1-3. а) Кова тано јекх таро главна буќа коленде со верујнаја? б) Соске о воскресение тано добором важно? (Дикх и слика ко почеток тари статија.)

АКО некој пучела тут кола тане о главна сикљојба тле веракере, со ка вакере? Сигурно ка вакере кај о Јехова тано о Створители кова со денѓа амен о живото. Веројатно ка вакере кај верујнеа ко Исус Христос хем кај ов денѓа пло живото сар откупнина. Исто аѓаар ка вакере кај и Пхув ка овел рај хем е Девлескере слуге вечно ка живинен ки лате. Ама, дали ка вакере кај о воскресение тано јекх таро сикљојба кола со највише керена тут бахтало?

² Иси амен шукар причине те вакера кај о воскресение тано јекх таро главна буќа коленде со верујнаја, чак ако надинаја амен кај ка преживина и бари неволја хем кај ка живина вечно ки Пхув. О апостол Павле сикавѓа соске о воскресение тано добором важно. Ов вакерѓа: „Ако чаче нане воскресение е муленге, тегани  о Христос да на воскреснинѓа“. Ако о Исус на воскреснинѓа, тегани нашти те владинел сар Цари ко небо хем амаро проповедибе ка овел џабе. (Читин 1. Коринќаните 15:12-19.) Ама, амен џанаја кај о Исус воскреснинѓа. Адалеске со верујнаја ко адава, на сием сар о Садукеија кола со упорно вакерена сине кај о муле нане те воскреснинен. Чак кеда о јавера асана аменге, амари вера кај о Девел ка воскреснинел е мулен ачховела зорали (Мар. 12:18; Дела 4:2, 3; 17:32; 23:6-8).

³ О Павле вакерѓа кај о сикљојбе башо „воскресение е муленгоро“ тано дело таро „главно сикљојбе башо Христос“ (Евр. 6:1, 2). Ов вакерѓа кај ов да верујнела ко воскресение (Дела 24:10, 15, 24, 25). Иако о воскресение тано јекх таро главна сикљојба хем јекх таро основна буќа со сикљоваја тари Библија, амен понадари да ваљани шукар те проучина баши лесте (Евр. 5:12). Соске?

4. Кола пучиба башо воскресение шај те пуча амен?

⁴ Кеда некој почминела те проучинел и Библија, читинела башо воскресенија со случинѓе пе ко пурано време, на пример о воскресение е Лазарескоро. Ов исто аѓаар сикљола кај о Авраам, о Јов хем о Даниел сине увериме кај ко време со авела о муле палем ка уштен. Ама, со ка вакере некаске ако вакерела туке те сикаве леске тари Библија соске шај те овел амен доверба ко ветувања со сине денде башо воскресение англедер бут берша? Хем дали и Библија вакерела кеда ка воскреснинен о муле? О одговорија башо акала пучиба ка керен амари вера позорали.

5. Башо кола пучиба ка кера лафи?

⁵ Шај нане аменге пхаро те замислина некој те воскреснинел одма пало лескоро мерибе (Јован 11:11; Дела 20:9, 10). Ама, дали шај те верујна ко ветување кај некој ка воскреснинел пало бут берша, чак пало бут векија откеда муло? Дали шај те верујна ко акава бизи разлика дали керела пе лафи баши некасте со муло бут берша англедер, или палем некаске со муло сигенде? Ама, ту више верујнеа ко јекх воскресение со случинѓа пе, а сине ветимо бут берша англедер. Кова воскресение тано адава? Хем сар влијајнела акава упри тли надеж башо воскресение ко време со авела?

6. Сар упро Исус исполнинѓе пе о лафија таро Псалм 118?

⁶ Акана те кера лафи башо јекх воскресение со сине пророкујмо бут берша англедер. Ко Псалм 118, кова со шај пишинѓа ле о Давид, пишинела: „Јехова, спасин амен, молинаја тут!“ хем „Нека овел берекети околе со авела ко е Јеховаскоро анав“. О мануша цитиринена сине акава пророштво башо Месија кеда о Исус ко хер кхувѓа андре ко Ерусалим ко 9 нисан, некобор диве англедер те мерел (Пс. 118:25, 26; Мат. 21:7-9). Ама, сар акава псалм тано поврзимо јекхе воскреснибаја со ваљани сине те случинел пе бут берша откеда сине пишимо? Ко акава псалм тано пишимо хем акава: „О бар со фрдинѓе ле  о градителија уло главно аголно бар“ (Пс. 118:22).

7. Сар отфрлинѓе о Евреија е Исусе?

⁷ „О градителија“ со отфрлинѓе е Месија сине о еврејска водачија. Ола на само со иранѓе думо е Исусеске хем отфрлинѓе ле сар Месија, него бут Евреија чак родинѓе таро Пилат те мударел ле (Лука 23:18-23). Оја, ола сине одговорна башо е Исусескоро мерибе.

8. Сар шај сине о Исус те овел „главно аголно бар“?

⁸ Ако о Исус сине отфрлимо хем мудардо, сар шај сине те овел „главно аголно бар“? Адава шај сине те овел само ако воскреснинѓа. О Исус објаснинѓа акава кеда вакерѓа јекх споредба башо јекх мануш со бичхалѓа гласникон ко работникија со керена сине бути ко лескере ниве дракхенцар. О работникија понашинѓе пе лошно ленцар. Ко крајо, акава мануш бичхалѓа пле чхаве соске мислинѓа кај о работникија ка шунен ле. Ама, ола мударѓе ле. Откеда вакерѓа акаја споредба, о Исус цитиринѓа о пророштво таро Псалм 118:22 (Лука 20:9-17). О апостол Петар вакерѓа о исто стихо кеда керѓа лафи е еврејска поглаваренцар, старешиненцар хем книжниконцар кола со сине кхедиме ко Ерусалим. Ов керѓа лафи башо Исус Христос коле со ола мударѓе ко стубо, а кас со о Девел ваздинѓа таро муле. Тегани вакерѓа ленге: „Ов тано ’о бар кова со тумен о градителија мислинѓен кај на врединела, а уло главно аголно бар‘“ (Дела 3:15; 4:5-11; 1. Пет. 2:5-7).

9. Со сине пророкујмо ко Псалм 118:22?

⁹ Дикхјола пе кај ко Псалм 118:22 сине пророкујмо воскресение кова со ваљани сине те случинел пе бут берша покасно. Адава пророштво сикавѓа кај о Месија ка овел отфрлимо хем мудардо, ама кај ка овел воскреснимо хем ка овел главно аголно бар. Кеда воскреснинѓа, о Исус уло адава преку касте со шај те спасина амен (Дела 4:12; Еф. 1:20).

10. а) Со сине пророкујмо ко Псалм 16:10? б) Соске шај те вакера кај о Псалм 16:10 на исполнинѓа пе упро Давид?

¹⁰ Те дикха јавер стихо кова со керела лафи башо воскресение. Исполнинѓа пе повише таро илјада берша покасно. Адава ваљани те уверинел амен кај јекх воскресение шај те случинел пе пало бут берша откеда сине пророкујмо. Ко 16 Псалм тане пишиме е Давидескере лафија: „Нане  те мукхе ман ко гробо. Нане те мукхе тло верно слуга те дикхел и дупка е гробоскири“ (Пс. 16:10). О Давид на мангља те вакерел кај ов никогаш нане те мерел хем те џал ко гробо. И Библија вакерела кај о Давид пхурило хем муло хем кај сине парумо ки пли диз (1. Цар. 2:1, 10). Тегани, упри касте исполнинѓе пе о лафија е Давидескере?

11. Сар о Петар објаснинѓа о лафија таро Псалм 16:10?

¹¹ Повише таро илјада берша откеда о Давид пишинѓа акала лафија, о Петар вакерѓа упри касте исполнинѓе пе. Некобор курке откеда о Исус муло хем воскреснинѓа, о Петар керѓа лафи англо бут Евреија хем англо мануша кола со прифатинѓе и еврејско вера. (Читин Дела 2:29-32.) Ов сетинкерѓа лен кај о Давид муло хем сине парумо. Ки Библија на пишинела кај некој таро адала мануша на мангља те прифатинел кеда о Петар вакерѓа кај о Давид пророкујнѓа о воскресение е Месијаскоро.

12. Сар исполнинѓа пе о Псалм 16:10 хем ко со уверинела амен адава?

¹² О Петар потврдинѓа адава со вакерѓа адалеа со цитиринѓа о лафија таро Псалм 110:1. (Читин Дела 2:33-36.) Адава со о Петар денѓа доказија тари Библија, поможинѓа адале манушенге те уверинен пе кај о Исус тано „хем Господари хем Христос“. О мануша халиле кај о лафија таро Псалм 16:10 исполнинѓе пе кеда о Исус воскреснинѓа. Пало несаво време, о апостол Павле користинѓа о иста доказија кеда керела сине лафи е Евреенцар ки писидиско Антиохија. Акала доказија влијајнѓе бут упри ленде, адалеске мангена сине те шунен повише. (Читин Дела 13:32-37, 42.) Акава ваљани те уверинел амен да кај сине точна о пророштвија тари Библија башо јекх воскресение кова со ваљани сине те случинел пе ки иднина, иако сине вакерде бут берша англедер те исполнинен пе.

13. Со шај некој те пучел башо воскресение?

¹³ Охрабринела амен адава со џанаја кај јекх воскресение шај те случинел пе пало бут берша откеда сине пророкујмо. Ама, некој шај те пучел: „Дали акава значинела кај ваљани те аџикерав бут време те шај те дикхав мле манглен со муле? Кеда ка овел о воскресение?“ О Исус вакерѓа е апостоленге кај иси буќа кола со на џанена лен хем нашти те џанен лен. Ов пхенѓа ленге: „Само о Дад сој ко небо иси ле власт те одрединел кеда ка овен о буќа, хем тумен на ваљани те џанен башо адава време“ (Дела 1:6, 7; Јован 16:12). Ама, адава на значинела кај на џанаја ништо башо адава кеда ка овел о воскресение.

14. Сар е Исусескоро воскресение сине појавер таро јавера воскресенија?

¹⁴ О најважно воскресение сој тано пишимо ки Библија тано е Исусескоро. Ако ов на воскреснинѓа, нијекхе амендар нане сине те овел надеж кај шај те дикха амаре манглен со муле. Окола со воскреснинѓе англедер о Исус, сар на пример ко време е Илијаскоро хем е Елисејескоро, на живинѓе вечно. Јекх диве ола палем муле хем уле право ко гробо. Ама,  о Исус воскреснинѓа хем „на мерела повише“, јавере лафенцар „о мерибе нане ле више власт упри лесте“. Ов живинела ко небо „ки цело вечност“ (Рим. 6:9; Отк. 1:5, 18; Кол. 1:18; 1. Пет. 3:18).

15. Соске башо Исус вакерела пе кај тано „о прво сој ваздимо таро муле“?

¹⁵ О Исус воскреснинѓа сар духовно личност ко небо. Прво пути некој воскреснинѓа аѓаар хем акава тано о најважно воскресение (Дела 26:23). Ама, нане само ов те воскреснинел ко небо. О Исус ветинѓа кај лескере верна апостолија ка владинен леа ко небо (Лука 22:28-30). Ама, акаја награда ола ка добинен ла пало ленгоро мериба. Тегани, исто сар о Исус, ола ка воскреснинен ко духовно тело. О Павле пишинѓа кај „о Христос воскреснинѓа таро муле, ов тано о прво сој ваздимо таро муле“. О Павле вакерѓа кај иси јавера да со ка воскреснинен хем ка џан ко небо: „Секој ко пло редо: О Христос сар прво со воскреснинѓа, а пало адава, џикоте трајнела лескири присутност, окола сој тане е Христосескере“ (1. Кор. 15:20, 23).

16. Со џанаја башо адава кеда ка случинел пе о воскресение ко небо?

¹⁶ Е Павлескере лафија сикавена аменге кеда ка овел о воскресение ко небо. Адава ка случинел пе џикоте трајнела е Христосескири присутност. Бершенцар, е Јеховаскере сведокија користинена и Библија те сикавен кај е Христосескири присутност почминѓа ко 1914 берш. Лескири присутност панда трајнела, хем о крајо таро акава лошно свето тано бут паше.

17, 18. Со ка случинел пе несаве помазаниконцар џикоте трајнела е Христосескири присутност?

¹⁷ И Библија вакерела аменге нешто повише башо воскресение ко небо: „Мангаја, пхраљален, те џанен башо окола со муле... Соске, ако верујнена кај о Исус муло хем воскреснинѓа, тегани о Девел околен да со муле ко јекхипе е Исусеа ка анел лен леа... Амен о џивде, со ачховаја џи ки присутност е Господарескири, нане те ова англедер окола со муле, соске, коркори о Господари ка хулел таро небо хем ка дел заповед... Хем најангле ка уштен окола со муле ко јекхипе е Христосеа. А пало адава амен о џивде кола со ачхилем, заедно ленцар ка ова ингарде ко облакија те шај те аракха амен е Господареа ко воздух. Хем аѓаар ка ова секогаш е Господареа“ (1. Сол. 4:13-17).

¹⁸ О прво воскресение ваљанѓа те овел несаво време откеда почминѓа е Христосескири присутност. О помазаникија со ка овен ки Пхув џикоте трајнела и бари неволја ка овен „ингарде ко облакија“ (Мат. 24:31). Ола „нане те мерен“, а адава значинела кај нане те овен муле бут време. Кеда ка мерен, сарине ка преобразинен пе „ко јекх моменти, одма, џикоте шунѓола и последно труба“ (1. Кор. 15:51, 52).

19. Кова тано о „пошукар воскресение“ со аџикераја ле?

¹⁹ Авдиве, побаро дело таро е Девлескере слуге нане помазаникија хем нане бириме те владинен е Христосеа. Наместо адава, ола аџикерена „е Јеховаскоро диве“ кеда ка авел о крајо акале лошно светоскоро. Никој  на џанела кеда точно ка авел о крајо, ама о доказија сикавена кај тано бут паше (1. Сол. 5:1-3). Ко нево свето, ка овел јавер воскресение. Тегани, о мануша со ка воскреснинен ка овел лен прилика те овен совршена хем те живинен вечно ки Пхув. Адава ка овел „пошукар воскресение“ таро воскресенија со случинѓе пе ко пурано време кеда окола со воскреснинѓе палем муле (Евр. 11:35).

20. Котар џанаја кај о воскресение ка овел организиримо?

²⁰ И Библија вакерела кај окола со џана ко небо воскреснинена „секој ко пло редо“ (1. Кор. 15:23). Адалеске, шај те ова увериме кај о воскресение ки Пхув исто аѓаар ка овел ко несаво редо, јавере лафенцар организиримо. Шај пучаја амен: „Дали окола со муле ко амаро време ка воскреснинен хем ка овен аџикерде таро пле паше кеда ка почминел о Христос те владинел? Дали о верна мурша таро пурано време со предводинена сине е Девлескере народо ка воскреснинен поангле те шај те поможинен те организиринел пе е Девлескоро народо ко нево свето? Со ка овел околенцар со на служинѓе е Јеховаске? Кеда хем коте ка воскреснинен ола?“ Иси бут пучиба со шај те пуча амен. Ама, акана нане време те размислина башо адала буќа. Најшукар тано те аџикера хем те дикха. Шај те овел амен доверба кај ка овел чаче интересно те дикха сар о Јехова ка керел са адала буќа.

21. Сави надеж иси тут?

²¹ Џи тегани, ваљани те бајрара амари вера ко Јехова. Таро адава со вакерѓа о Исус сием увериме кај о Јехова сетинела пе околенде со муле хем кај ка живинен палем (Јован 5:28, 29; 11:23). Те шај те сикавел кај о Јехова ка воскреснинел е мулен, о Исус ки јекх прилика вакерѓа кај о Авраам, о Исак хем о Јаков „сарине ола тане [англо Девел] џивде“ (Лука 20:37, 38). Амен да иси амен шукар причине те вакера о лафија со вакерѓа лен о апостол Павле: „Иси ман надеж... кај о Девел ка воскреснинел околен сој праведна хем околен со нане праведна“ (Дела 24:15).