1, 2. а) Соске шај те урава и неви личност? б) Кола особине тари неви личност тане спомниме ко Колошаните 3:10-14?

КО ПРЕВОД Нов свет тари Библија дуј пути аракхаја о лафија „неви личност“ (Еф. 4:24; Кол. 3:10). Акаја личност тани „керди спрема е Девлескири волја“. Дали шај те урава акаја неви личност? Оја. О Јехова керѓа е манушен спрема лескоро лико, адалеске шај те сикава лескере шуже особине (1. Мој. 1:26, 27; Еф. 5:1).

² Адалеске со наслединѓем и несовршеност, понекогаш појавинена пе аменге погрешна желбе. Исто аѓаар, упри аменде влијајнела и околина коте со живинаја. Ама, адалеске со иси ле бари милост, о Јехова поможинела амен те ова мануша саве со мангела ов. Те шај те овел позорали амари желба те исполнина акаја цел, ка дикха некобор особине сој тане дело тари неви личност. (Читин Колошаните 3:10-14.) Пало адава, ка дикха сар шај те сикава акала особине ки служба.

3. Која тани јекх особина тари неви личност?

³ О Павле вакерѓа кај и непристрасност тани важно дело тари неви личност. Ов пишинѓа: „Акате нане више разлика машкар о Грко или о Евреи, о обрежимо или о необрежимо, о јабанџија, о Скити, о робо или о слободно“. * (Дикх и фуснота.) Ко собрание, нијекх на ваљани те мислинел кај лескири раса, нација или положба ко општество, керела ле те овел пошукар таро јавера. Соске? Адалеске со сием ученикија е Исусескере сарине сием јекх (Кол. 3:11; Гал. 3:28).

4. а) Сар ваљани е Јеховаскере слуге те понашинен пе е јаверенцар? б) Соске ко несаве тхана шај те овел пхаро е пхраленге те овен сар јекх?

⁴ Кеда ураваја амен и неви личност, поштујнаја са е манушен бизи разлика која раса тане хем котар авена (Рим. 2:11). Ко несаве тхана акава шај те овел пхаро те керел пе. На пример, англедер бут берша ки Јужно Африка, и влада чхивѓа е манушен тари секоја раса те живинен ко посебна населбе. Бут мануша ки адаја пхув машкар кола сој е Јеховаскере сведокија, панда живинена ко асавке населбе. О Водечко тело мангља те охрабринел е пхрален те пхравен пумаре виле. Адалеске ко октомври 2013 берш, сине одобримо те организиринел пе јекх посебно програма која со поможинѓа е пхрален таро различна расе пошукар те пенџарен пе јекх јекхеа (2. Кор. 6:13).

5, 6. а) Со сине организиримо ки јекх пхув те шај е Девлескере слуге те овел лен панда побаро јекхипе? (Дикх и слика ко почеток тари статија.) б) Саве тане о резултатија тари адаја програма?

⁵ О пхраља организиринѓе о собранија таро различна чхибја или расе те дружинен пе. Несаве викендија, о објавителија таро дуј собранија ваљанѓе те џан заедно ки служба, ко состанокија хем јекх јекхесте ко гостија. Бут собранија учествујнѓе ки акаја програма хем и подружница добинѓа бут шуже искуствија хем коментарија чак таро мануша со нане е Јеховаскере сведокија. На пример, јекх свештенико вакерѓа: „Ме на сиум Сведоко, ама шај те вакерав кај бут шукар сиен организириме те проповединен хем иси тумен јекхипе иако сиен таро различна расе“. Со мислинена сине о пхраља хем о пхења баши акаја програма?

⁶ Јекх пхен со викинела пе Нома која со керела лафи ки чхиб коса, ко почеток сине лаке незгодно те канинел ко пло скромно кхер е пхрален тари парни раса таро англиско собрание. Ама, откеда проповединѓа заедно ленцар хем гели ленде госто, ој више на осетинѓа пе аѓаар. Ој вакерѓа: „Ола да тане мануша сар аменде!“ Адалеске, кеда о пхраља хем о пхења таро англиско собрание але те проповединен заедно е пхраленцар таро  собрание ки чхиб коса, и Нома спреминѓа хајбаске хем викинѓа некас лендар ки песте сар гостија. Ој сине изненадими кеда дикхља кај јекх таро гостија со сине старешина тари парни раса, на сметинѓа леске те бешел ки пластично гајба. Акаја програма која со керела пе панда, поможинѓа буте пхрален хем пхењен те овел лен неве амала хем понадари те запознајнен пе околенцар сој тари јавер раса.

7. Соске ваљани те ова секогаш сочувствителна?

⁷ Са џикоте на авела крајо е Сатанаскере светоске, е Јеховаскере слуген ка овел лен проблемија. Сарине шај те ачхова бизи бути, те овел амен пхаро насвалипе, прогонство, природна катастрофе или јавера неволје. Те шај те поможина јекх јекхеске ко асавке ситуацие, ваљани те ова чаче сочувствителна. О сочувство ка охрабринел амен те ова љубезна е јаверенцар (Еф. 4:32). Акала особине тане дело тари неви личност. Ола ка поможинен амен те постапина сар о Девел хем те да утеха е јаверенге (2. Кор. 1:3, 4).

8. Саве шукар буќа шај те случинен пе ако сикаваја сочувство хем љубезност сариненге ко собрание? Вакер пример.

⁸ Сар шај те ова панда пољубезна околенцар тари јавер пхув со але ко амаро собрание или адаленцар со живинена ко бут лошна условија? Аѓаар со ка ова ленцар амала хем ка поможина лен те дикхен кај ваљанена аменге ко собрание (1. Кор. 12:22, 25). На пример о Деникарл селинѓа пе таро Филипини ки Јапонија. Адалеске со сине странцо, понашинена пе сине леа полошно него е јавере работниконцар ки бути. Пало адава, ов гело ко јекх состанок со икерѓе е Јеховаскере сведокија. О Деникарл вакерѓа: „Скоро сарине сине Јапонција, ама ола добором шукар доџакерѓе ман сар ка пхене џанаја амен сине бершенцар“. Адава со о пхраља секогаш сине леа љубезна поможинѓа ле те овел паше е Јеховаја. Пало несаво време о Деникарл крстинѓа пе хем акана служинела сар старешина. О старешине тане бахтале со о Деникарл хем лескири ромни и Џенифер тане дело таро собрание, адалеске вакерена: „Ола живинена едноставно живото сар пионерија хем дена шукар пример соске о Царство чхивена ко прво тхан ко пумаро живото“ (Лука 12:31).

9, 10. Саве шукар резултатија иси кеда сикаваја сочувство ки служба? Вакер пример.

⁹ Кеда проповединаја о шукар хабери башо Царство, иси амен прилика „те кера шукарипе сариненге“ (Гал. 6:10). Адалеске со иси лен сочувство баши адала со авена ки ленгири пхув, бут џене таро е Јеховаскере сведокија трудинена пе те сикљон ленгири чхиб (1. Кор. 9:23). Адава анела ленге бут берекетија. На пример и Тифани, јекх пхен тари Австралија со служинела сар пионерка, сиклили и чхиб свахили те шај те поможинел ко јекх собрание ко Бризбен. Иако на сине лаке локхо те сикљол адаја чхиб, ој акана тани бут бахтали. Ој вакерела: „Ако мангена те овел туменге интересно и служба, тегани ваљани те служинен ко собрание ки јавер чхиб. Адава тано сар те пхене патујнеа ки јавер пхув бизо те џа туке тари тли  диз. Аѓаар шај лично те осетине о јекхипе кова со иси ко амаро пхралипе ко цело свето“.

¹⁰ Јекх фамилија ки Јапонија керѓа нешто слично. И чхај, која со викинела пе Сакико вакерела: „Кеда сием сине ки служба бут пути аракхаја сине манушен таро Бразил. Кеда сикаваја сине ленге стихија тари ленгири Библија ки португалско чхиб, сар на пример Откровение 21:3, 4 или Псалм 37:10, 11, 29, ола шунена сине хем понекогаш пхерѓовена сине ленгере јакха асвенцар“. Акаја фамилија сине ла сочувство баши акала мануша со авена сине тари јавер пхув хем мангле те поможинен лен те шунен баши о чачипе тари Библија, адалеске цело фамилија почминѓе те сикљовен и португалско чхиб. Пало несаво време акаја фамилија поможинѓа те керел пе собрание ки португалско чхиб. Ола поможинѓе буте џененге со селинѓе пе ки адаја пхув те овен е Јеховаскере слуге. И Сакико вакерела: „На сине аменге локхо те сикљова португалско, ама о берекетија сине бут по баре таро трудо со денѓем ле. Бут сием благодарна е Јеховаске“. (Читин Дела 10:34, 35.)

11, 12. а) Соске ваљани тари исправно причина те урава и неви личност? б) Со ка поможинел амен те ова понизна?

¹¹ И главно причина соске ваљани те урава и неви личност тани те фалина е Јехова, а на те фалинен амен о јавера. На ваљани те бистра кај чак јекх совршено ангели уло гордо хем грешинѓа. (Споредин Езекиел 28:17.) Амен сием несовршена, адалеске тано попхаро те избегина и гордост. Ама, шај те урава амен ки понизност. Со ка поможинел амен ко акава?

¹² Јекх бути со ка поможинел амен те ова понизна тани те читина и Библија секова диве хем те размислина башо адава со читинаја (5. Мој. 17:18-20). Посебно ваљани те размислина башо адава со сикавѓа о Исус хем башо лескоро шукар пример баши понизност (Мат. 20:28). Ов сине добором понизно со тховѓа пле апостоленгере пре (Јован 13:12-17). Јавер бути со шај те кера тани те молина е Јехова те дел амен пло свети дух. Лескоро свети дух шај те поможинел амен те борина амен против о мисле кај сием пошукар таро јавера (Гал. 6:3, 4; Фил. 2:3).

13. Саве берекетија анела и понизност?

 ¹³ Читин Изреки 22:4. О Јехова таро пле слуге родела те овен понизна. И понизност анела бут берекетија. Ако сием понизна, ко собрание ка овел мир хем јекхипе. Исто аѓаар, о Јехова ка сикавел аменге пло шукарипе со на заслужинаја ле. О апостол Петар вакерѓа: „Сарине тумен, понашинен тумен понизно јекх јекхеа, соске о Девел противинела пе околенге сој горда, а околенге сој понизна сикавела шукарипе со на заслужинена ле“ (1. Пет. 5:5).

14. Кој тано најшукар пример башо адава те на хољанел пе сигате хем баши стрпливост?

¹⁴ Ко свето авдиве, кеда некој на хољанела сигате хем тано стрпливо, о јавера мислинена кај иси ле слабо карактер. Ама, адава нане точно. Акала шуже особине авена таро Јехова, и најмоќно личност ко универзум. Ов тано најшукар пример башо адава те на хољанел пе сигате хем баши стрпливост (2. Пет. 3:9). На пример, размислин кобор стрпливо одговоринела сине о Јехова преку пле ангелија е Авраамеске хем е Лотеске (1. Мој. 18:22-33; 19:18-21). Исто аѓаар, размислин кобор сине стрпливо о Јехова е Израелцонцар со на сине леске послушна повише таро 1.500 берша (Езек. 33:11).

15. Саво пример денѓа амен о Исус адалеа со на хољанела сине сигате хем сине стрпливо?

¹⁵ О Исус да на хољанела сине сигате (Мат. 11:29). Ов бут стрпливо трпинѓа о грешке пле учениконгере. Џикоте керела сине пли служба ки Пхув, бут пути неправедно вакерена сине лошна лафија баши лесте хем кривинена ле сине. Ама, ов сикавѓа акала особине са џи ко пло мерибе. Кеда сине ле баре дукха џикоте висинела сине ко стубо, о Исус молинѓа пле Даде те простинел адаленге со ковинѓе ле. Ов вакерѓа: „На џанена со керена“ (Лука 23:34). Чак кеда сине ко баре дукха, о Исус на хољанѓа хем сине стрпливо. (Читин 1. Петрово 2:21-23.)

16. Сар шај те на хољана сигате хем те ова стрплива?

¹⁶ О Павле вакерѓа јекх начин сар шај те на хољана сигате хем те ова стрплива. Ов пишинѓа: „Трпинен тумен јекх јекхеа хем цело вилеа простинен туменге чак кеда некој ка вреџинел тумен. Сар о Јехова спремно со простинѓа туменге, аѓаар керен тумен да“ (Кол. 3:13). Те шај простинаја е јаверенге, ваљани те на хољана сигате хем те ова стрплива. Адава ка керел те аракха о јекхипе ко собрание.

17. Соске тано важно те на хољана сигате хем те ова стрплива?

¹⁷ О Јехова родела амендар те на хољана сигате е јаверенге хем те ова ленцар стрплива. Акала особине тане бут важна ако мангаја те живина ко нево свето (Мат. 5:5; Јак. 1:21). Кеда на хољанаја сигате хем сием стрплива, фалинаја е Јехова хем поможинаја о јавера да те фалинен ле (Гал. 6:1; 2. Тим. 2:24, 25).

18. Сар тане поврзиме о мангипе хем и непристрасност?

¹⁸ Са о особине со дикхлем лен џи акана тане поврзиме е мангипаја. На пример, о ученико Јаков ваљанѓа те дел совет е пхраленге адалеске со понашинена пе сине е барваленцар пошукар него е чороленцар. Ов вакерѓа кај акава тано против е Девлескири заповед: „Манг тле пашутне сар со мангеа тут“. Пало адава вакерѓа: „Ако сиен пристрасна, керена грево“ (Јак. 2:8, 9). Ако мангаја е манушен, нане те овел амен предрасуде спрема никасте башо ленгоро образование, раса или положба ко општество. На ваљани те глумина кај сием непристрасна, него искрено те ова асавке хем адава те овел дело тари амари личност.

19. Соске тано важно те овел амен мангипе?

¹⁹ Исто аѓаар, о мангипе тано „стрпливо хем љубезно“, хем „на фалинела пе“ (1. Кор. 13:4). Ваљани те ова стрплива, љубезна хем понизна те шај понадари да те вакера о шукар хабери е јаверенге (Мат. 28:19). Акала особине поможинена амен те накха шукар са е пхраленцар хем пхењенцар ко собрание. Ако сарине сикаваја асавко мангипе, ко амаро собрание ка овел јекхипе хем ка фалина е Јехова. О јавера ка дикхен акава јекхипе хем ка манген те авен ко чачипе. Адалеске, бут шукар тано со и Библија баши неви личност ко крајо вакерела: „Освен са акава, уравен тумен ко мангипе, соске ов совршено поврзинела тумен“ (Кол. 3:14).

20. а) Кола пучиба ваљани те пуча амен хем соске? б) Сави шужи иднина аџикерела амен?

²⁰ Секој амендар ваљани те пучел пе: „Саве промене ваљани те керав те шај те хуљавав хем никогаш палем те на уравав и пурани личност?“ Ваљани те молина амен е Јеховаске хем те рода лестар те поможинел амен. Ваљани те да са амендар те менина о погрешна мисле хем постапке те шај те наследина е Девлескоро царство (Гал. 5:19-21). Исто аѓаар, ваљани те пуча амен: „Дали понадари да менинава мо начин сар размислинава те шај те радујнкерав е Јехова?“ (Еф. 4:23, 24). Амен сием несовршена, адалеске ваљани бут те трудина амен те урава хем никогаш те на хуљава и неви личност. Акава секогаш ваљани те кера ле. Замислин кобор шужо ка овел о живото кеда секова мануш целосно ка уравел и неви личност хем совршено ка сикавел о шуже особине е Јеховаскере!