1. Соске о крстибе тано бут важно? (Дикх и слика ко почеток тари статија.)

СЕКОВА берш бут џене со проучинена и Библија крстинена пе. Бут џене лендар тане тинејџерија, а чак потикне да. Шај ленгере родителија тане е Јеховаскере сведокија. Дали ту да сиан јекх лендар? Ако оја, тегани керѓан бут шукар бути. Секова христијани ваљани те крстинел пе те шај те овел спасимо хем те живинел вечно (Мат. 28:19, 20; 1. Пет. 3:21).

2. Соске на ваљани те дара те де лафи е Јеховаске кај ка служине леске?

² О крстибе анела бут берекетија, ама исто аѓаар одговорностија. Ки сави смисла? Ко диве кеда крстинѓан тут, о пхрал со икерѓа о говор башо крстибе пучља: „Дали преку е Исусескири жртва каинѓан тут башо тле гревија хем дали ветинѓан е Јеховаске кај ка кере лескири волја?“ Ту денѓан лафи кај ка манге е Јехова хем кај ка овел туке најважно те кере лескири волја. Дали ваљани те каине тут со денѓан асавко сериозно ветување? Ни најхари! Никогаш нане те каине тут со мукхљан о Јехова те  водинел тут ко живото. Окола со на пенџарена е Јехова тане дело таро е Сатанаскоро свето. О Бенг на мангела лен исто сар со на мангела тут. Ов ка овел бахтало ако ту нашавеа и надеж те живине засекогаш адалеске со биринѓан те ове лескири страна хем отфрлинѓан е Јехова.

3. Саве берекетија добинѓан таро Јехова откеда денѓан лафи кај ка служине леске?

³ Размислин кобор бут берекетија денѓа тут о Јехова адалеске со денѓан лафи кај ка служине леске хем крстинѓан тут. Откеда керѓан адава, шај те овел тут доверба хем те вакере: „О Јехова тано тари мли страна; нане те дарав. Со шај те керел манге мануш?“ (Пс. 118:6). Нане побари чест те ове тари е Девлескири страна хем те џане кај ов тано задоволно тутар.

4, 5. а) Соске шај те вакерел пе кај тло амалипе е Јеховаја тани тли одговорност? б) Саве проблемија иси е Девлескере слуген бизи разлика кобор берша иси лен?

⁴ Ко тло амалипе е Јеховаја нашти те дикхе сар „фамилијарно пакети“ башо мобилно телефони кова со платинена ле тле родителија. Чак ако панда живинеа тле родителенцар, тло амалипе е Јеховаја тано тли одговорност. Соске тано важно те на бистре акава? Никој амендар нашти те џанел сар ка овел испитими амари вера. На пример, шај крстинѓан тут англедер те ове тинејџери. Ама, акана кеда кхувѓан ко тинејџерска берша, шај иси тут неве чувствија хем неве проблемија. Јекх тинејџерка вакерѓа: „Јекхе тикне чхавеске обично нане те овел пхаро сој тано е Јеховаскоро сведоко само адалеске со на леља котор тари торта башо роденден ки школа. Ама, некобор берша пало адава кеда и желба башо секс овела посилно, ов или ој ваљани те овен цврсто увериме кај секогаш тано најшукар те шунен е Јеховаскере законија“.

⁵ Нане само о терне адала со иси лен неве околностија хем проблемија. Чак о возрасна со крстинена пе, ленгири вера шај те овел испитими ко начин со на аџикерена. Шај те овел лен проблемија ко брако, састипаја или ки бути. Бизи разлика кобор берша иси амен, секова јекх амендар ваљани те ачхол верно е Јеховаске ко различна ситуацие (Јак. 1:12-14).

6. а) Со на ваљани те бистре башо тло лафи со денѓан е Девлеске? б) Со шај те сикљове таро Филипјаните 4:11-13?

⁶ Ако мангеа те ачхове верно е Јеховаске, никогаш ма бистре кај денѓан лафи те служине е Девлеске бизи разлика со ка случинел пе. Акава значинела кај денѓан лафи е Владетелеске упро цело универзум кај понадари да ка служине леске чак ако тле амала или родителија чхинавена те керен адава (Пс. 27:10). Ки секоја ситуација шај те молине е Јехова те поможинел туке те икере тут ко тло лафи со денѓан ле. (Читин Филипјаните 4:11-13.)

7. Со значинела те де тутар са те шај те ове спасимо таро Девел?

⁷ О Јехова мангела те ове лескоро амал. Ама, ваљани те трудине тут те икере адава амалипе зорало хем те де тутар са те шај те ове спасимо. Ко Филипјаните 2:12 пишинела: „Ден тумендар са те овен спасиме“. Адава значинела кај ваљани шукар те размислина сар шај те ачхова паше е Јеховаја хем те ова леске верна бизи разлика со ка овел. На ваљани те овел амен претерано доверба ки аменде.  Чак несаве со бершенцар служинѓе е Девлеске на ачхиле верна. Кола буќа шај те поможинен туке те де тутар са те шај те ове спасимо?

8. Сој тано вклучимо ко лично проучибе хем соске тано адава важно?

⁸ Те шај те ова амала е Јеховаја, ваљани те шуна ле хем те кера леа лафи. Главно начин сар шунаја е Јехова тано аѓаар со проучинаја и Библија. Ко адава тано вклучимо те читина е Девлескоро Лафи хем о библиска публикацие хем те размислина башо адава со читинаја. Ама, на ваљани те трудина амен само ки годи те памтина несаве информацие исто сар кеда спреминаја амен башо несаво испит школаке. Наместо адава, о проучибе тано сар те циде ко јекх интересно друмо коте со истражинеа хем аракхеа неве буќа башо Јехова. Аѓаар, ка ове попаше е Девлеа хем ов да ка овел попаше туја (Јак. 4:8).

9. Со поможинѓа туке хор те проучине и Библија?

⁹ Е Јеховаскири организација дела бут буќа кола со шај те поможинен туке хор те проучине. На пример, ки jw.org ки македонско чхиб, ко дело „Тинејџери“ иси рубрика „Оживеј си ги библиските настани“ која тани керди те поможинел туке те применине адава со сикљовеа таро библиска извештаија. Исто аѓаар, ки амари интернет-страница ки македонско чхиб шај те аракхе о работна листија башо лил Што навистина учи Библијата?, кола со шај те поможинен туке те бајраре  тли вера хем те џане сар те објаснине е јаверенге ко со верујнеа. Шај те аракхе јавера да идее башо тло лично проучибе ки статија „Младите прашуваат — како да уживам во читањето на Библијата?“ која со иклили ко Разбудете се! таро април 2009 берш. О проучибе хем о хор размислибе шај бут те поможинен туке те трудине тут те добине о спасение. (Читин Псалм 119:105.)

10. Соске тано бут важно јекх крстимо слуга е Девлескоро те молинел пе?

¹⁰ Кеда проучинаја и Библија, амен шунаја е Јехова, а кеда молинаја амен, кераја леа лафи. На ваљани те мислина кај и молитва тани обично ритуали или несави амајлија башо бахталипе. Наместо адава, и молитва тани чачутни комуникација амаре Створителеа. Замислин туке, о Јехова мангела те шунел со иси тут те вакере леске! (Читин Филипјаните 4:6.) Кеда ка овел туке пхаро тари било сави причина, шун о совет тари Библија: „Фрде тло пхарипе е Јеховаске“ (Пс. 55:22). Бут пхраља хем пхења шај те вакерен туке кај акава совет чаче поможинѓа ленге — а шај те поможинел туке да!

11. Соске ваљани секогаш те благодарина амен е Јеховаске?

¹¹ Ама, на ваљани те молина амен само кеда мангаја о Јехова те поможинел аменге. И Библија охрабринела амен: „Овен благодарна“ (Кол. 3:15). Понекогаш, добором бут сием зафатиме амаре проблеменцар со на дикхаја о шуже буќа со иси амен. Адалеске пробин акава: Секова диве размислин башо најхари трин буќа коленге со сиан благодарно хем пало адава вакер е Јеховаске кај сиан благодарно башо адава. Јекх тинејџерка со викинела пе Абигејл, која со крстинѓа пе кеда сине ла 12 берш, вакерела: „Мислинава кај никој јавер ко универзум на заслужинела те благодарина леске сар о Јехова. Ваљани те благодарина леске ки секоја прилика хем башо секова поклон со денѓа ле аменге“. Понекогаш и Абигејл пучела пе јекх пучибе со шунѓа ле јекх пути: „Ако уштава тајса хем иси ман само адала буќа коленге со благодаринѓум ман е Јеховаске јекх диве англедер, кобор буќа ка овен ман?“ * (Дикх и фуснота.)

12, 13. Соске тано важно те размислине башо адава сар о Јехова поможинѓа туке лично?

¹² О Јехова поможинѓа е Давидеске те истрајнел ко бут пхаре ситуацие. Адалеске, о Давид шај сине таро лично искуство те вакерел: „Пробинен хем дикхен кобор тано шукар о Јехова! Бахтало тано окова мануш колеске со ов тано тхан гарајбаске“ (Пс. 34:8). Акава стихо сикавела аменге кобор тано важно коркори амен те осетина е Јеховаскоро шукарипе. Кеда читинеа и Библија хем о библиска публикацие хем кеда сиан присутно ко  состанокија, сикљовеа сар о Девел поможинѓа е јаверенге те ачховен верна. Ама, сар овеа са попаше е Јеховаја, важно тано те хаљове сар о Јехова поможинела туке. Сар ту осетинѓан е Јеховаскоро шукарипе?

¹³ Секова слуга е Девлескоро осетинѓа е Јеховаскоро шукарипе ко посебно начин. Ов викинѓа секоле јекхе амендар те овел паше леа хем лескере Чхавеа. О Исус вакерѓа: „Никој нашти те авел ки манде, освен ако на анела ле мло Дад, кова со бичхалѓа ман“ (Јован 6:44). Дали мислинеа кај акала лафија важинена туке да? Или шај мислинеа туке: „О Јехова анѓа само мле родителен, а ме само џава пали ленде“. Ма бистре, кеда денѓан лафи кај ка служине е Јеховаске хем крстинѓан тут, сикавѓан кај сиан паше леа. И Библија вакерела: „Ако некој мангела е Девле, ле о Девел пенџарела ле“ (1. Кор. 8:3). Секогаш ценин о тхан со денѓа тут о Јехова ки лескири организација.

14, 15. Сар шај и служба те поможинел туке те бајраре тли вера?

¹⁴ О шукарипе е Јеховаскоро осетинеа ле исто аѓаар кеда ов дела тут храброст те кере лафи баши тли вера, сајекх дали ки служба ко подрачје или ки школа. Шај туке пхаро те проповедине тле соучениконге соске дараја сар ка реагиринен. Шај посебно дараја те кере лафи баши тли вера англи побари група мануша. Со шај те поможинел туке?

¹⁵ Прво, размислин соске сиан уверимо ко адава со сикљовеа тари Библија. Шај те користине о работна листија проучибаске со иси ки jw.org. Ола шај те поможинен туке те размислине ко со верујнеа, соске верујнеа ко адава хем сар шај е јаверенге те објаснине адава. Кеда ка ове чаче уверимо хем шукар спремимо, ка манге те кере лафи башо Јехова (Ерем. 20:8, 9).

16. Со шај те дел тут храброст те кере лафи баши тли вера?

¹⁶ Чак ако шукар спреминеа тут, шај ка овел тут трема кеда ка ваљани те објаснине е јаверенге ко со верујнеа. Јекх пхен со иси ла 18 берш, а крстинѓа пе ко 13 берш, вакерела: „Џанава ко со верујнава, ама понекогаш пхаро манге те вакерав адава со мислинава“. Адалеске, ој пробинела те керел лафи башо чачипе ко јекх смирено хем природно начин. Ој вакерела: „Мле соученикија слободно керена лафи башо адава со керена. Ме да ваљани те осетинав ман слободно те керав о исто. Адалеске, џикоте кераја лафи, вакерава нешто сар на пример: ’Англедер несаво диве, проучинава сине и Библија некасаја хем...‘ А пало адава вакерава адава со мангљум те вакерав. Иако на почминаја одма те кера лафи баши Библија, бут пути о јавера интересинена пе хем понекогаш пучена ман со керава кеда проучинава е јаверенцар и Библија. Кобор повише користинава акава пристап, добором манге полокхо те керав лафи башо чачипе. А ко крајо, секогаш осетинава ман бут шукар!“

17. Со јавер шај те поможинел туке те кере лафи е јаверенцар баши тли вера?

¹⁷ Кеда о јавера ка дикхен кај чаче  грижинеа тут ленге хем поштујнеа лен, ка овел ленге полокхо те поштујнен тут хем тли вера. И Оливија, кола со иси ла 17 берш хем крстинѓа пе англедер те овел тинејџерка, вакерела: „Секогаш дарава сине кај, ако керава лафи баши Библија, о јавера ка мислинен кај сиум фанатико“. Ама, пало адава ој почминѓа те дикхел појавер ко буќа. Наместо те концентриринел пе само ки пли дар, ој размислинѓа: „Бут терне на џанена ништо башо е Јеховаскере сведокија. Таро са е Јеховаскере сведокија, ола авена ко контакт само аменцар. Адалеске, о начин сар понашинаја амен шај те влијајнел упро адава сар ка реагиринен. Со ако сием лаџутне, дараја, пхаро аменге те кера лафи баши амари вера или кочинѓоваја тари дар кеда проповединаја? Тегани шај те мислинен песке кај лаџаја со сием е Јеховаскере сведокија. Шај чак нане те понашинен пе аменцар шукар соске нане амен доверба ки аменде. Ама, ако сием смирена хем увериме кеда кераја ленцар лафи баши амари вера, исто сар со кераја лафи башо јавере теме, тегани побари тани и веројатност кај ка поштујнен амен“.

18. Со ваљани те кере те шај те де тутар са те ове спасимо?

¹⁸ Сар со дикхлем, те де тутар са те ове спасимо тани бари одговорност. Те шај те кере адава, ваљани те читине е Девлескоро Лафи хем те размислине башо адава со читинеа, те молине тут е Јеховаске хем хор те размислине сар ов поможинѓа туке. Аѓаар ка ове поуверимо кај о Јехова тано тло амал. А акава ка охрабринел тут те кере е јаверенцар лафи баши тли вера. (Читин Псалм 73:28.)

19. Соске врединела те де тутар са те ове спасимо?

¹⁹ О Исус вакерѓа: „Ако некој мангела те авел пали манде, нека откажинел пе пестар хем нека лел пло стубо мучибаске хем нека авел пали манде“ (Мат. 16:24). Ако мангела те џал пало Исус, секова слуга е Девлескоро ваљани те дел лафи е Јеховаске кај ка служинел леске цело пло живото хем те крстинел пе. Ама, акава тано само почеток таро јекх бут шужо живото панда авдиве кова со ингарела џи ко вечно живото ко е Девлескоро нево свето. Адалеске, де тутар са те ове спасимо!