1, 2. а) Со шај те теринел амен те пуча: „Џи кеда, Јехова?“ б) Соске шај о примерија е верна слугенгере таро пурано време те охрабринен амен?

„ЏИ КЕДА, Јехова?“ Акава пучле о верна пророкија о Исаија хем о Авакум (Иса. 6:11; Авак. 1:2). Кеда пишинѓа о 13 Псалм, о цари о Давид пучља о исто пучибе штар пути (Пс. 13:1, 2). Исто аѓаар, кеда о Исус сине машкар о мануша со на сине лен вера, ов пучља: „Џи кеда?“ (Мат. 17:17). Шај амен да понекогаш пучлем амен акава.

² Со шај те теринел амен те пуча: „Џи кеда, Јехова?“ Шај доживинѓем несави неправда. Шај боринаја амен несаве насвалипаја или пхурипаја. Или, осетинаја притисок соске живинаја ко „бут пхаро време“ (2. Тим. 3:1). А шај адава со сием машкар о мануша со иси лен погрешна ставија лела амари сила хем разочаринела амен. Бизи разлика која тани и причина, охрабринела амен  адава со џанаја кај о Јехова на осудинѓа пле верна слуген таро пурано време со пучле акава пучибе.

3. Со шај те поможинел амен кеда ка аракхљова ки пхари ситуација?

³ Со шај те поможинел амен те истрајна кеда ка аракхљова ко пхаре ситуацие? О Јаков, е Исусескоро пхрал, сине водимо таро свети дух те пишинел: „Адалеске пхраљален, овен стрплива џикоте на почминела е Господарескири присутност“ (Јак. 5:7). Значи, сарине амен ваљани те ова стрплива. Ама, сој тани и стрпливост хем сар шај те сикава акаја шужи особина?

4, 5. а) Сој тани и стрпливост хем сар шај те сикава ла? б) Со вакерѓа о Јаков баши стрпливост? (Дикх и слика ко почеток тари статија.)

⁴ И Библија вакерела кај и стрпливост авела таро е Девлескоро свети дух. Бизи е Девлескири помош, шај те овел пхаро е несовршена манушенге те овен стрплива ко пхаре ситуацие. И стрпливост тани поклон таро Јехова. Кеда сием стрплива сикаваја кај мангаја е Јехова хем е јаверен, а кеда на сием стрплива, о мангипе машкар аменде хем о јавера шудрола (1. Кор. 13:4; Гал. 5:22). И стрпливост тани поврзими јавере важна особиненцар. Јекх лендар тани и истрајност која со поможинела аменге те издржина ко пхаре ситуацие хем ко исто време те овел амен позитивно стави (Кол. 1:11; Јак. 1:3, 4). И стрпливост исто аѓаар поможинела амен ма те ирана лошнипаја кеда доживинаја несави неправда хем те ачхова верна е Јеховаске бизи разлика саве проблемија ка овен амен. И Библија вакерела кај ваљани спремно те аџикера. Акаја важно бути сикљоваја ла таро Јаков 5:7, 8. (Читин.)

⁵ Соске ваљани спремно те аџикера о Јехова те исполнинел адава со ветинѓа? О Јаков спорединѓа амари ситуација јекхе земјоделцоја. Иако о земјоделцо керела бут бути те шај те сејнел о семе, ле нане ле контрола упро време или упро адава кобор сигате ка бајрол о семе. Ов ваљани стрпливо те аџикерел „о скапоцено плоди тари пхув“. Слично, адалеске со нане амен контрола упро бут буќа, амен да мора стрпливо те аџикера те исполнинен пе е Јеховаскере лафија (Мар. 13:32, 33; Дела 1:7).

6. Со шај те сикљова таро Михеј?

⁶ О пророко о Михеј ваљани сине те издржинел ко пхаре ситуацие, исто сар амен авдиве. Ов живинѓа кеда владинела сине о цари о Ахаз. О Ахаз сине бут лошно цари, адалеске керела пе сине лошнипа сегде. О мануша сине добором румиме со керена сине бут лошна буќа. (Читин Михеј 7:1-3.) О Михеј џанља кај нашти те менинел и ситуација. Ама, со шај сине те керел? Ов вакерѓа: „Ме ка дикхав ко Јехова. Спремно сиум те аџикерав е Девле со ка спасинел ман. Мо Девел ка шунел ман“ (Мих. 7:7). Исто сар о Михеј, амен да ваљани спремно те аџикера.

7. Саво стави ваљани те овел амен џикоте аџикераја о Јехова те керел адава со ветинѓа?

⁷ Ако иси амен вера сар о Михеј, ка ова спремна те аџикера е Јехова. Амари ситуација нане сар и ситуација јекхе затвореникоскири кова со аџикерела те овел мудардо. Ов мора те аџикерел хем нане бахтало џикоте  аџикерела адава диве. Аменцар тано бут појавер. Амен сием спремна те аџикера е Јехова адалеске со џанаја кај ко право време ка исполнинел пло ветување те дел амен вечно живото. Адалеске сием стрплива хем бахтале џикоте истрајнаја (Кол. 1:11, 12). Џикоте аџикераја, ваљани те пазина ма те жалина амен кај о Јехова мукхела бут време те накхел џикоте те керел адава со ветинѓа. Ако кераја акава, ка разочарина ле (Кол. 3:12).

8. Со на ваљани те бистра џикоте размислинаја башо примерија е верна слугенгере таро пурано време?

⁸ Кеда размислинаја башо верна слуге таро пурано време кола со стрпливо аџикерѓе о Јехова те керел адава со ветинѓа, адава поможинела амен спремно те аџикера (Рим. 15:4). Џикоте размислинаја башо ленгоро пример, ка овел шукар те на бистра кобор време ваљани сине те аџикерен, соске сине спремна те аџикерен хем саве берекетија добинѓе адалеске со сине стрплива.

9, 10. Кобор време о Авраам хем и Сара аџикерѓе те исполнинен пе несаве ветувања со денѓа лен о Јехова?

⁹ Размислин башо Авраам хем и Сара. Адалеске со сикавѓе „вера хем стрпливост“ добинѓе „адава со сине ветимо“. И Библија вакерела аменге кај откеда о Авраам сикавѓа стрпливост, о Јехова ветинѓа леске кај ка наградинел ле хем лестар ка керел баро народо (Евр. 6:12, 15). Соске ваљани сине о Авраам те сикавел стрпливост?  Адалеске со ваљани сине те накхел време акала лафија те исполнинен пе. Ко 14 нисан 1943 берш а.а.е., о Авраам и Сара хем сарине со сине леа накхле и река Еуфрат хем кхувѓе ки Ветими пхув. Ама, о Авраам ваљани сине те аџикерел панда 25 берш те бијанѓовел лескоро чхаво о Исак хем панда 60 берш те бијанѓовен лескере унукија о Исав хем о Јаков (Евр. 11:9).

¹⁰ Дали о Јехова денѓа е Авраамеске дело тари Ветими пхув? И Библија вакерела кај о Јехова „на денѓа ле наследство ки лате, ни јекх тикно котор пхув, него ветинѓа кај ка овел лескири хем лескере чхавенгири пали лесте, панда џикоте на сине ле чхаво“ (Дела 7:5). Пало 430 берш откеда о Авраам накхља и река Еуфрат, лескере чхавендар уло јекх народо кова со ваљани сине те живинел ки адаја пхув (2. Мој. 12:40-42; Гал. 3:17).

11. Соске о Авраам спремно аџикерѓа, хем башо со ка овел бахтало кеда ка воскреснинел?

¹¹ О Авраам спремно аџикерѓа соске сине сигурно кај о Јехова ка икерел пе ко пло лафи со денѓа ле. Ле сине ле вера ко Јехова. (Читин Евреите 11:8-12.) О Авраам сине бахтало џикоте аџикерѓа иако на доживинѓа те дикхел сар исполнинела пе са адава со ветинѓа о Јехова. Ама, замислин туке кобор ка овел бахтало кеда ка воскреснинел ко рај ки Пхув. Ка овел изненадимо кеда ка читинел ко бут тхана ки Библија кај керела пе лафи баши лесте хем баши лескири фамилија. * (Дикх и фуснота.) Замислин туке кобор ка овел бахтало кеда ка шунел кај сине ле бари улога те шај те исполнинел пе е Јеховаскири намера башо ветимо Месија. Сигурно ка хаљовел кај врединѓа адава со добором аџикерѓа.

12, 13. Соске ваљани сине о Јосиф те овел стрпливо хем саво позитивно стави сине ле?

¹² Е Авраамескоро параунуко, о Јосиф, исто аѓаар сине спремно те аџикерел. Ов доживинѓа некобор баре неправде. Лескере пхраља бикинѓе ле сар робо панда кеда сине ле околу 17 берш. Пало несаво време, кривинѓе ле кај мангља те силујнел пле господарескере ромња хем адалеске сине пханло ко затвор (1. Мој. 39:11-20; Пс. 105:17, 18). Иако о Јосиф сине е Девлескоро верно слуга, изглединела сине кај тано повише казнимо, а на наградимо. Ама, пало 13 берш, са менинѓа пе. О Јосиф иклило таро затвор хем уло о дујто најмоќно владетели ко Египет (1. Мој. 41:14, 37-43; Дела 7:9, 10).

¹³ Дали о Јосиф сине хољамо хем разочаримо башо неправде со доживинѓа лен? Дали мислинѓа кај о Јехова мукхља ле коркори? На. О Јосиф стрпливо аџикерѓа. Со поможинѓа ле? Адава со сине ле вера ко Јехова. Ов џанља кај о Јехова контролиринела и ситуација. Акава дикхјола пе таро адава со вакерѓа пле пхраленге: „Ма даран. Ме ли сиум ко тхан е Девлескоро? Иако тумен манглен те керен манге лошнипе, ама о Девел иранѓа адава ко шукар те шај те спасинел о живото буте манушенгоро, сар со керела авдиве“ (1. Мој. 50:19, 20). О Јосиф уверинѓа пе кај  врединела те аџикерел о берекетија со авена таро Јехова.

14, 15. а) Соске о Давид ваљани сине те овел бут стрпливо? б) Со поможинѓа е Давиде стрпливо те аџикерел?

¹⁴ О цари о Давид, исто аѓаар доживинѓа бут неправде. Иако о Јехова биринѓа ле те овел цари ко Израел кеда сине терно, ов мора сине те аџикерел 15 берш те шај овела цари ко пло племе (2. Сам. 2:3, 4). Ко адава време, о Давид мора сине те нашел таро Саул кова со мангела сине те мударел ле. * (Дикх и фуснота.) Адалеске, е Давиде на сине ле пло кхер. Мора сине те гаравел пе ко пештере хем те живинел ко пхувја аври таро Израел. Чак кеда о Саул муло ки јекх борба хем о Давид уло цари ки Јуда, ов мора сине те аџикерел панда ефта берш те шај те овел цари упро цело Израел (2. Сам. 5:4, 5).

¹⁵ Соске о Давид сине спремно стрпливо те аџикерел? Ов дела амен о одговор ко исто псалм коте со штар пути пучела „Џи кеда?“ О Давид вакерѓа: „Иси ман доверба ко тло верно мангипе, мло вило радујнела пе кеда ту спасинеа ман. Ка гиљавав е Јеховаске, соске тано шукар манцар“ (Пс. 13:5, 6). О Давид џанља кај о Јехова мангела ле хем кај секогаш ка овел леске верно. Размислинела сине сар о Јехова поможинѓа ле хем аџикерела сине о време кеда о Јехова ка чхивел крајо лескере мукенге. О Давид џанља кај врединела те аџикерел о берекетија таро Јехова.

16, 17. Сар о Јехова хем о Исус сикавѓе кај тане спремна те аџикерен?

¹⁶ О Јехова на родела амендар те кера нешто со ов нане спремно те керел. Ов денѓа амен најшукар пример башо адава со значинела некој спремно те аџикерел. (Читин 2. Петрово 3:9.) На пример, ки рајско градина о Сатана кривинѓа е Јехова кај тано неправедно. Оттегани, о Јехова стрпливо аџикерела те авел о време кеда целосно ка прославинел пло свето анав. Кеда ка случинел пе адава, окола „со аџикерена ле“ ка добинен баре берекетија (Иса. 30:18).

¹⁷ О Исус, исто аѓаар сине спремно те аџикерел. Кеда сине ки Пхув, ов ачхило верно џи ко крајо таро пло живото. Ко 33 берш а.е., о Исус иранѓа пе ко небо хем о право те живинел сар совршено мануш денѓа ле е Девлеске те шај ов те користинел ле сар откупнина. Ама, ов ваљани сине те аџикерел џи ко 1914 берш те шај те почминел те владинел сар цари (Дела 2:33-35; Евр. 10:12, 13). Исто аѓаар, о Исус ваљани те аџикерел  џикоте на завршинена о илјада берша коте со ка владинел ов те шај те овен уништиме лескере душмања (1. Кор. 15:25). Акава тано баро време аџикерибаске, ама шај те ова сигурна кај врединела адава со стрпливо аџикерела.

18, 19. Со ка поможинел амен спремно хем стрпливо те аџикера?

¹⁸ Јасно тано кај о Јехова мангела те ова стрплива хем спремно те аџикера. Со ка поможинел амен те кера акава? Ваљани те молина амен башо свети дух. Ма те бистра кај и стрпливост авела таро е Девлескоро свети дух (Еф. 3:16; 6:18; 1. Сол. 5:17-19). Адалеске, таро вило молин е Јехова те поможинел тут стрпливо те аџикере.

¹⁹ Исто аѓаар, шукар тано те на бистра со поможинѓа е Авраамеске, е Јосифеске хем е Давидеске стрпливо те аџикерен о Јехова те исполнинел адава со ветинѓа. Лен сине лен вера хем доверба ко Јехова. На мислинена сине само песке хем башо адава со ола мангена. Кеда размислинаја башо берекетија со добинѓе лен, амен да сием охрабриме стрпливо те аџикера.

20. Со ваљани те ова одлучна те кера?

²⁰ Иако иси амен различна неволје, одлучна сием спремно те аџикера. Понекогаш шај амен да пучаја: „Џи кеда, Јехова?“ (Иса. 6:11). Ама, е Девлескоро свети дух шај те поможинел амен те сикава исто стави сар о Еремија кова со вакерѓа: „О Јехова тано мло наследство... адалеске спремно ка аџикерав ле“ (Плач 3:21, 24).