О ЈЕХОВА поттикнинѓа е Павле те пишинел ења особине кола со авена таро свети дух (Гал. 5:22, 23). Акала шуже особине викинена пе „плодија е духоскере“. * (Дикх и фуснота.) Ола тане дело тари „неви личност“ која со о христијања ваљани те уравен ла (Кол. 3:10). Исто сар јекх каш со ка дел плодија ако редовно чхивела пе леске пани, аѓаар јекхе мануше да ка овен ле акала шуже особине ако мукхела о свети дух те влијајнел ко лескоро живото (Пс. 1:1-3).

И прво особина со вакерѓа ла о Павле тани о мангипе. Кобор тани вредно акаја особина? О Павле вакерѓа кај ако нане ле мангипе, на врединела ништо (1. Кор. 13:2). Ама, сој тано о мангипе, сар шај те бајрара ле хем те сикава ле секова диве?

Иако тано пхаро те објаснинел пе точно сој тано о мангипе, ки Библија пишинела сар шај некој те сикавел мангипе. На пример, ки лате пишинела кај о мангипе тано „стрпливо хем љубезно“ хем кај „радујнела пе башо чачипе“. О мангипе „са поднесинела, ко са верујнела, ко са надинела пе, са трпинела“. Адале со иси ле мангипе тано таро вило поврзимо е јаверенцар, искрено грижинела пе ленге хем тано верно амал. Ама, околе со нане ле мангипе тано љубоморно, гордо, непристојно, себично хем на простинела. Амен на мангаја те сикава асавке лошна особине, него мангаја те сикава искрено мангипе кова со „на родела пли корист“ (1. Кор. 13:4-8).

„О Девел тано мангипе“ (1. Јов. 4:8). Адава дикхјола таро са о буќа со керела лен. О Јехова сикавѓа најбаро мангипе адалеа со бичхалѓа е Исусе те цидел муке хем те мерел башо мануша. О апостол Јован пишинѓа: „Е Девлескоро мангипе баши аменде сикавѓа пе аѓаар со: О Девел бичхалѓа пле единствено бијаме Чхаве ко свето, те шај преку лесте те добина живото. Ов бичхалѓа пле Чхаве те дел пло живото те шај те ова ко мир е Девлеа. Керѓа адава соске мангља амен, а на соске амен манглем ле“ (1. Јов. 4:9, 10). Адалеске со о Девел мангела амен амаре гревија шај те овен простиме хем шај те овел амен надеж хем вечно живото.

О Исус сикавѓа кај мангела е манушен аѓаар со денѓа пло живото те шај те керел е Девлескири волја. О апостол Павле пишинѓа: „Според адаја ’волја‘ посветиме сием преку о Исус Христос, окова со денѓа пло тело сар жртва јекх пути засекогаш“ (Евр. 10:9, 10). Нијекх јавер мануш нашти сине те сикавел побаро мангипе. О Исус вакерѓа: „Никас нане побаро мангипе таро акава, те дел пло живото пле амаленге“ (Јован 15:13). Шај ли о несовршена мануша те сикавен исто мангипе сар со сикавѓе о Јехова хем о Исус? Оја! Те дикха сар шај те кера адава.

О Павле охрабринела амен: „Постапинен сар о Девел, сар лескере мангле чхаве хем живинен ко мангипе, исто сар о Христос со мангља тумен хем денѓа пе туменге“ (Еф. 5:1, 2). Со значинела те живина ко мангипе? Адава значинела секогаш те сикава мангипе. О мангипе ваљани те сикава ле амаре постапкенцар да, а на само лафенцар. О Јован пишинѓа: „Чхавален, ма те манга амен лафенцар или чхибјаја, него искрено те сикава адава е буќенцар со кераја лен“ (1. Јов. 3:18). На пример, проповединаја о шукар хабери башо Царство адалеске со мангаја е Јехова хем е јавере манушен (Мат. 24:14; Лука 10:27). Исто аѓаар, сикаваја мангипе кеда сием стрплива, љубезна хем кеда простинаја е јаверенге. Шунаја о совет тари Библија: „Сар о Јехова спремно со простинѓа туменге, аѓаар керен тумен да“ (Кол. 3:13).

Ако советинаја или укоринаја некас, адава на значинела кај на мангаја ле. На пример, несаве родителија мукхена о чхаво те керел са со мангела само кобор ма те ровел. Ама, јекх родители со чаче мангела пле чхаве ка овел строго кеда ваљани. Слично, иако о Девел тано мангипе, ов укоринела адален со мангела лен (Евр. 12:6). Значи, сикаваја мангипе исто аѓаар кеда даја укор кеда ваљани (Изр. 3:11, 12). Ама ваљани те памтина кај сарине грешинаја хем бут пути на сикаваја мангипе. Адалеске, секова јекх амендар шај те сикљол сар пошукар те сикавел мангипе. Сар шај те кера адава? Те дикха трин начинија.

Прво, молин е Девле те дел тут пло свети дух те шај те поможинел тут те сикаве панда побаро мангипе. О Исус вакерѓа кај о Јехова дела „свети дух адаленге со родена лестар“ (Лука 11:13). Адалеске, шај те ова увериме кај ако молинаја амен башо свети дух хем дозволинаја те поможинел амен, ка сикава панда побаро мангипе (Гал. 5:16). На пример, ако сиан старешина, шај те молине тут о свети дух те поможинел туке мангипаја те де советија тари Библија е јаверенге. Или, ако сиан родители, шај те молине тут е Девлескоро свети дух те поможинел туке те воспитине те чхавен мангипаја, а на хољаја.

Дујто, хор размислин сар о Исус сикавѓа мангипе кеда о јавера понашинѓе пе леа лошно (1. Пет. 2:21, 23). Кеда некој ка вреџинел тут или ка доживине неправда, пуч тут: „Со би керела сине о Исус?“ Јекх пхен со викинела пе Леа халили кај акава пучибе поможинѓа ла те мислинел англедер те керел нешто. Ој вакерела: „Јекх пути, јекх колешка бичхалѓа имејл порака ко јавера колеге колате со пишинѓа лошна буќа баши манде хем баши ми бути. Адава бут поврединѓа ман. Ама, тегани пучљум ман: ’Сар шај ки акаја ситуација те постапинав сар о Исус?‘ Откеда шукар размислинѓум баши акава пучибе, одлучинѓум те мукхав о буќа сар сој хем те на керав проблеми таро адава. Пало несаво време, шунѓум кај адале колешка сине ла сериозно проблеми састипаја хем кај сине ла баро стрес. Халиљум кај на мислинѓа адава со пишинѓа. Адава со размислинѓум сар о Исус реагиринѓа кеда о јавера вреџинена ле сине поможинѓа ман те сикавав мангипе ме колешкаке“. Ако џаја пало пример е Исусескоро, секогаш ка сикава мангипе е јаверенге.

Трито, сикљов те сикаве самопожртвувано мангипе. Таро асавко мангипе ка дикхел пе кој тане чаче е Исусескере ученикија (Јован 13:34, 35). О Исус сикавѓа асавко мангипе хем денѓа амен совршено пример. Адалеа со ало таро небо, ов откажинѓа пе таро са о буќа со сине ле са џи ко пло мерибе, хем адава керѓа ле баши аменде (Фил. 2:5-8). Кеда трудинаја амен те сикава сар е Исусескоро самопожртвувано мангипе, ка почмина те размислина хем те осетина амен сар лесте. Адава ка охрабринел амен те чхива е јаверенгере потребе англо амаре.

Кеда сикаваја мангипе добинаја бут берекетија. Те дикха дуј примерија:

• О ПХРАЛИПЕ КО ЦЕЛО СВЕТО: Адалеске со иси амен мангипе јекх јекхеске, џанаја кај ако џаја ко пхраља хем пхења таро било кова собрание ко свето ка ова шукар доџакерде. Чаче тано баро берекети те осетине о мангипе таро пхралипе ко цело свето (1. Пет. 5:9). Асавко мангипе иси само машкар е Девлескоро народо.

• МИР: Кеда трпинаја амен јекх јекхеа мангипаја, машкар аменде иси мир кова со поможинела амен те икера о јекхипа (Еф. 4:2, 3). Акава дикхаја ле ко амаре состанокија хем конгресија. На мислинеа ли ту да кај асавко мир пхаре аракхела пе ко акава свето? (Пс. 119:165; Иса. 54:13). Кеда трудинаја амен те ова ко мир е јаверенцар, сикаваја кај искрено мангаја лен хем адава бут радујнкерела амаре Даде (Пс. 133:1-3; Мат. 5:9).

О Павле пишинѓа: „О мангипе изградинела“ (1. Кор. 8:1). Со значинела адава? Ко 1. Коринќаните 13 поглавје, башо кова несаве вакерена кај тано „Химна е мангипаскири“, о Павле вакерѓа сар о мангипе изградинела. Сар прво, о мангипе охрабринела амен те чхива о потребе е јаверенгере англо амаре (1. Кор. 10:24; 13:5). Исто аѓаар, ако мангаја е јаверен ка ова обѕирна, грижлива, стрплива хем љубезна спрема о јавера. А адава ка керел амаре фамилие те овен побахтале хем керела о јекхипе ко амаро собрание те овел позорало (Кол. 3:14).

Иси бут начинија сар шај те сикава мангипе башо јавера, ама амаро мангипе башо Девел тано највредно. Соске? Адалеске со адава мангипе керела те ова сар јекх. Мануша таро различна расе хем чхибја заедно служинена е Јеховаске (Соф. 3:9). Те ова одлучна секова диве те сикава акаја бут вредно особина која со авела таро е Девлескоро свети дух.