1. Ко со сетинкерѓа о Павле е христијанен?

О ХРИСТИЈАЊА тане ки трка башо живото. Бизи разлика дали акана почминѓем те праста или бершенцар више прастаја, ваљани понадари да те праста са џи коте на ресаја џи ки цел. О совет со денѓа о Павле е христијаненге ко Филипи шај те поттикнинел амен те завршина и трка. Кеда добинѓе о писмо таро Павле, несаве пхраља хем пхења таро адава собрание бершенцар више служинена сине е Јеховаске. Ола шукар прастана сине и трка, ама о Павле сетинкерѓа лен кај ваљани понадари да истрајно те прастан. Ов мангља понадари да те џан пало лескоро пример хем те прастан џи ки цел (Фил. 3:14).

2. Соске сине ко тхан о совет со денѓа ле о Павле е Филипјаненге?

² О совет со денѓа ле о Павле е Филипјаненге сине ко тхан. О мануша таро Филипи противинена пе сине е пхраленге таро адава тхан панда таро почеток. Са почминѓа ко 50 берш а.е., кеда о Павле хем о Сила шунѓе адава со вакерѓа ленге о Девел — те џан ки Македонија. Ола геле ко Филипи те проповединен о шукар хабери (Дела 16:9). Адари аракхле е Лидија, која со шунѓа е Павлескере лафија. О Јехова пхравѓа лакоро вило хем ој прифатинѓа о шукар хабери (Дела 16:14). Пало адава ој хем лакере кхерутне крстинѓе пе. Ама, о Бенг одма почминѓа те керел проблемија. О мануша тари диз влечинѓе е Павле хем е Сила англо управителија е дизјакере хем ховавѓе кај керена проблемија ки диз. Адалеске ола сине марде хем пханле ко затвор, а пало адава замолиме те икљовен тари диз (Дела 16:16-40). Дали о Павле хем о Сила откажинѓе пе? На! А со керѓе о пхраља хем о пхења таро адава нево собрание? Ола да истрајнѓе! Сигурно, сине бут охрабриме таро шукар пример е Павлескоро хем е Силаскоро.

3. Со халило о Павле, хем башо кола пучиба ка кера лафи?

 ³ О Павле сине одлучно те на откажинел пе (2. Кор. 4:16). Ама, ов халило кај те шај те прастал и трка џи ко крајо, мора те мислинел ки цел. Со шај те сикљова таро е Павлескоро пример? Кола примерија таро амаро време сикавена кај шај те истрајна чак кеда иси амен проблемија? Хем сар шај амари надеж баши иднина те поможинел аменге те ова панда поодлучна никогаш те на откажина амен?

4. Сар о Павле ачхило зафатимо ки служба башо Јехова бизи разлика ко саве околностија сине?

⁴ Размислин ко саве околностија сине о Павле кеда пишинѓа о писмо е Филипјаненге. Ов сине пханло ко јекх кхер ко Рим. Адалеске, нашти сине те икљол те проповединел. Сепак, ов ревно проповединела сине околенге со авена сине те посетинен ле хем пишинела сине писмија различна собраниенге. Авдиве да бут христијања кола со нашти те икљовен кхерал адалеске сој пхуре или насвале, користинена секоја прилика те шај те вакерен о шукар хабери адаленге со авена ленде кхере. Исто аѓаар, ола пишинена охрабрувачка писмија коленцар со сведочинена е манушенге колен со нашти те аракха лен кхере.

5. Спрема адава со пишинѓа ко Филипјаните 3:12-14, со поможинѓа е Павлеске те овел концентриримо ки цел?

⁵ О Павле на мукхља ни о шукар ни о лошна буќа со керѓа лен англедер те лен лескоро внимание тари служба башо Јехова. Уствари, ов вакерѓа кај тано бут важно те бистрел адава сој пали лесте те шај те астарел адава сој англи лесте, јавере лафенцар успешно те завршинел и трка. (Читин Филипјаните 3:12-14.) Кола сине несаве буќа со шај сине те лен е Павлескоро внимание? Прво, англедер те овел христијани ов сине бут успешно ко јудаизам. Сепак, ов дикхела сине ко адава сар ѓубре (Фил. 3:3-8). Дујто, иако шај осетинела пе сине криво адалеске со прогонинела сине е христијанен, ов на дозволинѓа адава те чхинавел ле те служинел е Јеховаске. Хем трито, ов на мислинѓа кај са о шукар буќа со керѓа башо Јехова сине доволна. О Павле сине бут успешно ки служба башо Девел иако сине пханло, мардо, каменујмо, доживинѓа бродолом, хем бут пути на сине ле доволно хајбе хем шеја (2. Кор. 11:23-27). Ама, бизи разлика кобор сине успешно хем кобор неволје трпинѓа, о Павле џанља кај мора понадари да те прастал и трка. Акава важинела аменге да.

6. Кола тане несаве буќа кола со ваљани те мукха лен пали аменде?

⁶ Сар шај те џа пало е Павлескоро пример хем те бистра адава сој пали аменде? Несаве амендар шај осетинена пе крива башо гревија со керѓе лен англедер. Ако ту да осетинеа тут аѓаар, тегани џикоте проучинеа шај те истражине повише баши е Исусескири откупно жртва. Ако проучинаја, размислинаја хем молинаја амен баши адаја охрабрувачко тема, адава шај бут те поможинел аменге те на осетина амен бизи потреба добором крива башо гревија со керѓем лен англедер. Шај чак ка чхинава те осетина амен крива башо гревија кола со о Јехова више простинѓа лен аменге. Те дикха панда јекх бути со шај те сикљова таро Павле. Несаве шај откажинѓе пе тари успешно кариера те шај те керен повише башо Јехова. Ако тано аѓаар, дали шај те бистра адава сој пали аменде аѓаар со нане те манга о буќа со шај сине те овен амен? (4. Мој. 11:4-6; Проп. 7:10). Ко адава сој пали аменде шај те овен вклучиме хем о буќа кола со керѓем лен ки служба башо Јехова или о испитија коленде со истрајнѓем. Џанѓола пе, кеда размислинаја башо берекетија хем и помош со денѓа аменге о Јехова  бершенцар, адава шај панда повише те поможинел аменге те ова попаше амаре Дадеа. Ама, никогаш на мангаја те мислина кај керѓем доволно хем кај на ваљани више те трудина амен ки служба башо Девел (1. Кор. 15:58).

7. Спрема 1. Коринќаните 9:24-27, со ваљани те кера те шај успешно те завршина и трка башо живото? Вакер пример.

⁷ О Павле шукар халило е Исусескере лафија: „Са тумаре силенцар трудинен тумен“ (Лука 13:23, 24). О Павле џанља кај, исто сар о Исус, мора те трудинел пе џи ко крајо. Адалеске спорединѓа е христијаненгоро живото тркаја. (Читин 1. Коринќаните 9:24-27.) Јекх тркачи со прастала ачховела концентриримо ки цел хем на мукхела ништо те лел лескоро внимание. На пример, о тркачија ки јекх маратонско трка шај прастана узо дуќане или јавера буќа со шај те лен ленгоро внимание. Со мислинеа, дали несаво тркачи би ачховела сине те дикхел о излогија е дуќаненгере? Ако мангела те побединел, на! Ки трка башо живото, амен да мора те пазина те на лел нешто амаро внимание. Ако сием концентририме ки амари цел хем ако са амаре силенцар трудинаја амен исто сар о Павле, ка добина и награда!

8. Башо кола трин буќа ка кера лафи?

⁸ Те дикха акана трин буќа кола со шај те обесхрабринен амен. Адала буќа тане: нешто со аџикерѓем а на исполнинѓа пе, кеда на сием више добором физички силна хем кеда иси амен проблемија со трајнена бут време. Шај бут те користинел аменге ако сикљоваја таро јавера со истрајнѓе ко асавке ситуацие (Фил. 3:17).

9. Сар шај те влијајнел упри аменде нешто со аџикерѓем а на исполнинѓа пе?

⁹ Нешто со аџикерѓем а на исполнинѓа пе. Нормално тано те манга те исполнинен пе о шукар буќа со ветинѓа лен о Јехова. Баш аѓаар осетинѓа пе о пророко о Авакум. Ов вакерѓа кобор бут мангела о Јехова те чхивел крајо е лошнипаске со дикхела ле сине ки Јуда. Ама, о Јехова вакерѓа леске те аџикерел (Авак. 2:3). Тари јавер страна, ако бут време аџикераја те исполнинел пе нешто со мангаја, шај те нашава амари  ревност. Чак шај те обесхрабрина амен (Изр. 13:12). Акава случинѓа пе ко почеток таро 20-то веко. Ко адава време, бут христијања со сине помазиме аџикерѓе кај ка добинен пли награда ко небо ко 1914 берш. Кеда адава на случинѓа пе, сар о верна слуге е Девлескере иклиле ко крајо адалеа?

10. Со керѓа јекх брачно пари кеда на исполнинѓа пе адава со аџикерѓе?

¹⁰ Те дикха о пример дује верна слугенгоро кола со соочинѓе пе асавке проблемеа. О пхрал о Ројал Спац крстинѓа пе ко 1908 берш, кеда сине ле 20 берш. Ов сине уверимо кај панда хари ка добинел пли награда ко небо. Уствари, кеда ко 1911 берш нудинѓа брако пле идно ромњаке и Перл, ов вакерѓа лаке: „Ту џанеа со ка случинел пе ко 1914 берш. Ако мангеа те ла амен, ваљани те кера адава со посигате!“ Дали о пхрал хем и пхен Спац откажинѓе пе тари трка башо живото кеда на добинѓе пли награда ко небо ко 1914 берш? На, соске најважно сине ленге верно те служинен е Јеховаске, а на те џан ко небо. Ола сине одлучна истрајно те прастан и трка. Хем чаче, о Ројал хем и Перл понадари да верно служинѓе е Јеховаске бершенцар, са џи ко крајо таро пло живото ки Пхув. Сигурно, едвај аџикереа те дикхе сар о Јехова ка оправдинел пло анав хем пло право тле владинел, хем сар ка исполнинел са пле ветувања. Ов уверимо кај са акала буќа ка случинен пе ко време кеда о Јехова одрединѓа ле. Са џитегани, те ачхова зафатиме ки служба башо амаро Девел хем никогаш те на мукха о буќа со аџикерѓем лен а на исполнинѓе пе те обесхрабринен амен.

11-12. Соске шај понадари да верно те служина е Јеховаске чак кеда на сием више добором физички силна? Вакер пример.

¹¹ Кеда на сием више добором физички силна. Јекх тркачи ваљани те овел физички силно те шај те прастал. Ама, ту на ваљани те ове физички силно те шај понадари да духовно те бајрове. Уствари, бут џене со нане више добором физички силна, понадари да тане одлучна те ден пло најшукар е Јеховаске (2. Кор. 4:16). Јекх асавко пример тано о пхрал Артур Сикорд, * коле со сине проблемија е састипаја. Јекх диве али лесте јекх медицинско сестра те грижинел пе леске. Ој дикхља ле хем љубезно вакерѓа леске: „Пхрала Сикорд, ту бут керѓан ки служба башо Јехова“. Иако сине ле 88 берш хем ко Бетел служинела сине више 55 берш, о Артур на сине концентриримо ко адава со керѓа англедер. Ов дикхља ла ко јакхја, асандило хем вакерѓа лаке: „Оја, чаче. Ама, нане важно со керѓем, него важно тано со ка кера понадари“.

¹² Шај ту да служинеа е Јеховаске бут берша, ама акана, адалеске со иси тут проблемија састипаја, нашти те кере више добором  сар со кереа сине англедер. Ама ма обесхрабрин тут. Ов уверимо кај о Јехова бут ценинела тли служба која со цело вилеа керѓан ла англедер (Евр. 6:10). Хем на ваљани те бистре кај амаро мангипе башо Јехова на меринела пе адалеа кобор кераја ки служба. Наместо адава, сикаваја кобор тано хор амаро мангипе спрема о Девел аѓаар со понадари да бахтале служинаја леске добором кобор со шај (Кол. 3:23). О Јехова хаљовела кобор шај те кера хем на аџикерела амендар повише таро адава (Мар. 12:43, 44).

13. Сар о искуство е брачно парескоро Мелник поттикнинела амен понадари да те служина е Јеховаске чак ако иси амен бут проблемија?

¹³ Проблемија со трајнена бут време. Несаве пхраља хем пхења бершенцар истрајно служинена е Јеховаске иако иси лен испитија хем прогонствија. На пример, е Анатолија Мелник * сине ле само 12 берш кеда лескере даде астарѓе ле, пханле ле хем бичхалѓе ле ко Сибир — повише таро 7.000 километрија дур тари лескири фамилија која со живинела сине ки Молдавија. Јекх берш пало адава, о Анатолиј, лескири дај, о папо хем и баба сине исто аѓаар ингарде ко Сибир. Пало несаво време сине лен прилика те џан ко состанокија ко јавер гав, ама те шај сине те ресен џи адари мора сине ко бут шудро време те пхирен пешки 30 километрија ко ив. Покасно, о пхрал Мелник сине пханло трин берш ко затвор, дур тари пли ромни и Лидија хем тари пли чхај кола со сине ла јекх берш. Иако бершенцар трпинѓе неволје, о Анатолиј хем лескири фамилија понадари да верно служинѓе е Јеховаске. Акана е Анатолија иси ле 82 берш хем служинела сар члени ко Одбор јекхе подружницакоро ки централно Азија. Исто сар о Анатолиј хем и Лидија, понадари да верно хем истрајно те служина е Јеховаске сар со керѓем адава англедер (Гал. 6:9).

14. Со халило о Павле кај ваљани те керел те шај те ресел џи ки цел?

¹⁴ О Павле сине уверимо кај ка завршинел и трка хем ка ресел џи ки цел. Сар помазимо христијани, ов надинела пе сине кај ка добинел „и награда таро Девел, која сој живото ко небо“. Ама, ов халило кај те шај те ресел џи ки адаја цел, мора истрајно те прастал и трка башо живото (Фил. 3:14). О Павле денѓа е Филипјаненге интересно споредба те шај те поможинел ленге те мислинен ки пли цел.

15. Сар користинѓа о Павле и споредба башо граѓанство те шај те поттикнинел е Филипјанен истрајно те прастан и трка башо живото?

¹⁵ О Павле сетинкерѓа е Филипјанен кај ленгоро „граѓанство тано ко небо“ (Фил.  3:20). Соске сине важно те на бистрен акава? Ко адала диве о римско граѓанство сине бут ценимо. * Ама, о граѓанство е помазиме христијаненгоро сине бут пошукар соске ка дел лен бут повише предностија. О римско граѓанство ни најхари нашти сине те спорединел пе адалеа. Адалеске, о Павле поттикнинѓа е Филипјанен: „Живинен живото сој достојно е шукар хабереске башо Христос“ (Фил. 1:27). О лафија „живинен живото“ ко акава стихо значинена „понашинен тумен сар граѓања“. О помазиме христијања авдиве дена шукар пример адалеа со истрајно прастана ки пли цел — о вечно живото ко небо.

16. Бизи разлика дали иси амен надеж те живина ко небо или ки Пхув, со мора понадари да те кера спрема о лафија таро Филипјаните 4:6, 7?

¹⁶ Сајекх дали иси амен надеж те живина вечно ко небо или ко рај ки Пхув, ваљани понадари да истрајно те праста џи ки адаја цел. Бизи разлика саве околностија иси амен, на смејнаја те дикха ко адава сој пали аменде, а ни те мукха нешто те чхинавел амен те служина е Јеховаске (Фил. 3:16). Шај бут време аџикераја те исполнинен пе е Јеховаскере ветувања, или шај на сием више терне хем силна сар англедер. Шај бершенцар трпинаја пхарипа хем прогонствија. Бизи разлика ки сави ситуација аракхљоваја, на ваљани те секирина амен башо ништо. Наместо адава, ки молитва те вакера е Девлеске со мучинела амен хем ов ка Дел амен мир кова со нашти ни те замислина аменге. (Читин Филипјаните 4:6, 7.)

17. Со ка дикха ки наредно статија?

¹⁷ Исто сар јекх тркачи со ко крајо тари трка дела пестар са те шај те завршинел ла, амен да те ачхова концентририме ки амари цел те завршина и трка башо живото. Адалеске, кобор со дозволинена аменге амаре околностија хем амаре силе, те да амендар са истрајно те праста и трка хем те мислина ко шуже буќа со аџикерена амен. Со ваљани те кера те шај те успејна ко адава? И наредно статија ка поможинел аменге те чхива аменге исправна целија хем те дикха со ваљани те чхива ко прво тхан ко амаро живото (Фил. 1:9, 10).