И откупнина — „совршено поклон“ таро амаро Дад
Секова шукар хем совршено поклон авела таро Дад (ЈАК. 1:17)
ГИЉА: 148, 109
1. Кола шукар буќа шај те овен амен преку и откупнина?
И ОТКУПНО жртва е Исусескири анела бут берекетија. На пример, ој пхравела о удар са е Адамескере чхавенге со мангена и праведност, јекх диве те овен дело тари е Девлескири фамилија. Преку и откупнина ка шај те живина вечно хем те ова бахтале. Исто аѓаар, ој тани поврзими буќенцар кола сој тане бут важна сариненге ко небо хем ки Пхув (Евр. 1:8, 9).
2. а) Кола важна буќа вакерѓа о Исус ки молитва? (Дикх и слика ко почеток тари статија.) б) Со ка дикха ки акаја статија?
2 Отприлика дуј берш англедер те мерел, о Исус сикавѓа пле ученикон те молинен пе: „Амаро Дад со сиан ко небо, те славинел пе тло свето анав. Те авел тло Царство. Те овел тли волја, сар ко небо аѓаар ки пхув“ (Мат. 6:9, 10). Те дикха сар и откупнина тани поврзими адалеа те славинел пе е Јеховаскоро свето анав, те владинел е Девлескоро Царство, хем те керел пе е Девлескири волја.
„ТЕ СЛАВИНЕЛ ПЕ ТЛО СВЕТО АНАВ“
3. Со претставинела е Јеховаскоро анав? Сар о Сатана каљарѓа е Јеховаскоро свето анав?
3 Ки молитва о Исус прво спомнинѓа те славинел пе е Девлескоро свето анав. Лескоро анав, Јехова, претставинела кој тано ов хем саво тано. Ов тано праведно хем иси ле најбари моќ ко цело универзум. Исто аѓаар, о Исус вакерѓа баши лесте кај тано „Свето Дад“ (Јован 17:11). Адалеске со о Јехова тано свето, са лескере постапке хем о законија со дела тане света. Ама, ки рајско градина о Сатана керѓа те изглединел кај е Девле нане ле право те дел законија е манушенге. Ов вакерѓа ховавне буќа башо Јехова, хем адалеа каљарѓа е Јеховаскоро свето анав (1. Мој. 3:1-5).
4. Со керела сине о Исус те шај те славинел е Девлескоро свето анав?
4 О Исус чаче мангела сине е Јеховаскоро анав хем денѓа са пестар те шај те славинел ле (Јован 17:25, 26). Пле постапкенцар хем е проповедибаја ов поможинѓа е јаверенге те хаљовен кај о законија е Јеховаскере тане праведна хем кај са со родела амендар тано башо амаро шукарипе. (Читин Псалм 40:8-10.) Ов ачхило верно е Девлеске чак кеда о Сатана керѓа бут те цидел муке хем те мерел баре дукхенцар. Аѓаар сикавѓа кај јекх совршено мануш шај те овел послушно ко са е Јеховаске.
5. Сар шај те славина е Јеховаскоро свето анав?
5 Сар шај амен да те сикава кај мангаја е Јеховаскоро анав? Амаре постапкенцар. О Јехова родела амендар те ова света. (Читин 1. Петрово 1:15, 16.) Акава значинела те служина само леске хем те ова леске послушна таро вило. Чак кеда сием прогониме даја са амендар те шај те живина аѓаар сар со сикавела амен о Јехова. Адалеа со икераја амен ко лескере законија, кераја те славинел пе лескоро анав (Мат. 5:14-16). Исто аѓаар, сикаваја кај е Јеховаскере законија тане шукар, а о Сатана тано ховавно. Тари јавер страна, амен на сием совршена хем адалеске грешинаја. Ама кеда грешинаја, искрено кајнаја амен хем трудинаја амен те на кера више о буќа со анена лаџ е Јеховаскере анавеске (Пс. 79:9).
6. Соске шај о Јехова те вакерел кај сием праведна иако сием несовршена?
6 Преку и откупнина о Јехова простинела о гревија адаленгере со сикавена вера. Сарине со дена лафи е Девлеске кај ка служинен леске овена лескере слуге. Башо помазаникија вакерела кај тане праведна хем прифатинела лен сар пле чхаве. А башо „јавера бакхре“ вакерела кај тане праведна хем прифатинела лен сар пле амала (Јован 10:16; Рим. 5:1, 2; Јак. 2:21-25). Адалеске, панда акана преку и откупнина шај те ова паше амаре Дадеа хем те славина лескоро свето анав.
„ТЕ АВЕЛ ТЛО ЦАРСТВО“
7. Кола берекетија шај те овен амен преку и откупнина?
7 Ки молитва о Исус вакерѓа: „Те авел тло Царство“. Сар и откупнина тани поврзими е Девлескере Царствоја? Ко акава Царство, или влада, ка овен о Исус хем 144.000 мануша бириме тари Пхув. Преку и откупнина акала мануша шај те овен воскресниме ко небо (Отк. 5:9, 10; 14:1). Ола ка овен царија хем свештеникија со ка владинен илјада берша заедно е Исусеа упри Пхув. Ко адава периоди, о Јехова преку акава Царство ка керел и Пхув рај хем ка поможинел са е манушенге те овен совршена. Е Јеховаскере слуге ко небо хем ки Пхув конечно ка овен јекх фамилија (Отк. 5:13; 20:6). О Исус ка уништинел е Сатана хем ка цидел са о проблемија со керѓа лен (1. Мој. 3:15).
8. а) Сар поможинѓа о Исус пле учениконге те хаљовен кобор тано важно е Девлескоро Царство? б) Сар сикаваја кај сием верна слуге е Царствоске?
8 О Исус поможинѓа пле учениконге те хаљовен кобор тано важно е Девлескоро Царство. Кеда крстинѓа пе, ов одма почминѓа сегде те проповединел „о шукар хабери башо е Девлескоро Царство“ (Лука 4:43). Исто аѓаар, ов вакерѓа пле учениконге кај ка овен леске сведокија џи „ко најдур тхана ки пхув“ (Дела 1:6-8). Авдиве, преку о проповедиба, о мануша ко цело свето шај те шунен баши откупнина хем те овен подложна е Царствоске. Сикаваја кај сием верна слуге е Царствоске аѓаар со поможинаја е помазаникон те проповединел пе о шукар хабери ко цело свето (Мат. 24:14; 25:40).
„ТЕ ОВЕЛ ТЛИ ВОЛЈА“
9. Соске шај те ова сигурна кај о Јехова ка исполнинел пли намера е манушенцар?
9 Со мислинѓа о Исус кеда вакерѓа: „Те овел тли волја“? Кеда о Јехова вакерела нешто кај ка овел, адава сигурно ка овел (Иса. 55:11). Адава со о Сатана противинѓа пе е Јеховаске нашти те чхинавел ле те исполнинел пли намера. Сави намера сине е Јехова е Пхувјаја? Ов мангља те пхерѓол цело Пхув совршено чхавенцар таро Адам хем тари Ева (1. Мој. 1:28). Те мерен сине англедер те овел лен чхаве, е Девлескири намера нане те исполнинел пе сине. Адалеске, о Јехова мукхља те овел лен чхаве. Преку и откупнина, о Јехова дела прилика саринен со сикавена вера те овен совршена хем те живинен вечно. О Јехова мангела е манушен хем мангела те добина о прекрасно живото кова со сине дело тари лескири намера.
10. Сар ка користинел и откупнина адаленге со муле?
10 Со ка овел са околе манушенцар кола со муле бизо те шунен башо Јехова? О Јехова мангела о мануша те живинен. Адалеске, ов ка иранел ко живото адален со муле. Преку и откупнина, ола ка шај палем те живинен. Тегани ка овел лен прилика те сикљовен башо Јехова хем те живинен вечно (Дела 24:15). Таро Јехова авела о живото. Кеда о Јехова дела живото некаске со муло, ов овела леске Дад (Пс. 36:9). Кеда о Исус сикавѓа пле ученикон сар те молинен пе, башо Јехова вакерѓа: „Амаро Дад со сиан ко небо“ (Мат. 6:9). О Јехова денѓа е Исусе бут важно улога кеда ка воскреснинен о муле. О Исус вакерѓа: „Ме сиум о воскресение хем о живото“ (Јован 6:40, 44; 11:25).
11. Сави намера иси е Девле башо „баро мноштво“?
11 О Исус исто аѓаар вакерѓа: „Секој со керела е Девлескири волја, ов манге пхрал, хем пхен хем дај“ (Мар. 3:35). О Девел мангела о мануша таро са о нацие, племија хем чхибја те овен лескере слуге. Ленге и Библија вакерела кај тане „баро мноштво“ кова со нијекх мануш нашти те гејнел ле. Адале манушен иси лен вера ки откупнина хем мангена те овен послушна е Девлеске. Ола фалинена ле хем вакерена: „О спасение авела таро амаро Девел, кова со бешела ко престол, хем таро Бакхро!“ (Отк. 7:9, 10).
12. Со сикљоваја баши е Јеховаскири намера е манушенцар тари е Исусескири молитва?
Иса 8:13). И откупнина, преку која со шај те ова спасиме, славинела е Јеховаскоро анав. Исто аѓаар, о анав е Исусескоро значинела „о Јехова тано спасение“. Дујто, преку пло Царство, о Јехова ка дел е послушна манушенге о берекетија тари откупнина. Хем трито, сигурна сием кај ништо нашти те чхинавел е Јехова те керел пли намера (Пс. 135:6; Иса. 46:9, 10).
12 Тари молитва е Исусескири сикљоваја бут башо Јехова хем баши лескири намера е манушенцар. Прво, ваљани те кера са со шај те славина е Јеховаскоро свето анав (СИКАВ ТЛИ БЛАГОДАРНОСТ БАШИ ОТКУПНИНА
13. Со сикаваја кеда крстинаја амен?
13 Јекх важно начин сар сикаваја амари благодарност баши откупнина тано адава со даја лафи е Јеховаске кај ка служина леске хем крстинаја амен. Аѓаар, сикаваја кај иси амен вера ки откупнина хем сикаваја кај живинаја е Јеховаске (Рим. 14:8). Кеда крстинаја амен, родаја таро Јехова те дел амен чисто совест (1. Пет. 3:21). О Јехова одговоринела аменге аѓаар со користинела и откупно жртва е Исусескири те чистинел амен. Сигурна сием кај ов ка дел амен са со ветинѓа (Рим. 8:32).
Сар сикаваја амари благодарност баши откупнина? (Дикх о пасусија 13-14)
14. Соске о Јехова денѓа заповед те манга е јаверен?
14 Са со керела о Јехова, керела таро мангипа. Ов мангела лескере слуге те овен сар лесте хем те манген пе јекх јекхеа (1. Јов. 4:8-11). Кеда мангаја е манушен, сикаваја кај мангаја те ова „чхаве амаре Дадескере сој ко небо“ (Мат. 5:43-48). И прво најбари заповед тани те манга е Јехова, а и дујто, те манга е јаверен (Мат. 22:37-40). Јекх начин сар сикаваја кај мангаја е манушен тано кеда проповединаја о шукар хабери башо е Девлескоро Царство. Ако шунаја е Јеховаскири заповед те манга е јаверен, посебно амаре пхрален, тегани сикаваја кај целосно мангаја ле (1. Јов. 4:12, 20).
И ОТКУПНИНА АНЕЛА БЕРЕКЕТИЈА ТАРО ЈЕХОВА
15. а) Саве берекетија акана добинаја таро Јехова? б) Саве берекетија ка добина ки иднина?
15 О Јехова простинела амаре гревија Дела 3:19-21.) Сар со дикхлем англедер, преку и откупнина о Јехова посвојнела несаве манушен тари Пхув те овен лескере чхаве ко небо. Адала тане о помазаникија (Рим. 8:15-17). О Јехова исто аѓаар канинела „о јавера бакхре“ те овен дело тари лескири фамилија ки Пхув. Кеда ка овен совршена, пало адава последно пути ка овен испитиме хем те ачхиле верна, о Јехова ленде да ка посвојнел те овен лескере чхаве (Рим. 8:20, 21; Отк. 20:7-9). О Јехова секогаш ка мангел са пле чхавен хем ола вечно ка добинен берекетија со авена тари откупнина (Евр. 9:12). Ов денѓа амен и откупнина хем акава скапоцено поклон никој нашти те лел ле амендар.
кеда сикаваја вера ки откупнина. Ки Библија ов уверинела амен кај шај целосно те косел амаре гревија. (Читин16. Таро со ослободинела амен и откупнина?
16 Ако кајнаја амен башо амаре гревија, тегани о Бенг нашти те чхинавел амен те ова дело тари е Јеховаскири фамилија. О Исус ало ки Пхув хем муло „јекх пути засекогаш“. Значи, и откупнина сине платими засекогаш (Евр. 9:24-26). О Адам анѓа аменге мерибе, ама е Исусескири жртва ка анел аменге вечно живото. И откупнина шај те ослободинел амен таро е Сатанаскоро свето хем тари дар таро мерибе (Евр. 2:14, 15).
17. Со мислинеа ту башо е Девлескоро мангипе?
17 Са со ветинела о Девел секогаш исполнинела пе. Исто сар со о законија ки природа на менинена пе, аѓаар о Јехова да на менинела пе. Ов никогаш нане те разочаринел амен (Мал. 3:6). О Јехова на дела амен само живото. Ов дела амен пло мангипе да. Ки Библија пишинела: „Пенџарѓем о мангипе со иси е Девле баши аменде хем верујнѓем ко лескоро мангипе. О Девел тано мангипе“ (1. Јов. 4:16). Е Девлескере лафија секогаш исполнинена пе. Панда хари, цело Пхув ка овел бут шужо рај хем секова мануш ка сикавел мангипе саво со сикавела о Јехова. Тегани са лескере слуге ко небо хем ки Пхув ка вакерен: „И фалба хем и слава хем и мудрост хем и благодарност хем и чест хем и моќ хем и сила тани амаре Девлескири ки цело вечност! Амин“ (Отк. 7:12).