О ЖИВОТО ко акала „последна диве“ тано са попхаро, адалеске ваљани аменге повише стрпливост таро било кеда англедер (2. Тим. 3:1-5). Живинаја машкар о мануша со нане стрплива. Ола тане себична, мангена те акошен пе хем нане лен самоконтрола. Адалеске, ваљани те пуча амен: „Дали ме да почминѓум те на овав стрпливо сар о јавера мануша? Со значинела те овав чаче стрпливо? Со шај те керав акаја особина те овел дело тари мли личност?“

О лафи „стрпливост“ со користинела пе ки Библија на значинела само некој те трпинел несави пхари ситуација. О стрпливо мануш истрајнела адалеске со иси ле надеж кај о буќа ка овен пошукар. Ов на мислинела само песке, него грижинела пе башо е јаверенгере да чувствија, чак кеда некој ка нервиринел ле хем ка понашинел пе леа лошно. Ов понадари да надинела пе кај лескоро однос е јавереа ка овел пошукар. На изненадинела амен адава со и Библија вакерела кај и стрпливост тани резултати таро мангипе * (Дикх и фуснота.) (1. Кор. 13:4). И стрпливост исто аѓаар тани дело таро „особине со авена таро свети дух“ (Гал. 5:22, 23). Со ваљани те кера те шај чаче те ова стрплива?

Те шај те ова стрплива ваљани те молина амен башо е Јеховаскоро свети дух, кова со ов дела ле околенге со иси лен доверба ки лесте (Лука 11:13). О свети дух тано бут моќно, ама амен ваљани те кера амаро дело те шај те живина спрема амаре молитве (Пс. 86:10, 11). Акава значинела кај ваљани те да амендар са секова диве те сикава стрпливост хем акаја особина те кера ла дело тари амари личност. Ама, понекогаш шај нане те успејна ко адава. Тегани, со шај те поможинел аменге?

Ваљани те проучина о живото е Исусескоро хем те трудина амен те џа пало лескоро совршено пример. Кеда о апостол Павле керѓа лафи баши „неви личност“, колате сој вклучими и стрпливост да, ов поттикнинѓа амен те мукха „о мир е Христосескоро те владинел упро амаре виле“ (Кол. 3:10, 12, 15). Те шај те кера адава, ваљани те џа пало е Исусескоро пример хем те овел амен целосно доверба кај о Јехова ка испрајнел о буќа ко право време. Ако иси амен асавки доверба, ка ачхова стрплива бизи разлика со случинела пе околу аменде (Јован 14:27; 16:33).

Сарине амен мангаја о нево свето те авел посигате. Ама кеда размислинаја башо адава кобор стрпливо сине о Јехова аменцар, сикљоваја сар те ова пострплива. И Библија уверинела амен: „О Јехова на каснинела те керел адава со ветинѓа, сар со несаве мислинена кај каснинела, него ов тано стрпливо хем на мангела никој те овел уништимо него саринен те овел лен прилика те каинен пе“ (2. Пет. 3:9). Значи кеда размислинаја башо адава кобор тано стрпливо о Јехова аменцар, амен да ка ова пострплива е јаверенцар (Рим. 2:4). Ко кола ситуацие ваљани аменге стрпливост?

Иси бут ситуацие ко амаро живото коте со ваљани аменге стрпливост. На пример, кеда кераја лафи некасаја, шај ка сетина амен ко нешто со мислинаја кај тано важно те вакера ле. Ко асавке прилике и стрпливост ка поможинел аменге те на чхинава е јавере џикоте керела лафи (Јак. 1:19). Исто аѓаар ка ваљани аменге стрпливост кеда некој ка нервиринел амен. Наместо сигате те реагирина ки асавки ситуација, шукар тано те размислина сар о Јехова хем о Исус реагиринена ко амаре слабостија. Ола на концентриринена пе ко бут тикне буќа со кераја лен погрешно. Наместо адава, ола дикхена амаре шукар особине со иси амен хем стрпливо дена амен време те попрајна амен (1. Тим. 1:16; 1. Пет. 3:12).

Ваљани аменге стрпливост исто аѓаар кеда некој ка вакерел аменге кај нешто грешинѓем. Ко асавке ситуацие шај одма ка осетина амен повредиме или ка почмина те оправдина амен. Ама, е Девлескоро Лафи поттикнинела амен те реагирина ко појавер начин. Ки лесте пишинела: „Пошукар тано те овел пе стрпливо него те овел пе гордо. Ма вреџин тут сигате, о вило околескоро сој глупаво вреџинела пе“ (Проп. 7:8, 9). Значи, чак кеда неправедно кривинена амен башо нешто, ваљани те ова стрплива хем шукар те размислина англедер те реагирина. Аѓаар постапинѓа о Исус кеда о јавера неправедно кривинѓе ле (Мат. 11:19).

Е родителенге посебно ваљани стрпливост кеда ваљани те поможинен пумаре чхавенге те исправинен несаве ставија или те циден пестар о погрешна желбе. Размислин башо Матијас, јекх пхрал со служинела ко Бетел ки Скандинавија. Кеда сине тинејџери, лескере соученикија секогаш асана сине леске башо адава ко со верујнела. Ко почеток лескере родителија на џанена сине акава. Пало адава дикхле кај почминѓа те сумнинел пе ко адава со верујнела. О Јилис, о дад е Матијасескоро, вакерела кај леске хем лескере ромњаке ваљанѓа бари стрпливост ки акаја ситуација. О Матијас пучела сине пучиба сар сој: „Кој тано о Девел? Со ако и Библија нане е Девлескоро Лафи? Котар џанаја кај о Девел родела амендар акава?“ Исто аѓаар, пучела сине пе даде: „Соске некој те судинел ман само адалеске со нане ман иста ставија хем верувања сар туменде?“

О Јилис објаснинела: „Понекогаш хољамо пучела амен сине пучиба, ама на сине хољамо  манге или пе дајаке, него башо библиска чачипа, соске мислинела сине кај адава керела лескоро живото попхаро“. Сар о Јилис поможинѓа леске? „Мо чхаво хем ме кераја сине лафи саатенцар. Бут пути само шунава ле сине хем понекогаш пучава ле сине пучиба те шај те хаљовав со чувствујнела хем со размислинела. Понекогаш објаснинава леске сине нешто хем ка вакерав леске сине те размислинел башо адава јекх или дуј диве англедер те продолжина амаро разговор. А понекогаш ка вакерав леске сине кај ваљани манге некобор диве те размислинав башо адава со вакерѓа манге“. Преку асавке редовна разговорија, о Матијас почминѓа те хаљовел со значинела и откупнина хем кај о Јехова мангела амен хем кај иси ле право те владинел упри аменде. О Јилис вакерела: „Ваљани сине време хем бут пути на сине локхо, ама похари ко лескоро вило почминѓа те бајровел мангипе спрема о Јехова. Ме хем ми ромни сием бут бахтале со амари стрпливост успејнѓа те поможинел амаре чхавеске те накхавел о тинејџерска берша хем о чачипе те ресел џи ко лескоро вило“.

Лен сине лен доверба кај о Јехова ка поддржинел лен џикоте ола стрпливо поможинена пумаре чхавеске. О Јилис вакерела: „Бут пути вакерава сине е Матијасеске кај амаро мангипе спрема лесте поттикнинѓа лескере даја хем ман панда повише те молина е Јехова те поможинел леске те хаљовел о чачипе“. Акала родителија тане бут бахтале со сине стрплива хем со на откажинѓе пе!

Стрпливост исто аѓаар ваљани аменге кеда грижинаја амен некаске тари амари фамилија или несаве амалеске кова со повише време тано насвало. Те дикха о пример е Еленакоро, која со исто аѓаар живинела ки Скандинавија. * (Дикх и фуснота.)

Отприлика англедер офто берш, е Еленакере роме сине ле дуј мозочна ударија. Адалеске, ов нашти више те осетинел радост, туга или жал. Акаја ситуација тани бут пхари е Еленаке. Ој вакерела: „Ваљани те сикавав бари стрпливост хем бут те молинав ман“. Ој понадари вакерела: „Омилено стихо кова со дела ман утеха тано Филипјаните 4:13 коте со пишинела: ’Са шај те керав соске поможинела ман адава со дела ман сила‘“. Адалеске со добинела сила хем поддршка таро Јехова, и Елен стрпливо истрајнела ки пли пхари ситуација (Пс. 62:5, 6).

Џанѓола пе, најшукар пример баши стрпливост тано о Јехова (2. Пет. 3:15). Ки Библија читинаја башо бут ситуацие коте со о Јехова сикавѓа стрпливост (Неем. 9:30; Иса. 30:18). На пример, сар реагиринѓа о Јехова кеда о Авраам пучља ле некобор пучиба баши лескири одлука те уништинел о Содом? О Јехова на чхинавѓа е Аврааме? Ов стрпливо шунѓа секова лескоро пучибе хем о гриже со сине ле. О Јехова сикавѓа леске кај шунела ле сине хем уверинѓа ле кај нане те уништинел о Содом чак ако иси само деш праведникија ки адаја диз (1. Мој. 18:22-33). О Јехова секогаш шукар шунела хем никогаш на реагиринела сигате!

И стрпливост тани бут важно дело тари неви личност која со мора секова христијани те овел ле. Ако даја са амендар те ова чаче стрплива, ка фалина е Јехова, амаро Дад со грижинела пе аменге хем тано стрпливо аменцар хем ка ова машкар „окола со баши пли вера хем стрпливост добинена адава сој ветимо“ (Евр. 6:10-12).