И ДАЈАНА иси ла повише таро 80 берш, хем ко последна некобор берша сине ла бут пхаре моментија. Лакоро ром, кова со сине насвало таро Алцхајмер хем сине ко доми башо пхуре мануша, муло. Исто аѓаар, муле лакере дуј чхаве, а лате сине ла рако ки чучи. Кеда о пхраља хем о пхења дикхена е Дајана ко состанокија хем ки служба, ој тани секогаш бахтали иако сине ла пхаре ситуацие ко живото.

О Џон сине патувачко надгледнико повише таро 43 берш хем бут мангела сине адаја служба. Нашти сине те замислинел песке те керел нешто јавер. Ама, мора сине те чхинавел акале службаја соске ваљани сине те грижинел пе некаске тари пли фамилија со сине насвало. Кеда дикхена е Џоне ко конгресија о пхраља хем о пхења со пенџарена ле, приметинена кај ов на променинѓа пе. Ов панда тано бут бахтало.

Сар шај и Дајана хем о Џон те овен бахтале ко асавке околностија? Сар шај некој со иси ле бут пхарипа те овел бахтало? Сар шај јекх мануш те овел бахтало иако мора те чхинавел несави теократско задача која со мангела ла бут? И Библија дела амен о одговор. Ки лате пишинела: „О праведно мануш ка аракхел бахталипе ко Јехова“ (Пс. 64:10). Акава шај пошукар те хаљова ако џанаја со анела аменге привремено, а со трајно бахталипе.

Несаве буќа скоро секогаш керена амен бахтале. На пример, замислин туке кобор тане бахтале дуј терне сој тане заљубиме хем панда хари ка кхувен ко брако. Или замислин туке кобор тано некој бахтало кеда овела родители или кеда некој добинела неви задача ки служба е Јеховаске? Са акала буќа керена амен бахтале соске тане поклонија таро Јехова. Ов керѓа о брако, денѓа амен способност те овен амен чхаве хем дела амен задаче ки пли организација (1. Мој. 2:18, 22; Пс. 127:3; 1. Тим. 3:1).

Ама, несаве буќа шај те анен привремено бахталипе. Жално тано адава со јекх таро брачна партнерија шај те керел прељуба или те мерел (Езек. 24:18; Оси. 3:1). Несаве чхаве шај те на шунен пумаре родителен хем е Девле, па чак те овен исклучиме. На пример, о чхаве е Самоилескере на служинѓе е Јеховаске ко исправно начин. О Давид сине ле бут  проблемија ки фамилија соске керѓа прељуба е Витсавеаја (1. Сам. 8:1-3; 2. Сам. 12:11). Кеда овена акала буќа, ола на анена бахталипе, него бари жал хем дукх.

Слично ко адава, понекогаш несаве пхраља хем пхења мора сине те чхинавен несаве теократско задачаја адалеске со сине лен проблемија састипаја, сине лен обврске ки фамилија или сине промене ки организација. Бут џене лендар пхенена кај фалинела ленге о бахталипе со анела ленге сине адаја задача.

Акава јасно сикавела кај о бахталипе со анена акала буќа шај те овел привремено. Спрема адава, дали нешто шај те анел аменге бахталипе кова со трајнела чак кеда иси амен пхаре моментија ко живото? Сигурно иси, адалеске со о Самоил, о Давид хем о јавера на нашавѓе пло бахталипе чак кеда сине лен баре проблемија.

О Исус џанела сине сој чачутно бахталипе. И Библија вакерела кај англедер те авел ки Пхув, ов сине бахтало „англо [Јехова] цело време“ (Изр. 8:30). Ама, откеда ало ки Пхув, понекогаш сине ле пхарипа. Сепак, о Исус сине бахтало кеда керела сине пле Дадескири волја (Јован 4:34). А со уло леа некобор саатија англедер те мерел кеда сине ле баре дукха? Ко Евреите 12:2 пишинела: „Башо бахталипе со сине англи лесте, трпинѓа муке ко стубо“. Значи, таро Исус шај те сикљова бут башо чачутно бахталипе. Акана ка дикха дуј буќа.

Јекх пути, о Исус бичхалѓа 70 ученикија те проповединен. Кеда иранѓе пе ки лесте, ола сине бахтале соске керена сине чудија, чак палдена сине демонен. Ама, о Исус вакерѓа ленге: „Ма овен бахтале адалеске со о лошна духија шунена тумен, него овен бахтале со тумаре анава тане пишиме ко небо“ (Лука 10:1-9, 17, 20). Чаче, о шукар амалипе е Јеховаја тано бут поважно хем анела аменге бут побаро бахталипе тари било која задача со шај те кера ла ки е Јеховаскири организација.

Ки јавер прилика, о Исус керѓа лафи англо бут народо. Тегани јекх Еврејка сине добором воодушевими таро адава сар сикавела сине е народо со вакерѓа кај сигурно и дај лескири тани бут бахтали со иси ла асавко чхаво. Ама о Исус вакерѓа лаке: „На, него бахтале тане окола со шунена е Девлескоро лафи хем икерена  ле!“ (Лука 11:27, 28). Кеда о родителија иси лен причина те дичинен пе пумаре чхавенцар, адава керела лен бахтале. Сепак, адава со анела аменге трајно бахталипе тани и послушност спрема о Јехова хем о паше амалипе леа.

Чаче, баро бахталипе дела аменге о чувство кај о Јехова тано задоволно амендар. Чак о искушенија, кола сој тане пхаре, нашти те лен амендар адава чувство. Уствари, кеда ачховаја верна ко искушенија, амаро бахталипе панда повише бајрола (Рим. 5:3-5). Исто аѓаар, о Јехова дела пло свети дух околенге со иси лен доверба ки лесте, а о бахталипе тано јекх таро особине со авена таро адава духо (Гал. 5:22). Адава поможинела аменге те хаљова соске ко Псалм 64:10 пишинела: „О праведно мануш ка аракхел бахталипе ко Јехова“.

Акава исто аѓаар објаснинела соске и Дајана хем о Џон со спомнинѓем лен англедер, шај сине те ачховен бахтале иако сине лен пхаре ситуацие. И Дајана вакерела: „О Јехова сине манге тхан гарајбаске, исто сар јекх чхаво со родела заштита ко пло родители“. Ој вакерела: „Осетинава кај ов дела ман берекетија аѓаар со дела ман сила редовно те проповединав хем те овав бахтали џикоте керава адава“. Со поможинѓа е Џонеске те овел бахтало хем зафатимо ки служба откеда мора сине те чхинавел пле задачаја? Ов вакерела: „Таро 1998 берш кеда почминѓум те служинав сар инструктори ки Школа башо организациско оспособување, почминѓум бут похор те проучинав и Библија“. Ов објаснинела кај акаја промена ов хем лескири ромни прифатинѓе ла полокхе соске ола секогаш сине спремна те керен о задаче со о Јехова дела лен сине. Исто аѓаар вакерѓа: „Керѓем адава бизо те жалина“.

Бут јавера осетинѓе кај адава со пишинела ко Псалм 64:10 тано чаче. На пример, размислин башо јекх брачно пари со служинѓа ко Бетел ко САД повише таро 30 берш. Ола добинѓе неви задача те служинен сар специјална пионерија. Ола вакерена: „Кеда нашавеа нешто со мангеа тегани природно тано те овел туке жал“. Ама, исто аѓаар вакерена: „Нашти те жалине засекогаш“. Откеда ресле ко нево собрание, ола одма почминѓе те проповединен е објавителенцар таро адава собрание. Акава брачно пари вакерела: „Амен молинѓем амен башо несаве конкретна буќа. Кеда дикхаја сине сар о Јехова одговоринела сине ко амаре молитве адава охрабринела амен сине хем керела сине амен бахтале. Кратко откеда реслем, несаве ко собрание почминѓе те служинен сар пионерија. Исто аѓаар, почминѓем дуј библиска курсија со напредујнена шукар“.

Џанѓола пе, нане секогаш локхо те ове бахтало. Ка овен амен диве кеда ка ова тажна. Ама о Јехова уверинела амен е лафенцар сој пишиме ко Псалм 64:10. Чак кеда осетинаја амен обесхрабриме, амен шај те ова сигурна кај ако ачховаја верна бизи разлика со доживинаја, амен ка аракха „бахталипе ко Јехова“. Амен шај те размислина башо време кеда е Јеховаскоро ветување башо „нево небо хем неви пхув“ ка исполнинел пе. Тегани секој ка овел совршено хем „ка овел бахтало засекогаш“ башо са адава со ка керел о Јехова (Иса. 65:17, 18).

Замислин туке со шај те значинел акава. Амен ка овел амен совршено састипе хем секова диве сабајле ка ушта пхерде силаја. Бизи разлика саве буќа поангле керена амен сине тажна, нане те анен аменге повише дукх. О Јехова уверинела амен кај нане те авел аменге ки годи адава со сине англедер. Ка аџикера амаре манглен со муле кеда ка воскреснинен хем ка ова бут бахтале сар о родителија е чхајакере со сине ла 12 берш кола со воскреснинѓа ла о Исус (Марко 5:42). Конечно, секој ки Пхув ка овел праведно хем ка аракхел бахталипе ко Јехова засекогаш.