1. Ко саве начинија шај те соработина е Јеховаја?

КЕДА о Јехова створинѓа е манушен, ов мангља ола те овен лескере соработникија. Иако авдиве о мануша нане совршена, о верна слуге е Девлескере шај понадари да секова диве те соработинен е Јеховаја. На пример, амен сием „е Девлескере соработникија“ кеда проповединаја о шукар хабери хем кеда поможинаја е манушенге те овен е Девлескере слуге (1. Кор. 3:5-9). Чаче тани бари чест со о семоќно Створители биринѓа амен те кера јекх асавки бут важно задача! Ама, о проповедибе нане о единствено начин сар шај те соработина е Јеховаја. Ки акаја статија ка дикха сар кераја адава кеда поможинаја амаре фамилијаке хем е јаверенге ко собрание, кеда сием гостопримлива, кеда чхиваја амен ко располагање те поможина ки организација хем кеда служинаја ки побари мера (Кол. 3:23).

2. Соске никогаш на ваљани те споредина адава со кераја амен башо Јехова адалеа со керена о јавера?

² Џикоте проучинаја акаја статија, важно тано те на бистра кај секова јекх амендар тано различно. Амаре берша, о састипе, о околностија хем о способностија нане иста.  Адалеске, ма споредин адава со ту шај те кере башо Јехова адалеа со о јавера шај те керен. О апостол Павле пишинѓа: „Секова мануш ваљани те испитинел пле постапке хем тегани ка овел ле причина те овел бахтало башо буќа со керела лен ов, а на адалеске со спорединела пе е јаверенцар“ (Гал. 6:4).

3. Соске шај те вакера кај секој со грижинела пе пле фамилијаке соработинела е Девлеа?

³ О Јехова аџикерела амендар те грижина амен амаре фамилијаке. На пример, шај кереа бути те шај те грижине тут башо материјална потребе тле фамилијакере. Бут даја ачховена кхере те шај те аракхен пумаре тикне чхавен. А кеда амаре родителија нашти више те грижинен пе коркори песке, шај амен ка ваљани те грижина амен ленге. Акала буќа тане бут важна. И Библија вакерела: „Ако некој на грижинела пе башо пле, а посебно башо пле кхерутне, ов откажинѓа пе тари вера хем полошно тано таро мануш сој бизи вера“ (1. Тим. 5:8). Ако иси тут фамилијарна обврске, веројатно нашти те кере ки служба башо Јехова добором кобор со би мангеа те кере. Ама, ма обесхрабрин тут! О Јехова тано задоволно кеда грижинеа тут тле фамилијаке (1. Кор. 10:31).

4. Сар шај о родителија те чхивен о Царство ко прво тхан, хем саве резултатија шај те овен таро адава?

⁴ О родителија соработинена е Јеховаја аѓаар со поможинена пумаре чхавенге те чхивен песке духовна целија. Бут родителија керѓе акава. Адалеске, пало несаво време ленгере чхаве хем чхаја одлучинѓе те служинен е Јеховаске ки полновремено служба, чак дур таро пле кхера. Несаве тане мисионерија, јавера служинена сар пионерија коте со иси побари потреба таро објавителија, а несаве служинена ко Бетел. Џанѓола пе, кеда о чхаве тане дур кхералдан, о родителија нашти те накхен ленцар добором време кобор со би мангена сине. Ама, ола нане себична хем поттикнинена пумаре чхавен понадари да те служинен е Јеховаске било коте те овен. Соске? Ола тане бут бахтале со ленгере чхаве чхивена е Јехова ко прво тхан ко пумаро живото (3. Јов. 4). Бут џене таро адала родителија осетинена пе сар и Ана која со вакерѓа кај денѓа е Јеховаске сар поклон пле чхаве е Самоиле. Ленге тани бари чест со шај ко асавко начин те соработинен е Јеховаја (1. Сам. 1:28).

5. Сар шај те поможине е пхраленге хем е пхењенге ко тло собрание? (Дикх и слика ко почеток тари статија.)

⁵ Ако нане тут бут фамилијарна обврске, шај ли те поможине е пхраленге хем е пхењенге сој тане насвале, пхуре или иси лен јавере потребе? Или, шај ли те поможине околенге со грижинена пе ленге? Размислин каске таро тло собрание ваљани асавки помош. На пример, шај несави пхен грижинела пе башо пло пхуро родители. Шај ли понекогаш те ачхове лакере родителеа џикоте ој завршинела несаве јавера буќа? Или, шај ли те поможине некаске аѓаар со ка нудине тут те ингаре ле ко состанокија, ки дуќана, или ки болница те посетинел некас? Ако кереа адава, тегани шај соработинеа е Јеховаја те одговоринел ки некаскири молитва. (Читин 1. Коринќаните 10:24.)

6. Сар шај те ова гостопримлива?

⁶ Е Девлескере соработникија тане пенџарде пали пли гостопримливост.  Ки Библија, о грчко лафи баши „гостопримливост“ значинела „љубезност спрема о јабанџие“ (Евр. 13:2). Ко е Девлескоро Лафи шај те аракха примерија башо адава сар те сикава асавки љубезност (1. Мој. 18:1-5). Амен шај хем ваљани те поможина е јаверенге кеда ка овел амен прилика башо адава, бизи разлика дали тане амаре пхраља или на (Гал. 6:10).

7. Кола берекетија шај те овен амен ако сикаваја гостопримство е полновремена слугенге?

⁷ Шај ли те соработине е Јеховаја аѓаар со ка сикаве гостопримство е полновремена слугенге со авена те посетинен тло собрание? (Читин 3. Јованово 5, 8.) Кеда кераја аѓаар, хем лен хем амен ка овел амен корист. И Библија вакерела кај ко асавке прилике шај „заедно те охрабрина амен“ (Рим. 1:11, 12). Размислин башо пример јекхе пхралескоро кова со викинела пе Олаф. Кеда сине терно, јекх покраинско надгледнико со на сине прандимо ало те посетинел лескоро собрание. Ама, нијекх таро собрание нашти сине те нудинел леске тхан сојбаске. О Олаф пучља пле родителен, кола со на сине Сведокија, дали ка шај о покраинско надгледнико те совел ки ленде кхере. Ола вакерѓе кај шај, ама о Олаф ваљани сине те совел ко каучуко. Иако на сине леске удобно те совел ко каучуко, о Олаф никогаш на жалинѓа башо адава. Ов накхља песке бут шукар адава курко е покраинско надгледникоја! Ола уштена сине рано секова сабајле хем керена сине лафи башо бут интересна теме џикоте хана сине сабалуко. О покраинско надгледнико охрабринѓа ле добором бут со одлучинѓа те почминел полновремено службаја. Ко 40 берша со накхле, о Олаф служинѓа сар мисионери ко некобор пхувја.

8. Соске ваљани те ова љубезна чак ако о јавера ко почеток нане благодарна? Вакер пример.

⁸ Иси бут начинија сар шај те сикава мангипе е јабанџиенге, чак ако ко почеток нане благодарна. На пример, јекх пхен ки Шпанија проучинела сине и Библија е Џесикаја, јекх џувли таро Еквадор. Јекх диве џикоте проучинена сине, и Џесика почминѓа те ровел. Кеда и пхен пучља ла соске ровела, и Џесика вакерѓа лаке кај сине бут чороли англедер те авел ки Шпанија. Јекх диве чак на сине ла со те дел пле чхајаке те хал. Сине ла само пани. Џикоте пробинела сине те совљарел пле бебе и Џесика молинѓа е Девле те поможинел ла. Кратко пало адава, дуј пхења посетинѓе ла хем денѓе ла списание. Ама, ој понашинѓа пе грубо ленцар, пхаравѓа о списание хем вакерѓа ленге: „Акава ли те дав ме чхајаке те хал?“ О пхења пробинѓе те утешинен ла, ама и Џесика на мангља те шунел. Пало адава, о пхења мукхле јекх корпа хајбаја англо лакоро удар. Џикоте проучинела сине е пхењаја ки Шпанија, и Џесика почминѓа те ровел соске халили кај на мангља те дикхел сар о Девел одговоринѓа ки лакири молитва. Ама акана, и Џесика сине одлучно те служинел е Јеховаске. И дарежливост е дује пхењенгири чаче анѓа шукар резултатија (Проп. 11:1, 6).

9, 10. а) Кола прилике сине е Израелцон те чхивен пе ко располагање те поможинен? б) Сар шај о пхраља авдиве те поможинен ко собрание?

⁹ Ко пурано време, е Израелцон сине лен бут прилике те чхивен пе ко располагање те поможинен (2. Мој. 36:2; 1. Лет. 29:5; Неем. 11:2). Авдиве, туте да иси тут прилике те користине тло време, тле средствија хем тле способностија те шај те поможине е пхраленге хем е пхењенге. Ако кереа адава, ка ове бут бахтало хем о Јехова ка дел тут берекетија.

¹⁰ Е Девлескоро Лафи поттикнинела е пхрален ко собрание те соработинен е Јеховаја аѓаар со ка служинен е јаверенге сар слуга-помошникија хем старешине (1. Тим. 3:1, 8, 9; 1. Пет. 5:2, 3). Асавке пхраља поможинена е јаверенге ки служба башо Јехова хем ко јавера начинија (Дела 6:1-4). Дали о старешине замолинѓе тут те служине сар редари или те поможине ки литература, ко подрачја, те одржинел пе и дворана или нешто јавер? О пхраља кола со поможинена ко асавке начинија вакерена кај адава керела лен бут бахтале.

11. Саве берекетија добинѓа јекх пхен која со поможинела ко градежна проектија?

¹¹ Окола сој доброволција ко градежна проектија овена лен неве амала. Јекх пхен со викинела пе Марџи 18 берш више поможинела те градинен пе дворане. Џикоте трајнена адала проектија, ој посебно трудинела пе те сикавел внимание е терне пхењенге хем те поможинел лен те овен обучиме. Ој вакерела кај акала проектија тане бут шукар прилика о доброволција те охрабринен пе јекх јекхеа (Рим. 1:12). Уствари, кеда сине ла пхаре моментија ко живото, о амала со сине ла таро асавке проектија бут охрабринѓе ла. Дали некогаш сиан сине доброволцо ко несаво градежно проекти? Шај те поможине ко  несаво проекти чак ако нане тут посебна вештине.

12. Сар шај те поможине околенге со сине погодиме тари несави катастрофа?

¹² Исто аѓаар шај те соработина е Јеховаја кеда поможинаја амаре пхраленге пали несави природно катастрофа. На пример, шај те да паре (Јован 13:34, 35; Дела 11:27-30). Јавер начин сар шај те поможина тано аѓаар со ка чистина или ка поправина о објектија. И Габриела, јекх пхен тари Полска колакоро кхер сине бут оштетимо тари јекх поплава, сине бахтали кеда але те поможинен ла о пхраља таро собранија со сине паше. Кеда размислинела башо адава со уло, ој вакерела кај на секиринела пе башо материјална буќа со нашавѓа, него мислинела ко адава со добинѓа. Ој вакерела: „Акава искуство панда повише уверинѓа ман кај тани бут бари чест те овел пе дело таро христијанско собрание хем адава анела манге баро бахталипе хем задоволство“. Бут џене со добинѓе помош пали несави катастрофа осетинена пе исто сар акаја пхен. А окола со соработинена е Јеховаја аѓаар со поможинена адале пхраленге тане бут бахтале хем задоволна. (Читин Дела 20:35; 2. Коринќаните 9:6, 7.)

13. Сар бајрола амаро мангипе башо Јехова кеда чхиваја амен ко располагање те поможина? Вакер пример.

¹³ Јекх пхен со викинела пе Стефани хем јавера објавителија соработинѓе е Девлеа аѓаар со поможинѓе е Сведоконге кола со нашле ки Америка адалеске со сине војна ки ленгири пхув. Ола поможинѓе адале избеглиценге те аракхен тхан живибаске хем те овел лен мебел. Ој вакерела: „Бут сием сине погодиме кеда дикхлем кобор сине бахтале хем благодарна башо мангипе со сине ленге сикавдо таро пхраља ко цело свето. Адала фамилие мислинена кај амен поможинѓем ленге, ама уствари ола бут повише поможинѓе аменге. Ленгоро мангипе, јекхипе, вера хем доверба ко Јехова чаче керена зорало амаро мангипе башо Јехова, хем поттикнина амен панда повише те ценина са адава со добинаја ле преку амари организација“.

14, 15. а) Саво стави сине е пророко е Исаија? б) Сар шај е Девлескере слуге авдиве те сикавен исто стави сар о Исаија?

¹⁴ Мангеа ли панда повише те соработине е Јеховаја? Сиан ли спремно те селине тут ко тхана коте со ваљанена повише објавителија? Џанѓола пе, те шај те ова дарежлива на ваљани те селина амен ко јавер тхан. Ама о околностија несаве пхраленгере хем пхењенгере дозволинена ленге те служинен дур кхералдан. Лен иси лен исто стави сар о пророко о Исаија. Кеда о Јехова пучља:  „Кас те бичхалав? Кој ка џал баши аменде?“, о Исаија вакерѓа: „Аке сиум ме! Бичхал ман!“ (Иса. 6:8). Дали сиан спремно хем дали иси тут можност те поможине ки е Јеховаскири организација? Кола тане несаве начинија сар шај те поможине?

¹⁵ Башо проповедибе хем керибе ученикија о Исус вакерѓа: „И жетва тани бари, а работникија иси хари. Адалеске, молинен е Господаре е жетвакоро те бичхалел работникија ки пли жетва“ (Мат. 9:37, 38). Шај ли те служине сар пионери коте со иси потреба таро повише објавителија? Или, шај ли те поможине јавереске те керел адава? Бут пхраља хем пхења мислинена кај најшукар начин сар те сикавен мангипе е Девлеске хем е пашутненге тано аѓаар со ка служинен сар пионерија ко тхана коте со иси потреба таро повише објавителија. Шај ли те сетине тут ко јавера да начинија сар шај те служине ки побари мера? Ов уверимо кај адава ка анел туке бут берекетија.

16, 17. Ко саве јавера начинија шај те служине е Јеховаске ки побари мера?

¹⁶ Дали сиан спремно те служине ко Бетел или те поможине ки изградба, шај сар привремено доброволцо или аѓаар со ка поможине јекх или повише диве ко курко? Ки е Јеховаскири организација секогаш ваљанена мануша кола сој спремна те служинен сегде коте со иси потреба хем кола сој спремна те керен било со те родел пе лендар, чак кеда иси лен вештине или искуство баши јавер бути. О Јехова ценинела секас сој спремно те керел жртве хем те служинел адари коте со иси потреба (Пс. 110:3).

¹⁷ Мангеа ли те добине повише обука те шај те служине е Јеховаске ки побари мера? Ако тано аѓаар, шај те де молба баши Школа башо полновремена објавителија. Ки акаја школа духовно зрела пхраља хем пхења кола со више тане ки полновремено служба добинена обука те шај е Јеховаскири организација те користинел лен ки панда побари мера. Окола со џана ки акаја школа ваљани те овен спремна те служинен сегде коте со ка овен бичхалде. Дали сиан спремно ко акава начин те кере повише е Јеховаске? (1. Кор. 9:23).

18. Саве берекетија иси амен адалеске со секова диве соработинаја е Јеховаја?

¹⁸ Сар слуге е Јеховаскере, амен сием поттикниме секова диве те ова дарежлива, шукар хем љубезна е јаверенцар. Акава анела аменге бахталипе, мир хем задоволство (Гал. 5:22, 23). Бизи разлика саве тане тле околностија, ка ове бахтало са џикоте трудинеа тут те ове дарежливо сар о Јехова хем сиан лескоро скапоцено соработнико! (Изр. 3:9, 10).