Дали шај те одговорине ко акала пучиба кола со темелинена пе ко информацие тари Стражарско кула башо 2019?

Со значинела е Јеховаскоро ветување: „Нисаво оружје сој кердо против туте нане те успејнел“? (Иса. 54:17).

Шај те овел амен доверба кај о Јехова ка заштитинел амен таро нападија е душманенгере, кола сој сар „бура со кхувела ко ѕидо“ (Иса. 25:4, 5). Амаре душмања никогаш нане те успејнен те керен аменге трајно штета (w19.01, 6-7 стр.).

Сар дикхјола е Девлескири правда таро начин сар постапинѓа е Ханаанцонцар хем е Израелцонцар кола со на сине послушна?

О Јехова казнинѓа околен со учествујнена сине ко одвратна сексуална ритуалија хем со сине лошна е џувленцар хем е чхавенцар. А дела сине берекетија околенге со сине леске послушна хем со постапинена сине праведно јекх јекхеа (w19.02, 22-23 стр.).

Со те кера ако аракхљоваја ки ситуација те молинел пе некој со нане вернико?

Ако аракхљоваја ки асавки ситуација, шај те одлучина те ќутина хем те сикава поштовање е јаверенге. Нане те вакера „амин“ хем нане те вазда амаре васта. Шај ка одлучина те молина амен ки аменде (w19.03, 31 стр.).

Кобор тано сериозно о злоупотребибе чхавен?

О злоупотребибе чхавен тано сериозно грево кова со анела последице е жртваке хем лаџ е собраниеске хем колеа со пхаѓела пе о закони е државакоро. Сој најлошно, адава тано грево против о Девел. Кеда о законија е државакере родена таро мануша те пријавинен ко властија секова обвинение баши злоупотреба чхавен, о старешине поштујнена асавке законија (w19.05, 9-10 стр.).

Сар те менине тло начин сар размислинеа?

Ваљани те кере некобор буќа: Молин тут, хор размислин хем бирин шукар амала (w19.06, 11 стр.).

Сар шај панда акана те спремина амен башо прогонство?

Ваљани те кере позорало тло амалипе е Јеховаја. Ов уверимо кај о Јехова мангела тут хем кај никогаш нане те мукхел тут. Читин и Библија секова диве хем молин тут редовно. Ов уверимо кај е Девлескоро Царство чаче ка анел о берекетија со ветинѓа лен. Сикљов ки годи тле омилена стихија хем о теократска гиља (w19.07, 2-4 стр.).

Сар шај те поможина амаре фамилијаке те спасинел пе?

Ваљани те сикава кај хаљоваја сар осетинела пе, те да шукар сведоштво амаре понашибаја хем те ова стрплива хем тактична (w19.08, 15-17 стр.).

Спрема о ветување е Исусескоро таро Матеј 11:28, сар добинаја сила?

Иси амен о најшукар надгледникија, о најшукар амала хем и најшукар задача (w19.09, 23 стр.).

Сар шај о Јехова те дел амен и желба хем и сила те служина леске? (Фил. 2:13)

Џикоте читинаја е Девлескоро Лафи хем размислинаја баши лесте, о Девел ка дел амен желба те кера лескири волја хем сила те служина леске. О свети дух шај те поможинел аменге те развина о способностија со више иси амен (w19.10, 21 стр.).

Кола буќа ваљани те кера англедер те ана несави важно одлука?

Акала панџ буќа: темелно те истражина, те молина амен баши мудрост, те испитина амаре мотивија, те чхива аменге конкретна целија хем те ова реална (w19.11, 27-29 стр.).

Дали о верување кај и душа на мерела авела таро адава со о Сатана вакерѓа е Еваке?

Изгледа кај на. О Сатана на вакерѓа е Еваке кај ка мерел само лакоро тело, него кај ој ка мерел. Нијекх ховавно религиозно сикљојбе на ачхило пало Потоп. О верување кај и душа на мерела веројатно појавинѓа пе англедер о Девел те менинел о чхибја е манушенгере со градинена сине и Вавилонско кула (w19.12, 15 стр.).