ Иси бут доказија кај о Јехова заштитинела пле слуген авдиве. Размислин башо акава: амен проповединаја хем сикаваја е манушен башо чачипе ко цело свето (Мат. 28:19, 20). Аѓаар откринаја о лошна буќа со керела лен о Бенг. Сигурно, те шај сине, о Сатана целосно ка чхинавел сине о проповедибе — ама нашти. Адалеске на ваљани те дара таро лошна духија. Џанаја кај „о Јехова пле јакхенцар родела ки цело пхув те сикавел пли сила ки корист околенге со служинена леске цело вилеа“ (2. Лет. 16:9). Ако сием верна е Јеховаске, о демонија нашти те керен аменге трајно штета.

16-17. Соске ваљани аменге храброст те шај те борина амен против о лошна духија? Вакер пример.

¹⁶ Ваљани аменге храброст те шај те борина амен против о лошна духија, посебно кеда некој тари амари фамилија или амала со иси лен шукар намере теринена амен  те кера несаве буќа коленде со иси спиритизам. Ама о Јехова дела берекети околен со сикавена асавки храброст. Размислин башо пример јекхе пхењакоро со викинела пе Ерика, која со живинела ки Гана (Африка). И Ерика почминѓа те проучинел и Библија кеда сине ла 21 берш. Адалеске со лакоро дад сине свештенико со керела сине магие, латар аџикерела пе сине те учествујнел ко спиритистичка адетија коленде со ваљани сине те хал мас со сине жртвујмо е девленге ко кола со верујнела сине лакоро дад. Кеда и Ерика одбинѓа, лакири фамилија мислинела сине кај адалеа вреџинела е девлен. Исто аѓаар, верујнена сине кај о девела ка казнинен лен психичко хем физичко насвалипаја.

¹⁷ Е Ерикакири фамилија пробинѓа силаја те чхивел ла те учествујнел ко адетија, ама ој одлучно одбинѓа иако башо адава мора сине те џал песке кхералдан. Несаве Сведокија приминѓе ла ко пло кхер. Адалеа, о Јехова наградинѓа е Ерика неве фамилијаја — мануша тари исто вера кола со уле лаке пхраља хем пхења (Мар. 10:29, 30). Иако лакири фамилија откажинѓа пе латар, па чак тхарѓе лакере буќа, и Ерика ачхили верно е Јеховаске, крстинѓа пе хем акана служинела сар општо пионерка. Ој на дарала таро демонија. А баши пли фамилија, и Ерика вакерела: „Секова диве молинава ман те запознајнен амаре љубезно Девле е Јехова хем те осетинен и слобода со иси околен со служинена леске“.

18. Саве берекетија добинаја кеда иси амен доверба ко Јехова?

¹⁸ Нане секоле јекхе амендар те овел ле добором баро испит баши пли вера. Ама, секова јекх амендар ваљани те боринел пе против о лошна духија хем те овел ле доверба ко Јехова. Адава ка анел аменге бут берекетија хем ка поможинел аменге те на ова заведиме таро е Сатанаскере ховајба. Исто аѓаар, нане те мукха и дар таро демонија те чхинавел амен те служина е Јеховаске. А сој панда поважно, ка кера позорало амаро амалипе е Јеховаја. Ки Библија пишинела: „Овен подложна е Девлеске, а противинен тумен е Бенгеске, хем ов ка нашел тумендар. Овен паше е Девлеа, хем ов ка овел паше туменцар“ (Јак. 4:7, 8).