Баши акаја бути, о брачна партнерија ваљани те анен одлука колаја со ка овел лен чисто совест. Адалеске, ола ваљани шукар те информиринен пе сар функциониринела акаја контрацепција хем те размислинен башо библиска начелија.

О Јехова денѓа заповед е Адамеске хем е Еваке, а пало адава е Ноеске хем лескере фамилијаке: „Те овел тумен пхердо чхаве хем те овен бут џене“ (1. Мој. 1:28; 9:1). Ки Библија на пишинела кај о христијања ваљани те икерен акаја заповед. Адалеске, јекх брачно пари ваљани те одлучинел дали ка користинел несави контрацепција кеда планиринела дали, кеда хем кобор чхаве ка овел лен. Ама, кеда керена адава, башо кола буќа ваљани те размислинен?

Кеда размислинена сар те контролиринен о бијанибе, о христијања ваљани те лен ко предвид о библиска начелија. Адалеске, ола на прифатинена о абортус сар начин те контролиринен о бијанибе. О намерно абортус чхинавела о кхамнипе, кова со анела те бијанѓовел јекх бебе. Тари Библија џанаја кај о живото тано скапоцено хем ваљани те ценина ле. О абортус тано спротивно таро адава со вакерела и Библија (2. Мој. 20:13; 21:22, 23; Пс. 139:16; Ерем. 1:5). А сар ваљани те дикха ко користибе спирала?

Баши акаја тема пишинела сине ки Стражарско кула таро 15 мај 1979 берш, ки 30-31 страна, ки англиско чхиб. * (Дикх и фуснота.) Повише спирале со користинена пе сине ко адава време сине пластична хем чхивена пе сине ки матка те шај те чхинавел пе о кхамнипе. Ки статија пишинела сине кај нане баш јасно сар функциониринена сине акала спирале. Бут научникија мислинена сине кај и спирала чхинавела о сперматозоидија те ресен џи ки јајце-клетка е џувљакири хем те оплодинен ла. Ако и јајце-клетка нане оплодими, на почминела нево живото.

Ама, сине доказија кај понекогаш шај сине те оплодинел пе и јајце-клетка. И оплодими јајце клетка шај те бајрол ко јајцевод (вонматерично кхамнипе) или те путујнел џи ки матка. Ако ресела џи ки матка, и спирала шај те чхинавел и оплодими јајце-клетка те ачховел ко ѕидо е маткакоро хем аѓаар о кхамнипе чхинавела пе. Акава би овела сине сар абортус. И статија завршинела е лафенцар: „О христијања со нане сигурна дали шај те користинен спирала сар контрацепција ваљани сериозно те размислинен башо акала информацие хем те на бистрен о библиско начело баши адава кај о живото тано свето“ (Пс. 36:9).

Ама, таро 1979 берш, кеда иклили акаја статија, и медицина хем и наука бут напредујнѓа.

Акана иси јавера дуј врсте спирале. Јекх врста иси ла бакари хем џи ко 1988 берш ули бут раширими ки цело Америка. Јавер врста спирала, која со мукхела хормони, почминѓа те бикинел пе ко 2001 берш. Сар функциониринена акала дуј врсте спирале?

Бакарно спирала: Сар со вакерѓем, и спирала чхинавела о сперматозоидија те накхен тари матка те шај те ресен џи ки јајце-клетка. Освен акава, адалеске со и спирала мукхела бакари, кова сој отровно башо сперматозоидија, ла иси ла улога сар спермицид. * (Дикх и фуснота.) Исто аѓаар, акаја спирала керела промена ки слузница, или ки андруни обвивка тари матка.

Хормонско спирала: Акаја врста спирала мукхела хормони ки матка кова сој тано слично сар окова со иси ко контрацептивна хапија.  Ко несаве џувља, акаја спирала чхинавела и овулација, или те ослободинел пе јајце-клетка. Џанѓола пе, ако на ослободинела пе јајце-клетка, нашти те авел џи ко оплодување. Акаја спирала исто аѓаар, керела те овел посани и андруни обвивка тари матка. * (Дикх и фуснота.) Освен адава, керела те овел погусто и течност со овела ко крло е маткакоро, хем аѓаар чхинавела о сперматозоидија те накхен тари вагина ки матка.

Сар со вакерѓем англедер, веројатно солдуј врсте спирале керена те овел промена ки слузница е маткакири. Адава значинела кај, ако јекхе џувља иси ла овулација хем и јајце-клетка тани оплодими, ој шај те кхувел ки матка, ама нашти те ачховел ки лате адалеске со иси промене ки андруни обвивка тари матка. Адава ка чхинавел о кхамнипе панда ко почеток. Ама, о научникија верујнена кај акава случинела пе ретко, исто сар со шај те случинел пе понекогаш е контрацептивна хапенцар.

Адалеске, никој нашти те овел сигурно хем те вакерел кај ако користинела пе бакарно или хормонско спирала никогаш нашти те авел џи ко адава те оплодинел пе јекх јајце-клетка. Ама, о истражувања сикавена кај акала спирале чхинавена те оплодинел пе и јајце-клетка, адалеске ретко случинела пе јекх џувли те ачховел кхамни.

О брачна парија кола со мангена те користинен спирала ваљани те керен лафи доктореа. Ов шај те вакерел ленге кола спирале иси ко тхан коте со живинена хем кола предностија хем ризикија иси е ромњаке. О брачно пари на ваљани те аџикерел или те мукхел некој јавер, па чак ни о доктори те анел одлука наместо ленде (Рим. 14:12; Гал. 6:4, 5). Адаја тани лично одлука која со о ром хем и ромни ваљани те анен ла заедно. Ленгири цел ваљани те овел те шунен е Девле хем те овел лен чисто совест. (Споредин 1. Тимотеј 1:18, 19; 2. Тимотеј 1:3.)