КО НОЕМВРИ 1932 берш ко Мексико Сити, диз коте со живинена сине повише таро јекх милиони мануша, сине чхивде о прва семафорија. Ама, само јекх курко пало адава јекх јавер настан леља о внимание е манушенгоро. О новинарија пле апаратенцар аџикерена сине ки железничко станица те авел јекх посебно гости. Кој сине адава? Адава сине о Џозеф Ратерфорд, о претседатели таро Watch Tower Society. О пхраља тари адаја диз исто аѓаар аџикерена сине те авел о пхрал Ратерфорд кова со ало те овел ленцар трин диве ко конгрес.

Ко списание Златно веко пишинела сине: „Сигурно акава конгрес ка овел памтимо сар бут важно настан“ кова со поможинѓа те ширинел пе о чачипе ко Мексико. Ама, ко акава тикно конгрес сине присутна само 150 мануша. Тегани, соске адава конгрес сине добором важно?

Англедер те овел акава конгрес, ко Мексико на сине бут проповедимо. Таро 1919 берш, икерена пе сине тикне конгресија, ама пало адава берш о број е собраниенгоро хари похари тикнило. Кеда ко 1929 берш, пхравдили и подружница ко Мексико Сити, изглединела сине кај и ситуација ка овел пошукар, ама сине панда несаве проблемија со ваљани сине те решинен пе. И организација денѓа упатствија е колпортеренге (аѓаар викинена пе сине о пионерија англедер) те на керен бизнис кеда тане ки служба. Јекх колпортери добором бут хољанѓа башо адава со чак иклило тари организација хем керѓа пли група башо проучибе и Библија. Исто аѓаар, ко адава време о надгледнико е подружницакоро почминѓа те на постапинел спрема о библиска мерилија хем адалеске ваљани сине те менинен ле. Е верно пхраленге ко Мексико ваљани сине охрабрување.

Џикоте сине адари, о пхрал о Ратерфорд бут охрабринѓа акале верна пхрален аѓаар со икерѓа дуј охрабрувачка говорија ко конгрес хем панџ јавера говорија со сине мукхле ко радио. Адава сине прво пути кеда о пхраља користинѓе о радио те шај те ширинел пе о шукар хабери ко Мексико. Пало конгрес, јавер пхрал сине именујмо те служинел сар надгледнико ки подружница те организиринел о проповедибе. О пхраља добинѓе неве силе, хем о Јехова поддржинела лен сине понадари да ревно те проповединен.

О јавер берш, 1933 икерѓе пе дуј конгресија ки акаја пхув, јекх ко Веракруз хем јекх ко Мексико Сити. О пхраља проповединѓе бут хем, сине лен шукар резултатија. На пример, ко 1931 берш адари сине 82 објавителија, ама џи ко 1941 берш, адари уле деш пути повише објавителија. Ко конгрес со икерѓа пе 1941 берш ко Мексико Сити, але отприлика 1000 мануша.

Ко 1943 берш, е Јеховаскере сведокија почминѓе те објавинен о конгрес е темаја „Слободно народо“, кова со ваљани сине те икерел пе ко 12 дизја ко Мексико. * (Дикх и фуснота.) Адава керена сине аѓаар со користинена сине дуј баре плакате кола со сине пханле заедно хем пхиравена сине јекх плаката англал а и јавер палал. Акала плакате викинена лен сине сендвич плакате. О Сведокија користинена сине акала плакате те објавинен о конгресија панда таро 1936 берш.

И служба е плакатенцар ко Мексико Сити сине добором успешно со чак и новина Ла Национ башо е Јеховаскере сведокија со сине ко конгрес пишинѓа: „О прво диве сине ленге вакердо те канинен повише манушен. О јавер диве, и сала пхердили повише него со шај те кхедел“. Е Католичко цркваке на свиџинѓа пе адава, адалеске почминѓа те противинел пе е Јеховаскере сведоконге. Ама, о пхраља хем о пхења на дарандиле. Ола понадари да објавинена сине о конгрес. Ки јекх јавер статија тари адаја новина пишинела сине: „Цело диз дикхља лен.“ Пишинела сине кај о пхраља хем о пхења „уле рекламна ’сендвичија‘“. Ки статија сине слика таро пхраља ко улице ко Мексико Сити. Тели лате бешела сине о наслов: „Поплавинѓе о улице“.

Ко адава време, побаро дело таро пхраља ваљани сине те керен баре жртве те шај те џан ко конгресија со икерѓе пе ко Мексико. Бут пхраља хем пхења але таро дур гава коте со на сине возија хем друмија. О пхраља таро јекх собрание пишинѓе кај о возија на накхена сине таро ленгоро тхан. Адалеске о пхраља ваљани сине бут диве те џан пешки или мазгенцар џи ко тхан коте со сине вози те шај те путујнен џи ки диз коте со сине о конгрес.

Бут пхраља сине чороле хем едвај кхединѓе паре те џан ко конгрес. Кеда ресле, бут џене лендар совѓе ко пхраља кола со сикавѓе ленге мангипе хем гостопримство. А јавера совѓе ко дворане. Ки јекх прилика, околу 90 пхраља совѓе ки подружница упро кутие пхерде лиленцар. Ко Годишнико пишинѓа кај о пхраља сине бут благодарна адалеске со о кутие сине „поковле хем потате таро бетони“.

Акала пхраља на жалинѓе баши нијекх жртва со керѓе ла те шај те кхеден пе заедно пле пхраленцар хем пхењенцар. Авдиве, иси повише таро 850.000 сведокија ко Мексико хем лен иси лен исто асавко стави. * (Дикх и фуснота.) Ко јекх извештај таро Годишнико башо 1949 берш пишинѓа кај о жртве со ваљани сине те керен о пхраља на тикњарѓе ленгири ревност башо служибе е Јеховаске. Пало секова конгрес, ола бут време керена сине лафи баши лесте. Секова пути о пхраља пучена сине: „Кеда ка овел амен панда јекх конгрес?“ (Тари амари архива ки Централно Америка.)