Соске нане дозволимо те објавинен пе амаре публикацие ко јавера интернет-странице или социјална мреже?

Несаве мануша мислинена кај шај слободно те копиринен или те објавинен амаре библиска публикацие ко јавера интернет-странице или социјална мреже адалеске со даја лен бизо паре. Ама, акава шај те керел сериозна проблемија хем пхагела о Условија користибаске таро амаре интернет-странице. * (Дикх и фуснота.) Ко акала Условија јасно пишинела кај нане дозволимо „те објавинен пе цртиме слике, електронска публикацие, анава хем знакија сој заштитиме, музика, слике, видео или статие тари акаја страница ко Интернет (ки било која интернет-страница, страница делибаске фајлија, страница делибаске видеоматеријалија или социјална мреже)“. Соске ваљани те овел асавко правило?

Са со иси ко амаре интернет-странице тано заштитимо авторска правенцар. Акава тано важно соске аѓаар нане те користинен пе ко погрешно начин. Несаве отпадникија хем јавера противникија понекогаш чхивена амаре публикацие ко ленгере интернет-странице те шај те привлечинен е Јеховаскере сведокон хем е јаверен. Ама, ко адала странице иси материјали кова со чхивела сумње е манушенге ки годи (Пс. 26:4; Изр. 22:5). Јавера користинѓе амаро знако jw.org или материјали таро амаре публикацие ко рекламе, ко апликацие башо мобилна уредија хем ко производија бикибаске. Ама, адалеске со амаро материјали хем амаро знако тане заштитиме законеа, шај те џа ко судо хем те чхинава лен те на керен аѓаар (Изр. 27:12). Ама, ако свесно мукхаја е манушенге, чак амаре пхраленге, те објавинен амаре публикацие ко јавера интернет-странице или те користинен о заштитимо знако jw.org те шај те бикинен несаве производија, о судие нане те поддржинен амен кеда мангаја те чхинава е противникон хем е јаверен те керен адава.

Опасно тано ако пераваја амаре публикацие таро јавера тхана освен тари jw.org. О Јехова дела амен духовно храна само преку о „верно хем разборито робо“ (Мат. 24:45). Адава „робо“ дела духовно храна само преку о официјална интернет-странице — www.pr418.com, tv.pr418.com хем wol.pr418.com. Исто аѓаар, иси амен само трин официјална апликацие башо мобилна уредија — JW Language^®, JW Library^® хем JW Library Sign Language^®. Ко акала странице хем апликацие, нане те аракха рекламе или било со таро е Сатанаскоро свето. Ама, ако и духовно храна лаја ла таро јавер тхан, нане гаранција кај нане те овел меними ко несаво начин (Пс. 18:26; 19:8).

Освен адава, ако чхиваја амаре публикацие ко интернет-странице коте со шај те коментаринел пе, адава дела прилика е отпадникон хем е јаверен те критикујнен е Јеховаскере организација. Несаве пхраља почминѓе те акошен пе адале манушенцар ко Интернет, ама адава анѓа панда побари лаџ е Јеховаске. Асавке дискусие ко Интернет нане о исправно начин те менина некаскоро размислување хем те поможина леске те хаљовел о чачипе (1. Тим. 6:3-5; 2. Тим. 2:23-25). Исто аѓаар, несаве мануша керѓе ховавне профилија ко социјална мреже хем ховавне интернет-странице ко анав е организацијаке хем ко анав е пхраленгоро таро Водечко тело. Ама, нијекх члени таро Водечко тело нане ле пли интернет-страница, или профили ки несави социјално мрежа.

Кеда вакераја е манушенге те џан ки jw.org, поможинаја те ширинел пе „о шукар хабери“ (Мат. 24:14). Амаре интернет-странице хем апликацие овена са пошукар. Мангаја саринен те овел лен корист лендар. Адалеске, шај преку мејл те бичхала публикацие ко електронско формати или линк таро материјали кова со аракхљовела ки jw.org. Адалеа со вакераја е манушенге те џан ко амаре официјална интернет-странице, поврзинаја лен е единствено каналеа преку кова со о Јехова дела духовно храна — „о верно хем разборито робо“.