1, 2. Соске несаве родителија тане секириме кеда ленгере чхаве мангена те крстинен пе?

СЕКОВА берш, бут мануша со проучинена и Библија дена лафи е Јеховаске кај ка служинен леске хем крстинена пе. Бут џене лендар тане терне кола со бариле родителенцар сој тане е Јеховаскере сведокија хем ола биринѓе о најшукар друмо ко живото (Пс. 1:1-3). Ако сиан родители, веројатно едвај аџикереа о диве кеда тло чхаво или тли чхај ка крстинел пе. (Споредин 3. Јованово 4.)

² Ама, шај секиринеа тут. Шај пенџареа несаве тернен кола со откеда крстинѓе пе почминѓе те пучен пе дали чаче тано шукар те живинен спрема е Девлескере мерилија. Несаве чак цидинѓе пе тари е Девлескири организација. Адалеске, шај секиринеа тут кај тло чхаво ка почминел те служинел е Јеховаске, ама пало несаво време нане више те мангел о чачипе сар поангле. Шај мислинеа туке кај ка овел сар несаве христијања таро  прво веко со живинена сине ко Ефес. О Исус башо адава собрание вакерѓа: „Нане тут о мангипе кова со сине тут ко почеток“ (Отк. 2:4). Сар шај те поможине тле чхавеске те икерел зорало пло мангипе башо Девел хем те овел спасимо? (1. Пет. 2:2). О одговор ка добина ле ако дикхаја о пример е Тимотејескоро.

3. а) Сар уло о Тимотеј христијани хем со керѓа кеда шунѓа е Исусескере сикљојба? б) Кола трин буќа вакерѓа о Павле е Тимотејеске?

³ Ко 47 берш а.е, о апостол Павле прво пути гело ки Листра. Шај ко акава време о Тимотеј, кова со веројатно сине ко тинејџерска берша, шунѓа башо адава со сикавела сине о Исус. Ов керела сине адава со сиклило хем дуј берш пало адава почминѓа те путујнел е Павлеа. Отприлика 16 берш пало адава, о Павле пишинѓа е Тимотејеске: „Ачхов ко адава со сиклиљан хем ко адава со уверинѓан тут, адалеске со џанеа кастар сиклиљан са адава хем кај панда сар бут тикно пенџареа о света лила [о Хебрејска списија], кола со шај те керен тут гоѓавер те шај те спасине тут преку и вера ко Христос Исус“ (2. Тим. 3:14, 15). О Павле вакерѓа кај о Тимотеј 1) пенџарела сине о света лила, 2) уверинѓа пе ко адава со сиклило хем 3) уло гоѓавер те шај те спасинел пе преку и вера ко Христос Исус.

4. Кола публикацие користинѓан те шај те сикаве тле чхавен? (Дикх и слика ко почеток тари статија.)

⁴ Сар родители, ту мангеа тло чхаво те пенџарел о света лила, коленде со авдиве тане вклучиме о Хебрејска списија хем о Христијанска грчка списија. Чак о тикне чхаве шај те сикљовен башо мануша хем настанија тари Библија. Е Јеховаскири организација икалѓа бут лила, брошуре хем видеоклипија кола со о родителија шај те користинен лен те поможинен пумаре чхавенге. Кола лендар иси ки тли чхиб? Тло чхаво ваљани те џанел со пишинела ки Библија те шај те овел паше амал е Јеховаја.

5. Котар џанаја кај о Тимотеј сине уверимо ко шукар хабери башо Исус?

⁵ Нане доволно те сикаве е чхавен само башо мануша хем башо настанија тари Библија. Сар со дикхлем англедер, о Тимотеј пенџарела сине о света лила панда сар бут тикно, ама ов исто аѓаар сине уверимо ко адава со сиклило. Пало несаво време, ов уверинѓа пе кај о Исус тано о Месија. О Тимотеј крстинѓа пе соске сине ле бари вера хем почминѓа те служинел е Павлеа сар мисионери.

6. Сар шај те поможине тле чхавенге те верујнен ки Библија?

⁶ Сар шај те поможине тле чхавенге те овел лен зорали вера сар со сине е Тимотеје, те шај те овен увериме ко адава со сикљовена? Прво, ов стрпливо. Ваљани време те шај и вера те овел зорали. Исто аѓаар, ако ту верујнеа  ко нешто адава на значинела кај тло чхаво да автоматски ка верујнел ко адава. Секова чхаво ваљани те користинел пли способност размислибаске те шај те верујнел ки Библија. (Читин Римјаните 12:1.) Сар родители, ту шај бут те поможине тле чхавенге те овел лен зорали вера, посебно кеда пучена тут нешто. Те дикха со шај те сикљова таро пример јекхе дадескоро.

7, 8. а) Сар јекх родители сикавела стрпливост џикоте сикавела пле чхаја? б) Ки која ситуација ваљани сине те ове стрпливо тле чхавеа?

⁷ О Томас вакерела кај лескири чхај со иси ла 11 берш, понекогаш пучела ле пучиба, сар на пример: „Дали о Јехова користинѓа еволуција те шај те развинел о живото ки Пхув?“ или „Соске на мешинаја амен ко несаве активностија, сар сој о политичка изборија, те шај те кера о условија пошукар?“ Понекогаш ов ваљани те контролиринел пе те на вакерел лаке ко со те верујнел. О Томас џанела кај нане доволно само јекх доказ те шај те уверине некас ко чачипе, него ваљани повише доказија.

⁸ Исто аѓаар, ов џанела кај ваљани те овел стрпливо те шај те сикавел пле чхаја. На само леске, секоле Девлескере слугаске ваљани стрпливост (Кол. 3:12). О Томас халило кај ваљани те одвојнел доволно време те шај те керел лафи пле чхајаја соске само аѓаар ка поможинел лаке те хаљовел адава со сикљола тари Библија хем те бајрарел пли вера. Ов вакерела: „Посебно кеда керела пе лафи башо несаве важна буќа, ме хем ми ромни мангаја те ова сигурна кај амари чхај чаче верујнела ко адава со сикљола хем кај лаке логично адава. Шукар тано кеда пучела. Искрено, ка секиринав ман ако прифатинела нешто бизо те пучел“.

9. Сар шај те поможине тле чхавенге те верујнен ки Библија?

⁹ Ако о родителија тане стрплива џикоте сикавена пумаре чхавен, сар со накхела о време ленгере чхаве ка почминен те хаљовен „кобор тано бувло, дугачко, учо хем хор о чачипе“ (Еф. 3:18). О родителија шај те сикавен е чхавен ко начин кова со ка одговоринел ко ленгере берша хем способностија. Сар со ка бајрол ленгири вера, ка овел ленге полокхо те бранинен пле верувања англо јавера, чак англо пле соученикија (1. Пет. 3:15). На пример, дали тле чхаве шај тари Библија те објаснинен со овела некасаја кеда ка мерел? Дали ленге логично адава со објаснинела и Библија? * (Дикх и фуснота.) Ма бистре кај ваљани те ове стрпливо те шај те поможине тле чхавенге те верујнен ки Библија, ама адава ка исплатинел пе (5. Мој. 6:6, 7).

10. Сој тано важно кеда сикавеа е чхавен?

 ¹⁰ Џанѓола пе, ако мангеа те поможине тле чхавенге те овел лен вера, бут тано важно те де ленге шукар пример. И Стефани, јекх дај со иси ла трин чхаја, вакерела: „Панда џикоте мле чхаја сине бут тикне, ваљани сине те пучав ман: ’Дали вакерава мле чхаенге соске ме сиум уверими кај о Јехова постојнела, кај мангела амен хем кај секогаш постапинела праведно? Дали шај те дикхен кај ме чаче мангава е Јехова?‘ Нашти те аџикерав таро мле чхаве те овен увериме ко нешто ко со ме на сиум уверими“.

11, 12. Сој тани и мудрост хем котар џанаја кај ој на зависинела таро адава кобор берша иси некас?

¹¹ Сар со дикхлем, о Тимотеј 1) пенџарела сине о света лила хем 2) сине уверимо ко адава со сиклило. Ама, со мислинѓа о Павле кеда вакерѓа кај о света лила шај те керен е Тимотеје гоѓавер те шај те спасинел пе?

¹² Ко Увид ко Света лила (Insight on the Scriptures, англиски), 2 том, тано објаснимо кај и мудрост тани „способност те користине адава со џанеа те шај те решине о проблемија, те избегине опасна ситуацие, те исполнине несаве целија или те де совет е јаверенге те керен о исто. И мудрост тани спротивно тари глупост“. И Библија вакерела кај „и глупост тани пханли ко вило е чхавеске“ (Изр. 22:15). Спрема акава, и мудрост тани јекх знако баши зрелост. И духовно зрелост на зависинела таро адава кобор берша иси некас. Духовно зрело тано окова со дарала таро Јехова хем мангела те шунел ле. (Читин Псалм 111:10.)

13. Сар шај о терне те сикавен кај тане гоѓавер те шај те спасинен пе?

¹³ О терне сој тане духовно зрела нане „фрдиме таро бранија хем ингарде акари-окори“ таро ленгере желбе или таро притисок е врсниконгоро (Еф. 4:14). Наместо адава, ленгири „способност те хаљовен преку искуство тани вежбими те разликујнел о исправно хем о погрешно“ (Евр. 5:14). Адалеске, анена мудра одлуке чак кеда ленгере родителија или јавера сој попхуре на дикхена лен (Фил. 2:12). Асавки мудрост ваљани ленге те шај те спасинен пе. (Читин Изреки 24:14.) Сар шај те поможине тле чхавенге те овел лен асавки мудрост? Најангле вакер ленге кола мерилија водинена тут ко живото. Таро тле лафија хем постапке ола ваљани те дикхен кај трудинеа тут те живине спрема о библиска мерилија (Рим. 2:21-23).

14, 15. а) Башо кола важна буќа ваљани те размислинен о терне со мангена те крстинен пе? б) Сар шај те поможине тле чхавенге те размислинен башо берекетија со ка овен лен ако шунена е Девлескере законија?

¹⁴ Ама, те шај те поможине тле чхавенге те бајрарен пли вера, нане доволно само те вакере ленге сој тано исправно, а сој тано погрешно. Ваљани исто аѓаар те поможине ленге те  размислинен башо пучиба сар сој: „Соске и Библија забранинела несаве буќа со шај дикхјона привлечна? Соске шај те овав сигурно кај о библиска мерилија тане секогаш башо мло шукарипе?“ (Иса. 48:17, 18).

¹⁵ Ако тло чхаво мангела те крстинел пе, поможин леске сериозно те размислинел кај адава ка анел леске одговорностија. Сар дикхела ки ленде? Саве берекетија ка овен ле? Кола пхаре ситуацие ка овен ле? Соске шај те вакерел пе кај о крстиба анела повише берекетија него пхарипа? (Мар. 10:29, 30). Бут тано важно шукар те размислинел башо акала буќа англедер те крстинел пе. Поможин тле чхавеске хор те размислинел башо берекетија со ка овен ле ако шунѓа е Девле хем башо последице ако на шунѓа ле. Тегани, побари тани и веројатност те верујнел кај ако икерела пе ко библиска мерилија, адава секогаш ка овел башо лескоро шукарипе (5. Мој. 30:19, 20).

16. Со ваљани те керен о родителија ако ленгоро чхаво почминела те сумнинел пе ко чачипе откеда ка крстинел пе?

¹⁶ Со шај те кере ако тло чхаво почминела те сумнинел пе ко чачипе откеда ка крстинел пе? На пример, шај тле чхавеске или чхајаке ка свиџинен пе несаве буќа таро свето. Или шај ка сумнинел пе дали чаче тано  најшукар те живинел спрема о библиска начелија (Пс. 73:1-3, 12, 13). Таро адава сар ка реагирине шај те зависинел дали тло чхаво понадари да ка служинел е Јеховаске. Ов одлучно те на акоше тут леа башо адала буќа, бизи разлика дали тано панда тикно или тинејџери. Наместо адава, тли цел ваљани те овел те уверине ле кај мангеа ле хем кај мангеа те поможине леске.

17, 18. Сар шај о родителија те поможинен пумаре чхавенге со сумнинена пе ко чачипе?

¹⁷ Кеда крстинена пе, о терне сикавена кај денѓе лафи е Јеховаске кај ка служинен леске. Ола ветинѓе кај ка манген е Девле хем кај ка овел ленге најважно те керен лескири волја. (Читин Марко 12:30.) О Јехова дикхела бут сериозно ко асавко ветување, а аѓаар ваљани те дикха амен да (Проп. 5:4, 5). Сетинкер тле чхаве ко акава. Ама, прво читин хем проучин о публикацие со е Јеховаскири организација денѓа е родителенге. Пало адава, љубезно хем ко право време вакер тле чхавеске кај адава со денѓа лафи те служинел е Јеховаске хем крстинѓа пе тано сериозно, ама ка анел леске баре берекетија.

¹⁸ На пример, шај те аракхе шукар предлогија ко додаток „Родителите прашуваат“ ко крајо таро лил Младите прашуваат — делотворни одговори, том 1. Адари пишинела кај о родителија на ваљани одма те мислинен кај ленгере чхаве отфрлинѓе о чачипе, него ваљани те дикхен сој тано чаче о проблеми. Шај иси лен притисок таро врсникија, или палем осетинена пе коркори. Шај мислинена кај о јавера терне керена повише ки служба лендар. Ко додаток тано објаснимо кај асавке проблемија на ваљани те значинен кај о чхаве на прифатинена тумари религија. Адала буќа овена соске обично иси лен јавера проблемија коленцар со мора те боринен пе. Пало адава, о додаток дела несаве предлогија сар шај о родителија те поможинен пумаре чхавенге со сумнинена пе ко чачипе.

19. Сар шај о родителија те поможинен пумаре чхавенге те овен гоѓавер те шај те спасинен пе?

¹⁹ Сар родители, иси тут бари одговорност хем чест те де опомене тле чхавенге хем те воспитине лен аѓаар сар со вакерела о Јехова (Еф. 6:4). Сар со дикхлем, акава шај те кере ле аѓаар со ка сикаве тле чхавен башо адава со вакерела и Библија хем ка поможине ленге те овен увериме ко адава со сикљовена. Кеда ленгири вера ка овел зорали, ка овен охрабриме те ден лафи е Јеховаске кај ка служинен леске цело вилеа. Е Девлескоро Лафи, о свети дух хем адава ту со кереа нека поможинел тле чхавенге те овен гоѓавер те шај те спасинен пе.