О извештај тари 5. Мојсеева 22:25-27 на сине пишимо првенствено те докажинел пе дали о мурш тано криво, соске спрема о Закони ов више сине криво. Акава закони сине дендо те дикхел пе дали и џувли тани криво. Те дикха о контекст.

Ко англуне стихија керела пе лафи башо јекх мануш со сине ле сексуална односија јекхе вериме џувљаја „ки диз“. Адалеа о мануш сине криво баши прељуба соске ки верими џувли дикхела пе сине сар те пхене тани ко брако. А дали ој сине криво баши прељуба? И џувли „на викинѓа ки диз“. Те викинел сине, о јавера сигурно ка шунен ла хем ка бранинен ла. Ама, ој на викинѓа. Адава значинела кај ој да сине учеснико ки прељуба, хем адалеске о солдуј сине крива (5. Мој. 22:23, 24).

Пало адава, ко Закони сине вакерди јавер ситуација: „Ама, ако несаво мануш аракхела ки нива вериме џувља, па астарела ла хем пашљовела лаја, нека овел мудардо само адава мануш со пашлило лаја, а е џувљаке ма кер ништо. И џувли на керѓа грево со заслужинела мерибе, соске адава тано исто сар кеда некој нападинела пле пашутне хем мударела ле. Соске, ов аракхља ла ки нива. И верими џувли викинѓа, ама на сине кој те спасинел ла“ (5. Мој. 22:25-27).

Ко акава случај, о судие верујнена сине е џувљаке. Соске? Претпоставинела пе сине кај ој „викинѓа, ама на сине кој те спасинел ла“. Значи ој на керѓа прељуба. А о мануш сине криво башо силујбе хем баши прељуба соске астарѓа е вериме џувља хем „пашлило лаја“.

Спрема адава, адалеске со и цел акале Законескири сине те докажинел кај и џувли нане криво, башо мурш јасно вакерела пе кај тано криво башо силујбе хем баши прељуба. Шај те ова сигурна кај о судие темелно истражинена сине асавке случаија хем кај анена сине одлуке спрема о јасна упатствија кола со о Девел бут пути повторинела лен сине ленге (5. Мој. 13:14; 17:4; 2. Мој. 20:14).