1. Сави желба иси амен баши амари фамилија?

ЈЕКХ пхен со викинела пе Паулина * вакерела: „Панда кеда дознајнѓум о чачипе, мангљум сарине тари мли фамилија те овен манцар ко рај. Посебно мангљум мо ром о Вејн хем амаро чхаво те служинен е Јеховаске“. Дали иси некој ки тли фамилија со панда на запознајнѓа е Јехова хем на замангља ле? Исто сар и Паулина, веројатно ту да мангеа секова јекх тари тли фамилија те почминел те служинел е Јеховаске заедно туја.

2. Башо кола пучиба ка кера лафи ки акаја статија?

² Нашти силаја те терина амаре фамилија те прифатинел о шукар хабери, ама шај те поможина лаке те овел поспремно те шунел о хабери таро е Девлескоро Лафи (2. Тим. 3:14, 15). Соске ваљани те сведочина амаре фамилијаке? Соске ваљани те сикава кај хаљоваја сар осетинела пе? Сар шај те поможина амаре фамилијаке те мангел е Јехова исто сар аменде? Хем сар шај са амаре пхраља хем пхења таро амаро собрание те поможинен аменге ко адава?

3. Спрема 2. Петрово 3:9, соске ваљани те сведочина амаре фамилијаке?

³ Панда хари, о Јехова ка анел крајо акале светоске. Ка ачховен само окола со „исправно дикхена ко вечно живото“ (Дела 13:48). Амен трошинаја бут време хем сила те проповедина е манушенге со на пенџараја лен, адалеске нормално тано те манга амари фамилија да те служинел е Јеховаске заедно аменцар. Амаро мангло Дад о Јехова  „на мангела никој те овел уништимо, него саринен те овел лен прилика те каинен пе“. (Читин 2. Петрово 3:9.)

4. Која грешка шај кераја џикоте сведочинаја амаре фамилијаке?

⁴ На ваљани те бистра кај о шукар хабери шај те вакера ле ко исправно или ко погрешно начин. Кеда сведочинаја е манушенге со на пенџараја лен, трудинаја амен те ова тактична, ама кеда кераја лафи амаре фамилијаја шај сием бут директна.

5. Со на ваљани те бистра англедер те сведочина амаре фамилијаке?

⁵ Кеда размислинаја башо прво пути кеда пробинѓем те сведочина амаре фамилијаке, буте џененге амендар шај тано жал башо начин сар керѓем адава хем би мангаја те постапина сине појавер. О апостол Павле советинѓа е христијанен: „Сар о лон со керела о хајбе вкусно, аѓаар тумаро лафи секогаш те овел љубезно те шај те овел пријатно е јаверенге, те џанен секаске те одговоринен сар со ваљани“ (Кол. 4:5, 6). Шукар тано те на бистра акава совет кеда кераја лафи амаре фамилијаја. Ако на кераја аѓаар шај те вреџина лен наместо те поможина ленге те шунен амен.

6-7. Вакер пример кова со сикавела кај тано важно е Девлескере слуге те сикавен кај хаљовена пле брачно партнере со на служинела е Јеховаске.

⁶ Сикав кај хаљовеа сар осетинела пе. И Паулина со спомнинѓем ла англедер, вакерела: „Ко почеток мангава сине те керав лафи ме ромеа само башо Девел хем баши Библија. Скоро никогаш на кераја сине лафи башо јавера буќа“. Ама о Вејн, о ром е Паулинакоро, на џанела сине бут баши Библија хем нашти сине те хаљовел башо со керела сине лафи ој. Леске дикхјола пе сине кај ој мислинела само баши пли религија. Дарала сине кај лескири ромни тани заведими тари несави опасно секта.

 ⁷ И Паулина признајнела кај јекх периоди накхела сине бут време е пхраленцар хем е пхењенцар — ко собрание, ки служба хем ко дружибе. Ој вакерела: „Понекогаш, кеда авела сине о Вејн кхере, осетинела пе сине коркори соске никој на сине кхере“. Нормално тано адава со о Вејн мангела сине лескири ромни хем лескоро чхаво те накхен повише време леа. Ов на пенџарела сине пле ромњакере неве амален хем мислинела сине кај уле лаке поважна лестар. Адалеске, о Вејн заканинѓа пе лаке кај ка развединел пе латар. Со мислинеа, ко саве начинија шај сине и Паулина те сикавел пле ромеске кај хаљовела сар осетинела пе?

8. Спрема 1. Петрово 3:1, 2, со шај те мукхел најбаро впечаток амаре фамилијаке?

⁸ Ов шукар пример тле понашибаја. Бут пути адава со кераја мукхела побаро впечаток амаре фамилијаке него адава со вакераја. (Читин 1. Петрово 3:1, 2.) Сар со накхела сине о време и Паулина халили акаја бути. Ој вакерела: „Џанљум кај о Вејн бут мангела амен хем кај на мангела сине чаче те развединел пе мандар. Ама лескири закана теринѓа ман те хаљовав кај мора те почминав те керав о буќа сар со мангела о Јехова. Наместо само те керав лафи, ваљани сине те дав шукар пример мле понашибаја“. И Паулина чхинавѓа те теринел пле роме те керен лафи баши Библија хем почминѓе те керен лафи башо јавера буќа. О Вејн дикхља кај ој ули покротко хем кај ленгоро чхаво уло пољубезно хем попослушно (Изр. 31:18, 27, 28). Кеда о Вејн дикхља кобор шукар влијајнена о поуке тари Библија упри лескири фамилија, ов сине поспремно те шунел повише башо хабери таро е Девлескоро Лафи (1. Кор. 7:12-14, 16).

9. Соске на ваљани те чхинава те поможина амаре фамилијаке?

⁹ Ма чхинав те поможине тле фамилијаке те прифатинел о чачипе. О Јехова дела амен  шукар пример. Ов никогаш на чхинавѓа те дел е манушенге прилика те прифатинен о шукар хабери хем те добинен вечно живото (2. Лет. 36:15). О апостол Павле да вакерѓа е Тимотееске понадари да те трудинел пе те поможинел е јаверенге. Соске? Адалеске со аѓаар ка спасинел хем пес хем адален со шунена ле (1. Тим. 4:16). Амен мангаја амаре фамилија хем адалеске мангаја те џанел о чачипе таро е Девлескоро Лафи. Пало несаво време, о лафија хем о понашибе е Паулинакоро сине лен шукар влијание упри лакири фамилија. Акана тани бахтали со шај те служинел е Јеховаске заедно пле ромеа. О солдуј џене тане пионерија хем о Вејн служинела сар старешина.

10. Соске ваљани те ова стрплива?

¹⁰ Ов стрпливо. Кеда почминѓем те живина аѓаар сар со мангела о Девел, керѓем промене ко амаро живото хем ко амаре верувања. Амаре фамилијаке шај те овел пхаро те прифатинел адала промене. Бут пути, и прво бути со приметинела тани кај на славинаја више празникија хем кај на учествујнаја ко политичка активностија. Ко почеток, некој тари амари фамилија шај те хољанел аменге (Мат. 10:35, 36). Ама, на ваљани те мислина кај ола никогаш нане те менинен пе. Ако чхинаваја те поможина ленге те хаљовен ко со верујнаја, адалеа уствари, судинѓем ленге кај нане достојна те добинен вечно живото. О Јехова на денѓа амен задача те судина — адаја одговорност денѓа ла е Исусеске (Јован 5:22). Ако сием стрплива, сар со накхела о време амари фамилија шај те овел спремно те шунел о шукар хабери. (Дикх и рамка „ Користин амари интернет-страница те сведочине“.)

11-13. Со сикљовеа таро начин сар и Алиса постапинѓа пле родителенцар?

¹¹ Ов цврсто ама тактично (Изр. 15:2). Те дикха о пример јекхе пхењакоро со викинела пе Алиса. Ој дознајнѓа башо Јехова кеда живинела сине дур таро пле родителија кола со на верујнена сине ко Девел хем сине активно вклучиме ки политика. Ој халили кај ваљани со посигате те вакерел ленге башо шукар буќа со сикљола. Ој вакерела: „Кобор повише аџикереа те вакере е јаверенге тари тли фамилија башо тле неве верувања, добором повише ка овен вознемириме“. И Алиса пробинѓа те аракхел теме кола со ка интересинен лакере родителен. Пало адава пишинела ленге сине писмија коленде со пхенела со вакерела и Библија башо несаве таро адала теме сар сој, башо мангипе хем пучела лен сине со мислинена ола (1. Кор. 13:1-13). Ој благодаринела ленге сине башо адава со шукар воспитинѓе ла хем со грижинѓе пе лаке, хем бичхалела ленге сине поклонија. Кеда џала сине кхере те дикхел лен, керела сине са со шај те поможинел пле дајаке околу о кхер. Ко почеток, лакере родителија на сине бут бахтале кеда ој вакерѓа ленге башо пле неве верувања.

¹² Кеда сине кхере пле родителенцар, и Алиса понадари да читинела сине и Библија секова диве. Ој вакерела: „Адава поможинѓа ме дајаке те хаљол кобор манге важно и Библија“. Ко адава време, лакоро дад одлучинѓа те сикљол нешто повише баши Библија те шај те хаљол соске лескири чхај менинѓа пле верувања. Исто аѓаар, мангља те аракхел грешке ки Библија. И Алиса вакерела: „Денѓум ле Библија колате со пишинѓум некобор лафија со ка ресен џи ко лескоро вило“. Саво сине о резултати? Наместо те аракхел грешке, лакере даде бут погодинѓа ле адава со читинѓа ко е Девлескоро Лафи.

¹³ Ваљани те ова цврста ама тактична, чак кеда тани испитими амари вера (1. Кор. 4:12б). На пример, и Алиса доживинѓа противибе тари пли дај. Ој вакерела: „Кеда крстинѓум ман, ми дај вакерѓа манге кај на мангава ла“. Со керѓа и Алиса? „На избегинава сине те керав лафи баши мли вера, ама шукарипаја објаснинѓум кај одлучинѓум те овав е Јеховаскоро сведоко хем кај ка ачховав ки мли  одлука. Пробинѓум те уверинав ме даја кај бут мангава ла. О солдуј џене рунѓем, а пало адава керѓум лаке шужо хајбе. Оттегани ми дај почминѓа те хаљол кај и Библија поможинела манге те овав пошукар личност“.

14. Соске никогаш на ваљани те мукха амари фамилија те менинел амари одлука те служина е Јеховаске?

¹⁴ Шај ка ваљани те накхел време те шај амари фамилија целосно те хаљол кобор аменге важно те служина е Јеховаске. На пример, кеда и Алиса одлучинѓа те служинел сар пионери наместо те џал ки побари школа, нешто со лакере родителија мангле ој те керел, лакири дај палем рунѓа. И Алиса вакерела: „Ако мукхеа тли фамилија те убединел тут те менине несави одлука, ој веројатно ка пробинел те влијајнел упро тле јавера да одлуке. Ама, ако сиан љубезно, а сепак цврсто, некој тари фамилија шај ка овел поспремно те шунел тут кеда сведочинеа леске“. Баш акава доживинѓа и Алиса. Акана лакере родителија тане пионерија хем лакоро дад служинела сар старешина.

15. Спрема Матеј 5:14-16 хем 1. Петрово 2:12, сар о шукар буќа со керена о јавера шај те поможинен амаре фамилијаке?

¹⁵ Преку о „шукар буќа“ со керена лескере слуге, о Јехова привлечинела е манушен ки песте. (Читин Матеј 5:14-16; 1. Петрово 2:12.) Ако тло брачно партнери нане е Јеховаскоро сведоко, дали запознајнѓан ле више некасаја таро тло собрание? И Паулина кола со спомнинѓем ла англедер, канинѓа пхрален хем пхењен ко гостија те шај лакоро ром о Вејн пошукар те запознајнел лен. Ов сетинела пе сар јекх пхрал поможинѓа леске те хаљол саве тане чаче е Јеховаскере сведокија. О Вејн вакерела: „О пхрал леља слободно диве  тари бути само те шај те дикха спортско натпревар. Тегани мислинѓум манге: ’Па акава мануш нане фанатико!‘“

16. Соске ваљани те канина амаре фамилија те авел ко амаре состанокија?

¹⁶ Јекх бут шукар начин сар шај те поможина е јаверенге тари амари фамилија тано аѓаар со ка канина лен те авен аменцар ко амаре состанокија (1. Кор. 14:24, 25). О прво состанок ко кова со гело о Вејн сине и Спомен-свеченост соске икерѓа пе акшамеске пали бути хем сине релативно кратко. Ов вакерела: „На халиљум бут буќа таро говор, ама сиум сине воодушевимо таро мануша. Ола авена сине ки манде, љубезно поздравинена пе сине манцар хем доџакерѓе ман шукар. Дикхљум кај тане шукар мануша“. Јекх брачно пари, о Филип хем и Симона, посебно поможинена сине е Паулинаке аѓаар со грижинена пе сине лакере чхавеске ко состанокија хем ки служба. Адалеске, кеда о Вејн одлучинѓа те џанел нешто повише башо е Паулинакере неве верувања, ов замолинѓа е Филипе те проучинел и Библија леа.

17. а) Башо со на ваљани те кривина амен? б) Соске на ваљани те чхинава те поможина амаре фамилијаке?

¹⁷ Надинаја амен кај сарине тари амари фамилија ка прифатинен о чачипе хем ка почминен те служинен е Јеховаске заедно аменцар. Ама, бизи разлика кобор трудинаја амен те поможина ленге те служинен е Девлеске, ола шај нане те прифатинен о чачипе. Ко адава случај на ваљани те мислина кај амен сиен крива башо адава. Уствари, нашти никас те чхива силаја те прифатинел амаре верувања. Сепак, кеда тли фамилија ка дикхел кобор сиан бахтало адалеске со служинеа е Јеховаске, адава шај позитивно те влијајнел упри лате. Молин тут баши тли фамилија. Тактично кер ленцар лафи. Ма чхинав те поможине тле фамилијаке! (Дела 20:20). Ов уверимо кај о Јехова ка дел тут берекети адалеске со трудинеа тут. Хем ако тли фамилија одлучинела те шунел тут, ка овел спасими!