1, 2. а) Со ваљани сарине те сикљова хем соске? б) Со ка дикха ки акаја статија?

САРИНЕ ваљани те сикљова сар те проценина о информацие со добинаја лен хем сар те користина лен те шај те ава џи ко исправна заклучокија (Изр. 3:21-23; 8:4, 5). Ако на сикљоваја адава, о Сатана хем лескоро свето локхе ка шај те руминен амаро размислување (Еф. 5:6; Кол. 2:8). Џанѓола пе, те шај те ава џи ко исправно заклучок, ваљани те овен амен о точна информацие. Ко Изреки 18:13 пишинела: „Кој одговоринела сигате англедер те шунел, адава тано леске глупост хем лаџ“.

² Ки акаја статија ка дикха соске тано пхаро те ава џи ко точна информацие хем џи ко исправна заклучокија. Исто аѓаар ка дикха несаве библиска начелија хем примерија кола со ка поможинен аменге те сикљова сар те проценина о информацие.

3. Соске ваљани те применина о библиско начело таро Изреки 14:15? (Дикх и слика ко почеток тари статија.)

³ Авдиве, добинаја информацие тари секоја страна —  преку Интернет, телевизија хем јавера медиумија. Шај исто аѓаар добинаја бут пораке таро амаре амала. Понекогаш шај мислинаја кај нане крајо са акале информациенге. Адалеске ваљани те пазина. Шај амаре амален иси лен шукар намере, ама иси мануша кола со намерно ширинена ховавне информацие или превртинена о буќа. Кола библиска начелија шај те поможинен аменге те проценина адава со шунаја? Ко Изреки 14:15 вакерела: „О наивно мануш верујнела ко секова лафи, а о паметно пазинела ко секова пло чекори“.

4. Сар шај о лафија таро Филипјаните 4:8, 9 те поможинен аменге те бирина со читинаја, хем соске тано бут важно те овен амен точна информацие? (Дикх хем и рамка „ Коте шај те аракха точна информацие“.)

⁴ Те шај те ана шукар одлуке, ваљани аменге информацие коленде со шај те верујна. Адалеске, ваљани бут те пазина кеда биринаја со ка читина. (Читин Филипјаните 4:8, 9.) На ваљани те нашава амаро време аѓаар со ка читина хаберија ко сумлива интернет-странице или пораке коленде со иси информацие со нане потврдиме. Посебно тано важно те на пхрава интернет-странице коте со о отпадникија ширинена пле идее. Ола мангена те керен послабо и вера е Девлескере слугенгири хем те превртинен о чачипе. О сумлива информацие ингарена џи ко погрешна одлуке. Никогаш ма мислин кај нане те влијајнен упри туте о ховавне информацие! (1. Тим. 6:20, 21).

5. Кола ховавне информацие шунѓе о Израелција, хем сар ола влијајнѓе упри ленде?

⁵ О ховавне информацие шај те анен џи ко страшна последице. Ко е Мојсејескоро време, дешудуј Израелција геле те дикхен сави тани и Ветими пхув. Кеда иранѓе пе, деш лендар вакерѓе негативна буќа (4. Мој. 13:25-33). Ола бајрарѓе о буќа хем адалеске е Јеховаскоро народо дарандило хем обесхрабринѓа пе (4. Мој. 14:1-4). Соске о народо реагиринѓа аѓаар? Шај мислинѓе кај о информацие тане точна соске деш таро адала дешудуј Израелција вакерѓе иста буќа. Адалеске ола на мангле те верујнен ко шукар буќа баши Ветими пхув со вакерѓе о јавера дуј џене (4. Мој. 14:6-10). Ола на прифатинѓе о точна информацие хем на сикавѓе доверба ко Јехова, него верујнѓе ко негативна информацие. Аѓаар сикавѓе кај нане мудра!

6. Соске на ваљани те ова изненадиме ако шунаја башо е Јеховаскоро народо информацие со ка шокиринен амен?

⁶ Ваљани посебно те пазина кеда шунаја било саве информацие башо е Јеховаскоро народо. Ма бистре кај амаро душмани о Сатана тано „окова со вакерела ховајба против амаре пхраља“ (Отк. 12:10). О Исус предупрединѓа амен кај о душмања ка вакерен разна  ховавне лошна буќа против аменде (Мат. 5:11). Ако сериозно хаљоваја акава предупредување нане те ова шокириме кеда ка шуна чудна информацие башо е Јеховаскоро народо.

7. Со ваљани те пуча амен англедер те бичхала несаво хабери или искуство?

⁷ Дали мангеа те бичхале пораке тле амаленге? Кеда ка шуне несаво интересно хабери или искуство, дали осетинеа тут сар репортери кова со мангела одма те вакерел адава? Англедер те бичхале нешто, пуч тут: „Дали сиум сигурно кај акава тано чаче? Дали чаче џанава са о фактија?“ Ако на сиан сигурно, тегани шај те ширине ховајба. Адалеске, ако на џанеа дали несаво хабери тано точно, ма бичхал ле, него бришин ле!

8. Со керѓе несаве душмања ко несаве пхувја хем сар шај бизо те ова свесна те поможина ленге ко адава?

⁸ Иси панда јекх причина соске тано опасно те бичхала пораке бизо англедер те размислина. Ко несаве пхувја амаре активностија тане ограничиме, или чак забраниме. Амаре душмања ко акала пхувја шај намерно те ширинен ховајба баши аменде те шај те даравен амен или те чхивен амен те сумнина амен јекх јекхесте. Баш акава случинѓа пе ко пурано Советско Сојуз. И тајно полиција, пенџарди сар КГБ, ширинѓа ховајбе кај несаве пхраља со предводинена сине издајнѓе е Јеховаскере народо. * (Дикх и фуснота.) Жално тано адава со бут пхраља верујнѓе ко акала ховајбе хем адалеске цидинѓе пе тари е Јеховаскири организација. Бут џене лендар пало адава иранѓе пе, ама несаве никогаш на керѓе адава. Ола мукхле о ховавне информацие те уништинен ленгири вера (1. Тим. 1:19). Сар шај те чхинава те на случинел пе аменге нешто асавко? Ма ширин  информацие сој негативна или со нане потврдиме. Ма верујн ко са со шунеа. Наместо адава, ов сигурно кај иси тут точна информацие.

9. Со јавер шај те керел те овел аменге пхаро те ава џи ко точна информацие?

⁹ Понекогаш ка шуна информација која со само екваш тани точно, или палем нане ла са о фактија. Акава да шај те керел те овел аменге пхаро те ава џи ко точно заклучок. Нашти те верујнел пе ки информација која со само екваш тани точно. Со шај те кера те на ховавѓова таро асавке информацие? (Еф. 4:14).

10. Соске несаве Израелција харичкаске ка боринен пе сине против пле пхраља, хем со поможинѓа ленге те на керен адава?

¹⁰ Шај те сикљова таро адава со случинѓа пе е Израелцонге со живинена сине ки западно страна тари река Јордан ко време е Исус Навинескоро (Ис. Нав. 22:9-34). Ола шунѓе кај о Израелција тари источно страна тари река Јордан керѓе баро жртвенико узи река. Иако акава сине чаче, о Израелција тари западно страна тари река на џанена сине целосно и ситуација. Ола мислинѓе кај ленгере пхраља тари источно страна бунинѓе пе против о Јехова хем адалеске кхединѓе пе те џан те боринен пе против ленде. (Читин Исус Навин 22:9-12.) Ама англедер те џан, бичхалѓе несаве манушен те шај те испитинен и ситуација. Со дознајнѓе акала мануша? О Израелција тари источно страна на керѓе о жртвенико те ден жртве е ховавне девленге, него сар доказ кај ола да служинена е Јеховаске. Сигурно о Израелција сине бут бахтале со одвојнѓе време те испитинен и ситуација англедер те џан те боринен пе против пле пхраља.

11. а) Сави неправда доживинѓа о Мефивостеј? б) Со ваљани сине те керел о Давид те шај те на случинел пе акаја неправда?

¹¹ Понекогаш шај те случинел пе амен лично те ова повредиме кеда некој ка вакерел баши аменде буќа кола со само екваш тане точна. Акава случинѓа пе е Мефивостејеске. О цари о Давид дарежливо денѓа ле цело пхув со припадинела сине лескере папоске е Саулеске (2. Сам. 9:6, 7). Ама пало несаво време, о Давид шунѓа несаве лошна буќа башо Мефивостеј. Бизо те испитинел дали адава тано чаче, ов леља лестар цело имот (2. Сам. 16:1-4). Кеда пало несаво време керѓа леа лафи, о Давид халило кај керѓа грешка хем иранѓа леске дело таро имот (2. Сам. 19:24-29). Те одвојнел песке сине време о Давид те проверинел са о информацие наместо сигате те верујнел ко информацие со на сине целосно точна, о Мефивостеј нане те доживинел сине адаја неправда.

12, 13. а) Со керѓа о Исус кеда о јавера вакерѓе ховајба баши лесте? б) Со шај те кера ако некој вакерела ховајба баши аменде?

¹² Со шај те кере ако некој ширинела ховајба баши туте? Акава случинѓа пе е Исусеске хем е Јован Крстителеске. (Читин Матеј 11:18, 19.) Со керѓа о Исус? Ов на трошинѓа пло време хем сила те докажинел е манушенге кај адала буќа нане чаче. Наместо адава, ов охрабринѓа лен те испитинен о доказија. Ов мангела сине о мануша те концентриринен пе ко адава со керела хем со сикавела. Адалеске вакерѓа: „И мудрост дикхела пе таро лакере постапке“ (Мат. 11:19).

¹³ Шај те сикљова важно поука таро адава со вакерѓа о Исус. Понекогаш некој шај неправедно те критикујнел амен хем шај сием секириме кај акава  ка руминел амаро углед. Ама, о начин сар живинаја шај те сикавел е јаверенге саве сием чаче. Таро пример е Исусескоро сикљоваја кај адава со ка понашина амен шукар шај те сикавел кај о ховавне буќа сој вакерде баши аменде нане точна.

14, 15. Соске на ваљани те овел амен превише доверба ко адава сар амен проценинаја о буќа?

¹⁴ Дикхлем кај тано пхаро те авел пе џи ко информацие коленде со шај те верујнел пе. Јавер проблеми тано амари несовршеност. Ако бершенцар служинаја е Јеховаске, шај улем мудра хем иси амен способност хаљојбаске. О јавера шај поштујнена амен соске џанаја шукар те проценина о буќа. Дали шај акава те керел аменге проблеми?

¹⁵ Оја. Шај те почминел те овел амен превише доверба ко адава сар амен проценинаја о буќа хем те мукха амаре чувствија хем ставија те контролиринен амаро размислување. Шај те почмина те мислина кај хаљоваја несави ситуација иако на џанаја са о фактија. Акава тано бут опасно! И Библија јасно предупрединела те на овел амен превише доверба ко адава сар амен проценинаја о буќа (Изр. 3:5, 6; 28:26).

16. Со случинѓа пе ки акаја замислими ситуација хем со мислинѓа о Дејани?

¹⁶ Замислин туке акаја ситуација: О Дејани, јекх искусно старешина, џала ко ресторани хем адари дикхела е Роберте, јавер старешина таро исто собрание, јекхе џувљаја со нане лескири ромни. О Дејани дикхела кај ола уживинена џикоте керена лафи, асана хем чак гушинена пе. Ов тано бут секиримо хем мислинела песке: „Дали о Роберти  хем лескири ромни ка развединен пе? Со ка овел ленгере чхавенцар?“ О Дејани више дикхља асавке ситуацие англедер. Сар ка осетине тут сине ако сиан ко тхан е Дејанескоро?

17. Со дознајнѓа о Дејани покасно хем со шај амен те сикљова таро акава пример?

¹⁷ Ама, аџикер хари. Иако о Дејани претпоставинела кај о Роберти нане верно пле ромњаке, дали џанела са о фактија? Покасно адаја рат, о Дејани јавинела пе е Робертеске хем дознајнела кај и џувли ко ресторани тани лескири пхен која со али таро странство. О Роберти хем лескири пхен бут берша на дикхле пе. Адалеске со ој ачхили само некобор саатија, о Роберти шај сине те дикхел пе лаја само кратко ко ресторани. Лескири ромни нашти сине те авел. О Дејани сине бахтало со на вакерѓа никаске со мислинѓа. Со сикљоваја таро акава? Бизи разлика кобор берша служинаја е Јеховаске, понадари да ваљани те џана са о фактија те шај те ава џи ко исправно заклучок.

18. Со шај те случинел пе ако на накхаја шукар несаве пхралеа?

¹⁸ Понекогаш исто аѓаар шај те овел пхаро те ава џи ко исправно заклучок баши несави ситуација ако ки лате тано вклучимо несаво пхрал колеа со на накхаја баш најшукар. Ако цело време мислинаја башо адава кобор сием различна адале пхралеа, шај те почмина те сумнина амен ки лесте. Адалеске, кеда ка шуна нешто негативно башо адава пхрал, шај ка манга те верујна ко адава, чак кеда нане амен нисаве доказија кај адава тано точно. Со сикљоваја таро акава? Ако мукхаја ки аменде те бајровен негативна чувствија спрема амаре пхраља, шај те ана погрешна заклучокија коленге со нане амен точна информацие (1. Тим. 6:4, 5). Адалеске, на ваљани те мукха о лошна чувствија, сар сој и љубомора, те мукхен коренија ко амаре виле. Никогаш ма те бистре кај о Јехова аџикерела амендар те манга амаре пхрален хем спремно те простина ленге. (Читин Колошаните 3:12-14.)

19, 20. а) Кола библиска начелија ка поможинен аменге исправно те проценина о информацие? б) Башо со ка кера лафи ки јавер статија?

¹⁹ Авдиве нане локхо те авел пе џи ко информацие коленде со шај те верујнел пе хем исправно те проценинен пе. Бут таро информацие авдиве нане целосна или само екваш тане точна. Исто аѓаар, амари несовршеност керела те овел аменге попхаро. Со шај те поможинел аменге те ава џи ко точна информацие хем исправно те проценина лен? О библиска начелија. На пример, јекх начело сикавела кај нане мудро те ана заклучокија англедер те џана са о фактија (Изреки 18:13). А јавер поттикнинела амен те на верујна сигате ко секова лафи (Изреки 14:15). Хем бизи разлика кобор време служинаја е Јеховаске на ваљани те овел амен превише доверба ко адава сар амен проценинаја о буќа (Изреки 3:5, 6). О библиска начелија ка заштитинен амен ако родаја информацие коленде со шај те верујнел пе хем ако користинаја лен те ава џи ко исправна заклучокија хем мудра одлуке.

²⁰ Ама, иси панда јекх стапица. Сар мануша, амен сигате судинаја спрема адава со дикхаја. Ки јавер статија ка кера лафи башо несаве подрачја коте со шај те кера акаја грешка хем ка сикљова сар те избегина адава.