ДАЛИ мислинеа кај сиан благодарно мануш? Шукар тано секова јекх амендар те размислинел башо акава пучибе. И Библија пророкујнѓа кај ко амаро време бут мануша „нане те овен благодарна“ (2. Тим. 3:2). Веројатно пенџареа манушен кола со мислинена кај о јавера тане должна те керен нешто ленге или те ден лен нешто. Шај адалеске мислинена кај на ваљани те овен благодарна башо адава со добинена. Веројатно нане те манге те ове узо асавке мануша.

Тари јавер страна, е Јеховаскере слугенге тано вакердо: „Овен благодарна!“. Исто аѓаар, ки Библија пишинела: „Овен благодарна башо са“ (Кол. 3:15; 1. Сол. 5:18). Уствари, ако сием благодарна, адава ка користинел аменге да. Соске вакераја акава? Те дикха некобор причине.

Јекх важно причина соске ваљани секогаш те ова благодарна тани адаја со аѓаар ка дикха позитивно ки аменде. Мануш кова со заблагодаринела пе е јаверенге веројатно иси ле шукар мислење песке. Ама, окова да со приминела и благодарност осетинела пе шукар. Соске и благодарност керела саринен бахтале? Те дикха јекх пример: Кеда ка шуне кај о јавера мангена те керен нешто баши туте, на значинела ли адава кај врединеа англо ленгере јакхја? Ола мангена тут хем грижинена пе туке. Кеда ка хаљове адава, тегани ка дикхе ки туте панда попозитивно. Шај те ова сигурна кај исто аѓаар осетинѓа пе хем и Рут. О Вооз сине дарежливо спрема лате. Сигурно и Рут сине бут бахтали кеда дикхља кај некој грижинела пе лаке (Рут 2:10-13).

Некој со посебно заслужинела те ова леске благодарна тано о Девел. Сигурно понекогаш размислинеа башо бут духовна хем материјална поклонија со денѓа амен хем кола со понадари да дела амен (5. Мој. 8:17, 18; Дела 14:17). Ама шукар тано те одвојне повише време те шај хор те размислине баши е Девлескири дарежливост хем башо са о шукарипе со сикавела туке хем тле пашутненге. Адава панда повише ка бајрарел тли благодарност спрема о Јехова хем ка ове панда поуверимо кај ов мангела тут хем ценинела тут (1. Јов. 4:9).

Ама освен со ка размислине баши е Јеховаскири дарежливост хем башо берекетија кола со дела лен туке, шукар тано исто аѓаар те сикаве леске кај сиан благодарно (Пс. 100:4, 5). Кеда заблагодаринаја амен е јаверенге, адава керела амен бахтале.

Јавер причина соске тани корисно и благодарност тани адаја со о амалипе овела позорало. Секова јекх амендар иси ле потреба те џанел кај тано ценимо. Кеда заблагодаринаја амен некаске искрено, оваја попаше амала (Рим. 16:3, 4). Освен адава, окола сој благодарна обично тане спремна те поможинен е јаверенге. Ола приметинена кеда о јавера ка керен ленге шукарипе хем адава поттикнинела лен ола да те керен шукарипе е јаверенге. Хем кеда поможинаја е јаверенге тегани сием бахтале. Баш адава вакерѓа о Исус: „Повише иси бахталипе кеда дела пе него кеда лела пе“ (Дела 20:35).

О Роберт Емонс, професори ко јекх Универзитети ки Калифорнија, вакерѓа: „Те шај те ова благодарна, ваљани те хаљова кај зависинаја јекх јекхестар. Понекогаш амен даја нешто е јаверенге, а понекогаш амен добинаја нешто таро јавера“. Факти тано кај амаро живото хем бахталипе ко бут начинија зависинела таро јавера. На пример, шај дена амен хајбаске или поможинена амен кеда сием насвале (1. Кор. 12:21). Окова сој благодарно дикхела хем ценинела адава со керена о јавера баши лесте. Ако иси тут акава ки годи, дали иси тут навика те заблагодарине тут е јаверенге башо адава со керена туке?

Панда јекх причина соске тано шукар те ова благодарна тани адаја со и благодарност поможинела аменге те мислина ко позитивна наместо ко негативна буќа. Ки несави смисла, амари годи тани сар филтери — дозволинела аменге те концентририна амен ко одредена аспектија тари амари околина, а блокиринела о јавера. Ако сием благодарна повише ка мислина ко позитивна буќа, а похари ко проблемија. Кобор поблагодарна сием, добором посвесна ка ова башо шукар буќа околу аменде. А адава панда повише ка бајрарел амари благодарност. Ако концентриринаја амен ко буќа башо кола со шај те ова благодарна, тегани ка шај те кера адава со вакерѓа о апостол Павле: „Секогаш овен бахтале ко Господари“ (Фил. 4:4).

Адава со сиан благодарно поможинела туке те на размислине негативно. Бут тано пхаро те ове благодарно, а ко исто време те ове љубоморно, тажно или хољамо. Исто аѓаар, о благодарна мануша обично нане преокупириме материјална буќенцар. Ола тане задоволна адалеа со иси лен хем на оптоваринена пе е желбаја те овел лен повише (Фил. 4:12).

Сар слуге е Девлескере, џанаја кај о Сатана мангела те ова тажна хем обесхрабриме таро проблемија кола со иси амен ко акала последна диве. Ов ка овел бахтало ако сием негативна хем ако секогаш жалинаја амен башо нешто. Ако иси амен асавко стави, тегани ка кера те овел пхаро е манушенге те прифатинен о шукар хабери. Уствари, и благодарност тани поврзими е особиненцар кола со авена таро е Девлескоро свети дух. На пример, амен сием благодарна, полокхе ка ова бахтале. А адава бахталипе авела кеда дикхаја о шукар буќа со денѓа амен о Девел хем тари вера со иси амен ко е Девлескере ветувања (Гал. 5:22, 23).

Адалеске со сиан дело таро е Јеховаскоро народо, веројатно ка сложине тут адалеа со сине вакердо баши благодарност ки акаја статија. Сепак, свесно сиан кај нане секогаш локхо те ове благодарно хем позитивно. Ама, ма мукх адава те обесхрабринел тут. Ту шај те сикљове те ове панда поблагодарно. Сар? Секова диве одвојн време те размислине башо несаве буќа таро тло живото коленге со шај те ове благодарно. Со повише кереа адава, добором полокхе ка овел туке те осетине хем те сикаве благодарност. Адава ка поможинел туке те ове побахтало околендар со концентриринена пе само ко проблемија е животоскере. Размислин башо шукар буќа со керела лен туке о Девел хем о јавера — буќа со охрабринена тут хем керена тут бахтало. Шај те почмине чак те пишине туке дневнико. Ки лесте шај те пишине дуј или трин буќа башо кола сиан благодарно секова диве.

Несаве научникија откринѓе кај, кеда редовно заблагодаринаја амен е јаверенге, адава шај те менинел о начин сар функциониринела амари годи, јавере лафенцар ка овел аменге полокхе те дикха позитивно ко живото. О благодарна мануша тане бахтале мануша. Адалеске размислин башо тле берекетија, уживин ко шукар буќа со случинена пе туке хем секогаш ов благодарно! Ма дикх ко шукар буќа со иси тут ко живото сар нешто сој нормално те овен тут соске и Библија поттикнинела амен: „Благодаринен е Јеховаске, соске ов тано шукар“ хем „овен благодарна башо са“ (1. Лет. 16:34; 1. Сол. 5:18).