1. Кој поможинѓа те керел пе о нево собрание ко Филипи?

КЕДА о апостол Павле, о Сила, о Лука хем о Тимотеј ресле ки диз Филипи, адари аракхле буте манушен со интересинѓе пе башо шукар хабери. Акала штар ревна пхраља поможинѓе адари те керел пе собрание хем о неве пхраља хем пхења веројатно почминѓе те кхеден пе ко кхер е Лидијакоро, која со сине бут гостопримливо пхен (Дела 16:40).

2. Саве пхаре ситуацијаја соочинѓа пе адава собрание?

² Пало кратко време о нево собрание соочинѓа пе пхаре ситуацијаја. О Сатана поттикнинѓа е манушен со мрзинена сине о чачипе те противинен пе бут башо проповедибе акале верна христијаненгоро. О Павле хем о Сила сине астарде, марде каштенцар хем фрдиме ко затвор. Откеда сине мукхле таро затвор, ола посетинѓе е неве ученикон хем охрабринѓе лен. Пало адава, о Павле, о Сила хем о Тимотеј геле песке тари диз, а о Лука веројатно ачхило адари. Со случинѓа пе е неве собраниеа? О Јехова поможинѓа ленге пле духоја хем ола понадари да ревно служинѓе леске (Фил. 2:12). Е Павле сине ле шукар причина те дичинел пе ленцар!

3. Спрема Филипјаните 1:9-11, башо со молинѓа пе о Павле?

³ Околу деш берш покасно, о Павле пишинѓа писмо е собраниеске ко Филипи. Џикоте читинеа адава писмо шај јасно те дикхе кобор баро мангипе сине е Павле спрема о пхраља хем о пхења. Ов пишинѓа ленге: „Фалинена манге сарине бут, мангава тумен исто сар со мангела тумен о Христос Исус“ (Фил. 1:8). Исто аѓаар,  вакерѓа ленге кај молинела пе баши ленде. Молинела сине е Јехова те поможинел ленге ленгоро мангипе са повише те бајрол, те шај те проценинен сој тано најважно, те овен бизи маана, те на сопкинен е јаверен хем понадари да те керен праведна буќа. Амен да авдиве шај бут те сикљова таро е Павлескере охрабрувачка лафија. (Читин Филипјаните 1:9-11.) Ки акаја статија ка дикха подетално акала советија хем ка дикха сар шај те применина лен.

4. а) Спрема 1. Јованово 4:9, 10, сар сикавѓа о Јехова пло мангипе спрема аменде? б) Кобор ваљани те манга е Девле?

⁴ О Јехова сикавѓа пло баро мангипе спрема аменде адалеа со бичхалѓа пле Чхаве ки Пхув те мерел башо амаре гревија. (Читин 1. Јованово 4:9, 10.) Е Девлескоро несебично мангипе поттикнинела амен те манга ле (Рим. 5:8). Кобор ваљани те манга е Јехова? О Исус одговоринѓа ко акава пучибе кеда вакерѓа јекхе фарисееске: „Манг е Јехова, тле Девле, са тле вилеа, са тле душаја хем са тле гоѓаја“ (Мат. 22:36, 37). Ваљани те манга е Девле цело вилеа хем адава мангипе ваљани секова диве те бајрол са повише. О Павле вакерѓа е Филипјаненге кај ленгоро мангипе ваљани „са повише хем повише те бајрол“. Тегани, сар шај амен те бајрара амаро мангипе спрема о Девел?

5. Сар шај амаро мангипе са повише те бајрол?

⁵ Те шај те манга е Девле, мора шукар те пенџара ле. Ки Библија пишинела: „Кој на сикавела мангипе на пенџарела е Девле, соске о Девел тано мангипе“ (1. Јов. 4:8). О апостол Павле објаснинѓа кај кобор повише џанаја о чачипе башо Девел хем хаљоваја сар дикхела ко буќа добором повише ка бајрол амаро мангипе спрема лесте (Фил. 1:9). Кеда почминѓем те проучина и Библија, заманглем е Јехова иако на џанаја сине бут баши лесте. Ама, сар со накхела сине о време кобор повише сикљоваја сине башо Јехова добором повише бајрола сине амаро мангипе спрема лесте. Адалеске тано бут важно редовно те проучина е Девлескоро Лафи хем хор те размислина баши лесте! (Фил. 2:16).

6. Спрема 1. Јованово 4:11, 20, 21, ко со поттикнинела амен амаро мангипе спрема о Девел?

⁶ О баро мангипе со иси ле е Девле спрема аменде поттикнинела амен те манга амаре пхрален хем пхењен. (Читин 1. Јованово 4:11, 20, 21.) Шај мислинаја кај ка овел аменге локхо те манга лен адалеске со служинаја е Јеховаске хем трудинаја амен те ова сар лесте. Исто аѓаар, џаја пало е Исусескоро пример кова со добором бут мангља амен со денѓа пло живото аменге. Сепак, понекогаш шај те овел аменге пхаро те шуна и заповед те манга амен јекх јекхеа. Те дикха јекх пример таро собрание ко Филипи.

7. Со сикљоваја таро е Павлескоро совет со денѓа ле е Еводијаке хем е Синтихијаке?

⁷ И Еводија хем и Синтихија сине ревна пхења кола со соработинена сине ки служба е Павлеа. Ама, шај адале пхењен несаво време сине лен сериозно проблеми машкар ленде кова со керѓа те руминен пло амалипе. Ко писмо со бичхалѓа ле ко собрание коте со служинена сине акала дуј пхења, о Павле спомнинѓа ленгере анава хем денѓа лен конкретно совет „те овен лен иста мисле“ (Фил. 4:2, 3). О Павле мислинѓа кај мора исто аѓаар те вакерел цело собраниеске да: „Керен са бизо те жалинен тумен хем те акошен тумен“ (Фил. 2:14). Сигурно, акала директна советија со денѓа лен о Павле поможинѓе адале верна пхењенге, ама исто аѓаар цело собраниеске да те бајрарен пло мангипе машкар песте.

8. а) Соске понекогаш шај те овел аменге пхаро те манга амаре пхрален хем пхењен? б) Со ка поможинел аменге те на шудрол амаро мангипе спрема о пхраља?

 ⁸ Аменге да понекогаш шај те овел бут пхаро те манга е пхрален хем е пхењен, соске слично сар и Еводија хем и Синтихија, обично полокхе аменге те концентририна амен ко ленгере слабостија. Сарине грешинаја секова диве. Ако размислинаја само башо е јаверенгере грешке, амаро мангипе спрема ленде ка шудрол. На пример, шај ка нервирина амен ако јекх пхрал бистрела те поможинел амен кеда чистинаја и дворана пало состанок. Ако пало адава почминаја те размислина башо са лескере јавера грешке, адава панда повише ка нервиринел амен хем амаро мангипе спрема лесте ка тикњол. Ако аракхљоваја ки слично ситуација, ка овел шукар те размислина баши акаја бути: о Јехова дикхела хем амаре хем амаре пхралескере слабостија. Ама, иако дикхела акала слабостија, ов понадари да мангела амаре пхрале, а мангела амен да. Адалеске, мангаја те сикава мангипе сар о Јехова хем те концентририна амен ко амаре пхраленгере хем пхењенгере шукар особине. Кеда таро вило трудинаја амен те манга амаре пхрален хем пхењен, кераја позорало амаро јекхипе (Фил. 2:1, 2).

9. Кола тане несаве таро најважна буќа башо кола со керѓа лафи о Павле ко пло писмо џи ко Филипјања?

⁹ О свети дух водинѓа е Павле те вакерел е пхраленге ко Филипи „те проценинен сој тано најважно“ (Фил. 1:10). Акава совет важинела аменге да авдиве. Е Девлескере слугенге, несаве таро најважна буќа тане те славинел пе е Девлескоро свето анав, те исполнинел пе лескири намера хем те овел мир хем јекхипе ко собрание (Мат. 6:9, 10; Јован 13:35). Ако акала буќа аменге ко прво тхан ко живото, сикаваја кај мангаја е Јехова.

10. Со мора те кера те шај о Јехова те дикхел ки аменде сар мануша бизи маана?

¹⁰ О Павле исто аѓаар вакерѓа кај мора те ова бизи маана. Акава на значинела кај ваљани те ова совршена. Нашти те ова совршена ки апсолутно смисла сар о Јехова. Ама о Јехова ка дикхел ки аменде сар мануша бизи маана ако даја са амендар те бајрара амаро мангипе хем ако трудинаја амен те проценина сој тано најважно. Јекх начин сар сикаваја амаро мангипе тано аѓаар со кераја са со шај те на сопкина е јаверен.

11. Соске на ваљани те сопкина е јаверен?

¹¹ О совет те на сопкина е јаверен тано бут сериозно предупредување. Сар шај те сопкина некас? Адава шај те кера адалеа сави забава ка бирина, сар ка урава амен, па чак сави бути ка кера. Шај на кераја нешто со о Јехова осудинела. Ама, ако амаре одлукаја поврединаја некаскири совест хем адалеа сопкинаја ле, тегани адаја тани сериозно бути. О Исус вакерѓа кај пошукар ка овел те обесинен аменге баро бар ки мен хем те фрден амен ко море него те сопкина некас таро лескере бакхре! (Мат. 18:6).

12. Со сикљоваја таро пример јекхе брачно парескоро сој пионерија?

¹² Приметин ко кова начин о Мартини хем и Рената *‚ брачно пари кола со служинена сар пионерија, применинѓе е Исусескере лафија. Ко ленгоро собрание сине о брачно пари о Давид хем и Сузана, кола со сигенде крстинѓе пе. Акала неве христијања бариле ки фамилија коте со сине бут строго воспитиме хем мислинена сине кај е Девлескере слуге на ваљани те џан ко кино, чак ни те дикхен филмија кола сој прифатлива е христијаненге. Адалеске сине шокириме кеда шунѓе кај о Мартини хем и Рената геле ко кино. Откеда шунѓе башо адава, о Мартини хем и Рената одлучинѓе те на џан ко  кино са џикоте о Давид хем и Сузана на обликујнена пли совест те шај пошукар те хаљовен сој исправно а сој погрешно (Евр. 5:14). Аѓаар, о Мартини хем и Рената сикавѓе кај мангена е Давиде хем е Сузана (Рим. 14:19-21; 1. Јов. 3:18).

13. Сар шај амен те ова и причина некој те керел грево?

¹³ Јавер начин сар шај те сопкина некас тано аѓаар со амен ка ова и причина некој те керел грево. Сар шај те случинел пе адава? Замислин туке акаја ситуација. Откеда јекх интересенти бут време боринѓа пе пле навикаја те пиел алкохол, ов успејнѓа те чхинавел е пијбаја. Ов хаљола кај леске тано најшукар никогаш палем те на пиел. Успејнела те керел баре промене ко пло живото хем ко крајо крстинела пе. Пало несаво време, јекх пхрал канинела ле ко бешибе хем нудинела леске алкохол. Шукар намераја о пхрал вакерела леске: „Акана сиан е Девлескоро слуга хем иси тут е Јеховаскоро духо. Јекх таро особине со авена таро свети дух тани и самоконтрола. А ако иси тут самоконтрола, на би овела туке проблеми те пие хари алкохол“. Ка овел бут тажно ако о нево пхрал шунела акава погрешно совет хем палем овела зависно таро алкохол!

14. Сар поможинена аменге о состанокија те применина о советија таро Филипјаните 1:10?

¹⁴ О состанокија поможинена аменге ко бут начинија те применина о советија таро Филипјаните 1:10. Прво, и духовно храна со добинаја ла ко состанокија поможинела аменге те хаљова сој тано најважно е Јеховаске. Дујто, шунаја сар те применина адава  со сикљоваја те шај те ова бизи маана. Хем трито, поттикнинаја амен „те сикава мангипе хем те кера шукарипе“ (Евр. 10:24, 25). Кобор повише сием охрабриме таро амаре пхраља, добором повише ка бајрол амаро мангипе спрема о Девел хем спрема амаре пхраља. Ако цело вилеа мангаја е Јехова хем амаре пхрален, ка кера са со шај те на сопкина нијекхе пхрале или пхења.

15. Со значинела те кера са повише праведна буќа?

¹⁵ О Павле таро вило молинѓа пе башо Филипјања „те керен са повише праведна буќа“ (Фил. 1:11). Сигурно, ко „праведна буќа“ сине вклучимо ленгоро мангипе спрема о Јехова хем спрема лескоро народо. Ко адава исто аѓаар сине вклучимо те вакерен е јаверенге баши пли вера ко Исус хем баши шужи надеж. Ко Филипјаните 2:15 тани користими панда јекх споредба: „Светинена сар светло ко свето“. Акаја споредба одговоринела соске о Исус башо пле ученикија вакерѓа кај тане „о светло е светоскоро“ (Мат. 5:14-16). Исто аѓаар, ов заповединѓа пле следбениконге те керен ученикија хем вакерѓа ленге: „Ка овен мле сведокија... ко најдур тхана ки пхув“ (Мат. 28:18-20; Дела 1:8). Амен кераја „праведна буќа“ кеда даја амендар са те учествујна ки акаја важно задача.

16. Сар таро Филипјаните 1:12-14 дикхјола пе кај шај те светина сар светло чак ко пхаре околностија? (Дикх и слика тари насловно страна.)

¹⁶ Бизи разлика ко саве околностија сием, амен шај те светина сар светло ко акава свето. Понекогаш, о буќа со дикхјона кај чхинавена амен те вакера о шукар хабери, шај те овен прилика те проповедина. На пример, о апостол Павле сине пханло ко јекх кхер ко Рим кеда пишинѓа о писмо е Филипјаненге. Ама, иако о Павле сине пханло, ов на чхинавѓа те проповединел е чуваренге хем околенге со авена сине те посетинен  ле. О Павле ревно проповединела сине ко асавке околностија хем адалеа охрабринѓа е пхрален „бизи дар [те] вакерен башо е Девлескоро Лафи“. (Читин Филипјаните 1:12-14; 4:22.)

17. Сар несаве пхраља хем пхења успејнена те проповединен чак кеда тано пхаро?

¹⁷ Бут таро амаре пхраља хем пхења сикавена исто храброст сар о Павле. Ола живинена ко пхувја коте сој забранимо те проповединел пе јавно или таро кхер ко кхер хем адалеске аракхена јавера начинија те проповединен (Мат. 10:16-20). Ки јекх асавки пхув, јекх покраинско надгледнико денѓа предлог секова објавители те проповединел ко пло „подрачје“, јавере лафенцар е фамилијаке, е комшиенге, е соучениконге, е колегенге хем околенге кас со џанена. Дује бершенге, о број е собраниенгоро ки адаја покраина бут барило. Шај на живинаја ки пхув коте со амаре активностија тане забраниме. Ама, шај те сикљова важно поука таро пример акале снаодлива пхраленгоро хем пхењенгоро — секогаш те рода начинија те проповедина ки секоја прилика, увериме кај о Јехова ка дел амен и сила која со ваљани аменге те шај те накхава секоја пречка (Фил. 2:13).

18. Со ваљани те ова одлучна те кера?

¹⁸ Ко акава важно време, те ова одлучна те применина о советија сој тане пишиме ко е Павлескоро писмо џи ко Филипјања. Мора те трудина амен те проценина сој тано најважно, те ова бизи маана, те на сопкина е јаверен хем те кера праведна буќа. Тегани амаро мангипе са повише ка бајрол хем ка фалина амаре Даде е Јехова кова со грижинела пе аменге.