О БЕРШ со накхља, бут пхраља ко цело свето сине именујме сар старешине хем слуга-помошникија. Ако ту да сиан јекх таро адала пхраља, сигурно сиан бахтало со шај те служине е Јеховаске хем тле пхраленге ко асавко начин.

Џанѓола пе, шај џи негде сиан секиримо или на сиан сигурно ки туте. Јекх терно старешина со викинела пе Џејсон вакерела: „Кеда сиум сине именујмо, осетинава ман сине сар поплавимо таро бут неве обврске“. О Мојсеј хем о Еремија мислинѓе кај нане доволно способна башо неве задаче со добинѓе лен таро Јехова (2. Мој. 4:10; Ерем. 1:6). Ако ту да осетинеа тут аѓаар, со шај те кере те овел тут побари доверба ки туте хем понадари да те напредујне духовно? Шај те сикљове бут таро пример е Тимотејескоро (Дела 16:1-3).

Е Тимотеје веројатно сине ле отприлика 20 берш кеда почминѓа те патујнел е Павлеа. Ко почеток, о Тимотеј шај мислинела сине кај нане доволно способно те сикавел хем те дел совет е јаверенге адалеске со сине терно (1. Тим. 4:11, 12; 2. Тим. 1:1, 2, 7). Ама ов понадари да напредујнела сине хем пало деш берш о Павле вакерѓа е пхраленге таро Филипи: „Надинава ман кај ако тано ки волја е Господареске е Исусеске, панда хари ка бичхалав туменге е Тимотеје... Соске нане ман никој сар лесте“ (Фил. 2:19, 20).

Соске о Тимотеј тано шукар пример е именујме пхраленге? Те дикха шов буќа.

1. Ов чаче грижинела пе сине е манушенге. О Павле е пхраленге ко Филипи башо Тимотеј вакерѓа: „Нане ман никој сар лесте, кова со чаче ка грижинел пе туменге“ (Фил. 2:20). О Тимотеј мангела сине те поможинел е пхраленге те овен паше е Јеховаја хем сине спремно те жртвујнел пло време хем пли сила башо адава.

О Вилијам кова сој старешина повише таро 20 берш, секогаш вакерела е неве именујме старешиненге: „Манген тумаре пхрален. На ваљани те овел туменге најважно те организиринен о собраниска активностија, него мангипаја те поможинен е пхраленге“. Ма ов сар несаво шофери со возинела автобуси колеске сој поважно те ресел ко време ки автобуско станица, а на те лел патникон ко автобуси.

2. О духовна буќа сине леске ко прво тхан. О Павле вакерѓа кај о Тимотеј сине поразлично таро окола со „грижинена пе само песке, а на башо адава со припадинела е Исус Христосеске“ (Фил. 2:21). О Павле дикхља кај о пхраља околу лесте сине превише зафатиме пле лична буќенцар. Понекогаш ола чхивена сине пле лична интересија англедер и служба башо Јехова. Ама, о Тимотеј на сине асавко! Кеда добинѓа прилика те керел повише ки служба башо Јехова сине ле исто стави сар о Исаија кова со вакерѓа: „Аке сиум ме! Бичхал ман!“ (Иса. 6:8).

Сар шај те овел тут рамнотежа машкар о лична потребе хем о собраниска обврске? О Павле денѓа амен совет те проценина сој најважно (Фил. 1:10). Најважно нека овел туке и служба башо Јехова. Дујто, избегин буќа кола со ка лен тутар бут време хем сила. О Павле поттикнинѓа е Тимотеје: „Наш таро желбе е тернипаскере, а роде праведност, вера, мангипе хем мир“ (2. Тим. 2:22).

3. Ревно керела сине о теократска активностија. О Павле башо Тимотеј  вакерѓа: „Сар чхаво пе дадеа, сине робо манцар те ширинел о шукар хабери“ (Фил. 2:22). О Тимотеј на сине мрзало. Ов ревно трудинела пе сине те керел о теократска активностија заедно е Павлеа, а адава керѓа лен те овен панда попаше.

Авдиве ки е Јеховаскири организација иси бут бути. Акаја бути чаче керела амен бахтале хем паше амаре пхраленцар хем пхењенцар. Адалеске, чхив туке цел секогаш те ове зафатимо ки служба башо Јехова (1. Кор. 15:58).

4. Керела сине адава со сикљовела. О Павле пишинѓа е Тимотејеске: „Шукар пенџарѓан мло сикљојбе, мло начин сар живинава, мли цел, мли вера, мли стрпливост, мло мангипе, мли истрајност“ (2. Тим. 3:10). Адалеске со керела сине адава со сикљовела, о Тимотеј добинѓа побаре одговорностија (1. Кор. 4:17).

Дали иси тут несаво амал сој искусно старешина кова со шај те поможинел туке ко духовно поглед? Ако на, шај ли те аракхе? О Том, кова со бершенцар служинела сар старешина сетинела пе кај јекх искусно старешина уло амал леа хем сикавѓа ле башо бут буќа. Ов вакерела: „Секогаш родава лестар сине совет хем применинава ле сине. Акава керѓа те овел ман побари доверба ки манде“.

5. Ов понадари да сикљола сине. О Павле поттикнинѓа е Тимотеје: „Вежбин те ове верно е Девлеске“ (1. Тим. 4:7). Јекх спортисти обично иси ле тренери, ама ов мора коркори да те вежбинел. О Павле пишинѓа е Тимотејеске: „Понадари да концентририн тут ко јавно читибе, ко охрабрибе е јаверен, ко сикајбе... Размислин башо адава, посветин тут ко адава, те шај тло напредок те дикхен сарине“ (1. Тим. 4:13-15).

Трудин тут понадари да те кере бути ко тле вештине. Проучин хор и Библија хем ов ко тек е најневе упатствонцар тари организација. На ваљани те овел тут превише доверба ки туте. Погрешно тано те мислине кај адалеске со иси тут баро искуство шај те икљове ко крајо секоле ситуацијаја бизо англедер шукар те истражине. Исто сар о Тимотеј, „пазин шукар сар живинеа хем сар сикавеа“ (1. Тим. 4:16).

6. Ов мукхља те водинел ле е Јеховаскоро духо. Кеда керела сине лафи баши е Тимотејескири служба, о Павле сетинкерѓа ле: „Аракх акала скапоцена буќа со добинѓан лен преку о свети дух, кова сој ки аменде“ (2. Тим. 1:14). О Тимотеј ваљани сине те мукхел те водинел ле е Девлескоро свети дух.

О Доналд, кова со бершенцар служинела сар старешина, вакерѓа: „О именујме пхраља ваљани те ценинен пло амалипе е Јеховаја. Окола со керена адава, ка овел лен са побари хем побари сила. Ако молинена пе башо свети дух хем ако трудинена пе те сикавен о особине со авена лестар, ка овен баро берекети пле пхраленге“ (Пс. 84:7; 1. Пет. 4:11).

Чаче охрабринела адава со дикхаја кај бут неве именујме пхраља сар туте духовно напредујнена. О Џејсон, каске со керѓем лафи англедер, вакерела: „Откеда почминѓум те служинав сар старешина, сиклиљум бут хем уло ман побари доверба ки манде. Акана уживинава ки мли задача хем ки лате дикхава сар бари чест!“

Ка напредујне ли понадари да? Ако џаја пало пример е Тимотејескоро, ту да ка ове берекети тле пхраленге хем пхењенге.