Ако акава тано точно, размислин сар ка влијајнел адава ко амаро живото. На пример, јекхе пхралескоро чхаво мударѓа пе. Е пхралеске сине бут пхаро. Пучела пе сине дали о Јехова англедер дикхља кај ов хем лескири ромни шај те издржинен акаја трагедија. Авдиве, буте џененге шај те случинен пе трагедије. Ваљани ли те верујна кај е Јехова иси ле контрола упро са со случинела пе аменге ко живото?

Џикоте читинаја о лафија сој пишиме ко 1. Коринќаните 10:13, дикхаја кај и Библија на дела амен причина те верујна кај о Јехова англедер дикхела со шај те издржина хем спрема адава биринела кола искушенија ка овен амен. Те дикха штар причине соске пхенаја аѓаар.

Прво, о Јехова денѓа е манушен слободно волја, или право коркори те биринен. Ов мангела амен коркори те ана одлуке (5. Мој. 30:19, 20; Ис. Нав. 24:15). Кеда анаја одлуке коленцар со радујнаја е Јехова, шај те овел амен доверба кај ов ка водинел амен (Изр. 16:9). Ама, кеда анаја лошна одлуке, мора те соочина амен е последиценцар (Гал. 6:7). Ако о Јехова биринела саве искушенија ка овен амен, дали тегани шај те вакерел пе кај иси амен слободно волја?

Дујто, о Јехова на заштитинела амен таро непредвидена настанија (Проп. 9:11). Некој шај те доживинел несреќа само адалеске со аракхлило ко погрешно тхан хем ко погрешно време. На пример, о Исус вакерѓа баши јекх трагедија колате со муле 18 мануша кеда јекх кула пели упри ленде. Ов јасно вакерѓа кај о Девел на керѓа ола те мерен (Лука 13:1-5). Спрема акава, нане разумно те верујна кај англедер те овел несави трагедија, о Јехова биринела кој ка мерел, а кој на.

Трито, секој амендар шај те ачхол верно е Јеховаске. О Сатана вакерѓа кај е Јеховаскере слуге служинена леске таро себична мотивија хем кај нане те ачховен леске верна ако иси лен неволје (Јов 1:9-11; 2:4; Отк. 12:10). Ако о Јехова заштитинела амен тари несави неволја адалеске со мислинела кај нашти те издржина ла, нане ли те изглединел кај е Сатана иси ле право?

Штарто, о Јехова на користинела секогаш пли способност те дикхел англедер са со ка овел аменцар. Ако мангела о Јехова шај англедер те џанел со ка овел аменцар (Иса. 46:10). Ама, и Библија сикавела кај о Јехова на користинела секогаш пли способност те џанел англедер са со ка овел (1. Мој. 18:20, 21; 22:12). О Јехова мангела амен хем тано праведно, адалеске мукхела амен те користина амари слободно волја те шај коркори анаја одлуке (5. Мој. 32:4; 2. Кор. 3:17).

Тегани со мислинѓа о Павле кеда вакерѓа кај о Јехова нане те мукхел те ова искушиме повише таро адава со шај те издржина? Акате о Павле мангља те вакерел со керела о Јехова џикоте иси амен искушенија, а на англедер о искушенија. * (Дикх и фуснота.) Ако иси амен доверба ко Јехова, ов ка поможинел амен те икљова ко крајо секоле искушениеа (Пс. 55:22). Ка дикха дуј причине соске о Павле шај сине те вакерел акава.

И прво причина тани кај о неволје со иси амен, иси е јавере манушен да. Са џикоте живинаја ко свето е Сатанаскоро, ка овен амен пхаре ситуацие, чак шај хем трагедије. Ама, ако иси амен доверба ко Јехова, ка шај те издржина о неволје хем те ачхова леске верна (1. Пет. 5:8, 9). Ко 10 поглавје таро 1. Коринќаните, о Павле пишинѓа башо несаве искушенија со сине е Израелцон ки пустина (1. Кор. 10:6-11). Окола  со сине лен доверба ко Јехова шај сине те издржинен о искушенија. Ама, несаве Израелција на сине послушна е Јеховаске. Ола на ачхиле леске верна адалеске со на сине лен доверба ки лесте.

И дујто причина тани кај „о Девел тано верно“. Со значинела акава? Кеда читинаја сар о Јехова грижинела пе сине цело време пле слугенге, дикхаја кај ов верно поможинела сине „адаленге со мангена ле хем икерена лескере заповедија“ (5. Мој. 7:9). И Библија сикавела кај о Јехова са со ветинела, адава исполнинела (Ис. Нав. 23:14). Шај те ова сигурна кај 1) о Јехова нане те мукхел нијекх искушение те овел добором пхаро со нашти те издржина ле хем 2) ов ка поможинел амен.

Сар о Јехова ка поможинел адален со иси лен доверба ки лесте? Точно и адава кај ов шај те цидел о неволје. Ама, те сетина амен ко лафија е Павлескере кај о Јехова ка поможинел амен аѓаар со ка дел амен сила те издржина о искушенија. Бут пути, о Јехова поможинела амен адалеа со керела амен позорале те шај те ачхова верна. Те дикха несаве начинија сар керела адава.

• О Јехова „дела амен утеха ки секоја амари неволја“ (2. Кор. 1:3, 4). Ов шај те дел амен мир ко вило преку пло Лафи, преку о свети дух хем и духовно храна со дела амен о верно хем разборито робо (Мат. 24:45; Јован 14:16, фус.; Рим. 15:4).

• О Јехова шај те користинел пло духо те водинел амен (Јован 14:26). О свети дух шај те поможинел амен те сетина амен ко библиска извештаија хем начелија те шај те ана мудра одлуке.

• О Јехова шај те користинел е ангелен те поможинен амен (Евр. 1:14).

• О Јехова шај те користинел амаре пхрален те поможинел амен. Ола шај те ден амен сила пле лафенцар хем постапкенцар (Кол. 4:11).

Со сиклилем таро е Павлескере лафија пишиме ко 1. Коринќаните 10:13? О Јехова на одрединела англедер саве искушенија ка овен амен. Ама шај те ова увериме кај, ако иси амен доверба ко Јехова, ов ка поможинел амен те издржина секова искушение. Џанаја кај о Јехова ка поможинел амен ки секоја пхари ситуација те ачхова леске верна.